൨. തേചീവരികങ്ഗകഥാവണ്ണനാ

൨൫. ചതുത്ഥകചീവരന്തി നിവാസനപാരുപനയോഗ്യം ചതുത്ഥകചീവരന്തി അധിപ്പായോ, അംസകാസാവസ്സ അപ്പടിക്ഖിപിതബ്ബതോ. അഞ്ഞതരവചനേനാതി ഏത്ഥ യം വത്തബ്ബം, തം ഹേട്ഠാ വുത്തനയമേവ. യാവ ന സക്കോതി, യാവ ന ലഭതി, യാവ ന സമ്പജ്ജതീതി പച്ചേകം യാവ-സദ്ദോ സമ്ബന്ധിതബ്ബോ. ന സമ്പജ്ജതീതി ന സിജ്ഝതി. നിക്ഖിത്തപച്ചയാ ദോസോ നത്ഥീതി നിചയസന്നിധിധുതങ്ഗസംകിലേസദോസോ നത്ഥി. ആസന്നേതി ചീവരസ്സ ആസന്നേ ഠാനേ. രജനക്ഖണേ പരിഭുഞ്ജനകാസാവം രജനകാസാവം. തത്രട്ഠകപച്ചത്ഥരണം നാമ അത്തനോ, പരസ്സ വാ സന്തകം സേനാസനേ പച്ചത്ഥരണവസേന അധിട്ഠിതം. ‘‘അംസകാസാവം പരിക്ഖാരചോളം ഹോതി, ഇതി പച്ചത്ഥരണം, അംസകാസാവന്തി ഇമാനി ദ്വേപി അതിരേകചീവരട്ഠാനേ ഠിതാനിപി ധുതങ്ഗഭേദം ന കരോന്തീ’’തി അട്ഠകഥായം വുത്തന്തി വദന്തി. പരിഹരിതും പന ന വട്ടതീതി രജനകാലേ ഏവ അനുഞ്ഞാതത്താ നിച്ചപരിഭോഗവസേന ന വട്ടതി തേചീവരികസ്സ. അംസകാസാവന്തി ഖന്ധേ ഠപേതബ്ബകാസാവം. കായപരിഹാരികേനാതി വാതാതപാദിപരിസ്സയതോ കായസ്സ പരിഹരണമത്തേന. സമാദായേവാതി ഗഹേത്വാ ഏവ. അപ്പസമാരമ്ഭതാതി അപ്പകിച്ചതാ. കപ്പിയേ മത്തകാരിതായാതി നിസീദനാദിവസേന, പരിക്ഖാരചോളവസേന ച ബഹൂസു ചീവരേസു അനുഞ്ഞാതേസുപി തിചീവരമത്തേ ഠിതത്താ. സഹ പത്തചരണായാതി സപത്തചരണോ. പക്ഖീ സപക്ഖകോ.

ഇതി തേചീവരികങ്ഗകഥാവണ്ണനാ.