൩൨. സുവണ്ണതിലകായ വത്ഥുമ്ഹി അയമാനുപുബ്ബീകഥാ

ലങ്കാദീപേ കിര അനുരാധപുരനഗരേ ഏകോ മാതുഗാമോ [ഏകാമാതുഗാമാതിവാ ഏകാമാതുഗാമോതിവാ കത്ഥചി] സദ്ധാസമ്പന്നാ നിച്ചം അഭയുത്തരചേതിയേ പുപ്ഫപൂജം കരോതി, അഥേകദിവസം സാ അത്തനോ ധീതുയാ സദ്ധിം തസ്മിം ചേതിയേ പുപ്ഫപൂജനത്ഥായ [പുപ്ഫപൂജത്ഥായ ഇതികത്ഥചി] ഗന്ത്വാ പുപ്ഫാസനസാലായ ഉദകം അപസ്സന്തീ ധീതു ഹത്ഥേ പുപ്ഫചങ്ഗോടകം ഠപേത്വാ ഘട മാദായ പോക്ഖരണിം അഗമാസി, തതോ സാ ദാരികാ മാതരി അനാഗതായയേവ [അനാഗതേയേവ ഇതിസബ്ബത്ഥ] അധോതാസനേ പുപ്ഫമുട്ഠിംഗഹേത്വാ മണ്ഡലം കത്വാ പൂജേത്വാ ഏവം പത്ഥനമകാസി. തഥാ ഹി.

൧. മഹാവീരസ്സ ധീരസ്സ, സയമ്ഭുസ്സ മഹേസിനോ;

തിലോകഗ്ഗസ്സ നാഥസ്സ, ഭഗവന്തസ്സ സത്ഥുനോ.

൨. യ മഹം പൂജയിം പുപ്ഫം, തസ്സ കമ്മസ്സ വാഹസാ;

രൂപീനം പവരാ ഹേസ്സം, ആരോഹപരിണാഹവാ.

൩. മം ദിസ്വാ പുരിസാ സബ്ബേ, മുച്ഛന്തു കാമമുച്ഛിതാ;

നിച്ഛരന്തു സരീരാ മേ, രംസിമാലീവ രംസിയോ.

൪. ഹദയങ്ഗമാ കണ്ണസുഖാ, മഞ്ജുഭാണീ സുഭാ മമ;

കിന്നരാനം യഥാ വാണീ, ഏവമേവ പവത്തതൂതി.

അഥസ്സാ മാതാ ആഗമ്മ അധോതാസനേ പൂജിതാനി പുപ്ഫാനി ദിസ്വാ കസ്മാ ചണ്ഡാലീ അധോതാസനേ ഭഗവതോ പുപ്ഫാനി പൂജേസി, അയുത്തം തയാ കതന്തി ആഹ, തം സുത്വാ സാ മാതുയാ കുജ്ഝിത്വാ ത്വം ചണ്ഡാലീതി അക്കോസി, സാ ഏത്തകം പുഞ്ഞാപുഞ്ഞം കത്വാ അപരഭാഗേ തതോ ചുതാ ജമ്ബുദീപേ ഉത്തരമധുരായം ഏകസ്സ ചണ്ഡാലഗന്ധബ്ബബ്രാഹ്മണസ്സ ധീതാ ഹുത്വാ നിബ്ബത്തി, ഉത്തമരൂപധരാ അഹോസി, തസ്സാ സരീരതോ മേഘമുഖതോ വിജ്ജുല്ലതാവിയ രംസിയോ നിച്ഛരന്തി. സമന്താ ചതുഹത്ഥട്ഠാനേ സരീരപ്പഭായ അന്ധകാരേ വിധമതി. മുഖതോ ഉപ്പലഗന്ധോ വായതി, കായതോ ചന്ദനഗന്ധോ, തസ്സാ ദ്വിന്നം ഥനാന മന്തരേ സുവണ്ണവണ്ണം ഏകം തിലകം അഹോസി, തേന ബാലസുരിയസ്സ വിയ പഭാ നിച്ഛരതി. ദിട്ഠദിട്ഠാ യേഭുയ്യേന ഉമ്മത്താ വിയ കാമമദേന വിസഞ്ഞിനോ ഹോന്തി, അഹോ കുസലാകുസലാനം ആനുഭാവോ. തഥാ ഹി.

൫. യേന സാ കോധസാമാതു, ചണ്ഡാലീ ഇതി ഭാസിതാ;

തേന സാ ആസി ചണ്ഡാലീ, ജേഗുച്ഛാ ഹീനജാതികാ.

൬. സല്ലക്ഖേത്വാന സമ്ബുദ്ധ, ഗുണം പൂജേസി യം തദാ;

തേന പുഞ്ഞാനുഭാവേന, സാ ഭിരൂപീ മനോരമാ.

൭. യേന യേന പകാരേന, പുഞ്ഞപാപാനി യോ കരേ;

തസ്സ തസ്സാനുരൂപേന, മോരോവ ലഭതേ ഫലം.

൮. പാപേന ച തിരച്ഛാനേ, ജായന്തി കുസലേന തേ;

വണ്ണപോക്ഖരതാ ഹോതി, മോരാനം കമ്മ മീദിസന്തി.

തതോ തസ്സാ മാതാപിതരോ സുവണ്ണതിലകാതി നാമ മകംസു. തസ്മിംകിര നഗരേ മനുസ്സാ തസ്സാ രുപദസ്സനേനച സവണേനച സമ്പത്താപി ചണ്ഡാലധീതാ അയന്തി പരിഭവഭയേന ആവാഹം ന കരോന്തി. അഥ തസ്മിം നഗരേ ജേട്ഠചണ്ഡാലബ്രാഹ്മണസ്സ പുത്തോ ഏതമത്ഥായ തസ്സാ മാതാപിതുന്നം സന്തികം വത്ഥാഭരണഗന്ധമാലാദയോ പേസേസി സുവണ്ണതിലകം അമ്ഹാകം ദദന്തൂതി, തേ തം പവത്തിം തസ്സാ ആരോചേസും. സാസ്സ ജിഗുച്ഛന്തീ പരിഹാസ മകാസി. തതോ ബ്രാഹ്മണസ്സ പുത്തോ ലജ്ജിതോ രഞ്ഞോ സന്തികം ഗന്ത്വാ വീണം മുഞ്ചേത്വാ ഗായമാനോ ഏവമാഹ.

൯. ലലനാ നനാനീ ചലലോചനാനീ,

തരുണാ രുണാനീ ചലിതാധരാണീ;

മനുജോ ഹി യോ നേത്തപിയം കരോതി,

സ തു നീചജാതിം അപി നോ ജഹാതി.

കിമിദന്തി രഞ്ഞാ പുട്ഠോ ആഹ.

൧൦. സമേതി കിം ദേവ ഛമായ മത്തികാ,

കദാചി ചാമീകരജാതികായ;

സിഗാലധേനു അപി നീചജാതികാ,

സമേതി കിംസീഹവരേന ദേവാതി.

ഏവഞ്ച പന വത്വാ ദേവ ഇമസ്മിംനഗരേ സുവണ്ണതിലകാ നാമേകാ ചണ്ഡാലധീതാ അത്ഥി, സാ സമാനജാതികേഹി പേസിതപണ്ണാകാരം ന ഗണ്ഹാതി, കുലവന്തേയേവ പത്ഥേതി, കദാ നാമ കാകീ സുവണ്ണഹംസേന സമാഗച്ഛതി ദേവാതി. രാജാ തം സുത്വാ തസ്സാ പിതരം പക്കോസാപേത്വാ തമത്ഥം വത്വാ സച്ചം ഭണേതി പുച്ഛി, സോപി സച്ചം ദേവ, സാ ജാതിസമ്പന്നമേവ കാമേതീതി ആഹ. രാജാ ഏവം സതി ഭണേ പഞ്ചമധുരനഗരേ ഉദ്ദാളബ്രാഹ്മണോ നാമ അത്ഥി, സോ ജാതിസമ്പന്നോ മാതിതോച പിതിതോച അനുപക്കുട്ഠോ, ജേഗുച്ഛാ പടിക്കൂലാ ഏതാതി മാതുഗാമേന സദ്ധിം ന സംവസതി. അത്തനോ ഗേഹതോ രാജഗേഹം ഗച്ഛന്തോച ആഗച്ഛന്തോ ച സോളസഖീരോദകഘടേഹി മഗ്ഗേ സിഞ്ചാപേസി. മാതുഗാമേ ദിസ്വാ കാലകണ്ണീ മയാ ദിട്ഠാതി ഖീരോദകേന മുഖം ധോവതി. തവ ധീതാ സക്കോന്തീ തേന സദ്ധിം സംവസതു, ഏതമത്ഥം തവ ധീതരം കഥേഹീതി ആഹ, സോപി തം സുത്വാ ഗേഹം ഗന്ത്വാ ധീതരം പക്കോസിത്വാ രഞ്ഞാ വുത്തനിയാമേനേവ തസ്സാ കഥേസി. തായ തം സുത്വാ സക്കോന്തീ അഹം ഉദ്ദാളബ്രാഹ്മണേന സദ്ധിം വസിസ്സാമി, മാ തുമ്ഹേ ചിന്തേഥ, പപഞ്ചമ്പി മാ കരോഥ, പാതോവ ഗമിസ്സാമീതി വുത്തേ പിതാ പനസ്സാ സാധൂതി സഹസ്സഗ്ഘനകചിത്തകമ്ബലകഞ്ചുകേന ധീതു സരീരം പാരുപാപേത്വാ വീണാദിതുരിയഭണ്ഡാനി ഗാഹാപേത്വാ ധീതുയാ സദ്ധിം അദ്ധാനമഗ്ഗം പടിപജ്ജി. ഗച്ഛന്തോ അന്തരാമഗ്ഗേ അഞ്ഞതരസ്മിം നഗരേ രഞ്ഞോ ഗന്ധബ്ബം കരോന്തോ ധീതരം പിട്ഠിപസ്സേ നിസീദാപേത്വാ ഗന്ധബ്ബമകാസി. അഥസ്സ പിട്ഠിപസ്സനിസിന്നാ സുവണ്ണതിലകാ നയനകോടിയാ ദിട്ഠിം പാപേന്തീ സരസേന തം ഓലോകേത്വാ പാരുതകഞ്ചുകം കിഞ്ചി അപനേത്വാ സരീരപ്പഭം പഞ്ഞാപേസി, രാജാ പനസ്സാ സരീരപ്പഭംച രൂപസമ്പദംച ദിസ്വാ കാമാതുരോ വിഗതസഞ്ഞോ സമ്മൂള്ഹോ ഹുത്വാ മുഹുത്തേന പടിലദ്ധസ്സാസോ തസ്സാ സസ്സാമികാസ്സാമികഭാവം പുച്ഛിത്വാ ചണ്ഡാലധീതാതി സുത്വാ പരിഭവഭയേന തം ആനേതു മസക്കോന്തോ ഏവരൂപം വണ്ണപോക്ഖരസമ്പന്നം ഇത്ഥിരതനം അലഭന്തസ്സ മേ കോ അത്ഥോ ജീവിതേനാതി സോചന്തോ പരിദേവന്തോ കാമമുച്ഛിതോ കത്തബ്ബാ കത്തബ്ബം അജാനന്തോ അസിം ഗഹേത്വാ അത്തനോ സീസം സയമേവ ഛിന്ദിത്വാ കാല മകാസി. ഏവമേവ അന്തരാമഗ്ഗേ പഞ്ചരാജാനോ തസ്സാ രൂപസമ്പത്തിമദമത്താ അസിനാ ഛിന്നസീസാ ജീവിതക്ഖയം പാപുണിംസു. തഥാ ഹി സത്താ ഹിരഞ്ഞസുവണ്ണദാസിദാസ പുത്തദാരാദീസു [പുത്തദാരാദീഹി ഇതിസബ്ബത്ഥ] പിയം നിസ്സായ കാമേന മുച്ഛിതാ അനയബ്യസനം പാപുണന്തീതി. വുത്തഞ്ഹേതം ഭഗവതാ.

൧൧. പിയതോ ജായതേ സോകോ,

പിയതോ ജായതേ ഭയം;

പിയതോ വിപ്പമുത്തസ്സ,

നത്ഥി സോകോ കുതോ ഭയം.

൧൨. പേമതോ ജായതേ സോകോ,

പേമതോ ജായതേ ഭയം;

പേമതോ വിപ്പമുത്തസ്സ,

നത്ഥി സോകോ കുതോ ഭയം.

൧൩. രതിയാ ജായതേ സോകോ,

രതിയാ ജായതേ ഭയം;

രതിയാ വിപ്പമുത്തസ്സ,

നത്ഥി സോകോ കുതോ ഭയം.

൧൪. കാമതോ ജായതേ സോകോ,

കാമതോ ജായതേ ഭയം;

കാമതോ വിപ്പമുത്തസ്സ,

നത്ഥി സോകോ കുതോ ഭയം.

൧൫. തണ്ഹായ ജായതേ സോകോ,

തണ്ഹായ ജായതേ ഭയം;

തണ്ഹായ വിപ്പമുത്തസ്സ,

നത്ഥി സോകോ കുതോ ഭയം.

തതോ സോ അനുക്കമേന പഞ്ചമധുരനഗരം ഗന്ത്വാ അത്തനോ ആഗതഭാവം രഞ്ഞാ കഥാപേത്വാ തേന അനുഞ്ഞാതോ ഗന്ത്വാ രാജാനം അദ്ദസ. തദാ ഉദ്ദാളബ്രാഹ്മണോ രഞ്ഞോ അവിദൂരേ കമ്ബലഭദ്ദപീഠേ നിസിന്നോ ഹോതി, ഗന്ധബ്ബബ്രാഹ്മണോപി ധീതുയാ സദ്ധിം ഗന്ധബ്ബം കുരുമാനോ നിസീദി. തസ്മിംഖണേ പിതു പിട്ഠിപസ്സേ നിസിന്നാ സുവണ്ണതിലകാ ഉദ്ദാളബ്രാഹ്മണോ കതമോതി പുച്ഛിത്വാ ഏതസ്മിം ഭദ്ദപീഠേ നിസിന്നോം ഏസോതി സുത്വാ നിലാമലലോചനേഹി തം ഓലോകന്തി ദസനരംസിനാ സമ്ഭിന്നസുരത്താധരേന മന്ദഹസിതം കരോന്തീ തം ഓലോകേത്വാ പാരുതകഞ്ചുകം അപനേത്വാ സരീരപ്പഭം വിസ്സജ്ജേസി. തം ദിസ്വാ ബ്രാഹ്മണോ ഉമ്മത്തോ സോകേന പരിദഡ്ഢഗത്തോ ഉണ്ഹവാതേന പൂരിതമുഖനാസോ അസ്സുനാ കിലിന്നനേത്തോ വിസഞ്ഞീ അഹോസി. തതോ സോ മുഹുത്തേന ലദ്ധസ്സാസോ രോഗീവിയ രഞ്ഞോ സകാസാ അപസരന്തോ അത്തനോ ഗേഹം ഗന്ത്വാ സുഹദേ പക്കോസിത്വാ തേസം ഏവമാഹ. ഭവന്തേത്ഥ.

൧൬. യോ ആപദേ സമുപ്പന്നേ,

ഉപതിട്ഠതി സന്തികേ;

സുഖദുക്ഖേ സമോ ഹോതി,

സോ മിത്തോ സോച ഞാതകോ.

൧൭. യോ ഗുണം ഭാസതേ യസ്സ, അഗുണഞ്ച നിഗൂഹതി;

പടിസേധേത്യ [പടിസേധേതികത്തബ്ബാ ഇതിസബ്ബത്ഥ] കത്തബ്ബാ, സോ മിത്തോ സോച ഞാതകോ.

൧൮. സുവണ്ണതിലകാനാമ, ലലനാ കാമലാലയാ;

നീലക്ഖിചണ്ഡകണ്ഡേഹി, വിഖണ്ഡേസി മനോ മമ.

൧൯. തസ്സാ മുഖമ്ബുജേ സത്താ, മമ നേത്തമധുബ്ബതാ,

അപ്പമ്പിന സരന്താമം, തത്ഥേവാ ഭിരമന്തി തേ.

൨൦. സഹേവ തേഹി മേ ചിത്തം, ഗതം ഉല്ലംഘിയുദ്ധതോ;

ലജ്ജാഗമ്ഭീരപരിഖം, ധിതിപാകാരമുഗ്ഗതം.

൨൧. സമ്മുയ്ഹാമി പമുയ്ഹാമി, സബ്ബാ മുയ്ഹന്തി മേ ദിസാ;

തസ്സ മേ സരണം ഹോഥ, കരോഥ മമ സങ്ഗഹന്തി.

തം സുത്വാ തേ ഏവമാഹംസു.

൨൨. യം ത്വമാചരിയ പത്ഥേസി, ചണ്ഡാലീ സാ അസങ്ഗമാ;

കിന്നു മീള്ഹേന സംയോഗോ, ചന്ദനസ്സ കദാ സിയാ.

൨൩. അഗമ്മഗമനാ യാതി, നരാനം ദൂരതോ സിരീ;

കിത്തിചായു ബലം ബുദ്ധി, അയസംച സ ഗച്ഛതീതി.

അഥ തേസം ബ്രഹ്മണോ ആഹ.

൨൪. ന പരിച്ചജതി ലോകോയം, അമേജ്ഝേ മണിമുത്തമം;

ഥീരതനം യുവാണീ ച, ദുക്കുലാ അപി ഗാഹിയാതി.

ഏവഞ്ച പന വത്വാ തസ്സാ സസ്സാമികാസ്സാമികഭാവം ഞത്വാ ആനേഥാതി ആഹ, തേ തഥാ അകംസു. തതോ ബ്രാഹ്മണോ തായ ഗേഹം ആഗതകാലതോ പട്ഠായ ചത്താരോ മാസേ രഞ്ഞോ ഉപട്ഠാനം നേവ അഗമാസി. തസ്സ പന ബ്രഹ്മണസ്സ സന്തികേ പഞ്ചസതരാജകുമാരാ നാനാവിധാനി സിപ്പാനി ഉഗ്ഗണ്ഹന്തി. തേ തം കാരണം ഞത്വാ സുവണ്ണതിലകായ വിജ്ജമാനായ അമ്ഹാകം സിപ്പുഗ്ഗഹണസ്സ അന്തരായോ ഭവിസ്സതി, യേന കേനചി ഉപായേന ഏതം മാരേതും വട്ടതീതി, ചിന്തേത്വാ തേ ഹത്ഥാ ചരിയം പക്കോസിത്വാ ലഞ്ജം ദത്വാ ഏവമാഹംസു, ഹത്ഥിം സുരായ മത്തം കത്വാ സുവണ്ണതിലകം മാരേഹീതി. തതോ തേ സബ്ബേ രാജങ്ഗണേ സന്നിപതിത്വാ ദൂതം പാഹേസും, ആചരിയം ദട്ഠുകാമമ്ഹാതി. തതോ ബ്രാഹ്മണേന ആഗന്ത്വാ നിസിന്നേന പടിസന്ഥാരം കത്വാ ആചരിയ ആചരിയാനിം പസ്സിതുകാമമ്ഹാതി ആഹംസു. അഥ സോ സുവണ്ണതിലകം ഗഹേത്വാ ആഗച്ഛഥാതി മനുസ്സേ പേസേസി. തേ തഥാ കരിംസു, അഥ തസ്സാ വീഥിമജ്ഝം സമ്പത്തകാലേ ഹത്ഥിം വിസ്സജ്ജാപേസും. സോ സോണ്ഡായ ഭൂമിയം പഹരന്തോ [പഹരന്തോഉപധാവിത്വാ ഇതികത്ഥചി] ഗച്ഛന്തോ ഉപധാവിത്വാ സോണ്ഡേന തം ഉക്ഖിപിത്വാ കുമ്ഭേ നിസീദാപേസി. തതോ രാജാനോ തഥാ തം മാരാപേതു മസക്കോന്താ പുന ദിവസേ മനുസ്സേ പയോജേത്വാ രത്തിയം മാരാപേസും. ബ്രാഹ്മണോപി ഏവരൂപം ഇത്ഥിം അലസിത്വാ ജീവനതോ മതമേവ [മതംമേസേയ്യോ ഇതികത്ഥചി] സേയ്യോതി സോചന്തോ പരിദേവന്തോ രാജങ്ഗണേ ദാരുചിതകം കാരാപേത്വാ അഗ്ഗിംപവിസിത്വാ മതോതി. ഏവം മാതുഗാമവസങ്ഗതാ മഹന്തം അനയബ്യസനഞ്ച മരണഞ്ച പാപുണന്തീതി. വുത്തഞ്ഹേതം ഭഗവതാ.

൨൫. മായാവേസാ [മായാചേസാ ഇതികത്ഥചി] മരീചീവ,

സോകോ രോഗോ ചുപദ്ദവോ;

ഖരാവ ബന്ധനാ ചേസാ,

മച്ചുപാസോ ഗുഹാസയോ;

താസു യോ വിസ്സസേ പോസോ,

സോ നരേസു നരാധമോതി.

൨൬. അയോനിസോ സാ പുരിമായ ജാതിയാ,

പുഞ്ഞം കരിത്വാ അലഭീദിസം ഗതിം;

ധീസമ്പയുത്തം [ധിതിസമ്പയുത്തം ഇതികത്ഥചി] കുസലം കരോന്താ,

നിബ്ബാണമേവാഭിമുഖം കരോഥാതി.

സുവണ്ണതിലകായ വത്ഥും ദുതിയം.