൫. മഹാനാമസുത്തം

൨൫. ഏകം സമയം ഭഗവാ സക്കേസു വിഹരതി കപിലവത്ഥുസ്മിം നിഗ്രോധാരാമേ. അഥ ഖോ മഹാനാമോ സക്കോ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ മഹാനാമോ സക്കോ ഭഗവന്തം ഏതദവോച – ‘‘കിത്താവതാ നു ഖോ, ഭന്തേ, ഉപാസകോ ഹോതീ’’തി? ‘‘യതോ ഖോ, മഹാനാമ, ബുദ്ധം സരണം ഗതോ ഹോതി, ധമ്മം സരണം ഗതോ ഹോതി, സങ്ഘം സരണം ഗതോ ഹോതി; ഏത്താവതാ ഖോ, മഹാനാമ, ഉപാസകോ ഹോതീ’’തി.

‘‘കിത്താവതാ പന, ഭന്തേ, ഉപാസകോ സീലവാ ഹോതീ’’തി? ‘‘യതോ ഖോ, മഹാനാമ, ഉപാസകോ പാണാതിപാതാ പടിവിരതോ ഹോതി, അദിന്നാദാനാ പടിവിരതോ ഹോതി, കാമേസുമിച്ഛാചാരാ പടിവിരതോ ഹോതി, മുസാവാദാ പടിവിരതോ ഹോതി, സുരാമേരയമജ്ജപമാദട്ഠാനാ പടിവിരതോ ഹോതി; ഏത്താവതാ ഖോ, മഹാനാമ, ഉപാസകോ സീലവാ ഹോതീ’’തി.

‘‘കിത്താവതാ പന, ഭന്തേ, ഉപാസകോ അത്തഹിതായ പടിപന്നോ ഹോതി, നോ പരഹിതായാ’’തി? ‘‘യതോ ഖോ, മഹാനാമ, ഉപാസകോ അത്തനാവ സദ്ധാസമ്പന്നോ ഹോതി, നോ പരം സദ്ധാസമ്പദായ സമാദപേതി [സമാദാപേതി (?)]; അത്തനാവ സീലസമ്പന്നോ ഹോതി, നോ പരം സീലസമ്പദായ സമാദപേതി; അത്തനാവ ചാഗസമ്പന്നോ ഹോതി, നോ പരം ചാഗസമ്പദായ സമാദപേതി; അത്തനാവ ഭിക്ഖൂനം ദസ്സനകാമോ ഹോതി, നോ പരം ഭിക്ഖൂനം ദസ്സനേ സമാദപേതി; അത്തനാവ സദ്ധമ്മം സോതുകാമോ ഹോതി, നോ പരം സദ്ധമ്മസ്സവനേ സമാദപേതി; അത്തനാവ സുതാനം ധമ്മാനം ധാരണജാതികോ ഹോതി, നോ പരം ധമ്മധാരണായ സമാദപേതി; അത്തനാവ സുതാനം ധമ്മാനം അത്ഥൂപപരിക്ഖിതാ ഹോതി, നോ പരം അത്ഥൂപപരിക്ഖായ സമാദപേതി; അത്തനാവ അത്ഥമഞ്ഞായ ധമ്മമഞ്ഞായ ധമ്മാനുധമ്മപ്പടിപന്നോ ഹോതി, നോ പരം ധമ്മാനുധമ്മപ്പടിപത്തിയാ സമാദപേതി. ഏത്താവതാ ഖോ, മഹാനാമ, ഉപാസകോ അത്തഹിതായ പടിപന്നോ ഹോതി, നോ പരഹിതായാ’’തി.

‘‘കിത്താവതാ പന, ഭന്തേ, ഉപാസകോ അത്തഹിതായ ച പടിപന്നോ ഹോതി പരഹിതായ ചാ’’തി? ‘‘യതോ ഖോ, മഹാനാമ, ഉപാസകോ അത്തനാ ച സദ്ധാസമ്പന്നോ ഹോതി, പരഞ്ച സദ്ധാസമ്പദായ സമാദപേതി; അത്തനാ ച സീലസമ്പന്നോ ഹോതി, പരഞ്ച സീലസമ്പദായ സമാദപേതി; അത്തനാ ച ചാഗസമ്പന്നോ ഹോതി, പരഞ്ച ചാഗസമ്പദായ സമാദപേതി; അത്തനാ ച ഭിക്ഖൂനം ദസ്സനകാമോ ഹോതി, പരഞ്ച ഭിക്ഖൂനം ദസ്സനേ സമാദപേതി; അത്തനാ ച സദ്ധമ്മം സോതുകാമോ ഹോതി, പരഞ്ച സദ്ധമ്മസ്സവനേ സമാദപേതി; അത്തനാ ച സുതാനം ധമ്മാനം ധാരണജാതികോ ഹോതി, പരഞ്ച ധമ്മധാരണായ സമാദപേതി; അത്തനാ ച സുതാനം ധമ്മാനം അത്ഥൂപപരിക്ഖിതാ ഹോതി, പരഞ്ച അത്ഥൂപപരിക്ഖായ സമാദപേതി, അത്തനാ ച അത്ഥമഞ്ഞായ ധമ്മമഞ്ഞായ ധമ്മാനുധമ്മപ്പടിപന്നോ ഹോതി, പരഞ്ച ധമ്മാനുധമ്മപ്പടിപത്തിയാ സമാദപേതി. ഏത്താവതാ ഖോ, മഹാനാമ, ഉപാസകോ അത്തഹിതായ ച പടിപന്നോ ഹോതി പരഹിതായ ചാ’’തി. പഞ്ചമം.