൧. പാതുഭാവസുത്തം

൯൬. ‘‘ഛന്നം, ഭിക്ഖവേ, പാതുഭാവോ ദുല്ലഭോ ലോകസ്മിം. കതമേസം ഛന്നം? തഥാഗതസ്സ അരഹതോ സമ്മാസമ്ബുദ്ധസ്സ പാതുഭാവോ ദുല്ലഭോ ലോകസ്മിം, തഥാഗതപ്പവേദിതസ്സ ധമ്മവിനയസ്സ ദേസേതാ പുഗ്ഗലോ ദുല്ലഭോ ലോകസ്മിം, അരിയായതനേ പച്ചാജാതി ദുല്ലഭാ [പച്ചാജാതോ ദുല്ലഭോ (സ്യാ.)] ലോകസ്മിം, ഇന്ദ്രിയാനം അവേകല്ലതാ ദുല്ലഭാ ലോകസ്മിം, അജളതാ അനേളമൂഗതാ ദുല്ലഭാ ലോകസ്മിം, കുസലേ ധമ്മേ ഛന്ദോ [കുസലധമ്മച്ഛന്ദോ (സീ. സ്യാ. പീ.)] ദുല്ലഭോ ലോകസ്മിം. ഇമേസം ഖോ, ഭിക്ഖവേ, ഛന്നം പാതുഭാവോ ദുല്ലഭോ ലോകസ്മി’’ന്തി. പഠമം.