൩൫. ഛട്ഠീ ചാ+നാദരേ

യസ്സ ഭാവോ ഭാവന്തരസ്സ ലക്ഖണം ഭവതി, തതോ ഛട്ഠീ ഹോതി സത്തമീ ചാ+നാദരേ ഗമ്യമാനേ. അകാമകാനം മാതാപിതൂനം രുദന്താനം പബ്ബജി, മാതാപിതൂസു രുദന്തേസു വാ. ‘‘ആകോടയന്തോ സോ നേതി, സിവിരാജസ്സ പേക്ഖതേ’’, ‘‘മച്ചു ആദായ ഗച്ഛതി, പേക്ഖമാനേ മഹാജനേ’’.

ഗുന്നം സാമീതി സമ്ബന്ധേ ഛട്ഠീ, ഗോസു സാമീതി വിസയസത്തമീ. ഏവം ഗുന്നമിസ്സരോ, ഗോസ്വി+സ്സരോ, ഗുന്നം അധിപതി, ഗോസു അധിപതി, ഗുന്നം ദായാദോ, ഗോസു ദായാദോ, ഗുന്നം സക്ഖീ, ഗോസു സക്ഖീ, ഗുന്നം പതിഭൂ, ഗോസു പതിഭൂ, ഗുന്നം പസുതോ, ഗോസു പസുതോ, കുസലാ നച്ചഗീതസ്സ, കുസലാ നച്ചഗീതേ, ആയുത്തോ കടകരണസ്സ, ആയുത്തോ കടകരണേ. തഥാ ആധാരവചനിച്ഛായം സത്തമീ, ഭിക്ഖൂസു അഭിവാദേന്തി, മുദ്ധനി ചുമ്ബിത്വാ, ബാഹാസു ഗഹേത്വാ, ഹത്ഥേസു പിണ്ഡായ ചരന്തി, കദലീസു ഗജേ രക്ഖന്തി, ഞാണസ്മിം പസന്നോ, ഞാണസ്മിം ഉസ്സുക്കോതി വിസയസത്തമീ.