൧൯. പടിവേധാനുയോഗോ

൨൦൧. ന വത്തബ്ബം – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി? ആമന്താ. നനു സോതാപന്നോ അത്ഥീതി? ആമന്താ. ഹഞ്ചി സോതാപന്നോ അത്ഥി, തേന വത രേ വത്തബ്ബേ – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി.

൨൦൨. ന വത്തബ്ബം – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി? ആമന്താ. നനു സകദാഗാമീ അത്ഥി…പേ… അനാഗാമീ അത്ഥി… അരഹാ അത്ഥി… ഉഭതോഭാഗവിമുത്തോ അത്ഥി… പഞ്ഞാവിമുത്തോ അത്ഥി… കായസക്ഖി [കായസക്ഖീ (സ്യാ.)] അത്ഥി… ദിട്ഠിപ്പത്തോ അത്ഥി… സദ്ധാവിമുത്തോ അത്ഥി… ധമ്മാനുസാരീ അത്ഥി… സദ്ധാനുസാരീ അത്ഥീതി? ആമന്താ.

ഹഞ്ചി സദ്ധാനുസാരീ അത്ഥി, തേന വത രേ വത്തബ്ബേ – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി.

൨൦൩. സോതാപന്നോ അത്ഥീതി കത്വാ തേന ച കാരണേന പുഗ്ഗലോ ഉപലബ്ഭതി സച്ചികട്ഠപരമത്ഥേനാതി? ആമന്താ. അത്ഥി കോചി ന സോതാപന്നോ ഹുത്വാ സോതാപന്നോ ഹോതീതി? ആമന്താ. അത്ഥി കോചി ന പുഗ്ഗലോ ഹുത്വാ പുഗ്ഗലോ ഹോതീതി? ന ഹേവം വത്തബ്ബേ…പേ….

൨൦൪. അത്ഥി കോചി ന സകദാഗാമീ ഹുത്വാ… ന അനാഗാമീ ഹുത്വാ… ന അരഹാ ഹുത്വാ… ന ഉഭതോഭാഗവിമുത്തോ ഹുത്വാ… ന പഞ്ഞാവിമുത്തോ ഹുത്വാ… ന കായസക്ഖി ഹുത്വാ… ന ദിട്ഠിപ്പത്തോ ഹുത്വാ… ന സദ്ധാവിമുത്തോ ഹുത്വാ… ന ധമ്മാനുസാരീ ഹുത്വാ… ന സദ്ധാനുസാരീ ഹുത്വാ സദ്ധാനുസാരീ ഹോതീതി? ആമന്താ. അത്ഥി കോചി ന പുഗ്ഗലോ ഹുത്വാ പുഗ്ഗലോ ഹോതീതി? ന ഹേവം വത്തബ്ബേ…പേ….

൨൦൫. സോതാപന്നോ അത്ഥീതി കത്വാ തേന ച കാരണേന പുഗ്ഗലോ ഉപലബ്ഭതി സച്ചികട്ഠപരമത്ഥേനാതി? ആമന്താ. അത്ഥി കോചി സോതാപന്നോ ഹുത്വാ ന സോതാപന്നോ ഹോതീതി? ആമന്താ. അത്ഥി കോചി പുഗ്ഗലോ ഹുത്വാ ന പുഗ്ഗലോ ഹോതീതി? ന ഹേവം വത്തബ്ബേ…പേ….

അത്ഥി കോചി സകദാഗാമീ ഹുത്വാ… അനാഗാമീ ഹുത്വാ ന അനാഗാമീ ഹോതീതി? ആമന്താ. അത്ഥി കോചി പുഗ്ഗലോ ഹുത്വാ ന പുഗ്ഗലോ ഹോതീതി? ന ഹേവം വത്തബ്ബേ…പേ….

പടിവേധാനുയോഗോ.