൧൪. അഭിഞ്ഞാനുയോഗോ

൧൯൩. ന വത്തബ്ബം – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി? ആമന്താ. നനു അത്ഥി കോചി ഇദ്ധിം വികുബ്ബതീതി? ആമന്താ. ഹഞ്ചി അത്ഥി കോചി ഇദ്ധിം വികുബ്ബതി, തേന വത രേ വത്തബ്ബേ – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി.

൧൯൪. ന വത്തബ്ബം – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി? ആമന്താ. നനു അത്ഥി കോചി ദിബ്ബായ സോതധാതുയാ സദ്ദം സുണാതി…പേ… പരചിത്തം വിജാനാതി… പുബ്ബേനിവാസം അനുസ്സരതി… ദിബ്ബേന ചക്ഖുനാ രൂപം പസ്സതി… ആസവാനം ഖയം സച്ഛികരോതീതി? ആമന്താ. ഹഞ്ചി അത്ഥി കോചി ആസവാനം ഖയം സച്ഛികരോതി, തേന വത രേ വത്തബ്ബേ – ‘‘പുഗ്ഗലോ ഉപലബ്ഭതി സച്ചികട്ഠപരമത്ഥേനാ’’തി.

൧൯൫. അത്ഥി കോചി ഇദ്ധിം വികുബ്ബതീതി കത്വാ തേന ച കാരണേന പുഗ്ഗലോ ഉപലബ്ഭതി സച്ചികട്ഠപരമത്ഥേനാതി? ആമന്താ. യോ ഇദ്ധിം വികുബ്ബതി, സ്വേവ പുഗ്ഗലോ? യോ ഇദ്ധിം ന വികുബ്ബതി, ന സോ പുഗ്ഗലോതി? ന ഹേവം വത്തബ്ബേ…പേ….

൧൯൬. യോ ദിബ്ബായ സോതധാതുയാ സദ്ദം സുണാതി…പേ… യോ പരചിത്തം വിജാനാതി… യോ പുബ്ബേനിവാസം അനുസ്സരതി… യോ ദിബ്ബേന ചക്ഖുനാ രൂപം പസ്സതി… യോ ആസവാനം ഖയം സച്ഛികരോതി, സ്വേവ പുഗ്ഗലോ? യോ ആസവാനം ഖയം ന സച്ഛികരോതി, ന സോ പുഗ്ഗലോതി? ന ഹേവം വത്തബ്ബേ…പേ….

അഭിഞ്ഞാനുയോഗോ.