൭. സക്ഖിഭബ്ബസുത്തം

൭൧. ‘‘ഛഹി, ഭിക്ഖവേ, ധമ്മേഹി സമന്നാഗതോ ഭിക്ഖു അഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ. കതമേഹി ഛഹി? ഇധ, ഭിക്ഖവേ, ഭിക്ഖു ‘ഇമേ ഹാനഭാഗിയാ ധമ്മാ’തി യഥാഭൂതം നപ്പജാനാതി, ‘ഇമേ ഠിതിഭാഗിയാ ധമ്മാ’തി യഥാഭൂതം നപ്പജാനാതി, ‘ഇമേ വിസേസഭാഗിയാ ധമ്മാ’തി യഥാഭൂതം നപ്പജാനാതി, ‘ഇമേ നിബ്ബേധഭാഗിയാ ധമ്മാ’തി യഥാഭൂതം നപ്പജാനാതി, അസക്കച്ചകാരീ ച ഹോതി, അസപ്പായകാരീ ച. ഇമേഹി ഖോ, ഭിക്ഖവേ, ഛഹി ധമ്മേഹി സമന്നാഗതോ ഭിക്ഖു അഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ.

‘‘ഛഹി, ഭിക്ഖവേ, ധമ്മേഹി സമന്നാഗതോ ഭിക്ഖു ഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ. കതമേഹി ഛഹി? ഇധ, ഭിക്ഖവേ, ഭിക്ഖു ‘ഇമേ ഹാനഭാഗിയാ ധമ്മാ’തി യഥാഭൂതം പജാനാതി, ‘ഇമേ ഠിതിഭാഗിയാ ധമ്മാ’തി യഥാഭൂതം പജാനാതി, ‘ഇമേ വിസേസഭാഗിയാ ധമ്മാ’തി യഥാഭൂതം പജാനാതി, ‘ഇമേ നിബ്ബേധഭാഗിയാ ധമ്മാ’തി യഥാഭൂതം പജാനാതി, സക്കച്ചകാരീ ച ഹോതി, സപ്പായകാരീ ച. ഇമേഹി ഖോ, ഭിക്ഖവേ, ഛഹി ധമ്മേഹി സമന്നാഗതോ ഭിക്ഖു ഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ’’തി. സത്തമം.