൫,൧൧൩. യജസ്സ യസ്സ ടി+യീതി

യജസ്സ യസ്സ ടി+യീ ഹോന്തി കാനുബന്ധേതി ബഹുലാധികാരാ ത്യാദിവിസയേപി ക്യേ പുബ്ബരൂപേ ച ഇജ്ജതി യിജ്ജതി മയാ ബുദ്ധോ. സോ യജിസ്സതി, തേന ഇജ്ജിസ്സതേ യിജ്ജിസ്സതേ. സോ യജീ, തേന ഇജ്ജി യിജ്ജി. സോ യജിസ്സാ, തേന ഇജ്ജിസ്സാ യിജ്ജിസ്സാ. സോ യജേയ്യ, തേന ഇജ്ജേയ്യ യിജ്ജേയ്യ. സോ യജതു, തേന ഇജ്ജതു യിജ്ജതു ഇച്ചാദി.

വദ=വചനേ, ‘‘ഗമവദാ’’ ദിനാ വദസ്സ വജ്ജാദേസോ വാ, ലസ്സ ‘‘ഊലസ്സേ’’തി ക്വചി ഏ ച, വജ്ജതി വദേതി വദതി, വജ്ജേന്തി വദേന്തി ഇച്ചാദി. കമ്മേ – ‘‘ക്യസ്സാ’’തി ഈഞ, വജ്ജീയതി വജ്ജതി വദീയതി, വജ്ജീയന്തി വജ്ജന്തി വദീയന്തി. വദിസ്സതി, വദിസ്സന്തി. അവദീ വദീ, അവദിംസു വദിംസു. അവദിസ്സ വദിസ്സ. വജ്ജേ വജ്ജേയ്യ വദേ വദേയ്യ, വജ്ജേയ്യും വദേയ്യും. വജ്ജേതു വദേതു വദതു ഇച്ചാദി യഥാഗമം ഞേയ്യം.

കമു=പദവിക്ഖേപേ, ‘‘പരോക്ഖായഞ്ചാ’’തി ചഗ്ഗഹണേന കമ കമ ഇതി ദ്വിത്തേ അനാദിബ്യഞ്ജനലോപേ ലവികരണേ ‘‘കവഗ്ഗഹാ’’ ദിനാ കസ്സ ചേ നിഗ്ഗഹീതാഗമേ ച കതേ ചംകമതി കമതി ഇച്ചാദി. ചല=കമ്പനേ, ചംചലതി. ജല+ദല=ദിത്തിയം, ദ്വിത്തേ ദദ്ദല്ലതി ഇച്ചാദി. (സവുദ്ധികഭൂവാദിനയോ).

ഹൂ+ഭൂ=സത്തായം, ത്യാദീസു ‘‘കത്തരി ലോ’’തി ലോ, തസ്സ ലോപേ ‘‘യുവണ്ണാന+മേഓ പച്ചയേ’’തി ഓകാരോ. സോ ഹോതി, തേ ഹോന്തി. ഹോസി, ഹോഥ. ഹോമി, ഹോമ ഇച്ചാദി. ഭാവേ-തേന ഹൂയതി ഹൂയതേ.