൧൦. ദുതിയഇധലോകികസുത്തം

൫൦. ‘‘ചതൂഹി, ഭിക്ഖവേ, ധമ്മേഹി സമന്നാഗതോ മാതുഗാമോ ഇധലോകവിജയായ പടിപന്നോ ഹോതി, അയംസ ലോകോ ആരദ്ധോ ഹോതി. കതമേഹി ചതൂഹി? ഇധ, ഭിക്ഖവേ, മാതുഗാമോ സുസംവിഹിതകമ്മന്തോ ഹോതി, സങ്ഗഹിതപരിജനോ, ഭത്തു മനാപം ചരതി, സമ്ഭതം അനുരക്ഖതി.

‘‘കഥഞ്ച, ഭിക്ഖവേ, മാതുഗാമോ സുസംവിഹിതകമ്മന്തോ ഹോതി? ഇധ, ഭിക്ഖവേ, മാതുഗാമോ യേ തേ ഭത്തു അബ്ഭന്തരാ കമ്മന്താ…പേ… ഏവം ഖോ, ഭിക്ഖവേ, മാതുഗാമോ സുസംവിഹിതകമ്മന്തോ ഹോതി.

‘‘കഥഞ്ച, ഭിക്ഖവേ, മാതുഗാമോ സങ്ഗഹിതപരിജനോ ഹോതി? ഇധ, ഭിക്ഖവേ, മാതുഗാമോ യോ സോ ഭത്തു അബ്ഭന്തരോ അന്തോജനോ…പേ… ഏവം ഖോ, ഭിക്ഖവേ, മാതുഗാമോ സങ്ഗഹിതപരിജനോ ഹോതി.

‘‘കഥഞ്ച, ഭിക്ഖവേ, മാതുഗാമോ ഭത്തു മനാപം ചരതി? ഇധ, ഭിക്ഖവേ, മാതുഗാമോ യം ഭത്തു അമനാപസങ്ഖാതം തം ജീവിതഹേതുപി ന അജ്ഝാചരതി. ഏവം ഖോ, ഭിക്ഖവേ, മാതുഗാമോ ഭത്തു മനാപം ചരതി.

‘‘കഥഞ്ച, ഭിക്ഖവേ, മാതുഗാമോ സമ്ഭതം അനുരക്ഖതി? ഇധ, ഭിക്ഖവേ, മാതുഗാമോ യം ഭത്താ ആഹരതി…പേ… ഏവം ഖോ, ഭിക്ഖവേ, മാതുഗാമോ സമ്ഭതം അനുരക്ഖതി. ഇമേഹി ഖോ, ഭിക്ഖവേ, ചതൂഹി ധമ്മേഹി സമന്നാഗതോ മാതുഗാമോ ഇധലോകവിജയായ പടിപന്നോ ഹോതി, അയംസ ലോകോ ആരദ്ധോ ഹോതി.

‘‘ചതൂഹി, ഭിക്ഖവേ, ധമ്മേഹി സമന്നാഗതോ മാതുഗാമോ പരലോകവിജയായ പടിപന്നോ ഹോതി, പരലോകോ ആരദ്ധോ ഹോതി. കതമേഹി ചതൂഹി? ഇധ, ഭിക്ഖവേ, മാതുഗാമോ സദ്ധാസമ്പന്നോ ഹോതി, സീലസമ്പന്നോ ഹോതി, ചാഗസമ്പന്നോ ഹോതി, പഞ്ഞാസമ്പന്നോ ഹോതി.

‘‘കഥഞ്ച, ഭിക്ഖവേ, മാതുഗാമോ സദ്ധാസമ്പന്നോ ഹോതി? ഇധ, ഭിക്ഖവേ, മാതുഗാമോ സദ്ധോ ഹോതി…പേ… ഏവം ഖോ, ഭിക്ഖവേ, മാതുഗാമോ സദ്ധാസമ്പന്നോ ഹോതി.

‘‘കഥഞ്ച, ഭിക്ഖവേ, മാതുഗാമോ സീലസമ്പന്നോ ഹോതി? ഇധ, ഭിക്ഖവേ, മാതുഗാമോ പാണാതിപാതാ പടിവിരതോ ഹോതി…പേ… സുരാമേരയമജ്ജപമാദട്ഠാനാ പടിവിരതോ ഹോതി. ഏവം ഖോ, ഭിക്ഖവേ, മാതുഗാമോ സീലസമ്പന്നോ ഹോതി.

‘‘കഥഞ്ച, ഭിക്ഖവേ, മാതുഗാമോ ചാഗസമ്പന്നോ ഹോതി? ഇധ, ഭിക്ഖവേ, മാതുഗാമോ വിഗതമലമച്ഛേരേന ചേതസാ അഗാരം അജ്ഝാവസതി…പേ… ഏവം ഖോ, ഭിക്ഖവേ, മാതുഗാമോ ചാഗസമ്പന്നോ ഹോതി.

‘‘കഥഞ്ച, ഭിക്ഖവേ, മാതുഗാമോ പഞ്ഞാസമ്പന്നോ ഹോതി? ഇധ, ഭിക്ഖവേ, മാതുഗാമോ പഞ്ഞവാ ഹോതി…പേ… ഏവം ഖോ, ഭിക്ഖവേ, മാതുഗാമോ പഞ്ഞാസമ്പന്നോ ഹോതി. ഇമേഹി ഖോ, ഭിക്ഖവേ, ചതൂഹി ധമ്മേഹി സമന്നാഗതോ മാതുഗാമോ പരലോകവിജയായ പടിപന്നോ ഹോതി, പരലോകോ ആരദ്ധോ ഹോതീ’’തി.

‘‘സുസംവിഹിതകമ്മന്താ, സങ്ഗഹിതപരിജ്ജനാ;

ഭത്തു മനാപം ചരതി, സമ്ഭതം അനുരക്ഖതി.

‘‘സദ്ധാ സീലേന സമ്പന്നാ, വദഞ്ഞൂ വീതമച്ഛരാ;

നിച്ചം മഗ്ഗം വിസോധേതി, സോത്ഥാനം സമ്പരായികം.

‘‘ഇച്ചേതേ അട്ഠ ധമ്മാ ച, യസ്സാ വിജ്ജന്തി നാരിയാ;

തമ്പി സീലവതിം ആഹു, ധമ്മട്ഠം സച്ചവാദിനിം.

‘‘സോളസാകാരസമ്പന്നാ, അട്ഠങ്ഗസുസമാഗതാ;

താദിസീ സീലവതീ ഉപാസികാ, ഉപപജ്ജതി ദേവലോകം മനാപ’’ന്തി. ദസമം;

ഉപോസഥവഗ്ഗോ പഞ്ചമോ.