൩൨. സത്തമ്യാ+ധാരേ

കത്തുകമ്മട്ഠാനം നിസജ്ജ+പചനാദിക്രിയാനം യോ ആധാരോ, തം ആധാരകാരകം നാമ. കഥം കടേ നിസീദതി ദേവദത്തോ, ഥാലിയം ഓദനം പചതി, ദേവദത്ത+തണ്ഡുലാനം കത്തു+കമ്മാനം ധാരണതോ തദട്ഠആസന+പചനക്രിയം കട+ഥാലിയോ ധാരേന്തി നാമ, തസ്മിം സത്തമീവിഭത്തി ഹോതി.

സോ ബ്യാപികോ, ഓപസിലേസികോ, വേസയികോ, സാമീപികോതി ചതുബ്ബിധോ. തത്ഥ യോ ആധേയ്യസ്സ നിസ്സേസാധാരഭൂതോ, സോ ബ്യാപികോ, യഥാ തിലേസു തേലം അത്ഥി, ഖീരേസു ജലം, ദധിമ്ഹി സപ്പി. പച്ചേകസിദ്ധാനം ഭാവാനം യം ആധേയ്യഭാവേന ഉപസിലേസനം അല്ലീയനം അത്ഥി, സോ ഓപസിലേസികോ. യഥാ ആസനേ നിസിന്നോ സങ്ഘോ, ഥാലിയം ഓദനം പചതി, ഘടേ ഉദക+മത്ഥി, ദൂരേ ഠിതോ, സമീപേ ഠിതോ. യത്ഥ സമീപേ സമീപീവോഹാരം കത്വാ തദായത്തതാദീപനത്ഥം ആധാരഭാവോ ഉപചരീയതി, തം സാമീപികം, യഥാ ഗങ്ഗായം ഘോസോ, ഗങ്ഗായ സമീപേ വജോത്യത്ഥോ. സാവത്ഥിയം വിഹരതി ജേതവനേ. യത്ഥ അഞ്ഞഥാഭാവവസേന ദേസന്തരാവച്ഛേദവസേന വാ ആധാരപരികപ്പോ, സോ വേസയിതോ. യഥാ ആകാസേ സകുണാ ചരന്തി, ഭൂമിയം മനുസ്സാ, ജലേ മച്ഛാ, പാസാദേസു പതിതോ, പാപസ്മിം രമതീ മനോ, പസന്നോ ബുദ്ധസാസനേ, പഞ്ഞായ സാധു, വിനയേ നിപുണോ, മാതരി സാധു, പിതരി നിപുണോ.

കിരിയാ കത്തു+കമ്മട്ഠാ, ആധാരീയതി യേന സോ;

ആധാരോ ചതുധാ വുത്തോ, ബ്യാപകാദിപ്പഭേദതോ.

ബ്യാപകോ തിലഖീരാദി, കടോ ഓപസിലേസികോ;

സാമീപികോ തു ഗങ്ഗാദി, ആകാസോ വിസയോ മതോ.