൬. ജീവകസുത്തം

൨൬. ഏകം സമയം ഭഗവാ രാജഗഹേ വിഹരതി ജീവകമ്ബവനേ. അഥ ഖോ ജീവകോ കോമാരഭച്ചോ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ ജീവകോ കോമാരഭച്ചോ ഭഗവന്തം ഏതദവോച – ‘‘കിത്താവതാ നു ഖോ, ഭന്തേ, ഉപാസകോ ഹോതീ’’തി? ‘‘യതോ ഖോ, ജീവക, ബുദ്ധം സരണം ഗതോ ഹോതി, ധമ്മം സരണം ഗതോ ഹോതി, സങ്ഘം സരണം ഗതോ ഹോതി; ഏത്താവതാ ഖോ ജീവക, ഉപാസകോ ഹോതീ’’തി.

‘‘കിത്താവതാ പന, ഭന്തേ, ഉപാസകോ സീലവാ ഹോതീ’’തി? ‘‘യതോ ഖോ, ജീവക, ഉപാസകോ പാണാതിപാതാ പടിവിരതോ ഹോതി…പേ… സുരാമേരയമജ്ജപമാദട്ഠാനാ പടിവിരതോ ഹോതി; ഏത്താവതാ ഖോ, ജീവക, ഉപാസകോ സീലവാ ഹോതീ’’തി.

‘‘കിത്താവതാ പന, ഭന്തേ, ഉപാസകോ അത്തഹിതായ പടിപന്നോ ഹോതി, നോ പരഹിതായാ’’തി? ‘‘യതോ ഖോ, ജീവക, ഉപാസകോ അത്തനാവ സദ്ധാസമ്പന്നോ ഹോതി, നോ പരം സദ്ധാസമ്പദായ സമാദപേതി…പേ… അത്തനാവ അത്ഥമഞ്ഞായ ധമ്മമഞ്ഞായ ധമ്മാനുധമ്മപ്പടിപന്നോ ഹോതി, നോ പരം ധമ്മാനുധമ്മപ്പടിപത്തിയാ സമാദപേതി. ഏത്താവതാ ഖോ, ജീവക, ഉപാസകോ അത്തഹിതായ പടിപന്നോ ഹോതി, നോ പരഹിതായാ’’തി.

‘‘കിത്താവതാ പന, ഭന്തേ, ഉപാസകോ അത്തഹിതായ ച പടിപന്നോ ഹോതി പരഹിതായ ചാ’’തി? ‘‘യതോ ഖോ, ജീവക, ഉപാസകോ അത്തനാ ച സദ്ധാസമ്പന്നോ ഹോതി, പരഞ്ച സദ്ധാസമ്പദായ സമാദപേതി; അത്തനാ ച സീലസമ്പന്നോ ഹോതി, പരഞ്ച സീലസമ്പദായ സമാദപേതി; അത്തനാ ച ചാഗസമ്പന്നോ ഹോതി, പരഞ്ച ചാഗസമ്പദായ സമാദപേതി; അത്തനാ ച ഭിക്ഖൂനം ദസ്സനകാമോ ഹോതി, പരഞ്ച ഭിക്ഖൂനം ദസ്സനേ സമാദപേതി; അത്തനാ ച സദ്ധമ്മം സോതുകാമോ ഹോതി, പരഞ്ച സദ്ധമ്മസ്സവനേ സമാദപേതി; അത്തനാ ച സുതാനം ധമ്മാനം ധാരണജാതികോ ഹോതി, പരഞ്ച ധമ്മധാരണായ സമാദപേതി; അത്തനാ ച സുതാനം ധമ്മാനം അത്ഥൂപപരിക്ഖിതാ ഹോതി, പരഞ്ച അത്ഥൂപപരിക്ഖായ സമാദപേതി; അത്തനാ ച അത്ഥമഞ്ഞായ ധമ്മമഞ്ഞായ ധമ്മാനുധമ്മപ്പടിപന്നോ ഹോതി, പരഞ്ച ധമ്മാനുധമ്മപ്പടിപത്തിയാ സമാദപേതി. ഏത്താവതാ ഖോ, ജീവക, ഉപാസകോ അത്തഹിതായ ച പടിപന്നോ ഹോതി പരഹിതായ ചാ’’തി. ഛട്ഠം.