൬൧. തും തായേ തവേ ഭാവേ ഭവിസ്സതി ക്രിയായം തദത്ഥായം

ഭവിസ്സതിഅത്ഥേ വത്തമാനതോ ക്രിയത്ഥാ ഭാവേ തുമാദയോ ഹോന്തി ക്രിയായം തദത്ഥായം പതീയമാനായം. കരണായ ഗച്ഛതി കാതും ഗച്ഛതി. ‘‘തുംതുനതബ്ബേസു വാ’’തി കരസ്സ വാ ആ ഹോതി, പുബ്ബരൂപേ കത്തായേ. ‘‘കരസ്സാ തവേ’’തി നിച്ചം ആ, കാതവേ. നിപാതത്താ ‘‘അസങ്ഖ്യേഹി സബ്ബാസം’’തി ചതുത്ഥീസസ്സ ലോപോ. ഏവ+മുപരി തുനാദീസു. കത്തും കാമേതീതി കത്തുകാമോ, അഭിസങ്ഖരിതു+മാകങ്ഖതി. സദ്ധമ്മം സുണിതും, ഞിമ്ഹി നാഗമേ തസ്സ ണോ, നാഗമത്താ ന വുദ്ധി. സോതവേ സോതും സുണിതും വാ പത്ഥേഹി. ഏവം അനുഭവിതും, പചിതും. ഗന്തും, ‘‘മനാനം നിഗ്ഗഹീതം’’തി നിഗ്ഗഹീതം. ഗമിതും, ഖന്തും, ഖനിതും, ഹന്തും, ഹനിതും, മന്തും, മനിതും, ഹരിതും, അനുസ്സരിതും ഇച്ഛതി. തഥാ തുദിതും, പവിസിതും, ഉദ്ദിസിതും, ഭോത്തും, സയിതും, നേതും, ജുഹോതും, പജഹിതും, പഹാതും, ദാതും, രോദ്ധും, രുന്ധിതും, ഭോത്തും, ഭുഞ്ജീതും, ഛേത്തും, ഛിന്ദിതും, സിബ്ബിതും, ഊമ്ഹി വസ്സ ബോ, ദ്വിത്തം, ബുദ്ധും, തസ്സ ധോ. ബുജ്ഝിതും, യുക. ജാനിതും ഞാ=അവബോധനേ. ജനിതും. ജേതും ജിനിതും. പത്തും പാപുണിതും. കേതും കിണിതും. വിനിച്ഛേതും, ഇസ്സ ഏ, വിനിച്ഛിനിതും. ഗഹേതും ഗണ്ഹിതും. ചോരിതും ചോരേതും ചോരയിതും, പാലേതും പാലയിതും. പയോജകേ-ഭാവേതും ഭാവയിതും, കാരേതും കാരയിതും കാരാപേതും കാരാപയിതും ഇച്ഛതി+ച്ചാദി.

ഏവം ക്രിയത്ഥക്രിയായം ഗമ്യമാനായം, യഥാ സുബോദ്ധും വക്ഖാമി, ഏവം ദട്ഠും ഗച്ഛതി, ഗന്തു+മാരഭതി, ഗന്തും പയോജേതി, ദസ്സേതു+മാഹ ഇച്ചാദി.

അരഹസക്കാദീസുപി സിദ്ധം, തഥാ കാല സമയവേലാസു. കോ തം നിന്ദിതു+മരഹതി, രാജാ ഭവിതു+മരഹതി, അരഹോ ഭവം വത്തും, സക്കാ ജേതും ധനേന വാ, സക്കാ ലദ്ധും, ഭസ്സ ധോ. കത്തും സക്ഖിസ്സതി. ഭബ്ബോ നിയാമം ഓക്കമിതും, അഭബ്ബോ കാതും. അനുച്ഛവികോ ഭവം ദാനം പടിഗ്ഗഹേതും, ഇദം കാതും അനുരൂപം, ദാനം ദാതും യുത്തം, ദാതും വത്തുഞ്ച ലഭതി. ഏവം വട്ടതി ഭാസിതും, ഛിന്ദിതും ന ച കപ്പതി ഇച്ചാദി. തഥാകാലോ ഭുഞ്ജിതും, സമയോ ഭുഞ്ജിതും, വേലാ ഭുഞ്ജിതും.

അലമത്ഥേപി സിദ്ധം, അലമേവ ദാനാനി ദാതും, അലമേവ പുഞ്ഞാനി കാതും.