൯. സമണവഗ്ഗോ

൧. ഭിക്ഖുസുത്തം

൮൫. [മഹാനി. ൧൮; ചൂളനി. അജിതമാണവപുച്ഛാനിദ്ദേസ ൮] ‘‘സത്തന്നം, ഭിക്ഖവേ, ധമ്മാനം ഭിന്നത്താ ഭിക്ഖു ഹോതി. കതമേസം സത്തന്നം? സക്കായദിട്ഠി ഭിന്നാ ഹോതി, വിചികിച്ഛാ ഭിന്നാ ഹോതി, സീലബ്ബതപരാമാസോ ഭിന്നോ ഹോതി, രാഗോ ഭിന്നോ ഹോതി, ദോസോ ഭിന്നോ ഹോതി, മോഹോ ഭിന്നോ ഹോതി, മാനോ ഭിന്നോ ഹോതി. ഇമേസം ഖോ, ഭിക്ഖവേ, സത്തന്നം ധമ്മാനം ഭിന്നത്താ ഭിക്ഖു ഹോതീ’’തി. പഠമം.

൨. സമണസുത്തം

൮൬. സത്തന്നം, ഭിക്ഖവേ, ധമ്മാനം സമിതത്താ സമണോ ഹോതി…പേ…. ദുതിയം.

൩. ബ്രാഹ്മണസുത്തം

൮൭. ബാഹിതത്താ ബ്രാഹ്മണോ ഹോതി…പേ…. തതിയം.

൪. സോത്തിയസുത്തം

൮൮. നിസ്സുതത്താ [നിസ്സുത്തത്താ (സ്യാ.) മ. നി. ൧.൪൩൪ പസ്സിതബ്ബം] സോത്തിയോ [സോത്ഥികോ (സീ.), സോത്തികോ (സ്യാ.)] ഹോതി…പേ…. ചതുത്ഥം.

൫. ന്ഹാതകസുത്തം

൮൯. ന്ഹാതത്താ ന്ഹാതകോ [നഹാതത്തോ നഹാതകോ (സീ. സ്യാ.)] ഹോതി…പേ…. പഞ്ചമം.

൬. വേദഗൂസുത്തം

൯൦. വിദിതത്താ വേദഗൂ ഹോതി…പേ…. ഛട്ഠം.

൭. അരിയസുത്തം

൯൧. ആരകത്താ [അരഹത്താ (സീ.), അരീ ഹതത്താ (ക.) മ. നി. ൧.൪൩൪ പാളി അട്ഠകഥാടീകാ പസ്സിതബ്ബാ. സ്യാമപോത്ഥകേ പന സകലമ്പി ഇദം സത്തമസുത്തം നത്ഥി] അരിയോ ഹോതി…പേ…. സത്തമം.

൮. അരഹാസുത്തം

൯൨. ‘‘ആരകത്താ അരഹാ ഹോതി. കതമേസം സത്തന്നം? സക്കായദിട്ഠി ആരകാ ഹോതി, വിചികിച്ഛാ ആരകാ ഹോതി, സീലബ്ബതപരാമാസോ ആരകോ ഹോതി, രാഗോ ആരകോ ഹോതി, ദോസോ ആരകോ ഹോതി, മോഹോ ആരകോ ഹോതി, മാനോ ആരകോ ഹോതി. ഇമേസം ഖോ, ഭിക്ഖവേ, സത്തന്നം ധമ്മാനം ആരകത്താ അരഹാ ഹോതീ’’തി. അട്ഠമം.

൯. അസദ്ധമ്മസുത്തം

൯൩. ‘‘സത്തിമേ, ഭിക്ഖവേ, അസദ്ധമ്മാ. കതമേ സത്ത? അസ്സദ്ധോ ഹോതി, അഹിരികോ ഹോതി, അനോത്തപ്പീ ഹോതി, അപ്പസ്സുതോ ഹോതി, കുസീതോ ഹോതി, മുട്ഠസ്സതി ഹോതി, ദുപ്പഞ്ഞോ ഹോതി. ഇമേ ഖോ, ഭിക്ഖവേ, സത്ത അസദ്ധമ്മാ’’തി. നവമം.

൧൦. സദ്ധമ്മസുത്തം

൯൪. ‘‘സത്തിമേ, ഭിക്ഖവേ, സദ്ധമ്മാ. കതമേ സത്ത? സദ്ധോ ഹോതി, ഹിരീമാ ഹോതി, ഓത്തപ്പീ ഹോതി, ബഹുസ്സുതോ ഹോതി, ആരദ്ധവീരിയോ ഹോതി, സതിമാ ഹോതി, പഞ്ഞവാ ഹോതി. ഇമേ ഖോ, ഭിക്ഖവേ, സത്ത സദ്ധമ്മാ’’തി. ദസമം.

സമണവഗ്ഗോ നവമോ.