൯. ദുതിയപരിഹാനിസുത്തം

൨൯. ‘‘സത്തിമേ, ഭിക്ഖവേ, ധമ്മാ ഉപാസകസ്സ പരിഹാനായ സംവത്തന്തി. കതമേ സത്ത? ഭിക്ഖുദസ്സനം ഹാപേതി, സദ്ധമ്മസ്സവനം പമജ്ജതി, അധിസീലേ ന സിക്ഖതി, അപ്പസാദബഹുലോ ഹോതി, ഭിക്ഖൂസു ഥേരേസു ചേവ നവേസു ച മജ്ഝിമേസു ച ഉപാരമ്ഭചിത്തോ ധമ്മം സുണാതി രന്ധഗവേസീ, ഇതോ ബഹിദ്ധാ ദക്ഖിണേയ്യം ഗവേസതി, തത്ഥ ച പുബ്ബകാരം കരോതി. ഇമേ ഖോ, ഭിക്ഖവേ, സത്ത ധമ്മാ ഉപാസകസ്സ പരിഹാനായ സംവത്തന്തി.

‘‘സത്തിമേ, ഭിക്ഖവേ, ധമ്മാ ഉപാസകസ്സ അപരിഹാനായ സംവത്തന്തി. കതമേ സത്ത? ഭിക്ഖുദസ്സനം ന ഹാപേതി, സദ്ധമ്മസ്സവനം നപ്പമജ്ജതി, അധിസീലേ സിക്ഖതി, പസാദബഹുലോ ഹോതി, ഭിക്ഖൂസു ഥേരേസു ചേവ നവേസു ച മജ്ഝിമേസു ച അനുപാരമ്ഭചിത്തോ ധമ്മം സുണാതി ന രന്ധഗവേസീ, ന ഇതോ ബഹിദ്ധാ ദക്ഖിണേയ്യം ഗവേസതി, ഇധ ച പുബ്ബകാരം കരോതി. ഇമേ ഖോ, ഭിക്ഖവേ, സത്ത ധമ്മാ ഉപാസകസ്സ അപരിഹാനായ സംവത്തന്തീ’’തി. ഇദമവോച ഭഗവാ. ഇദം വത്വാന സുഗതോ അഥാപരം ഏതദവോച സത്ഥാ –

‘‘ദസ്സനം ഭാവിതത്താനം, യോ ഹാപേതി ഉപാസകോ;

സവനഞ്ച അരിയധമ്മാനം, അധിസീലേ ന സിക്ഖതി.

‘‘അപ്പസാദോ ച ഭിക്ഖൂസു, ഭിയ്യോ ഭിയ്യോ പവഡ്ഢതി;

ഉപാരമ്ഭകചിത്തോ ച, സദ്ധമ്മം സോതുമിച്ഛതി.

‘‘ഇതോ ച ബഹിദ്ധാ അഞ്ഞം, ദക്ഖിണേയ്യം ഗവേസതി;

തത്ഥേവ ച പുബ്ബകാരം, യോ കരോതി ഉപാസകോ.

‘‘ഏതേ ഖോ പരിഹാനിയേ, സത്ത ധമ്മേ സുദേസിതേ;

ഉപാസകോ സേവമാനോ, സദ്ധമ്മാ പരിഹായതി.

‘‘ദസ്സനം ഭാവിതത്താനം, യോ ന ഹാപേതി ഉപാസകോ;

സവനഞ്ച അരിയധമ്മാനം, അധിസീലേ ച സിക്ഖതി.

‘‘പസാദോ ചസ്സ ഭിക്ഖൂസു, ഭിയ്യോ ഭിയ്യോ പവഡ്ഢതി;

അനുപാരമ്ഭചിത്തോ ച, സദ്ധമ്മം സോതുമിച്ഛതി.

‘‘ന ഇതോ ബഹിദ്ധാ അഞ്ഞം, ദക്ഖിണേയ്യം ഗവേസതി;

ഇധേവ ച പുബ്ബകാരം, യോ കരോതി ഉപാസകോ.

‘‘ഏതേ ഖോ അപരിഹാനിയേ, സത്ത ധമ്മേ സുദേസിതേ;

ഉപാസകോ സേവമാനോ, സദ്ധമ്മാ ന പരിഹായതീ’’തി. നവമം;