ബ്രഹ്മസംയുത്ത

ഗാരവസുത്ത

പുച്ഛാ – ബ്രഹ്മസംയുത്തേ ആവുസോ പോരാണേഹി മഹാകസ്സപഥേരാദീഹി ധമ്മസംഗാഹകഥേരവരേഹി ദുതിയം സംഗീതം ഗാരവസുത്തം കത്ഥ കഥഞ്ച സമുപ്പന്നം.

വിസ്സജ്ജനാ – ഉരുവേലായം ഭന്തേ സമുപ്പന്നം. ഭഗവാ ഭന്തേ ഉരുവേലായം വിഹരതി നജ്ജാ നേരഞ്ജരായ തീരേ അജപാലനിഗ്രോധമൂലേ പഠമാഭിസമ്ബുദ്ധോ. അഥ ഖോ ഭഗവതോ രഹോഗതസ്സ പടിസല്ലീനസ്സ ഏവം ചേതസോ പരിവിതക്കോ ഉദപാദി ‘‘ദുക്ഖം ഖോ അഗാരവോ വിഹരതി അപ്പതിസ്സോ, കം നു ഖ്വാഹം സമണം വാ ബ്രാഹ്മണം വാ സക്കത്വാ ഗരും കത്വാ ഉപനിസ്സായ വിഹരേയ്യ’’ന്തി.

അഥ ഖോ ഭന്തേ ഭഗവതോ ഏതദഹോസി ‘‘അപരിപുണ്ണസ്സ ഖോ സീലക്ഖന്ധസ്സ പാരിപൂരിയാ അഞ്ഞം സമണം വാ ബ്രാഹ്മണം വാ സക്കത്വാ ഗരും കത്വാ ഉപനിസ്സായ വിഹരേയ്യും, ന ഖോ പനാഹം പസ്സാമി സദേവകേ ലോകേ സമാരകേ സബ്രഹ്മകേ സസ്സമണബ്രാഹ്മണിയാ പജായ സദേവമനുസ്സായ അത്തനാ സീലസമ്പന്നതരം അഞ്ഞം സമണം വാ

ബ്രാഹ്മണം വാ, യമഹം സക്കത്വാ ഗരും കത്വാ ഉപനിസ്സായ വിഹരേയ്യും.

അപരിപുണ്ണസ്സ ഖോ സമാധിക്ഖന്ധസ്സ;

അപരിപുണ്ണസ്സ ഖോ പഞ്ഞാക്ഖന്ധസ്സ;

അപരിപുണ്ണസ്സ ഖോ വിമുത്തിക്ഖന്ധസ്സ.

അപരിപുണ്ണസ്സ ഖോ വിമുത്തിഞാണദസ്സനക്ഖന്ധസ്സ പാരിപൂരിയാ അഞ്ഞം സമണം വാ ബ്രാഹ്മണം വാ സക്കത്വാ ഗരും കത്വാ ഉപനിനിസ്സായ വിഹരേയ്യം. ന ഖോ പനാഹം പസ്സാമി സദേവകേ ലോകേ സമാരകേ സബ്രഹ്മകേ സസ്സമണബ്രാഹ്മണിയാ പജായ സദേവമനുസ്സായ അത്തനാ വിമുത്തിഞാണദസ്സനസമ്പന്നതരം അഞ്ഞം സമണം വാ ബ്രാഹ്മണം വാ, യമഹം സക്കത്വാ ഗരും കത്വാ ഉപനിസ്സായ വിഹരേയ്യം. യംനൂനാഹം യ്വായം ധമ്മോ മയാ അഭിസമ്ബുദ്ധോ, തമേവ ധമ്മം സക്കത്വാ ഗരും കത്വാ ഉപനിസ്സായ വിഹരേയ്യ’’ന്തി. ഏവം ഖോ ഭന്തേ ഭഗവതോ ചേതസോ പരിവിതക്കവസേന ഉപ്പന്നം.

യേ ച അതീതാ സമ്ബുദ്ധാ, യേ ച ബുദ്ധാ അനാഗതാ;

യോ ചേതരഹി സമ്ബുദ്ധോ, ബഹൂനം സോകനാസനോ;

സബ്ബേ സദ്ധമ്മഗരുനോ, വിഹംസു വിഹരന്തി ച;

തഥാപി വിഹരിസ്സന്തി, ഏസാ ബുദ്ധാന ധമ്മതാ.

തസ്മാ ഹി അത്തകാമേന, മഹത്തമഭികങ്ഖതാ;

സദ്ധമ്മോ ഗരുകാതബ്ബോ, സരം ബുദ്ധാന സാസനം.

അഞ്ഞരതബ്രഹ്മസുത്ത

പുച്ഛാ- തത്ഥാവുസോ പോരാണകേഹി മഹാകസ്സപാദീഹി ധമ്മസംഗാഹകഥേരവരേഹി പഠമം സംഗീതം അഞ്ഞതരബ്രഹ്മസുത്തം കത്ഥ കം ആരബ്ഭ കിസ്മിം വത്ഥുസ്മിം കേന കഥഞ്ച ഭാസിതം.

വിസ്സജ്ജനാ – ബ്രഹ്മലോകേ ഭന്തേ അഞ്ഞതരം ബ്രഹ്മാനം ആരബ്ഭ ആയസ്മതാ മഹാമോഗ്ഗല്ലാനത്ഥേരേന ഭാസിതം. അഞ്ഞതരസ്സ ഭന്തേ ബ്രഹ്മുനോ ഏവരൂപം പാപകം ദിട്ഠിഗതം ഉപ്പന്നം ഹോതി ‘‘നത്ഥി സോ സമണോ വാ ബ്രാഹ്മണോ വാ, യോ ഇധ ആഗച്ഛേയ്യാ’’തി. തസ്മിം ഭന്തേ വത്ഥുസ്മിം–

അജ്ജാപി തേ ആവുസോ സാ ദിട്ഠി, യാ തേ ദിട്ഠി പുരേ അഹു;

പസ്സസി വീതിവത്തന്തം, ബ്രഹ്മലോകേ പഭസ്സരന്തി;

ഏവം ഖോ ഭന്തേ ആയസ്മതാ മഹാമോഗ്ഗല്ലാനത്ഥേരേന ഭാസിതം.

അജ്ജാപി തേ ആവുസോ സാ ദിട്ഠി, യാ തേ ദിട്ഠി പുരേ അഹു;

പസ്സസി വീതിവത്തന്ത, ബ്രഹ്മലോകേ പഭസ്സരം-ഹു–

ന മേ മാരിസ സാ ദിട്ഠി, യാ മേ ദിട്ഠി പുരേ അഹു;

പസ്സാമി വീതിവത്തന്തം, ബ്രഹ്മലോകേ പഭസ്സരം;

സ്വാഹം അജ്ജ കഥം വജ്ജം, അഹം നിച്ചോമ്ഹി സസ്സതോ ഹു–

തേവിജ്ജാ ഇദ്ധിപത്താ ച, ചേതോപരിയായ കോവിദാ;

ഖീണാസവാ അരഹന്തോ, ബഹൂ ബുദ്ധസ്സ സാവകാ-ഹു–

അരുണവതീസുത്ത

പുച്ഛാ – തത്ഥാവുസോ അരുണവതീസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ ‘‘ഭൂതപുബ്ബം ഭിക്ഖവേ രാജാ അഹോസി അരുണവാ നാമ. രഞ്ഞോ ഖോ പന ഭിക്ഖവേ അരുണവതോ അരുണവതീ നാമ രാജധാനീ അഹോസീ’’തി ഏവമാദിനാ ഭന്തേ ഭഗവതാ അരുണവതീ സുത്തം ഭാസിതം.

ആരമ്ഭഥ നിക്കമഥ, യുഞ്ജഥ ബുദ്ധസാസനേ;

ധുനാഥ മച്ചുനോ സേനം, നളാഗാരംവ കുഞ്ജരോ;

യോ ഇമസ്മിം ധമ്മവിനയേ, അപ്പമത്തോ വിഹസ്സതി;

പഹായ ജാതി സംസാരം, ദുക്ഖസ്സന്തം കരിസ്സതി-ഹു–