നിദാനസംയുത്ത

പടിച്ചസമുപ്പാദസുത്ത

പുച്ഛാ – തേനാവുസോ ഭഗവതാ…പേ… സമ്മാസമ്ബുദ്ധേന നിദാനവഗ്ഗസംയുത്തേ പഠമം സംഗീതം പടിച്ചസമുപ്പാദസുത്തം കത്ഥ തം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ പഞ്ചസതേ ജനപദവാസിനോ ഭിക്ഖൂ ആരബ്ഭ ഭാസിതം. പഞ്ചസതാ ഭന്തേ ജനപദവാസിനോ ഭിക്ഖൂ സബ്ബേ ഉഗ്ഘാടിതഞ്ഞുനോ ധുതങ്ഗധരാ ആരദ്ധവീരിയാ യുത്തയോഗാ വിപസ്സകാ സണ്ഹം സുഖുമം സുഞ്ഞതം പച്ചയാകാരധമ്മദേസനം പത്ഥയമാനാ ഭഗവന്തം അഭിവാദേത്വാ ഭഗവന്തം പരിവാരേത്വാ നിസീദിംസു. തസ്മിം വത്ഥുസ്മിം ‘‘പടിച്ചസമുപ്പാദം വോ ഭിക്ഖവേ ദേസേസ്സാമി, തം സുണാഥ സാധുകം മനസി കരോഥ, ഭാസിസ്സാമീ’’തി ഏവമാദിനാ ഭന്തേ ഭഗവതാ ഭാസിതം.

കതമോ ച ഭിക്ഖവേ പടിച്ചസമുപ്പാദോ. അവിജ്ജാപച്ചയാ ഭിക്ഖവേ സങ്ഖാരാ, സങ്ഖാരപച്ചയാ വിഞ്ഞാണം (പേയ്യാല) ജാതിപച്ചയാ ജരാമരണം സോകപരിദേവദുക്ഖദോമനസ്സുപാസാ സമ്ഭവന്തി, ഏവമേതസ്സ കേവലസ്സ ദുക്ഖന്ധസ്സ സമുദയോ ഹോതി. അയം വുച്ചതി ഭിക്ഖവേ പടിച്ചസമുപ്പാദോ.

അവിജ്ജായ ത്വേവ അസേസവിരാഗനിരോധോ സങ്ഖാരനിരോധോ (പേയ്യാല) ജാതിനിരോധാ ജരാമരണം സോകപരിദേവദുക്ഖദോമനസ്സുപായാസാ നിരുജ്ഝന്തി, ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതി –

വിഭങ്ഗസുത്ത

പുച്ഛാ – തത്ഥാവുസോ ദുതിയം സംഗീതം വിഭങ്ഗസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ പഞ്ചസതേ ജനപദവാസിനോ വിപഞ്ചിതഞ്ഞുനോ ഭിക്ഖൂ ആരബ്ഭ ഭാസിതം. പഞ്ചസതാ ഭന്തേ ജനപദവാസികാ ഭിക്ഖൂ വിപഞ്ചിതഞ്ഞുനോ ധുതങ്ഗധരാ ആരദ്ധവീരിയാ യുത്തയോഗാ വിസ്സകാ സണ്ഹം സുഖുമം സുഞ്ഞതപടിസംയുത്തം പച്ചയാകാരധമ്മദേസനം പത്ഥയമാനാ ഭഗവന്തം പരിവാരേത്വാ നിസീദിംസു. തസ്മിം വത്ഥുസ്മിം ‘‘പടിച്ച സമുപ്പാദം വോ ഭിക്ഖവേ ദേദേസ്സാമി വിഭജിസ്സാമി, തം സുണാഥ സാധുകം മനസികരോഥ, ഭാസിസ്സാമീ’’തി ഏവമാദിനാ ഭന്തേ ഭഗവതാ ഭാസിതം.

പഞ്ചവേരഭയസുത്ത

പുച്ഛാ – പഞ്ചവേരഭയസുത്തം പനാവുസോ ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ അനാഥപിണ്ഡികം ഗഹപതിം ആരബ്ഭ ‘‘യതോ ഖോ ഗഹപതി അരിയസാവകസ്സ പഞ്ച ഭയാനി വേരാനി വൂപസന്താനി ഹോന്തി, ചതൂഹി ച സോതാപത്തിയങ്ഗേഹി സമന്നാഗതോ ഹോതി, അരിയോ ചസ്സ ഞായോ പഞ്ഞായ സുദിട്ഠോ ഹോതി സുപ്പടിവിദ്ധോ, സോ ആകങ്ഖമാനോ അത്തനാവ അത്താനം ബ്യാകരേയ്യ ഖീണനിരയോമി ഖീണതിരച്ഛാനയോനി ഖീണപേത്തിവിസയോ ഖീണാപായദുഗ്ഗതിവിനിപാതോ, സോതാപന്നോഹമസ്മി അവിനിപാതധമ്മോ നിയതോ സമ്ബോധിപരായനോ’’തി ഏവം ഖോ ഭന്തേ ഭഗവതാ ഭാസിതം.

പുച്ഛാ – കഥഞ്ചാവുസോതത്ഥ ഭഗവതാ അരിയസാവകസ്സ പഞ്ചന്നം ഭയാനം വേരാനം വൂപസന്തതാ പകാസിതാ.

വിസ്സജ്ജനാ – ‘‘കതമാനി പഞ്ച ഭയാനി വേരാനി വൂപസന്താനി ഹോന്തി. യം ഗഹപതി പാണാതിപാതീ പാണാതിപാതപച്ചയാ ദിട്ഠധമ്മികമ്പി ഭയം വേരം പസവതി, സമ്പരായികമ്പി ഭയം വേരം പസവതി, ചേതസികമ്പി ദുക്ഖം ദോമനസ്സം പടിസംവേദയതി. പാണാതിപാതാ ടിവിരതസ്സ ഏവം തം ഭയം വേരം വൂപസന്തം ഹോതീ’’തി ഏവമാദിനാ ഭന്തേ തത്ഥ ഭഗവതാ അരിയസാവകസ്സ പഞ്ചന്നം ഭയാനം വേരാനം വൂപസന്തതാ പകാസിതാ.

പുച്ഛാ – കഥഞ്ചാവുസോ തത്ഥ ഭഗവതാ അരിയസാവകസ്സ ചതൂഹി സോതാപത്തിയങ്ഗേഹി സമന്നാഗതതാ പകാസിതാ.

വിസ്സജ്ജനാ – കതമേഹി ചതൂഹി സോതാപത്തിയങ്ഗേഹി സമന്നാഗതോ ഹോതി. ഇധ ഗഹപതി അരിയസാവകോ ബുദ്ധേ അവേച്ചപ്പസാദേന സമന്നാഗതോ ഹോതി ‘‘ഇതിപിസോ ഭഗവാ അരഹം സമ്മാസമ്ബുദ്ധോ വിജ്ജാചരണസമ്പന്നോ സുഗതോ ലോകവിദൂ അനുത്തരോപുരിസദമ്മസാരഥി സത്ഥാദേവമനുസ്സാനം ബുദ്ധോ ഭഗവാ’’തി ഏവമാദിനാ ഭന്തേ തത്ഥ ഭഗവതാ അരിയസാവകസ്സ ചതൂഹി സോതാപത്തിയങ്ഗേഹി സമന്നാഗതതാ പകാസിതാ.

പുച്ഛാ – കഥഞ്ചാവുസോ തത്ഥ ഭഗവതാ അരിയസാവകേന അരിയസ്സ ഞായസ്സ പഞ്ഞായ സുദിട്ഠതാ സുപ്പടിവിദ്ധതാ പകാസിതാ.

വിസ്സജ്ജനാ – കതമോ ചസ്സ അരിയോ ഞായോ പഞ്ഞായ സുദിട്ഠോ ഹോതി സുപ്പടിവിദ്ധോ. ഇധ ഗഹപതി അരിയസാവകോ പടിച്ചസമുപ്പാദഞ്ഞേവ സാധുകം യോനിസോ മനസി കരോതി ‘‘ഇതി ഇമസ്മിം സതി ഇദം ഹോതി, ഇമസ്മിം അസതി ഇദം ന ഹോതി, ഇമസ്സുപ്പാദാ ഇദം ഉപ്പജ്ജതി, ഇമസ്സ നിരോധാ ഇദം നിരുജ്ഝതി, യദിദം അവിജ്ജാപച്ചയാ (പേയ്യാല) ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതീ’’തി, ഏവം ഖോ ഭന്തേ ഭഗവതാ തത്ഥ അരിയസാവകേന അരിയസ്സ ഞായസ്സ പഞ്ഞായ സുദിട്ഠതാ സുപ്പടിവിദ്ധതാ പകാസിതാ.

യതോ ഖോ ഗഹപതി അരിയസാവകസ്സ ഇമാനി പഞ്ച ഭയാനി വേരാനി വൂപസന്താനി ഹോന്തി. ഇമേഹി ചതൂഹി സോതാപത്തിയങ്ഗേഹി സമന്നാഗതോ ഹോതി. അയഞ്ചസ്സ അരിയോ ഞായോ പഞ്ഞായ സുദിട്ഠോ ഹോതി സുപ്പടിവിദ്ധോ–

ദുക്ഖസുത്ത

പുച്ഛാ – ദുക്ഖസുത്തം പനാവുസോ ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ ‘‘ദുക്ഖസ്സ ഭിക്ഖവേ സമുദയഞ്ച അത്ഥങ്ഗമഞ്ച ദേസേസ്സാമീ’’തി ഏവമാദിനാ ഭഗവതാ ഭാസിതം.

പുച്ഛാ – കഥഞ്ചാവുസോ തത്ഥ ഭഗവതാ ദുക്ഖസമുദയോ പകാസിതോ.

വിസ്സജ്ജനാ – കതമോ ച ഭിക്ഖവേ ദുക്ഖസ്സ സമുദയോ. ചക്ഖുഞ്ച പടിച്ച രൂപേ ച ഉപ്പജ്ജതി ചക്ഖുവിഞ്ഞാണം, തിണ്ണം സങ്ഗതി ഫസ്സോ, ഫസ്സപച്ചയാ വേദനാ, വേദനാപച്ചയാ തണ്ഹാ. അയം ഖോ ഭിക്ഖവേ ദുക്ഖസ്സ സമുദയോ. സോതഞ്ച പടിച്ച സദ്ദേ ച ഉപ്പജ്ജതി സോതവിഞ്ഞാണം…പേ… ഘാനഞ്ച പടിച്ച ഗന്ധേ ച…പേ… ജിവ്ഹഞ്ച പടിച്ച രസേ ച…പേ… കായഞ്ച പടിച്ച ഫോട്ഠബ്ബേ ച…പേ… മനഞ്ച പടിച്ച ധമ്മേ ച ഉപ്പജ്ജതി മനോവിഞ്ഞാണം, തിണ്ണം സങ്ഗതി ഫസ്സോ, ഫസ്സപച്ചയാ വേദനാ, വേദനാപച്ചയാ തണ്ഹാ. അയം ഖോ ഭിക്ഖവേ ദുക്ഖസ്സ സമുദയോതി ഏവംഖോ ഭന്തേ തത്ഥ ഭഗവതാ ദുക്ഖസ്സ സമുദയോ പകാസിതോ.

പുച്ഛാ – കഥഞ്ചാവുസോ തത്ഥ ഭഗവതാ ദുക്ഖസ്സ അത്ഥങ്ഗമോ പകാസിതോ.

വിസ്സജ്ജനാ – കതമോ ച ഭിക്ഖവേ ദുക്ഖസ്സ അത്ഥങ്ഗമോ. ചക്ഖുഞ്ച പടിച്ച രൂപേ ച ഉപ്പജ്ജതി ചക്ഖുവിഞ്ഞാണം, തിണ്ണം സങ്ഗതി ഫസ്സോ, ഫസ്സപച്ചയാ വേദനാ, വേദനാപച്ചയാ തണ്ഹാ, തസ്സായേവ തണ്ഹായ അസേസവിരാഗനിരോധാ ഉപാദാനനിരോധോ ഉപാദാനനിരോധാ ഭവനിരോധോ, ഭവനിരോധാ ജാതിനിരോധോ, ജാതിനിരോധാ ജരാമരണം സോകപരിദേവദുക്ഖദോമനസ്സുപായാസാ നിരുജ്ഝന്തി. ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതീതി ഏവമാദിനാ ഭന്തേ തത്ഥ ഭഗവതാ ദുക്ഖസ്സ അത്ഥങ്ഗമോ പകാസിതോ.

പുത്തമംസൂപമസുത്ത

പുച്ഛാ – പുത്തമംസൂപമസുത്തം പനാവുസോ ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ അധുനാ പബ്ബജിതേ ഭിക്ഖൂ ആരബ്ഭ ഭാസിതം. ഭഗവതോ ച ഭന്തേ ഭിക്ഖുസങ്ഘസ്സ ച മഹാലാഭസക്കാരോ ഉദപാദി, ഏകച്ചേ ച ഭന്തേ ഭിക്ഖൂ നവാ അചിരപബ്ബജിതാ കുലപുത്താ ആഹാരം അപച്ചവേക്ഖിത്വാ പരിഭുഞ്ജിംസു. തസ്മിം ഭന്തേ വത്ഥുസ്മിം ‘‘ചത്താരോമേ ഭിക്ഖവേ ആഹാരാ ഭൂതാനം വാ സത്താനം ഠിതിയാ സമ്ഭവേസീനം വാ അനുഗ്ഗഹായ. കതമേ ചത്താരോ കബളീകാരോ ആഹാരോ ഓളാരികോ വാ സുഖുമോ വാ ഫസ്സോ ദുതിയോ മനോസഞ്ചേതനാ തതിയാ വിഞ്ഞാണം ചതുത്ഥ’’ന്തി ഏവം ഖോ ഭന്തേ ഭഗവതാ ഭാസിതം.

പുച്ഛാ – കഥഞ്ചാവുസോ തത്ഥ കബളീകാരസ്സ ആഹാരസ്സ ദട്ഠബ്ബാകാരോ ഭഗവതാ പകാസിതോ.

വിസ്സജ്ജനാ – സേയ്യഥാപി ഭിക്ഖവേ ദ്വേ ജായമ്പതികാ പരിത്തം സമ്ബലം ആദായ കന്താരമഗ്ഗം പടിപജ്ജേയ്യും. തേസമസ്സ ഏകപുത്തകോ പിയോ മനാപോതി ഏവമാദിനാ ഭന്തേ തത്ഥ ഭഗവതാ കബളീകാരസ്സ ആഹാരസ്സ ദട്ഠബ്ബാകാരോ പകാസിതോ.

പുച്ഛാ – കഥഞ്ചാവുസോ തത്ഥ ഭഗവതാ ഫസ്സാഹാരസ്സ ദട്ഠബ്ബാകാരോ പകാസിതോ.

വിസ്സജ്ജനാ – സേയ്യഥാപി ഭിക്ഖവേ ഗാവീ നിച്ചമ്മാ കുട്ടം ചേ നിസ്സായ തിട്ഠേയ്യ, യേ കുട്ടനിസ്സിതാ പാണാ, തേ നം ഖാദേയ്യും. രുക്ഖം ചേ നിസ്സായ തിട്ഠേയ്യ. ഉദകം ചേ നിസ്സായ തിട്ഠേയ്യ. ആകാസം ചേ നിസ്സായ തിട്ഠേയ്യ, യേ ആകാസനിസ്സിതാ പാണാ, തേ നം ഖാദേയ്യുന്തി ഏവമാദിനാ ഭന്തേ തത്ഥ ഭഗവതാ ഫസ്സസ്സ ആഹാരസ്സ ദട്ഠബ്ബാകാരോ വിത്ഥാരേത്വാ പകാസിതോ.

ഏവമേവ ഖ്വാഹം ഭിക്ഖവേ ഫസ്സാഹാരോ ദട്ഠബ്ബോതി വദാമി.

പുച്ഛാ – കഥഞ്ചാവുസോ തത്ഥ ഭഗവതാ മനോസഞ്ചേതനാഹാരസ്സ ദട്ഠബ്ബാകാരോ പകാസിതോ.

വിസ്സജ്ജനാ – സേയ്യഥാപി ഭിക്ഖവേ അങ്ഗാരകാസു സാധികപോരിസാ പുണ്ണാ അങ്ഗാരാനം വീതച്ചികാനം വീതധൂമാനം. അഥ പുരിസോ ആഗച്ഛേയ്യ ജീവിതുകാമോ അമരിതുകാമോ സുഖ കാമോ ദുക്ഖപ്പടികൂലോതി ഏവമാദിനാ ഭന്തേ തത്ഥ ഭഗവതാ മനോസഞ്ചേതനാഹാരസ്സ ദട്ഠബ്ബാകാരോ വിത്ഥാരേന പകാസിതോ.

പുച്ഛാ – കഥഞ്ചാവുസോ തത്ഥ ഭഗവതാ വിഞ്ഞാണാഹാരസ്സ ദട്ഠബ്ബാകാരോ പകാസിതോ.

വിസ്സജ്ജനാ – സേയ്യഥാപി ഭിക്ഖവേ ചോരം ആഗുചാരിം ഗഹേത്വാ രഞ്ഞോ ദസ്സേയ്യും ‘‘അയം തേ ദേവചോരോ ആഗുചാരീ, ഇമസ്സ യം ഇച്ഛസി, തം ദണ്ഡം പണേഹീ’’തി ഏവമാദിനാ ഭന്തേ തത്ഥ ഭഗവതാ വിഞ്ഞാണാഹാരസ്സ ദട്ഠബ്ബാകാരോ പകാസിതോ.

സുസിമപരിബ്ബാജകസുത്ത

പുച്ഛാ – തേനാവുസോ ഭഗവതാ…പേ… സമ്മാസമ്ബുദ്ധേന സുസിമപരിബ്ബാജക സുത്തം കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – രാജഗഹേ ഭന്തേ ആയസ്മന്തം സുസിമം ആരബ്ഭ ഭാസിതം. ആയസ്മാ ഭന്തേ സുസിമോ യാവതകോ ഭിക്ഖൂഹി സദ്ധിം അഹോസി കഥാസല്ലാപോ, തം സബ്ബം ഭഗവതോ ആരോചേസി. തസ്മിം വത്ഥുസ്മിം ‘‘പുബ്ബേ ഖോ സുസിമ ധമ്മട്ഠിതിഞാണം, പച്ഛാ നിബ്ബാനേ ഞാണ’’ന്തി ഏവമാദിനാ ഭന്തേ ഭഗവതാ ഭാസിതം.

പുച്ഛാ – കഥഞ്ചാവുസോ തത്ഥ ഭഗവാ ആയസ്മതോ സുസിമത്ഥേരസ്സ സമ്പതിഅരഹത്തപത്തസ്സ അനുയോഗവസേന പടിപുച്ഛിത്വാ പടിപുച്ഛിത്വാ ഉത്തരി ധമ്മദേസനം വിത്ഥാരേത്വാ ദേസേസി.

വിസ്സജ്ജനാ – ജാതിപച്ചയാ ജരാമരണന്തി സുസിമ പസ്സസീതി. ഏവം ഭന്തേ. ഭവപച്ചയാ ജാതീതി സുസിമ പസ്സസീതി. ഏവം ഭന്തേതി ഏവമാദിനാ ഭന്തേ ഭഗവാ തത്ഥ ആയസ്മതോ സുസിമസ്സ സമ്പതിഅരഹത്തപത്തസ്സ ഉത്തരിപി അനുയോഗവസേന പടിപുച്ഛിത്വാ പടിപുച്ഛിത്വാ വിത്ഥാരതോ ധമ്മം ദേസേസി.

തസ്സ മേ ഭന്തേ ഭഗവാ അച്ചയം അച്ചയതോ പടിഗ്ഗണ്ഹാതു ആയതിംസംവരായ–