(൧൦) ൧. പരൂപഹാരകഥാ

൩൦൭. അത്ഥി അരഹതോ അസുചി സുക്കവിസ്സട്ഠീതി? ആമന്താ. അത്ഥി അരഹതോ രാഗോ കാമരാഗോ കാമരാഗപരിയുട്ഠാനം കാമരാഗസംയോജനം കാമോഘോ കാമയോഗോ കാമച്ഛന്ദനീവരണന്തി? ന ഹേവം വത്തബ്ബേ…പേ….

നത്ഥി അരഹതോ രാഗോ കാമരാഗോ കാമരാഗപരിയുട്ഠാനം കാമരാഗസംയോജനം കാമോഘോ കാമയോഗോ കാമച്ഛന്ദനീവരണന്തി? ആമന്താ. ഹഞ്ചി നത്ഥി അരഹതോ രാഗോ കാമരാഗോ കാമരാഗപരിയുട്ഠാനം കാമരാഗസംയോജനം കാമോഘോ കാമയോഗോ കാമച്ഛന്ദനീവരണം, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.

അത്ഥി പുഥുജ്ജനസ്സ അസുചി സുക്കവിസ്സട്ഠി, അത്ഥി തസ്സ രാഗോ കാമരാഗോ കാമരാഗപരിയുട്ഠാനം കാമരാഗസംയോജനം കാമോഘോ കാമയോഗോ കാമച്ഛന്ദനീവരണന്തി? ആമന്താ. അത്ഥി അരഹതോ അസുചി സുക്കവിസ്സട്ഠി, അത്ഥി തസ്സ രാഗോ കാമരാഗോ കാമരാഗപരിയുട്ഠാനം…പേ… കാമച്ഛന്ദനീവരണന്തി? ന ഹേവം വത്തബ്ബേ…പേ….

അത്ഥി അരഹതോ അസുചി സുക്കവിസ്സട്ഠി, നത്ഥി തസ്സ രാഗോ കാമരാഗോ കാമരാഗപരിയുട്ഠാനം…പേ… കാമച്ഛന്ദനീവരണന്തി? ആമന്താ. അത്ഥി പുഥുജ്ജനസ്സ അസുചി സുക്കവിസ്സട്ഠി, നത്ഥി തസ്സ രാഗോ കാമരാഗോ കാമരാഗപരിയുട്ഠാനം…പേ… കാമച്ഛന്ദനീവരണന്തി? ന ഹേവം വത്തബ്ബേ…പേ….

അത്ഥി അരഹതോ അസുചി സുക്കവിസ്സട്ഠീതി? ആമന്താ. കേനട്ഠേനാതി? ഹന്ദ ഹി മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീതി.

മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീതി? ആമന്താ. അത്ഥി മാരകായികാനം ദേവതാനം അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

നത്ഥി മാരകായികാനം ദേവതാനം അസുചി സുക്കവിസ്സട്ഠീതി? ആമന്താ. ഹഞ്ചി നത്ഥി മാരകായികാനം ദേവതാനം അസുചി സുക്കവിസ്സട്ഠി, നോ ച വത രേ വത്തബ്ബേ – ‘‘മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീ’’തി.

മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീതി? ആമന്താ. മാരകായികാ ദേവതാ അത്തനോ അസുചിം സുക്കവിസ്സട്ഠിം ഉപസംഹരന്തി, അഞ്ഞേസം അസുചിം സുക്കവിസ്സട്ഠിം ഉപസംഹരന്തി, തസ്സ അസുചിം സുക്കവിസ്സട്ഠിം ഉപസംഹരന്തീതി? ന ഹേവം വത്തബ്ബേ…പേ….

മാരകായികാ ദേവതാ നേവ അത്തനോ ന അഞ്ഞേസം ന തസ്സ അസുചിം സുക്കവിസ്സട്ഠിം ഉപസംഹരന്തീതി? ആമന്താ. ഹഞ്ചി മാരകായികാ ദേവതാ നേവ അത്തനോ ന അഞ്ഞേസം ന തസ്സ അസുചിം സുക്കവിസ്സട്ഠിം ഉപസംഹരന്തി, നോ ച വത രേ വത്തബ്ബേ – ‘‘മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീ’’തി.

മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീതി? ആമന്താ. ലോമകൂപേഹി ഉപസംഹരന്തീതി? ന ഹേവം വത്തബ്ബേ…പേ….

൩൦൮. മാരകായികാ ദേവതാ അരഹതോ അസുചിം സുക്കവിസ്സട്ഠിം ഉപസംഹരന്തീതി? ആമന്താ. കിം കാരണാതി? ഹന്ദ ഹി വിമതിം ഗാഹയിസ്സാമാതി. അത്ഥി അരഹതോ വിമതീതി? ന ഹേവം വത്തബ്ബേ…പേ….

അത്ഥി അരഹതോ വിമതീതി? ആമന്താ. അത്ഥി അരഹതോ സത്ഥരി വിമതി, ധമ്മേ വിമതി, സങ്ഘേ വിമതി, സിക്ഖായ വിമതി, പുബ്ബന്തേ വിമതി, അപരന്തേ വിമതി, പുബ്ബന്താപരന്തേ വിമതി, ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ന ഹേവം വത്തബ്ബേ…പേ….

നത്ഥി അരഹതോ സത്ഥരി വിമതി, ധമ്മേ വിമതി, സങ്ഘേ വിമതി, സിക്ഖായ വിമതി, പുബ്ബന്തേ വിമതി, അപരന്തേ വിമതി, പുബ്ബന്താപരന്തേ വിമതി, ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ആമന്താ. ഹഞ്ചി നത്ഥി അരഹതോ സത്ഥരി വിമതി…പേ… ഇദപ്പച്ചയതാപടിച്ചസമുപ്പന്നേസു ധമ്മേസു വിമതി, നോ ച വത രേ വത്തബ്ബേ – ‘‘അത്ഥി അരഹതോ വിമതീ’’തി.

അത്ഥി പുഥുജ്ജനസ്സ വിമതി, അത്ഥി തസ്സ സത്ഥരി വിമതി…പേ… ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ആമന്താ. അത്ഥി അരഹതോ വിമതി, അത്ഥി തസ്സ സത്ഥരി വിമതി…പേ… ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ന ഹേവം വത്തബ്ബേ…പേ….

അത്ഥി അരഹതോ വിമതി, നത്ഥി തസ്സ സത്ഥരി വിമതി…പേ… ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ആമന്താ. അത്ഥി പുഥുജ്ജനസ്സ വിമതി, നത്ഥി തസ്സ സത്ഥരി വിമതി…പേ… ഇദപ്പച്ചയതാപടിച്ചസമുപ്പന്നേസു ധമ്മേസു വിമതീതി? ന ഹേവം വത്തബ്ബേ…പേ….

അത്ഥി അരഹതോ അസുചി സുക്കവിസ്സട്ഠീതി? ആമന്താ. അരഹതോ അസുചി സുക്കവിസ്സട്ഠി കിസ്സ നിസ്സന്ദോതി? അസിതപീതഖായിതസായിതസ്സ നിസ്സന്ദോതി. അരഹതോ അസുചി സുക്കവിസ്സട്ഠി അസിതപീതഖായിതസായിതസ്സ നിസ്സന്ദോതി? ആമന്താ. യേ കേചി അസന്തി പിവന്തി ഖാദന്തി സായന്തി, സബ്ബേസംയേവ അത്ഥി അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

യേ കേചി അസന്തി പിവന്തി ഖാദന്തി സായന്തി, സബ്ബേസംയേവ അത്ഥി അസുചി സുക്കവിസ്സട്ഠീതി? ആമന്താ. ദാരകാ അസന്തി പിവന്തി ഖാദന്തി സായന്തി, അത്ഥി ദാരകാനം അസുചി സുക്കവിസ്സട്ഠീതി? ന ഹേവം വത്തബ്ബേ.

പണ്ഡകാ അസന്തി പിവന്തി ഖാദന്തി സായന്തി, അത്ഥി പണ്ഡകാനം അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

ദേവാ അസന്തി പിവന്തി ഖാദന്തി സായന്തി, അത്ഥി ദേവതാനം അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

൩൦൯. അരഹതോ അസുചി സുക്കവിസ്സട്ഠി അസിതപീതഖായിതസായിതസ്സ നിസ്സന്ദോതി? ആമന്താ. അത്ഥി തസ്സ ആസയോതി? ന ഹേവം വത്തബ്ബേ…പേ….

അരഹതോ ഉച്ചാരപസ്സാവോ അസിതപീതഖായിതസായിതസ്സ നിസ്സന്ദോ, അത്ഥി തസ്സ ആസയോതി? ആമന്താ. അരഹതോ അസുചി സുക്കവിസ്സട്ഠി അസിതപീതഖായിതസായിതസ്സ നിസ്സന്ദോ, അത്ഥി തസ്സ ആസയോതി? ന ഹേവം വത്തബ്ബേ…പേ….

അരഹതോ അസുചി സുക്കവിസ്സട്ഠി അസിതപീതഖായിതസായിതസ്സ നിസ്സന്ദോ, നത്ഥി തസ്സ ആസയോതി? ആമന്താ. അരഹതോ ഉച്ചാരപസ്സാവോ അസിതപീതഖായിതസായിതസ്സ നിസ്സന്ദോ, നത്ഥി തസ്സ ആസയോതി? ന ഹേവം വത്തബ്ബേ…പേ….

൩൧൦. അത്ഥി അരഹതോ അസുചി സുക്കവിസ്സട്ഠീതി? ആമന്താ. അരഹാ മേഥുനം ധമ്മം പടിസേവേയ്യ, മേഥുനം ഉപ്പാദേയ്യ [മേഥുനം ധമ്മം ഉപ്പാദേയ്യ (സീ. സ്യാ.)], പുത്തസമ്ബാധസയനം അജ്ഝാവസേയ്യ, കാസികചന്ദനം പച്ചനുഭവേയ്യ, മാലാഗന്ധവിലേപനം ധാരേയ്യ, ജാതരൂപരജതം സാദിയേയ്യാതി? ന ഹേവം വത്തബ്ബേ.

അത്ഥി പുഥുജ്ജനസ്സ അസുചി സുക്കവിസ്സട്ഠി, പുഥുജ്ജനോ മേഥുനം ധമ്മം പടിസേവേയ്യ, മേഥുനം ഉപ്പാദേയ്യ, പുത്തസമ്ബാധസയനം അജ്ഝാവസേയ്യ, കാസികചന്ദനം പച്ചനുഭവേയ്യ, മാലാഗന്ധവിലേപനം ധാരേയ്യ, ജാതരൂപരജതം സാദിയേയ്യാതി? ആമന്താ. അത്ഥി അരഹതോ അസുചി സുക്കവിസ്സട്ഠി, അരഹാ മേഥുനം ധമ്മം പടിസേവേയ്യ, മേഥുനം ഉപ്പാദേയ്യ, പുത്തസമ്ബാധസയനം അജ്ഝാവസേയ്യ, കാസികചന്ദനം പച്ചനുഭവേയ്യ, മാലാഗന്ധവിലേപനം ധാരേയ്യ, ജാതരൂപരജതം സാദിയേയ്യാതി? ന ഹേവം വത്തബ്ബേ…പേ….

അത്ഥി അരഹതോ അസുചി സുക്കവിസ്സട്ഠി, ന ച അരഹാ മേഥുനം ധമ്മം പടിസേവേയ്യ, മേഥുനം ഉപ്പാദേയ്യ, പുത്തസമ്ബാധസയനം അജ്ഝാവസേയ്യ, കാസികചന്ദനം പച്ചനുഭവേയ്യ, മാലാഗന്ധവിലേപനം ധാരേയ്യ, ജാതരൂപരജതം സാദിയേയ്യാതി? ആമന്താ. അത്ഥി പുഥുജ്ജനസ്സ അസുചി സുക്കവിസ്സട്ഠി, ന ച പുഥുജ്ജനോ മേഥുനം ധമ്മം പടിസേവേയ്യ, മേഥുനം ഉപ്പാദേയ്യ, പുത്തസമ്ബാധസയനം അജ്ഝാവസേയ്യ, കാസികചന്ദനം പച്ചനുഭവേയ്യ, മാലാഗന്ധവിലേപനം ധാരേയ്യ, ജാതരൂപരജതം സാദിയേയ്യാതി? ന ഹേവം വത്തബ്ബേ.

അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോതി? ആമന്താ. ഹഞ്ചി അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോ, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.

അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹതോ ദോസോ പഹീനോ…പേ… മോഹോ പഹീനോ… മാനോ പഹീനോ… ദിട്ഠി പഹീനാ… വിചികിച്ഛാ പഹീനാ… ഥിനം പഹീനം… ഉദ്ധച്ചം പഹീനം… അഹിരികം പഹീനം…പേ… അനോത്തപ്പം പഹീനം ഉച്ഛിന്നമൂലം താലാവത്ഥുകതം അനഭാവങ്കതം ആയതിം അനുപ്പാദധമ്മന്തി? ആമന്താ. ഹഞ്ചി അരഹതോ അനോത്തപ്പം പഹീനം ഉച്ഛിന്നമൂലം താലാവത്ഥുകതം അനഭാവങ്കതം ആയതിം അനുപ്പാദധമ്മം, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.

൩൧൧. അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹതോ രാഗപ്പഹാനായ മഗ്ഗോ ഭാവിതോതി? ആമന്താ. ഹഞ്ചി അരഹതോ രാഗപ്പഹാനായ മഗ്ഗോ ഭാവിതോ, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.

അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹതോ രാഗപ്പഹാനായ സതിപട്ഠാനാ ഭാവിതാ…പേ… സമ്മപ്പധാനാ ഭാവിതാ… ഇദ്ധിപാദാ ഭാവിതാ… ഇന്ദ്രിയാ ഭാവിതാ… ബലാ ഭാവിതാ…പേ… ബോജ്ഝങ്ഗാ ഭാവിതാതി? ആമന്താ. ഹഞ്ചി അരഹതോ രാഗപ്പഹാനായ ബോജ്ഝങ്ഗാ ഭാവിതാ, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.

അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹതോ ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാതി? ആമന്താ. ഹഞ്ചി അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.

അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു അരഹാ വീതരാഗോ വീതദോസോ വീതമോഹോ കതകരണീയോ ഓഹിതഭാരോ അനുപ്പത്തസദത്ഥോ പരിക്ഖീണഭവസംയോജനോ സമ്മദഞ്ഞാവിമുത്തോ ഉക്ഖിത്തപലിഘോ സങ്കിണ്ണപരിഖോ അബ്ബൂള്ഹേസികോ നിരഗ്ഗളോ അരിയോ പന്നദ്ധജോ പന്നഭാരോ വിസഞ്ഞുത്തോ സുവിജിതവിജയോ, ദുക്ഖം തസ്സ പരിഞ്ഞാതം, സമുദയോ പഹീനോ, നിരോധോ സച്ഛികതോ, മഗ്ഗോ ഭാവിതോ, അഭിഞ്ഞേയ്യം അഭിഞ്ഞാതം, പരിഞ്ഞേയ്യം പരിഞ്ഞാതം, പഹാതബ്ബം പഹീനം, ഭാവേതബ്ബം ഭാവിതം, സച്ഛികാതബ്ബം സച്ഛികതന്തി? ആമന്താ. ഹഞ്ചി അരഹാ വീതരാഗോ വീതദോസോ വീതമോഹോ കതകരണീയോ…പേ… സച്ഛികാതബ്ബം സച്ഛികതം, നോ ച വത രേ വത്തബ്ബേ – ‘‘അത്ഥി അരഹതോ അസുചി സുക്കവിസ്സട്ഠീ’’തി.

൩൧൨. അത്ഥി അരഹതോ അസുചി സുക്കവിസ്സട്ഠീതി? സധമ്മകുസലസ്സ അരഹതോ അത്ഥി അസുചി സുക്കവിസ്സട്ഠി, പരധമ്മകുസലസ്സ അരഹതോ നത്ഥി അസുചി സുക്കവിസ്സട്ഠീതി. സധമ്മകുസലസ്സ അരഹതോ അത്ഥി അസുചി സുക്കവിസ്സട്ഠീതി? ആമന്താ. പരധമ്മകുസലസ്സ അരഹതോ അത്ഥി അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

പരധമ്മകുസലസ്സ അരഹതോ നത്ഥി അസുചി സുക്കവിസ്സട്ഠീതി? ആമന്താ. സധമ്മകുസലസ്സ അരഹതോ നത്ഥി അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

സധമ്മകുസലസ്സ അരഹതോ രാഗോ പഹീനോ, അത്ഥി തസ്സ അസുചി സുക്കവിസ്സട്ഠീതി? ആമന്താ. പരധമ്മകുസലസ്സ അരഹതോ രാഗോ പഹീനോ, അത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

സധമ്മകുസലസ്സ അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം, അത്ഥി തസ്സ അസുചി സുക്കവിസ്സട്ഠീതി? ആമന്താ. പരധമ്മകുസലസ്സ അരഹതോ അനോത്തപ്പം പഹീനം, അത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

സധമ്മകുസലസ്സ അരഹതോ രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ…പേ… ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ, അത്ഥി തസ്സ അസുചി സുക്കവിസ്സട്ഠീതി? ആമന്താ. പരധമ്മകുസലസ്സ അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, അത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

സധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, അത്ഥി തസ്സ അസുചി സുക്കവിസ്സട്ഠീതി? ആമന്താ. പരധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, അത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

പരധമ്മകുസലസ്സ അരഹതോ രാഗോ പഹീനോ, നത്ഥി തസ്സ അസുചി സുക്കവിസ്സട്ഠീതി? ആമന്താ. സധമ്മകുസലസ്സ അരഹതോ രാഗോ പഹീനോ, നത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

പരധമ്മകുസലസ്സ അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം, നത്ഥി തസ്സ അസുചി സുക്കവിസ്സട്ഠീതി? ആമന്താ. സധമ്മകുസലസ്സ അരഹതോ അനോത്തപ്പം പഹീനം, നത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

പരധമ്മകുസലസ്സ അരഹതോ രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ…പേ… ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ, നത്ഥി തസ്സ അസുചി സുക്കവിസ്സട്ഠീതി? ആമന്താ. സധമ്മകുസലസ്സ അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, നത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

പരധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, നത്ഥി തസ്സ അസുചി സുക്കവിസ്സട്ഠീതി? ആമന്താ. സധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, നത്ഥി തസ്സ അസുചി സുക്കവിസ്സട്ഠീതി? ന ഹേവം വത്തബ്ബേ…പേ….

൩൧൩. അത്ഥി അരഹതോ അസുചി സുക്കവിസ്സട്ഠീതി? ആമന്താ. നനു വുത്തം ഭഗവതാ – ‘‘യേ തേ [യേ കേചി (സീ.)], ഭിക്ഖവേ, ഭിക്ഖൂ പുഥുജ്ജനാ സീലസമ്പന്നാ സതാ സമ്പജാനാ നിദ്ദം ഓക്കമന്തി, തേസം അസുചി ന മുച്ചതി. യേപി തേ, ഭിക്ഖവേ, ബാഹിരകാ ഇസയോ കാമേസു വീതരാഗാ, തേസമ്പി അസുചി ന മുച്ചതി. അട്ഠാനമേതം, ഭിക്ഖവേ, അനവകാസോ യം അരഹതോ അസുചി മുച്ചേയ്യാ’’തി [മഹാവ. ൩൫൩ അത്ഥതോ സമാനം; അ. നി. ൫.൨൧൦ പസ്സിതബ്ബം]. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അസുചി സുക്കവിസ്സട്ഠീ’’തി.

ന വത്തബ്ബം – ‘‘അത്ഥി അരഹതോ പരൂപഹാരോ’’തി? ആമന്താ. നനു അരഹതോ ചീവരപിണ്ഡപാതസേനാസനഗിലാനപച്ചയഭേസജ്ജപരിക്ഖാരം പരേ ഉപസംഹരേയ്യുന്തി? ആമന്താ. ഹഞ്ചി അരഹതോ ചീവരപിണ്ഡപാതസേനാസനഗിലാനപച്ചയഭേസജ്ജപരിക്ഖാരം പരേ ഉപസംഹരേയ്യും, തേന വത രേ വത്തബ്ബേ – ‘‘അത്ഥി അരഹതോ പരൂപഹാരോ’’തി.

അരഹതോ ചീവരപിണ്ഡപാതസേനാസനഗിലാനപച്ചയഭേസജ്ജപരിക്ഖാരം പരേ ഉപസംഹരേയ്യുന്തി, അത്ഥി അരഹതോ പരൂപഹാരോതി? ആമന്താ. അരഹതോ സോതാപത്തിഫലം വാ സകദാഗാമിഫലം വാ അനാഗാമിഫലം വാ അരഹത്തം വാ പരേ ഉപസംഹരേയ്യുന്തി? ന ഹേവം വത്തബ്ബേ…പേ….

പരൂപഹാരകഥാ നിട്ഠിതാ.