൧൫-൧൮. ഞാതകാനുയോഗാദി

൧൯൭. ന വത്തബ്ബം – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി? ആമന്താ. നനു മാതാ അത്ഥീതി? ആമന്താ. ഹഞ്ചി മാതാ അത്ഥി, തേന വത രേ വത്തബ്ബേ – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി.

൧൯൮. ന വത്തബ്ബം – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി? ആമന്താ. നനു പിതാ അത്ഥി…പേ… ഭാതാ അത്ഥി… ഭഗിനീ അത്ഥി… ഖത്തിയോ അത്ഥി … ബ്രാഹ്മണോ അത്ഥി… വേസ്സോ അത്ഥി… സുദ്ദോ അത്ഥി… ഗഹട്ഠോ അത്ഥി… പബ്ബജിതോ അത്ഥി… ദേവോ അത്ഥി… മനുസ്സോ അത്ഥീതി? ആമന്താ. ഹഞ്ചി മനുസ്സോ അത്ഥി, തേന വത രേ വത്തബ്ബേ – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി.

൧൯൯. മാതാ അത്ഥീതി കത്വാ തേന ച കാരണേന പുഗ്ഗലോ ഉപലബ്ഭതി സച്ചികട്ഠപരമത്ഥേനാതി? ആമന്താ. അത്ഥി കോചി ന മാതാ ഹുത്വാ മാതാ ഹോതീതി? ആമന്താ. അത്ഥി കോചി ന പുഗ്ഗലോ ഹുത്വാ പുഗ്ഗലോ ഹോതീതി? ന ഹേവം വത്തബ്ബേ…പേ… അത്ഥി കോചി ന പിതാ ഹുത്വാ…പേ… ന ഭാതാ ഹുത്വാ… ന ഭഗിനീ ഹുത്വാ… ന ഖത്തിയോ ഹുത്വാ… ന ബ്രാഹ്മണോ ഹുത്വാ… ന വേസ്സോ ഹുത്വാ… ന സുദ്ദോ ഹുത്വാ… ന ഗഹട്ഠോ ഹുത്വാ… ന പബ്ബജിതോ ഹുത്വാ… ന ദേവോ ഹുത്വാ… ന മനുസ്സോ ഹുത്വാ മനുസ്സോ ഹോതീതി? ആമന്താ. അത്ഥി കോചി ന പുഗ്ഗലോ ഹുത്വാ പുഗ്ഗലോ ഹോതീതി? ന ഹേവം വത്തബ്ബേ…പേ….

൨൦൦. മാതാ അത്ഥീതി കത്വാ തേന ച കാരണേന പുഗ്ഗലോ ഉപലബ്ഭതി സച്ചികട്ഠപരമത്ഥേനാതി? ആമന്താ. അത്ഥി കോചി മാതാ ഹുത്വാ ന മാതാ ഹോതീതി? ആമന്താ. അത്ഥി കോചി പുഗ്ഗലോ ഹുത്വാ ന പുഗ്ഗലോ ഹോതീതി? ന ഹേവം വത്തബ്ബേ…പേ….

അത്ഥി കോചി പിതാ ഹുത്വാ… ഭാതാ ഹുത്വാ… ഭഗിനീ ഹുത്വാ… ഖത്തിയോ ഹുത്വാ… ബ്രാഹ്മണോ ഹുത്വാ… വേസ്സോ ഹുത്വാ… സുദ്ദോ ഹുത്വാ… ഗഹട്ഠോ ഹുത്വാ… പബ്ബജിതോ ഹുത്വാ… ദേവോ ഹുത്വാ… മനുസ്സോ ഹുത്വാ ന മനുസ്സോ ഹോതീതി? ആമന്താ. അത്ഥി കോചി പുഗ്ഗലോ ഹുത്വാ ന പുഗ്ഗലോ ഹോതീതി? ന ഹേവം വത്തബ്ബേ…പേ….