൫,൧. തിജ+മാനേഹി ഖ+സാ ഖമാ+വീമംസാസു

ഖന്തിയം തിജാ, വീമംസായം മാനാ ച ഖ+സപച്ചയാ ഹോന്തി യഥാക്കമം. തിജ=നിസാനേ, അകാരസ്സാ+പയോഗോ. ഖേ ‘‘ലഹുസ്സുപന്തസ്സാ’’തി പത്തേ+കാരസ്സ ‘‘അഞ്ഞത്രാപീ’’തി പടിസേധോ. യകാരവജ്ജിതബ്യഞ്ജനസ്സ ‘‘പരരൂപ+മയകാരേ ബ്യഞ്ജനേ’’തി പരരൂപഞ്ച. ‘‘ചതുത്ഥദുതിയാ’’ ദിനാ പഠമക്ഖരകകാരേ ച ‘‘ഖഛസാന+മേകസ്സരോ+ദി ദ്വേ’’തി തിക്ഖ തിക്ഖ ഇതി ദ്വിഭാവേ ‘‘ലോപോ+നാദിബ്യഞ്ജനസ്സാ’’തിആദിതോ+ഞ്ഞസ്സ ബ്യഞ്ജനസ്സ ലോപേ ച കതേ തിതിക്ഖാധാതുതോ ത്യാദിപച്ചയ+ലവികരണാനി. തിതിക്ഖതി ഇച്ചാദി പുരിമസമം. കമ്മേ-തിതിക്ഖീയതി ഇച്ചാദി. ഇതോ പരം കമ്മോദാഹരണം ന കരിസ്സാമ.

മാന=പൂജായം+തിമസ്മാ സപച്ചയ, ദ്വിത്താദിമ്ഹി കതേ ‘‘മാനസ്സ വീ പരസ്സ ച മം’’തി പുബ്ബമാനസ്സ വീ ച പരമാനസ്സ മഞ്ച ഹോതി. വീമംസധാതുതോ തിപച്ചയാദിമ്ഹി കതേ വീമംസതി ഇച്ചാദി. തിതിക്ഖിസ്സതി, വീമംസിസ്സതി ഇച്ചാദി. ഏവ+മുപരിപി അജ്ജതനാദീസുപി യോജേതബ്ബം. പയോജകത്താ ണി, ‘‘ണിണാപ്യാപീഹി വാ’’തി ലവികരണം, തേജയതി തേജേതി. തഥാ ചുരാദിത്താ ന ലവികരണം, മാനയതി മാനേതി.