൧൦. പഞ്ഞത്താനുയോഗോ

൬൧. രൂപധാതുയാ രൂപീ പുഗ്ഗലോതി? ആമന്താ. കാമധാതുയാ കാമീ പുഗ്ഗലോതി? ന ഹേവം വത്തബ്ബേ…പേ….

൬൨. രൂപധാതുയാ രൂപിനോ സത്താതി? ആമന്താ. കാമധാതുയാ കാമിനോ സത്താതി? ന ഹേവം വത്തബ്ബേ…പേ….

൬൩. അരൂപധാതുയാ അരൂപീ പുഗ്ഗലോതി? ആമന്താ. കാമധാതുയാ കാമീ പുഗ്ഗലോതി? ന ഹേവം വത്തബ്ബേ…പേ….

൬൪. അരൂപധാതുയാ അരൂപിനോ സത്താതി? ആമന്താ. കാമധാതുയാ കാമിനോ സത്താതി? ന ഹേവം വത്തബ്ബേ…പേ….

൬൫. രൂപധാതുയാ രൂപീ പുഗ്ഗലോ അരൂപധാതുയാ അരൂപീ പുഗ്ഗലോ, അത്ഥി ച കോചി രൂപധാതുയാ ചുതോ അരൂപധാതും ഉപപജ്ജതീതി? ആമന്താ. രൂപീ പുഗ്ഗലോ ഉപച്ഛിന്നോ, അരൂപീ പുഗ്ഗലോ ജാതോതി? ന ഹേവം വത്തബ്ബേ…പേ….

൬൬. രൂപധാതുയാ രൂപിനോ സത്താ അരൂപധാതുയാ അരൂപിനോ സത്താ, അത്ഥി ച കോചി രൂപധാതുയാ ചുതോ അരൂപധാതും ഉപപജ്ജതീതി? ആമന്താ. രൂപീ സത്തോ ഉപച്ഛിന്നോ, അരൂപീ സത്തോ ജാതോതി? ന ഹേവം വത്തബ്ബേ…പേ….

൬൭. കായോതി വാ സരീരന്തി വാ, സരീരന്തി വാ കായോതി വാ, കായം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേതി? ആമന്താ. പുഗ്ഗലോതി വാ ജീവോതി വാ, ജീവോതി വാ പുഗ്ഗലോതി വാ, പുഗ്ഗലം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേതി? ആമന്താ. അഞ്ഞോ കായോ, അഞ്ഞോ പുഗ്ഗലോതി? ആമന്താ. അഞ്ഞം ജീവം, അഞ്ഞം സരീരന്തി? ന ഹേവം വത്തബ്ബേ.

ആജാനാഹി നിഗ്ഗഹം. ഹഞ്ചി കായോതി വാ സരീരന്തി വാ, സരീരന്തി വാ കായോതി വാ, കായം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, പുഗ്ഗലോതി വാ ജീവോതി വാ, ജീവോതി വാ പുഗ്ഗലോതി വാ, പുഗ്ഗലം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, അഞ്ഞോ കായോ അഞ്ഞോ പുഗ്ഗലോ; തേന വത രേ വത്തബ്ബേ – ‘‘അഞ്ഞം ജീവം അഞ്ഞം സരീര’’ന്തി. യം തത്ഥ വദേസി – ‘‘വത്തബ്ബേ ഖോ – ‘കായോതി വാ സരീരന്തി വാ, സരീരന്തി വാ കായോതി വാ, കായം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, പുഗ്ഗലോതി വാ ജീവോതി വാ, ജീവോതി വാ പുഗ്ഗലോതി വാ, പുഗ്ഗലം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, അഞ്ഞോ കായോ അഞ്ഞോ പുഗ്ഗലോ,’ നോ ച വത്തബ്ബേ – ‘അഞ്ഞം ജീവം അഞ്ഞം സരീര’’’ന്തി മിച്ഛാ.

നോ ചേ പന വത്തബ്ബേ – ‘‘അഞ്ഞം ജീവം അഞ്ഞം സരീര’’ന്തി, നോ ച വത രേ വത്തബ്ബേ – ‘‘കായോതി വാ സരീരന്തി വാ, സരീരന്തി വാ കായോതി വാ, കായം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, പുഗ്ഗലോതി വാ ജീവോതി വാ, ജീവോതി വാ പുഗ്ഗലോതി വാ, പുഗ്ഗലം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, അഞ്ഞോ കായോ അഞ്ഞോ പുഗ്ഗലോ’’തി. യം തത്ഥ വദേസി – ‘‘വത്തബ്ബേ ഖോ – ‘കായോതി വാ സരീരന്തി വാ, സരീരന്തി വാ കായോതി വാ, കായം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, പുഗ്ഗലോതി വാ ജീവോതി വാ, ജീവോതി വാ പുഗ്ഗലോതി വാ, പുഗ്ഗലം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, അഞ്ഞോ കായോ അഞ്ഞോ പുഗ്ഗലോ’, നോ ച വത്തബ്ബേ – ‘അഞ്ഞം ജീവം അഞ്ഞം സരീര’’’ന്തി മിച്ഛാ…പേ….

൬൮. കായോതി വാ സരീരന്തി വാ, സരീരന്തി വാ കായോതി വാ, കായം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേതി? ആമന്താ. വുത്തം ഭഗവതാ – ‘‘അത്ഥി പുഗ്ഗലോ അത്തഹിതായ പടിപന്നോ’’തി? ആമന്താ. അഞ്ഞോ കായോ അഞ്ഞോ പുഗ്ഗലോതി? ന ഹേവം വത്തബ്ബേ.

ആജാനാഹി പടികമ്മം. ഹഞ്ചി കായോതി വാ സരീരന്തി വാ, സരീരന്തി വാ കായോതി വാ, കായം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, വുത്തം ഭഗവതാ – ‘‘അത്ഥി പുഗ്ഗലോ അത്തഹിതായ പടിപന്നോ,’’ തേന വത രേ വത്തബ്ബേ – ‘‘അഞ്ഞോ കായോ അഞ്ഞോ പുഗ്ഗലോ’’തി. യം തത്ഥ വദേസി – ‘‘വത്തബ്ബേ ഖോ – ‘കായോതി വാ സരീരന്തി വാ, സരീരന്തി വാ കായോതി വാ, കായം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, വുത്തം ഭഗവതാ – അത്ഥി പുഗ്ഗലോ അത്തഹിതായ പടിപന്നോ,’ നോ ച വത്തബ്ബേ – ‘അഞ്ഞോ കായോ അഞ്ഞോ പുഗ്ഗലോ’’’തി മിച്ഛാ.

നോ ചേ പന വത്തബ്ബേ – ‘‘അഞ്ഞോ കായോ അഞ്ഞോ പുഗ്ഗലോ’’തി, നോ ച വത രേ വത്തബ്ബേ – ‘‘കായോതി വാ സരീരന്തി വാ, സരീരന്തി വാ കായോതി വാ, കായം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, വുത്തം ഭഗവതാ – ‘അത്ഥി പുഗ്ഗലോ അത്തഹിതായ പടിപന്നോ’’’തി. യം തത്ഥ വദേസി – ‘‘വത്തബ്ബേ ഖോ – ‘കായോതി വാ സരീരന്തി വാ, സരീരന്തി വാ കായോതി വാ, കായം അപ്പിയം കരിത്വാ ഏസേസേ ഏകട്ഠേ സമേ സമഭാഗേ തജ്ജാതേ, വുത്തം ഭഗവതാ – അത്ഥി പുഗ്ഗലോ അത്തഹിതായ പടിപന്നോ,’ നോ ച വത്തബ്ബേ – ‘അഞ്ഞോ കായോ അഞ്ഞോ പുഗ്ഗലോ’’’തി മിച്ഛാ. (സംഖിത്തം)

പഞ്ഞത്താനുയോഗോ.