൮൦. ദണ്ഡാദിത്വി+ക+ഈ വാതി

ഇക+ഈ ഹോന്തി വാ മന്തത്ഥേ. ബഹുലംവിധാനാ കുതോചിസദ്ദതോ ദ്വേ ഹോന്തി, കുതോ ചേ+കമേകംവ. നിച്ചയുത്തോ ദണ്ഡോ അസ്സ അത്ഥീതി ദണ്ഡികോ ദണ്ഡീ. ഗന്ധികോ ഗന്ധീ. വാത്വേവ, ദണ്ഡവാ.

‘‘ഉത്തമിണേവ ധനാ ഇകോ’’തി ഗണസുത്തേന ഇകോ ധനികോ. അഞ്ഞോ ധനീ ധനവാ.

‘‘അസന്നിഹിതേ അത്ഥാ’’ അസന്നിഹിതോ അത്ഥോ അസ്സ അത്ഥീതി അത്ഥികോ അത്ഥീ. സന്നിഹിതേ അത്ഥവാ. ‘‘തദന്താ ച’’ പുഞ്ഞത്ഥോ അസ്സ അത്ഥീതി പുഞ്ഞത്ഥികോ പുഞ്ഞത്ഥീ.

‘‘വണ്ണന്താ ഈയേവ’’. ബ്രഹ്മവണ്ണം അസ്സ അത്ഥീതി ബ്രഹ്മവണ്ണീ, ദേവവണ്ണീ.

‘‘ഹത്ഥദന്തേഹി ജാതിയം’’. ഹത്ഥ+മസ്സ അത്ഥീതി ഹത്ഥീ, ദന്തീ. അഞ്ഞത്ര ഹത്ഥവാ ദന്തവാ.

‘‘വണ്ണതോ ബ്രഹ്മചാരിമ്ഹി’’. വണ്ണോ അസ്സ അത്ഥീതി വണ്ണികോ ബ്രഹ്മചാരീ.

‘‘പോക്ഖരാദിതോ ദേസേ’’. പോക്ഖരം ജലം പദുമം വാ അസ്സ അത്ഥീതി പോക്ഖരീ, ‘‘യുവണ്ണേഹി നീ’’തി നീമ്ഹി ‘‘ഘരണ്യാദയോ’’തി ഈസ്സ അത്തം, നസ്സ ണോ ച, പോക്ഖരണീ, ഉപ്പലിനീ, കുമുദിനീ, ഭിസിനീ, മുലാലിനീ, സാലുകിനീ.

‘‘ക്വചാ+ദേസേപി’’. പദുമ+മസ്സ അത്ഥീതി പദുമീ പദുമിനീ പദുമിനീപണ്ണം. ദേസതോ+ഞ്ഞത്ര പോക്ഖരവാ ഹത്ഥീ.

‘‘നാവായി+കോ’’ നാവികോ. സിഖീ, ബാലീ, സീലീ, ബലീ.

‘‘സുഖദുക്ഖാ ഈ’’. സുഖീ ദുക്ഖീ. ‘‘ബലാ ബാഹൂരുപുബ്ബാ ച’’. ബാഹുബലീ, ഊരുബലീ.