൨൦. സങ്ഘാനുയോഗോ

൨൦൬. ന വത്തബ്ബം – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി? ആമന്താ. നനു ചത്താരോ പുരിസയുഗാ അട്ഠ പുരിസപുഗ്ഗലാ അത്ഥീതി? ആമന്താ. ഹഞ്ചി ചത്താരോ പുരിസയുഗാ അട്ഠ പുരിസപുഗ്ഗലാ അത്ഥി, തേന വത രേ വത്തബ്ബേ – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി.

൨൦൭. ചത്താരോ പുരിസയുഗാ അട്ഠ പുരിസപുഗ്ഗലാ അത്ഥീതി കത്വാ തേന ച കാരണേന പുഗ്ഗലോ ഉപലബ്ഭതി സച്ചികട്ഠപരമത്ഥേനാതി? ആമന്താ. ചത്താരോ പുരിസയുഗാ അട്ഠ പുരിസപുഗ്ഗലാ ബുദ്ധപാതുഭാവാ പാതുഭവന്തീതി? ആമന്താ. പുഗ്ഗലോ ബുദ്ധപാതുഭാവാ പാതുഭവതീതി? ന ഹേവം വത്തബ്ബേ…പേ….

പുഗ്ഗലോ ബുദ്ധപാതുഭാവാ പാതുഭവതീതി? ആമന്താ. ബുദ്ധസ്സ ഭഗവതോ പരിനിബ്ബുതേ ഉച്ഛിന്നോ പുഗ്ഗലോ, നത്ഥി പുഗ്ഗലോതി? ന ഹേവം വത്തബ്ബേ…പേ….

സങ്ഘാനുയോഗോ.