൨. ദുതിയവഗ്ഗോ

(൧൧) ൨. അഞ്ഞാണകഥാ

൩൧൪. അത്ഥി അരഹതോ അഞ്ഞാണന്തി? ആമന്താ. അത്ഥി അരഹതോ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ന ഹേവം വത്തബ്ബേ. നത്ഥി അരഹതോ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ആമന്താ. ഹഞ്ചി നത്ഥി അരഹതോ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണം, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.

അത്ഥി പുഥുജ്ജനസ്സ അഞ്ഞാണം, അത്ഥി തസ്സ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ആമന്താ. അത്ഥി അരഹതോ അഞ്ഞാണം, അത്ഥി തസ്സ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ന ഹേവം വത്തബ്ബേ.

അത്ഥി അരഹതോ അഞ്ഞാണം, നത്ഥി തസ്സ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ആമന്താ. അത്ഥി പുഥുജ്ജനസ്സ അഞ്ഞാണം, നത്ഥി തസ്സ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാസംയോജനം അവിജ്ജാനീവരണന്തി? ന ഹേവം വത്തബ്ബേ.

അത്ഥി അരഹതോ അഞ്ഞാണന്തി? ആമന്താ. അരഹാ അഞ്ഞാണപകതോ പാണം ഹനേയ്യ, അദിന്നം ആദിയേയ്യ, മുസാ ഭണേയ്യ, പിസുണം ഭണേയ്യ, ഫരുസം ഭണേയ്യ, സമ്ഫം പലപേയ്യ, സന്ധിം ഛിന്ദേയ്യ, നില്ലോപം ഹരേയ്യ, ഏകാഗാരിയം കരേയ്യ, പരിപന്ഥേ തിട്ഠേയ്യ, പരദാരം ഗച്ഛേയ്യ, ഗാമഘാതം കരേയ്യ, നിഗമഘാതം കരേയ്യാതി? ന ഹേവം വത്തബ്ബേ.

അത്ഥി പുഥുജ്ജനസ്സ അഞ്ഞാണം, പുഥുജ്ജനോ അഞ്ഞാണപകതോ പാണം ഹനേയ്യ, അദിന്നം ആദിയേയ്യ, മുസാ ഭണേയ്യ…പേ… ഗാമഘാതം കരേയ്യ, നിഗമഘാതം കരേയ്യാതി? ആമന്താ. അത്ഥി അരഹതോ അഞ്ഞാണം, അരഹാ അഞ്ഞാണപകതോ പാണം ഹനേയ്യ, അദിന്നം ആദിയേയ്യ…പേ… ഗാമഘാതം കരേയ്യ, നിഗമഘാതം കരേയ്യാതി? ന ഹേവം വത്തബ്ബേ.

അത്ഥി അരഹതോ അഞ്ഞാണം, ന ച അരഹാ അഞ്ഞാണപകതോ പാണം ഹനേയ്യ, അദിന്നം ആദിയേയ്യ…പേ… ഗാമഘാതം കരേയ്യ, നിഗമഘാതം കരേയ്യാതി? ആമന്താ. അത്ഥി പുഥുജ്ജനസ്സ അഞ്ഞാണം, ന ച പുഥുജ്ജനോ അഞ്ഞാണപകതോ പാണം ഹനേയ്യ, അദിന്നം ആദിയേയ്യ…പേ… ഗാമഘാതം കരേയ്യ, നിഗമഘാതം കരേയ്യാതി? ന ഹേവം വത്തബ്ബേ.

അത്ഥി അരഹതോ അഞ്ഞാണന്തി? ആമന്താ. അത്ഥി അരഹതോ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം, സിക്ഖായ അഞ്ഞാണം, പുബ്ബന്തേ അഞ്ഞാണം, അപരന്തേ അഞ്ഞാണം, പുബ്ബന്താപരന്തേ അഞ്ഞാണം, ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ന ഹേവം വത്തബ്ബേ.

നത്ഥി അരഹതോ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം, സിക്ഖായ അഞ്ഞാണം, പുബ്ബന്തേ അഞ്ഞാണം, അപരന്തേ അഞ്ഞാണം, പുബ്ബന്താപരന്തേ അഞ്ഞാണം, ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ആമന്താ. ഹഞ്ചി നത്ഥി അരഹതോ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം…പേ… ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണം, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.

അത്ഥി പുഥുജ്ജനസ്സ അഞ്ഞാണം, അത്ഥി തസ്സ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം…പേ… ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ആമന്താ. അത്ഥി അരഹതോ അഞ്ഞാണം, അത്ഥി തസ്സ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം…പേ… ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ന ഹേവം വത്തബ്ബേ.

അത്ഥി അരഹതോ അഞ്ഞാണം, നത്ഥി തസ്സ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം…പേ… ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ആമന്താ. അത്ഥി പുഥുജ്ജനസ്സ അഞ്ഞാണം, നത്ഥി തസ്സ സത്ഥരി അഞ്ഞാണം, ധമ്മേ അഞ്ഞാണം, സങ്ഘേ അഞ്ഞാണം…പേ… ഇദപ്പച്ചയതാപടിച്ചസമുപ്പന്നേസു ധമ്മേസു അഞ്ഞാണന്തി? ന ഹേവം വത്തബ്ബേ.

൩൧൫. അത്ഥി അരഹതോ അഞ്ഞാണന്തി? ആമന്താ. നനു അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോതി? ആമന്താ. ഹഞ്ചി അരഹതോ രാഗോ പഹീനോ ഉച്ഛിന്നമൂലോ താലാവത്ഥുകതോ അനഭാവങ്കതോ ആയതിം അനുപ്പാദധമ്മോ, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.

അത്ഥി അരഹതോ അഞ്ഞാണന്തി? ആമന്താ. നനു അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം ഉച്ഛിന്നമൂലം താലാവത്ഥുകതം അനഭാവങ്കതം ആയതിം അനുപ്പാദധമ്മന്തി? ആമന്താ. ഹഞ്ചി അരഹതോ അനോത്തപ്പം പഹീനം ഉച്ഛിന്നമൂലം താലാവത്ഥുകതം അനഭാവങ്കതം ആയതിം അനുപ്പാദധമ്മം, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.

അത്ഥി അരഹതോ അഞ്ഞാണന്തി? ആമന്താ. നനു അരഹതോ രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാതി? ആമന്താ. ഹഞ്ചി അരഹതോ രാഗപ്പഹാനായ ബോജ്ഝങ്ഗാ ഭാവിതാ, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.

അത്ഥി അരഹതോ അഞ്ഞാണന്തി? ആമന്താ. നനു അരഹതോ ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ …പേ… ബോജ്ഝങ്ഗാ ഭാവിതാതി? ആമന്താ. ഹഞ്ചി അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.

അത്ഥി അരഹതോ അഞ്ഞാണന്തി? ആമന്താ. നനു അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതന്തി? ആമന്താ. ഹഞ്ചി അരഹാ വീതരാഗോ…പേ… സച്ഛികാതബ്ബം സച്ഛികതം, നോ ച വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.

൩൧൬. അത്ഥി അരഹതോ അഞ്ഞാണന്തി? സധമ്മകുസലസ്സ അരഹതോ അത്ഥി അഞ്ഞാണം, പരധമ്മകുസലസ്സ അരഹതോ നത്ഥി അഞ്ഞാണന്തി. സധമ്മകുസലസ്സ അരഹതോ അത്ഥി അഞ്ഞാണന്തി? ആമന്താ. പരധമ്മകുസലസ്സ അരഹതോ അത്ഥി അഞ്ഞാണന്തി? ന ഹേവം വത്തബ്ബേ…പേ….

പരധമ്മകുസലസ്സ അരഹതോ നത്ഥി അഞ്ഞാണന്തി? ആമന്താ. സധമ്മകുസലസ്സ അരഹതോ നത്ഥി അഞ്ഞാണന്തി? ന ഹേവം വത്തബ്ബേ…പേ….

സധമ്മകുസലസ്സ അരഹതോ രാഗോ പഹീനോ, അത്ഥി തസ്സ അഞ്ഞാണന്തി? ആമന്താ. പരധമ്മകുസലസ്സ അരഹതോ രാഗോ പഹീനോ, അത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….

സധമ്മകുസലസ്സ അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം, അത്ഥി തസ്സ അഞ്ഞാണന്തി? ആമന്താ. പരധമ്മകുസലസ്സ അരഹതോ അനോത്തപ്പം പഹീനം, അത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….

സധമ്മകുസലസ്സ അരഹതോ രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ, അത്ഥി തസ്സ അഞ്ഞാണന്തി? ആമന്താ. പരധമ്മകുസലസ്സ അരഹതോ രാഗപ്പഹാനായ ബോജ്ഝങ്ഗാ ഭാവിതാ, അത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….

സധമ്മകുസലസ്സ അരഹതോ ദോസപ്പഹാനായ…പേ… മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ, അത്ഥി തസ്സ അഞ്ഞാണന്തി? ആമന്താ. പരധമ്മകുസലസ്സ അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, അത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….

സധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, അത്ഥി തസ്സ അഞ്ഞാണന്തി? ആമന്താ. പരധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, അത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….

പരധമ്മകുസലസ്സ അരഹതോ രാഗോ പഹീനോ, നത്ഥി തസ്സ അഞ്ഞാണന്തി? ആമന്താ. സധമ്മകുസലസ്സ അരഹതോ രാഗോ പഹീനോ, നത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….

പരധമ്മകുസലസ്സ അരഹതോ ദോസോ പഹീനോ…പേ… മോഹോ പഹീനോ…പേ… അനോത്തപ്പം പഹീനം, നത്ഥി തസ്സ അഞ്ഞാണന്തി? ആമന്താ. സധമ്മകുസലസ്സ അരഹതോ അനോത്തപ്പം പഹീനം, നത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….

പരധമ്മകുസലസ്സ അരഹതോ രാഗപ്പഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ…പേ… ദോസപ്പഹാനായ മോഹപ്പഹാനായ…പേ… അനോത്തപ്പപഹാനായ മഗ്ഗോ ഭാവിതോ…പേ… ബോജ്ഝങ്ഗാ ഭാവിതാ, നത്ഥി തസ്സ അഞ്ഞാണന്തി? ആമന്താ. സധമ്മകുസലസ്സ അരഹതോ അനോത്തപ്പപഹാനായ ബോജ്ഝങ്ഗാ ഭാവിതാ, നത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….

പരധമ്മകുസലോ അരഹാ വീതരാഗോ വീതദോസോ വീതമോഹോ…പേ… സച്ഛികാതബ്ബം സച്ഛികതം, നത്ഥി തസ്സ അഞ്ഞാണന്തി? ആമന്താ. സധമ്മകുസലോ അരഹാ വീതരാഗോ വീതദോസോ വീതമോഹോ …പേ… സച്ഛികാതബ്ബം സച്ഛികതം, നത്ഥി തസ്സ അഞ്ഞാണന്തി? ന ഹേവം വത്തബ്ബേ…പേ….

൩൧൭. അത്ഥി അരഹതോ അഞ്ഞാണന്തി? ആമന്താ. നനു വുത്തം ഭഗവതാ – ‘‘ജാനതോഹം [ജാനതാഹം (സീ.), ജാനത്വാഹം (സ്യാ. പീ. ക.)], ഭിക്ഖവേ, പസ്സതോ ആസവാനം ഖയം വദാമി, നോ അജാനതോ നോ അപസ്സതോ. കിഞ്ച, ഭിക്ഖവേ, ജാനതോ കിം പസ്സതോ ആസവാനം ഖയോ ഹോതി? ‘ഇതി രൂപം, ഇതി രൂപസ്സ സമുദയോ, ഇതി രൂപസ്സ അത്ഥങ്ഗമോ, ഇതി വേദനാ…പേ… ഇതി സഞ്ഞാ… ഇതി സങ്ഖാരാ… ഇതി വിഞ്ഞാണം, ഇതി വിഞ്ഞാണസ്സ സമുദയോ, ഇതി വിഞ്ഞാണസ്സ അത്ഥങ്ഗമോ’തി – ഏവം ഖോ, ഭിക്ഖവേ, ജാനതോ ഏവം പസ്സതോ ആസവാനം ഖയോ ഹോതീ’’തി [സം. നി. ൩.൧൦൧; ഇതിവു. ൧൦൨; സം. നി. ൫.൧൦൯൫]. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി.

അത്ഥി അരഹതോ അഞ്ഞാണന്തി? ആമന്താ. നനു വുത്തം ഭഗവതാ – ‘‘ജാനതോഹം, ഭിക്ഖവേ, പസ്സതോ ആസവാനം ഖയം വദാമി, നോ അജാനതോ നോ അപസ്സതോ. കിഞ്ച, ഭിക്ഖവേ, ജാനതോ കിം പസ്സതോ ആസവാനം ഖയോ ഹോതി? ‘ഇദം ദുക്ഖ’ന്തി – ഭിക്ഖവേ, ജാനതോ പസ്സതോ ആസവാനം ഖയോ ഹോതി, ‘അയം ദുക്ഖസമുദയോ’തി – ജാനതോ പസ്സതോ ആസവാനം ഖയോ ഹോതി, ‘അയം ദുക്ഖനിരോധോ’തി – ജാനതോ പസ്സതോ ആസവാനം ഖയോ ഹോതി, ‘അയം ദുക്ഖനിരോധഗാമിനീ പടിപദാ’തി – ജാനതോ പസ്സതോ ആസവാനം ഖയോ ഹോതി. ഏവം ഖോ, ഭിക്ഖവേ, ജാനതോ ഏവം പസ്സതോ ആസവാനം ഖയോ ഹോതീ’’തി [സം. നി. ൫.൧൦൯൫]. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി.

അത്ഥി അരഹതോ അഞ്ഞാണന്തി? ആമന്താ. നനു വുത്തം ഭഗവതാ – ‘‘സബ്ബം, ഭിക്ഖവേ, അനഭിജാനം അപരിജാനം അവിരാജയം അപ്പജഹം അഭബ്ബോ ദുക്ഖക്ഖയായ, സബ്ബഞ്ച ഖോ, ഭിക്ഖവേ, അഭിജാനം പരിജാനം വിരാജയം പജഹം ഭബ്ബോ ദുക്ഖക്ഖയായാ’’തി [സം. നി. ൪.൨൬; ഇതിവു. ൭ ഇതിവുത്തകേപി]! അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി.

അത്ഥി അരഹതോ അഞ്ഞാണന്തി? ആമന്താ. നനു വുത്തം ഭഗവതാ –

‘‘സഹാവസ്സ ദസ്സനസമ്പദായ,

തയസ്സു ധമ്മാ ജഹിതാ ഭവന്തി;

സക്കായദിട്ഠീ വിചികിച്ഛിതഞ്ച,

സീലബ്ബതം വാപി യദത്ഥി കിഞ്ചി;

ചതൂഹപായേഹി ച വിപ്പമുത്തോ,

ഛച്ചാഭിഠാനാനി അഭബ്ബ കാതു’’ന്തി.

അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി.

അത്ഥി അരഹതോ അഞ്ഞാണന്തി? ആമന്താ. നനു വുത്തം ഭഗവതാ – ‘‘യസ്മിം, ഭിക്ഖവേ, സമയേ അരിയസാവകസ്സ വിരജം വീതമലം ധമ്മചക്ഖും ഉദപാദി – ‘യം കിഞ്ചി സമുദയധമ്മം സബ്ബം തം നിരോധധമ്മ’ന്തി, സഹ ദസ്സനുപ്പാദാ, ഭിക്ഖവേ, അരിയസാവകസ്സ തീണി സംയോജനാനി പഹീയന്തി – സക്കായദിട്ഠി, വിചികിച്ഛാ, സീലബ്ബതപരാമാസോ’’തി. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി.

ന വത്തബ്ബം – ‘‘അത്ഥി അരഹതോ അഞ്ഞാണ’’ന്തി? ആമന്താ. നനു അരഹാ ഇത്ഥിപുരിസാനം നാമഗോത്തം ന ജാനേയ്യ, മഗ്ഗാമഗ്ഗം ന ജാനേയ്യ, തിണകട്ഠവനപ്പതീനം നാമം ന ജാനേയ്യാതി? ആമന്താ. ഹഞ്ചി അരഹാ ഇത്ഥിപുരിസാനം നാമഗോത്തം ന ജാനേയ്യ, മഗ്ഗാമഗ്ഗം ന ജാനേയ്യ, തിണകട്ഠവനപ്പതീനം നാമം ന ജാനേയ്യ, തേന വത രേ വത്തബ്ബേ – ‘‘അത്ഥി അരഹതോ അഞ്ഞാണ’’ന്തി.

അരഹാ ഇത്ഥിപുരിസാനം നാമഗോത്തം ന ജാനേയ്യ, മഗ്ഗാമഗ്ഗം ന ജാനേയ്യ, തിണകട്ഠവനപ്പതീനം നാമം ന ജാനേയ്യാതി, അത്ഥി അരഹതോ അഞ്ഞാണന്തി? ആമന്താ. അരഹാ സോതാപത്തിഫലം വാ സകദാഗാമിഫലം വാ അനാഗാമിഫലം വാ അരഹത്തം വാ ന ജാനേയ്യാതി? ന ഹേവം വത്തബ്ബേ…പേ….

അഞ്ഞാണകഥാ നിട്ഠിതാ.