൩൪. സരമ്ഹാ ദ്വേ

സരമ്ഹാ പരസ്സ ബ്യഞ്ജനസ്സ ക്വചി ദ്വേ രൂപാനി ഹോന്തി. ഏത്ഥ ച ആവുത്തിദ്വിവചനം ഠാനേദ്വിവചനന്തി ദ്വീസു ഠാനേദ്വിവചനം വേദിതബ്ബം.

താനി ച പ+പതി+പടി+കമ+കുസ+കുധ+കീ+ഗഹ+ജുത+ഞാ+സി+ സു+സൂ+സമ്ഭൂ+സര+സസാദീനമാദിബ്യഞ്ജനാനഞ്ച ഹോതി. ഇധ പമാദോ=ഇധപ്പമാദോ, ഏവം അപ്പമാദോ, വിപ്പയുത്തോ, സുപ്പസന്നോ, സമ്മാ പധാനം=സമ്മപ്പധാനം രസ്സത്തം. അപ്പതിവത്തിയോ, അധിപ്പതിപച്ചയോ, സുപ്പതിട്ഠിതോ,. അപ്പടിപുഗ്ഗലോ, വിപ്പടിസാരോ, സുപ്പടിപത്തി. പക്കമോ, പടിക്കമോ, ഹേതുക്കമോ, ആകമതി=അക്കമതി, ഏവം പക്കമതി, യഥാക്കമം. അക്കോസതി, പടിക്കോസതി, അനുക്കോസതി, ആകോസതി=അക്കോസതി. അക്കുദ്ധോ, അഭിക്കുദ്ധോ. ധനക്കീതോ, വിക്കയോ, അനുക്കയോ. പഗ്ഗഹോ, വിഗ്ഗഹോ, അനുഗ്ഗഹോ, ചന്ദഗ്ഗാഹോ, ദിട്ഠിഗ്ഗാഹോ. പജ്ജോതോ, വിജ്ജോതോ, ഉജ്ജോതോ. കതഞ്ഞൂ, വിഞ്ഞൂ, പഞ്ഞാണം, വിഞ്ഞാണം, അനഞ്ഞാണം. അവസ്സയോ, നിസ്സയോ, സമുസ്സയോ. അപ്പസ്സുതോ, വിസ്സുതോ, ബഹുസ്സുതോ. ആസവാ=അസ്സവാ. പസ്സമ്ഭേന്തോ, വിസ്സമ്ഭേന്തോ. അട്ടസ്സരോ, വിസ്സരതി, അനുസ്സരതി, അനുസ്സതി. പസ്സസന്തോ, വിസ്സസന്തോ, മുഹുസ്സസന്തോ, ആസാസോ=അസ്സാസോ. ആദിസദ്ദേന അവിസ്സജേന്തോ, വിസ്സജേന്തോ, അഭിക്കന്തതരോ, പരിച്ചജേന്തോ, ഉപദ്ദവോ, ഉപക്കിലേസോ, മിത്തദ്ദുനോ, ആയബ്യയോ, അബ്ബഹി ഇച്ചാദി.

തിക+തയ+തിംസ+വതാദീന+മാദിബ്യഞ്ജനസ്സ ച. കുസലത്തികം, പീതിത്തികം, ഹേതുത്തികം. ലോകത്തയം, ബോധിത്തയം, വത്ഥുത്തയം. ഏകത്തിംസ, ദ്വത്തിംസ, തേത്തിംസ, ചതുത്തിംസ. സീലബ്ബതം, സുബ്ബതോ. സപ്പീതികോ, സമന്നാഗതോ, പുനപ്പുനം ഇച്ചാദി.

വതു+വട+ദിസാന+മന്തേ, യഥാ വത്തതി, വട്ടതി, ദസ്സനം, ഫസ്സോ ഇച്ചാദി.

ഉ+ദു+നിഉപസഗ്ഗ+ത+ചതു+ഛ+സന്തസദ്ദാദേസാദീഹി പരേസഞ്ച. ഉകംസോ=ഉക്കംസോ, ഏവം ദുക്കരം, നിക്കങ്ഖോ, ഉഗ്ഗതം, ദുച്ചരിതം, നിജ്ജടം, ഉജ്ജഹം, ഉച്ചങ്ഗം, ഉന്നമതി, ദുക്കരോ, നിദ്ദരോ, ഉന്നതോ, ദുപ്പഞ്ഞോ, നിമ്മലോ, ഉയ്യുത്തോ, ദുല്ലഭോ, നിബ്ബത്തോ, ഉസ്സാഹോ, നിസ്സാരോ. തക്കരോ, തജ്ജോ, തന്നിന്നോ, തപ്പഭവോ, തമ്മയോ, ചതുക്കം, ചതുദ്ദിസം, ചതുപ്പദോ, ചതുബ്ബിധം, ചതുസ്സാലം, ഛക്കം, ഛന്നവുതി, ഛപ്പദികോ, ഛബ്ബസ്സാനി. സക്കാരോ, സഗ്ഗുണോ, സന്ദിട്ഠി, സപ്പുരിസോ, മഹബ്ബലോ.

അപദന്തആകാരവജ്ജിതദീഘതോ യകാരസ്സ ച, നിയ്യാതി, സുയ്യതി, അഭിഭുയ്യ, വിചേയ്യ, വിനേയ്യ, ധേയ്യം, നേയ്യം, സേയ്യോ, ജേയ്യോ, വേയ്യാകരണോ. ആകാരവജ്ജിതന്തി കിം, മാലായ, ദോലായ, സമാദായ.

ഛന്ദാനുരക്ഖണേ-നപ്പജഹേ വണ്ണബലം പുരാണം, ഉജ്ജുഗതേസു സേയ്യോ, ഗച്ഛന്തി സുഗ്ഗതിം. സരമ്ഹാതി കിം, ഞായോ, തംഖണം. ക്വചിത്വേവ, നികായോ, നിദാനം, നിവാസോ, തതോ, ഛസട്ഠി, ഉപനീയതി, സൂയതി.