൪. ഖേത്തസുത്തം

൩൪. ‘‘അട്ഠങ്ഗസമന്നാഗതേ, ഭിക്ഖവേ, ഖേത്തേ ബീജം വുത്തം ന മഹപ്ഫലം ഹോതി ന മഹസ്സാദം ന ഫാതിസേയ്യം [ന ഫാതിസേയ്യന്തി (സീ. സ്യാ. ക.), ന ഫാതിസേയ്യാ (കത്ഥചി)]. കഥം അട്ഠങ്ഗസമന്നാഗതേ? ഇധ, ഭിക്ഖവേ, ഖേത്തം ഉന്നാമനിന്നാമി ച ഹോതി, പാസാണസക്ഖരികഞ്ച ഹോതി, ഊസരഞ്ച ഹോതി, ന ച ഗമ്ഭീരസിതം ഹോതി, ന ആയസമ്പന്നം ഹോതി, ന അപായസമ്പന്നം ഹോതി, ന മാതികാസമ്പന്നം ഹോതി, ന മരിയാദസമ്പന്നം ഹോതി. ഏവം അട്ഠങ്ഗസമന്നാഗതേ, ഭിക്ഖവേ, ഖേത്തേ ബീജം വുത്തം ന മഹപ്ഫലം ഹോതി ന മഹസ്സാദം ന ഫാതിസേയ്യം.

‘‘ഏവമേവം ഖോ, ഭിക്ഖവേ, അട്ഠങ്ഗസമന്നാഗതേസു സമണബ്രാഹ്മണേസു ദാനം ദിന്നം ന മഹപ്ഫലം ഹോതി ന മഹാനിസംസം ന മഹാജുതികം ന മഹാവിപ്ഫാരം. കഥം അട്ഠങ്ഗസമന്നാഗതേസു? ഇധ, ഭിക്ഖവേ, സമണബ്രാഹ്മണാ മിച്ഛാദിട്ഠികാ ഹോന്തി, മിച്ഛാസങ്കപ്പാ, മിച്ഛാവാചാ, മിച്ഛാകമ്മന്താ, മിച്ഛാആജീവാ, മിച്ഛാവായാമാ, മിച്ഛാസതിനോ, മിച്ഛാസമാധിനോ. ഏവം അട്ഠങ്ഗസമന്നാഗതേസു, ഭിക്ഖവേ, സമണബ്രാഹ്മണേസു ദാനം ദിന്നം ന മഹപ്ഫലം ഹോതി ന മഹാനിസംസം ന മഹാജുതികം ന മഹാവിപ്ഫാരം.

‘‘അട്ഠങ്ഗസമന്നാഗതേ, ഭിക്ഖവേ, ഖേത്തേ ബീജം വുത്തം മഹപ്ഫലം ഹോതി മഹസ്സാദം ഫാതിസേയ്യം. കഥം അട്ഠങ്ഗസമന്നാഗതേ? ഇധ, ഭിക്ഖവേ, ഖേത്തം അനുന്നാമാനിന്നാമി ച ഹോതി, അപാസാണസക്ഖരികഞ്ച ഹോതി, അനൂസരഞ്ച ഹോതി, ഗമ്ഭീരസിതം ഹോതി, ആയസമ്പന്നം ഹോതി, അപായസമ്പന്നം ഹോതി, മാതികാസമ്പന്നം ഹോതി, മരിയാദസമ്പന്നം ഹോതി. ഏവം അട്ഠങ്ഗസമന്നാഗതേ, ഭിക്ഖവേ, ഖേത്തേ ബീജം വുത്തം മഹപ്ഫലം ഹോതി മഹസ്സാദം ഫാതിസേയ്യം.

‘‘ഏവമേവം ഖോ, ഭിക്ഖവേ, അട്ഠങ്ഗസമന്നാഗതേസു സമണബ്രാഹ്മണേസു ദാനം ദിന്നം മഹപ്ഫലം ഹോതി മഹാനിസംസം മഹാജുതികം മഹാവിപ്ഫാരം. കഥം അട്ഠങ്ഗസമന്നാഗതേസു? ഇധ, ഭിക്ഖവേ, സമണബ്രാഹ്മണാ സമ്മാദിട്ഠികാ ഹോന്തി, സമ്മാസങ്കപ്പാ, സമ്മാവാചാ, സമ്മാകമ്മന്താ, സമ്മാആജീവാ, സമ്മാവായാമാ, സമ്മാസതിനോ, സമ്മാസമാധിനോ. ഏവം അട്ഠങ്ഗസമന്നാഗതേസു, ഭിക്ഖവേ, സമണബ്രാഹ്മണേസു ദാനം ദിന്നം മഹപ്ഫലം ഹോതി മഹാനിസംസം മഹാജുതികം മഹാവിപ്ഫാര’’ന്തി.

‘‘യഥാപി ഖേത്തേ സമ്പന്നേ, പവുത്താ ബീജസമ്പദാ;

ദേവേ സമ്പാദയന്തമ്ഹി [സഞ്ജായന്തമ്ഹി (ക.)], ഹോതി ധഞ്ഞസ്സ സമ്പദാ.

‘‘അനീതിസമ്പദാ ഹോതി, വിരൂള്ഹീ ഭവതി സമ്പദാ;

വേപുല്ലസമ്പദാ ഹോതി, ഫലം വേ ഹോതി സമ്പദാ.

‘‘ഏവം സമ്പന്നസീലേസു, ദിന്നാ ഭോജനസമ്പദാ;

സമ്പദാനം ഉപനേതി, സമ്പന്നം ഹിസ്സ തം കതം.

‘‘തസ്മാ സമ്പദമാകങ്ഖീ, സമ്പന്നത്ഥൂധ പുഗ്ഗലോ;

സമ്പന്നപഞ്ഞേ സേവേഥ, ഏവം ഇജ്ഝന്തി സമ്പദാ.

‘‘വിജ്ജാചരണസമ്പന്നേ, ലദ്ധാ ചിത്തസ്സ സമ്പദം;

കരോതി കമ്മസമ്പദം, ലഭതി ചത്ഥസമ്പദം.

‘‘ലോകം ഞത്വാ യഥാഭൂതം, പപ്പുയ്യ ദിട്ഠിസമ്പദം;

മഗ്ഗസമ്പദമാഗമ്മ, യാതി സമ്പന്നമാനസോ.

‘‘ഓധുനിത്വാ മലം സബ്ബം, പത്വാ നിബ്ബാനസമ്പദം;

മുച്ചതി സബ്ബദുക്ഖേഹി, സാ ഹോതി സബ്ബസമ്പദാ’’തി. ചതുത്ഥം;