൬. ഛപ്പച്ചയവിഭാഗ-ഛട്ഠപരിച്ഛേദ

പത്ഥാരനയ

൧൨൯. പത്ഥാരേ സബ്ബഗേ പാദേ, പുബ്ബഗാ’ധോ ല്പ’രേ സമാ;

പുബ്ബേ ഗരു തേ ച മിമേ, കത്തബ്ബാ യാവ സബ്ബലാ.

നട്ഠനയ

൧൩൦. നട്ഠസ്സ യോ ഭവേയ്യ’ങ്കോ, തസ്മിം ലോ’ദ്ധികതേ സമേ;

വിസമേ ത്വേ’കസഹിതേ, ഭവേയ്യ’ദ്ധികതേ ഗരു.

ഉദ്ദിട്ഠനയ

൧൩൧. ഏകാ’ദിനുക്കമേന’ങ്കേ, പുബ്ബാധോ ദ്വിഗുണേ ലിഖേ;

മിസ്സകേഹി ലഹുട്ഠേഹി, സേ’കേഹു’ദ്ദിട്ഠകം ഭവേ.

സബ്ബഗലക്രിയനയ

൧൩൨. വുത്ത’ക്ഖര സമാ സങ്ഖ്യാ, ലിക്ഖ്യ സേകോ’പരൂ’പരി;

ഏകേകഹീന മേകാദി, നു’ട്ഠാനേ സബ്ബഗാദികം.

വുത്തസങ്ഖ്യാനയ

൧൩൩. ഗരുക്രിയാ’ങ്ക സന്ദോഹേ, ഭവേ സങ്ഖ്യാ വിമിസ്സിതേ;

ഉദ്ദിട്ഠ’ങ്ക സമാഹാരോ, സേ’കോ വേ’മം സമാ’നയേ.

വുത്തഅദ്ധാനയ

൧൩൪. സങ്ഖ്യേവ ദ്വിഗുണേ’കൂനാ, വിത്ഥാരാ’യാമസമ്ഭവാ;

വുത്തസ്സ’ദ്ധ’ന്തരാനഞ്ച, ഗരുലാനഞ്ച അങ്ഗുലം.

ഇതി വുത്തോദയേ ഛന്ദസി ഛപ്പച്ചയവിഭാഗോ നാമ

ഛട്ഠോ പരിച്ഛേദോ.

നിഗമന

൧൩൫. സേല’ന്തരാ’യതന വാസിക സീല’ത്ഥേര,

പാദോ ഗരു ഗ്ഗുണഗരു ജ്ജയതം മമേ’സോ;

യസ്സ പ്പഭാവ’മവലമ്ബ മയേ’ദിസോപി,

സമ്പാദിതോ’ഭിമത സിദ്ധികരോ പരത്ഥോ.

൧൩൬. പരത്ഥ സമ്പാദനതോ, പുഞ്ഞേനാ’ധിഗതേന’ഹം;

പരത്ഥ സമ്പാദനകോ, ഭവേയ്യം ജാതി ജാതിയം.

൧൩൭. അവലോകിത മത്തേന, യഥാ ഛപ്പച്ചയാ മയാ;

സാധിതാ സാധയന്തേ’വ, മിച്ഛിതത്ഥമ്പി പാണിനോതി.

ഇതി സങ്ഘരക്ഖിതമഹാസാമിത്ഥേരേന വിരചിതം

വുത്തോദയപ്പകരണം പരിനിട്ഠിതം.