൧൧. തികവഗ്ഗോ

൧. രാഗസുത്തം

൧൦൭. ‘‘തയോമേ, ഭിക്ഖവേ, ധമ്മാ. കതമേ തയോ? രാഗോ, ദോസോ, മോഹോ. ഇമേ ഖോ, ഭിക്ഖവേ, തയോ ധമ്മാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ തയോ ധമ്മാ ഭാവേതബ്ബാ. കതമേ തയോ? രാഗസ്സ പഹാനായ അസുഭാ ഭാവേതബ്ബാ, ദോസസ്സ പഹാനായ മേത്താ ഭാവേതബ്ബാ, മോഹസ്സ പഹാനായ പഞ്ഞാ ഭാവേതബ്ബാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ ഇമേ തയോ ധമ്മാ ഭാവേതബ്ബാ’’തി. പഠമം.

൨. ദുച്ചരിതസുത്തം

൧൦൮. ‘‘തയോമേ, ഭിക്ഖവേ, ധമ്മാ. കതമേ തയോ? കായദുച്ചരിതം, വചീദുച്ചരിതം, മനോദുച്ചരിതം. ഇമേ ഖോ, ഭിക്ഖവേ, തയോ ധമ്മാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ തയോ ധമ്മാ ഭാവേതബ്ബാ. കതമേ തയോ? കായദുച്ചരിതസ്സ പഹാനായ കായസുചരിതം ഭാവേതബ്ബം, വചീദുച്ചരിതസ്സ പഹാനായ വചീസുചരിതം ഭാവേതബ്ബം, മനോദുച്ചരിതസ്സ പഹാനായ മനോസുചരിതം ഭാവേതബ്ബം. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ ഇമേ തയോ ധമ്മാ ഭാവേതബ്ബാ’’തി. ദുതിയം.

൩. വിതക്കസുത്തം

൧൦൯. ‘‘തയോമേ, ഭിക്ഖവേ, ധമ്മാ. കതമേ തയോ? കാമവിതക്കോ, ബ്യാപാദവിതക്കോ, വിഹിംസാവിതക്കോ. ഇമേ ഖോ, ഭിക്ഖവേ, തയോ ധമ്മാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ തയോ ധമ്മാ ഭാവേതബ്ബാ. കതമേ തയോ? കാമവിതക്കസ്സ പഹാനായ നേക്ഖമ്മവിതക്കോ ഭാവേതബ്ബോ, ബ്യാപാദവിതക്കസ്സ പഹാനായ അബ്യാപാദവിതക്കോ ഭാവേതബ്ബോ, വിഹിംസാവിതക്കസ്സ പഹാനായ അവിഹിംസാവിതക്കോ ഭാവേതബ്ബോ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ ഇമേ തയോ ധമ്മാ ഭാവേതബ്ബാ’’തി. തതിയം.

൪. സഞ്ഞാസുത്തം

൧൧൦. ‘‘തയോമേ, ഭിക്ഖവേ, ധമ്മാ. കതമേ തയോ? കാമസഞ്ഞാ, ബ്യാപാദസഞ്ഞാ, വിഹിംസാസഞ്ഞാ. ഇമേ ഖോ, ഭിക്ഖവേ, തയോ ധമ്മാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ തയോ ധമ്മാ ഭാവേതബ്ബാ. കതമേ തയോ? കാമസഞ്ഞായ പഹാനായ നേക്ഖമ്മസഞ്ഞാ ഭാവേതബ്ബാ, ബ്യാപാദസഞ്ഞായ പഹാനായ അബ്യാപാദസഞ്ഞാ ഭാവേതബ്ബാ, വിഹിംസാസഞ്ഞായ പഹാനായ അവിഹിംസാസഞ്ഞാ ഭാവേതബ്ബാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ ഇമേ തയോ ധമ്മാ ഭാവേതബ്ബാ’’തി. ചതുത്ഥം.

൫. ധാതുസുത്തം

൧൧൧. ‘‘തയോമേ, ഭിക്ഖവേ, ധമ്മാ. കതമേ തയോ? കാമധാതു, ബ്യാപാദധാതു, വിഹിംസാധാതു. ഇമേ ഖോ, ഭിക്ഖവേ, തയോ ധമ്മാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ തയോ ധമ്മാ ഭാവേതബ്ബാ. കതമേ തയോ? കാമധാതുയാ പഹാനായ നേക്ഖമ്മധാതു ഭാവേതബ്ബാ, ബ്യാപാദധാതുയാ പഹാനായ അബ്യാപാദധാതു ഭാവേതബ്ബാ, വിഹിംസാധാതുയാ പഹാനായ അവിഹിംസാധാതു ഭാവേതബ്ബാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ ഇമേ തയോ ധമ്മാ ഭാവേതബ്ബാ’’തി. പഞ്ചമം.

൬. അസ്സാദസുത്തം

൧൧൨. ‘‘തയോമേ, ഭിക്ഖവേ, ധമ്മാ. കതമേ തയോ? അസ്സാദദിട്ഠി, അത്താനുദിട്ഠി, മിച്ഛാദിട്ഠി. ഇമേ ഖോ, ഭിക്ഖവേ, തയോ ധമ്മാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ തയോ ധമ്മാ ഭാവേതബ്ബാ. കതമേ തയോ? അസ്സാദദിട്ഠിയാ പഹാനായ അനിച്ചസഞ്ഞാ ഭാവേതബ്ബാ, അത്താനുദിട്ഠിയാ പഹാനായ അനത്തസഞ്ഞാ ഭാവേതബ്ബാ, മിച്ഛാദിട്ഠിയാ പഹാനായ സമ്മാദിട്ഠി ഭാവേതബ്ബാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ ഇമേ തയോ ധമ്മാ ഭാവേതബ്ബാ’’തി. ഛട്ഠം.

൭. അരതിസുത്തം

൧൧൩. ‘‘തയോമേ, ഭിക്ഖവേ, ധമ്മാ. കതമേ തയോ? അരതി, വിഹിംസാ [വിഹേസാ (ക.)], അധമ്മചരിയാ. ഇമേ ഖോ, ഭിക്ഖവേ, തയോ ധമ്മാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ തയോ ധമ്മാ ഭാവേതബ്ബാ. കതമേ തയോ? അരതിയാ പഹാനായ മുദിതാ ഭാവേതബ്ബാ, വിഹിംസായ പഹാനായ അവിഹിംസാ ഭാവേതബ്ബാ, അധമ്മചരിയായ പഹാനായ ധമ്മചരിയാ ഭാവേതബ്ബാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ ഇമേ തയോ ധമ്മാ ഭാവേതബ്ബാ’’തി. സത്തമം.

൮. സന്തുട്ഠിതാസുത്തം

൧൧൪. ‘‘തയോമേ, ഭിക്ഖവേ, ധമ്മാ. കതമേ തയോ? അസന്തുട്ഠിതാ, അസമ്പജഞ്ഞം, മഹിച്ഛതാ. ഇമേ ഖോ, ഭിക്ഖവേ, തയോ ധമ്മാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ തയോ ധമ്മാ ഭാവേതബ്ബാ. കതമേ തയോ? അസന്തുട്ഠിതായ പഹാനായ സന്തുട്ഠിതാ ഭാവേതബ്ബാ, അസമ്പജഞ്ഞസ്സ പഹാനായ സമ്പജഞ്ഞം ഭാവേതബ്ബം, മഹിച്ഛതായ പഹാനായ അപ്പിച്ഛതാ ഭാവേതബ്ബാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ ഇമേ തയോ ധമ്മാ ഭാവേതബ്ബാ’’തി. അട്ഠമം.

൯. ദോവചസ്സതാസുത്തം

൧൧൫. ‘‘തയോമേ, ഭിക്ഖവേ, ധമ്മാ. കതമേ തയോ? ദോവചസ്സതാ, പാപമിത്തതാ, ചേതസോ വിക്ഖേപോ. ഇമേ ഖോ, ഭിക്ഖവേ, തയോ ധമ്മാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ തയോ ധമ്മാ ഭാവേതബ്ബാ. കതമേ തയോ? ദോവചസ്സതായ പഹാനായ സോവചസ്സതാ ഭാവേതബ്ബാ, പാപമിത്തതായ പഹാനായ കല്യാണമിത്തതാ ഭാവേതബ്ബാ, ചേതസോ വിക്ഖേപസ്സ പഹാനായ ആനാപാനസ്സതി ഭാവേതബ്ബാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ ഇമേ തയോ ധമ്മാ ഭാവേതബ്ബാ’’തി. നവമം.

൧൦. ഉദ്ധച്ചസുത്തം

൧൧൬. ‘‘തയോമേ, ഭിക്ഖവേ, ധമ്മാ. കതമേ തയോ? ഉദ്ധച്ചം, അസംവരോ, പമാദോ. ഇമേ ഖോ, ഭിക്ഖവേ, തയോ ധമ്മാ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ തയോ ധമ്മാ ഭാവേതബ്ബാ. കതമേ തയോ? ഉദ്ധച്ചസ്സ പഹാനായ സമഥോ ഭാവേതബ്ബോ, അസംവരസ്സ പഹാനായ സംവരോ ഭാവേതബ്ബോ, പമാദസ്സ പഹാനായ അപ്പമാദോ ഭാവേതബ്ബോ. ഇമേസം ഖോ, ഭിക്ഖവേ, തിണ്ണം ധമ്മാനം പഹാനായ ഇമേ തയോ ധമ്മാ ഭാവേതബ്ബാ’’തി. ദസമം.

തികവഗ്ഗോ ഏകാദസമോ. [പഠമോ (സ്യാ.)]