൭. ദേവതാവഗ്ഗോ

൧. അനാഗാമിഫലസുത്തം

൬൫. ‘‘ഛ, ഭിക്ഖവേ, ധമ്മേ അപ്പഹായ അഭബ്ബോ അനാഗാമിഫലം സച്ഛികാതും. കതമേ ഛ? അസ്സദ്ധിയം, അഹിരികം, അനോത്തപ്പം, കോസജ്ജം, മുട്ഠസ്സച്ചം, ദുപ്പഞ്ഞതം – ഇമേ ഖോ, ഭിക്ഖവേ, ഛ ധമ്മേ അപ്പഹായ അഭബ്ബോ അനാഗാമിഫലം സച്ഛികാതും.

‘‘ഛ, ഭിക്ഖവേ, ധമ്മേ പഹായ ഭബ്ബോ അനാഗാമിഫലം സച്ഛികാതും. കതമേ ഛ? അസ്സദ്ധിയം, അഹിരികം, അനോത്തപ്പം, കോസജ്ജം, മുട്ഠസ്സച്ചം, ദുപ്പഞ്ഞതം – ഇമേ ഖോ, ഭിക്ഖവേ, ഛ ധമ്മേ പഹായ ഭബ്ബോ അനാഗാമിഫലം സച്ഛികാതു’’ന്തി. പഠമം.

൨. അരഹത്തസുത്തം

൬൬. ‘‘ഛ, ഭിക്ഖവേ, ധമ്മേ അപ്പഹായ അഭബ്ബോ അരഹത്തം സച്ഛികാതും. കതമേ ഛ? ഥിനം [ഥീനം (സീ. സ്യാ. കം. പീ.)], മിദ്ധം, ഉദ്ധച്ചം, കുക്കുച്ചം, അസ്സദ്ധിയം, പമാദം – ഇമേ ഖോ, ഭിക്ഖവേ, ഛ ധമ്മേ അപ്പഹായ അഭബ്ബോ അരഹത്തം സച്ഛികാതും.

‘‘ഛ, ഭിക്ഖവേ, ധമ്മേ പഹായ ഭബ്ബോ അരഹത്തം സച്ഛികാതും. കതമേ ഛ? ഥിനം, മിദ്ധം, ഉദ്ധച്ചം, കുക്കുച്ചം, അസ്സദ്ധിയം, പമാദം – ഇമേ ഖോ, ഭിക്ഖവേ, ഛ ധമ്മേ പഹായ ഭബ്ബോ അരഹത്തം സച്ഛികാതു’’ന്തി. ദുതിയം.

൩. മിത്തസുത്തം

൬൭. ‘‘‘സോ വത, ഭിക്ഖവേ, ഭിക്ഖു പാപമിത്തോ പാപസഹായോ പാപസമ്പവങ്കോ, പാപമിത്തേ [പാപകേ മിത്തേ (ക.)] സേവമാനോ ഭജമാനോ പയിരുപാസമാനോ, തേസഞ്ച ദിട്ഠാനുഗതിം ആപജ്ജമാനോ ആഭിസമാചാരികം ധമ്മം പരിപൂരേസ്സതീ’തി നേതം ഠാനം വിജ്ജതി. ‘ആഭിസമാചാരികം ധമ്മം അപരിപൂരേത്വാ സേഖം ധമ്മം പരിപൂരേസ്സതീ’തി നേതം ഠാനം വിജ്ജതി. ‘സേഖം ധമ്മം അപരിപൂരേത്വാ സീലാനി പരിപൂരേസ്സതീ’തി നേതം ഠാനം വിജ്ജതി. ‘സീലാനി അപരിപൂരേത്വാ കാമരാഗം വാ രൂപരാഗം വാ അരൂപരാഗം വാ പജഹിസ്സതീ’തി നേതം ഠാനം വിജ്ജതി.

‘‘‘സോ വത, ഭിക്ഖവേ, ഭിക്ഖു കല്യാണമിത്തോ കല്യാണസഹായോ കല്യാണസമ്പവങ്കോ, കല്യാണമിത്തേ സേവമാനോ ഭജമാനോ പയിരുപാസമാനോ, തേസഞ്ച ദിട്ഠാനുഗതിം ആപജ്ജമാനോ ആഭിസമാചാരികം ധമ്മം പരിപൂരേസ്സതീ’തി ഠാനമേതം വിജ്ജതി. ‘ആഭിസമാചാരികം ധമ്മം പരിപൂരേത്വാ സേഖം ധമ്മം പരിപൂരേസ്സതീ’തി ഠാനമേതം വിജ്ജതി. ‘സേഖം ധമ്മം പരിപൂരേത്വാ സീലാനി പരിപൂരേസ്സതീ’തി ഠാനമേതം വിജ്ജതി. ‘സീലാനി പരിപൂരേത്വാ കാമരാഗം വാ രൂപരാഗം വാ അരൂപരാഗം വാ പജഹിസ്സതീ’തി ഠാനമേതം വിജ്ജതീ’’തി. തതിയം.

൪. സങ്ഗണികാരാമസുത്തം

൬൮. ‘‘‘സോ വത, ഭിക്ഖവേ, ഭിക്ഖു സങ്ഗണികാരാമോ സങ്ഗണികരതോ സങ്ഗണികാരാമതം അനുയുത്തോ, ഗണാരാമോ ഗണരതോ ഗണാരാമതം അനുയുത്തോ, ഏകോ പവിവേകേ അഭിരമിസ്സതീ’തി നേതം ഠാനം വിജ്ജതി. ‘ഏകോ പവിവേകേ അനഭിരമന്തോ ചിത്തസ്സ നിമിത്തം ഗഹേസ്സതീ’തി നേതം ഠാനം വിജ്ജതി. ‘ചിത്തസ്സ നിമിത്തം അഗണ്ഹന്തോ സമ്മാദിട്ഠിം പരിപൂരേസ്സതീ’തി നേതം ഠാനം വിജ്ജതി. ‘സമ്മാദിട്ഠിം അപരിപൂരേത്വാ സമ്മാസമാധിം പരിപൂരേസ്സതീ’തി നേതം ഠാനം വിജ്ജതി. ‘സമ്മാസമാധിം അപരിപൂരേത്വാ സംയോജനാനി പജഹിസ്സതീ’തി നേതം ഠാനം വിജ്ജതി. ‘സംയോജനാനി അപ്പഹായ നിബ്ബാനം സച്ഛികരിസ്സതീ’തി നേതം ഠാനം വിജ്ജതി.

‘‘‘സോ വത, ഭിക്ഖവേ, ഭിക്ഖു ന സങ്ഗണികാരാമോ ന സങ്ഗണികരതോ ന സങ്ഗണികാരാമതം അനുയുത്തോ, ന ഗണാരാമോ ന ഗണരതോ ന ഗണാരാമതം അനുയുത്തോ, ഏകോ പവിവേകേ അഭിരമിസ്സതീ’തി ഠാനമേതം വിജ്ജതി. ‘ഏകോ പവിവേകേ അഭിരമന്തോ ചിത്തസ്സ നിമിത്തം ഗഹേസ്സതീ’തി ഠാനമേതം വിജ്ജതി. ‘ചിത്തസ്സ നിമിത്തം ഗണ്ഹന്തോ സമ്മാദിട്ഠിം പരിപൂരേസ്സതീ’തി ഠാനമേതം വിജ്ജതി. ‘സമ്മാദിട്ഠിം പരിപൂരേത്വാ സമ്മാസമാധിം പരിപൂരേസ്സതീ’തി ഠാനമേതം വിജ്ജതി. ‘സമ്മാസമാധിം പരിപൂരേത്വാ സംയോജനാനി പജഹിസ്സതീ’തി ഠാനമേതം വിജ്ജതി. ‘സംയോജനാനി പഹായ നിബ്ബാനം സച്ഛികരിസ്സതീ’തി ഠാനമേതം വിജ്ജതീ’’തി. ചതുത്ഥം.

൫. ദേവതാസുത്തം

൬൯. അഥ ഖോ അഞ്ഞതരാ ദേവതാ അഭിക്കന്തായ രത്തിയാ അഭിക്കന്തവണ്ണാ കേവലകപ്പം ജേതവനം ഓഭാസേത്വാ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം അട്ഠാസി. ഏകമന്തം ഠിതാ ഖോ സാ ദേവതാ ഭഗവന്തം ഏതദവോച – ‘‘ഛയിമേ, ഭന്തേ, ധമ്മാ ഭിക്ഖുനോ അപരിഹാനായ സംവത്തന്തി. കതമേ ഛ? സത്ഥുഗാരവതാ, ധമ്മഗാരവതാ, സങ്ഘഗാരവതാ, സിക്ഖാഗാരവതാ, സോവചസ്സതാ, കല്യാണമിത്തതാ – ഇമേ ഖോ, ഭന്തേ, ഛ ധമ്മാ ഭിക്ഖുനോ അപരിഹാനായ സംവത്തന്തീ’’തി. ഇദമവോച സാ ദേവതാ. സമനുഞ്ഞോ സത്ഥാ അഹോസി. അഥ ഖോ സാ ദേവതാ ‘‘സമനുഞ്ഞോ മേ സത്ഥാ’’തി ഭഗവന്തം അഭിവാദേത്വാ പദക്ഖിണം കത്വാ തത്ഥേവന്തരധായി.

അഥ ഖോ ഭഗവാ തസ്സാ രത്തിയാ അച്ചയേന ഭിക്ഖൂ ആമന്തേസി – ‘‘ഇമം, ഭിക്ഖവേ, രത്തിം അഞ്ഞതരാ ദേവതാ അഭിക്കന്തായ രത്തിയാ അഭിക്കന്തവണ്ണാ കേവലകപ്പം ജേതവനം ഓഭാസേത്വാ യേനാഹം തേനുപസങ്കമി; ഉപസങ്കമിത്വാ മം അഭിവാദേത്വാ ഏകമന്തം അട്ഠാസി. ഏകമന്തം ഠിതാ ഖോ, ഭിക്ഖവേ, സാ ദേവതാ മം ഏതദവോച – ‘ഛയിമേ, ഭന്തേ, ധമ്മാ ഭിക്ഖുനോ അപരിഹാനായ സംവത്തന്തി. കതമേ ഛ? സത്ഥുഗാരവതാ, ധമ്മഗാരവതാ, സങ്ഘഗാരവതാ, സിക്ഖാഗാരവതാ, സോവചസ്സതാ, കല്യാണമിത്തതാ – ഇമേ ഖോ, ഭന്തേ, ഛ ധമ്മാ ഭിക്ഖുനോ അപരിഹാനായ സംവത്തന്തീ’തി. ഇദമവോച, ഭിക്ഖവേ, സാ ദേവതാ. ഇദം വത്വാ മം അഭിവാദേത്വാ പദക്ഖിണം കത്വാ തത്ഥേവന്തരധായീ’’തി.

ഏവം വുത്തേ ആയസ്മാ സാരിപുത്തോ ഭഗവന്തം അഭിവാദേത്വാ ഏതദവോച – ‘‘ഇമസ്സ ഖോ അഹം, ഭന്തേ, ഭഗവതാ സംഖിത്തേന ഭാസിതസ്സ ഏവം വിത്ഥാരേന അത്ഥം ആജാനാമി. ഇധ, ഭന്തേ, ഭിക്ഖു അത്തനാ ച സത്ഥുഗാരവോ ഹോതി സത്ഥുഗാരവതായ ച വണ്ണവാദീ. യേ ചഞ്ഞേ ഭിക്ഖൂ ന സത്ഥുഗാരവാ തേ ച സത്ഥുഗാരവതായ സമാദപേതി. യേ ചഞ്ഞേ ഭിക്ഖൂ സത്ഥുഗാരവാ തേസഞ്ച വണ്ണം ഭണതി ഭൂതം തച്ഛം കാലേന. അത്തനാ ച ധമ്മഗാരവോ ഹോതി…പേ… സങ്ഘഗാരവോ ഹോതി… സിക്ഖാഗാരവോ ഹോതി … സുവചോ ഹോതി… കല്യാണമിത്തോ ഹോതി കല്യാണമിത്തതായ ച വണ്ണവാദീ. യേ ചഞ്ഞേ ഭിക്ഖൂ ന കല്യാണമിത്താ തേ ച കല്യാണമിത്തതായ സമാദപേതി. യേ ചഞ്ഞേ ഭിക്ഖൂ കല്യാണമിത്താ തേസഞ്ച വണ്ണം ഭണതി ഭൂതം തച്ഛം കാലേന. ഇമസ്സ ഖോ അഹം, ഭന്തേ, ഭഗവതാ സംഖിത്തേന ഭാസിതസ്സ ഏവം വിത്ഥാരേന അത്ഥം ആജാനാമീ’’തി.

‘‘സാധു സാധു, സാരിപുത്ത! സാധു ഖോ ത്വം, സാരിപുത്ത, ഇമസ്സ മയാ സംഖിത്തേന ഭാസിതസ്സ ഏവം വിത്ഥാരേന അത്ഥം ആജാനാസി. ഇധ, സാരിപുത്ത, ഭിക്ഖു അത്തനാ ച സത്ഥുഗാരവോ ഹോതി സത്ഥുഗാരവതായ ച വണ്ണവാദീ. യേ ചഞ്ഞേ ഭിക്ഖൂ ന സത്ഥുഗാരവാ തേ ച സത്ഥുഗാരവതായ സമാദപേതി. യേ ചഞ്ഞേ ഭിക്ഖൂ സത്ഥുഗാരവാ തേസഞ്ച വണ്ണം ഭണതി ഭൂതം തച്ഛം കാലേന. അത്തനാ ച ധമ്മഗാരവോ ഹോതി…പേ… സങ്ഘഗാരവോ ഹോതി… സിക്ഖാഗാരവോ ഹോതി… സുവചോ ഹോതി… കല്യാണമിത്തോ ഹോതി കല്യാണമിത്തതായ ച വണ്ണവാദീ. യേ ചഞ്ഞേ ഭിക്ഖൂ ന കല്യാണമിത്താ തേ ച കല്യാണമിത്തതായ സമാദപേതി. യേ ചഞ്ഞേ ഭിക്ഖൂ കല്യാണമിത്താ തേസഞ്ച വണ്ണം ഭണതി ഭൂതം തച്ഛം കാലേന. ഇമസ്സ ഖോ, സാരിപുത്ത, മയാ സംഖിത്തേന ഭാസിതസ്സ ഏവം വിത്ഥാരേന അത്ഥോ ദട്ഠബ്ബോ’’തി. പഞ്ചമം.

൬. സമാധിസുത്തം

൭൦. ‘‘‘സോ വത, ഭിക്ഖവേ, ഭിക്ഖു ന സന്തേന സമാധിനാ ന പണീതേന ന പടിപ്പസ്സദ്ധിലദ്ധേന [ന പടിപ്പസ്സദ്ധലദ്ധേന (സീ.)] ന ഏകോദിഭാവാധിഗതേന അനേകവിഹിതം ഇദ്ധിവിധം പച്ചനുഭവിസ്സതി – ഏകോപി ഹുത്വാ ബഹുധാ ഭവിസ്സതി, ബഹുധാപി ഹുത്വാ ഏകോ ഭവിസ്സതി…പേ… യാവ ബ്രഹ്മലോകാപി കായേന വസം വത്തേസ്സതീ’തി നേതം ഠാനം വിജ്ജതി. ‘ദിബ്ബായ സോതധാതുയാ വിസുദ്ധായ അതിക്കന്തമാനുസികായ ഉഭോ സദ്ദേ സുണിസ്സതി – ദിബ്ബേ ച മാനുസേ ച യേ ദൂരേ സന്തികേ ചാ’തി നേതം ഠാനം വിജ്ജതി. ‘പരസത്താനം പരപുഗ്ഗലാനം ചേതസാ ചേതോ പരിച്ച പജാനിസ്സതി – സരാഗം വാ ചിത്തം സരാഗം ചിത്തന്തി പജാനിസ്സതി …പേ… വിമുത്തം വാ ചിത്തം വിമുത്തം ചിത്തന്തി പജാനിസ്സതീ’തി നേതം ഠാനം വിജ്ജതി. ‘അനേകവിഹിതം പുബ്ബേനിവാസം അനുസ്സരിസ്സതി, സേയ്യഥിദം – ഏകമ്പി ജാതിം, ദ്വേപി ജാതിയോ…പേ… ഇതി സാകാരം സഉദ്ദേസം അനേകവിഹിതം പുബ്ബേനിവാസം അനുസ്സരിസ്സതീ’തി നേതം ഠാനം വിജ്ജതി. ‘ദിബ്ബേന ചക്ഖുനാ വിസുദ്ധേന അതിക്കന്തമാനുസകേന സത്തേ പസ്സിസ്സതി…പേ… യഥാകമ്മൂപഗേ സത്തേ പജാനിസ്സതീ’തി നേതം ഠാനം വിജ്ജതി. ‘ആസവാനം ഖയാ…പേ… സച്ഛികത്വാ ഉപസമ്പജ്ജ വിഹരിസ്സതീ’തി നേതം ഠാനം വിജ്ജതി.

‘‘‘സോ വത, ഭിക്ഖവേ, ഭിക്ഖു സന്തേന സമാധിനാ പണീതേന പടിപ്പസ്സദ്ധിലദ്ധേന ഏകോദിഭാവാധിഗതേന അനേകവിഹിതം ഇദ്ധിവിധം പച്ചനുഭവിസ്സതി…പേ… യാവ ബ്രഹ്മലോകാപി കായേന വസം വത്തേസ്സതീ’തി ഠാനമേതം വിജ്ജതി. ‘ദിബ്ബായ സോതധാതുയാ വിസുദ്ധായ അതിക്കന്തമാനുസികായ ഉഭോ സദ്ദേ സുണിസ്സതി – ദിബ്ബേ ച മാനുസേ ച യേ ദൂരേ സന്തികേ ചാ’തി ഠാനമേതം വിജ്ജതി. ‘പരസത്താനം പരപുഗ്ഗലാനം ചേതസാ ചേതോ പരിച്ച പജാനിസ്സതി – സരാഗം വാ ചിത്തം സരാഗം ചിത്തന്തി പജാനിസ്സതി…പേ… വിമുത്തം വാ ചിത്തം വിമുത്തം ചിത്തന്തി പജാനിസ്സതീ’തി ഠാനമേതം വിജ്ജതി. ‘അനേകവിഹിതം പുബ്ബേനിവാസം അനുസ്സരിസ്സതി, സേയ്യഥിദം – ഏകമ്പി ജാതിം, ദ്വേപി ജാതിയോ…പേ… ഇതി സാകാരം സഉദ്ദേസം അനേകവിഹിതം പുബ്ബേനിവാസം അനുസ്സരിസ്സതീ’തി ഠാനമേതം വിജ്ജതി. ‘ദിബ്ബേന ചക്ഖുനാ വിസുദ്ധേന അതിക്കന്തമാനുസകേന സത്തേ പസ്സിസ്സതി ചവമാനേ ഉപപജ്ജമാനേ ഹീനേ പണീതേ സുവണ്ണേ ദുബ്ബണ്ണേ, സുഗതേ ദുഗ്ഗതേ യഥാകമ്മൂപഗേ സത്തേ പജാനിസ്സതീ’തി ഠാനമേതം വിജ്ജതി. ‘ആസവാനം ഖയാ അനാസവം ചേതോവിമുത്തിം…പേ… സച്ഛികത്വാ ഉപസമ്പജ്ജ വിഹരിസ്സതീ’തി ഠാനമേതം വിജ്ജതീ’’തി. ഛട്ഠം.

൭. സക്ഖിഭബ്ബസുത്തം

൭൧. ‘‘ഛഹി, ഭിക്ഖവേ, ധമ്മേഹി സമന്നാഗതോ ഭിക്ഖു അഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ. കതമേഹി ഛഹി? ഇധ, ഭിക്ഖവേ, ഭിക്ഖു ‘ഇമേ ഹാനഭാഗിയാ ധമ്മാ’തി യഥാഭൂതം നപ്പജാനാതി, ‘ഇമേ ഠിതിഭാഗിയാ ധമ്മാ’തി യഥാഭൂതം നപ്പജാനാതി, ‘ഇമേ വിസേസഭാഗിയാ ധമ്മാ’തി യഥാഭൂതം നപ്പജാനാതി, ‘ഇമേ നിബ്ബേധഭാഗിയാ ധമ്മാ’തി യഥാഭൂതം നപ്പജാനാതി, അസക്കച്ചകാരീ ച ഹോതി, അസപ്പായകാരീ ച. ഇമേഹി ഖോ, ഭിക്ഖവേ, ഛഹി ധമ്മേഹി സമന്നാഗതോ ഭിക്ഖു അഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ.

‘‘ഛഹി, ഭിക്ഖവേ, ധമ്മേഹി സമന്നാഗതോ ഭിക്ഖു ഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ. കതമേഹി ഛഹി? ഇധ, ഭിക്ഖവേ, ഭിക്ഖു ‘ഇമേ ഹാനഭാഗിയാ ധമ്മാ’തി യഥാഭൂതം പജാനാതി, ‘ഇമേ ഠിതിഭാഗിയാ ധമ്മാ’തി യഥാഭൂതം പജാനാതി, ‘ഇമേ വിസേസഭാഗിയാ ധമ്മാ’തി യഥാഭൂതം പജാനാതി, ‘ഇമേ നിബ്ബേധഭാഗിയാ ധമ്മാ’തി യഥാഭൂതം പജാനാതി, സക്കച്ചകാരീ ച ഹോതി, സപ്പായകാരീ ച. ഇമേഹി ഖോ, ഭിക്ഖവേ, ഛഹി ധമ്മേഹി സമന്നാഗതോ ഭിക്ഖു ഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ’’തി. സത്തമം.

൮. ബലസുത്തം

൭൨. ‘‘ഛഹി, ഭിക്ഖവേ, ധമ്മേഹി സമന്നാഗതോ ഭിക്ഖു അഭബ്ബോ സമാധിസ്മിം [സമാധിമ്ഹി (ക.)] ബലതം പാപുണിതും. കതമേഹി ഛഹി? ഇധ, ഭിക്ഖവേ, ഭിക്ഖു ന സമാധിസ്സ സമാപത്തികുസലോ ഹോതി, ന സമാധിസ്സ ഠിതികുസലോ ഹോതി, ന സമാധിസ്സ [ന സമാധിമ്ഹാ (ക.) ഉപരിസത്തകനിപാതേ ദേവതാവഗ്ഗേ പന സബ്ബത്ഥപി ‘‘സമാധിസ്സ’’ഇത്വേവ ദിസ്സതി] വുട്ഠാനകുസലോ ഹോതി, അസക്കച്ചകാരീ ച ഹോതി, അസാതച്ചകാരീ ച, അസപ്പായകാരീ ച. ഇമേഹി ഖോ, ഭിക്ഖവേ, ഛഹി ധമ്മേഹി സമന്നാഗതോ ഭിക്ഖു അഭബ്ബോ സമാധിസ്മിം ബലതം പാപുണിതും.

‘‘ഛഹി, ഭിക്ഖവേ, ധമ്മേഹി സമന്നാഗതോ ഭിക്ഖു ഭബ്ബോ സമാധിസ്മിം ബലതം പാപുണിതും. കതമേഹി ഛഹി? ഇധ, ഭിക്ഖവേ, ഭിക്ഖു സമാധിസ്സ സമാപത്തികുസലോ ഹോതി, സമാധിസ്സ ഠിതികുസലോ ഹോതി, സമാധിസ്സ വുട്ഠാനകുസലോ ഹോതി, സക്കച്ചകാരീ ച ഹോതി, സാതച്ചകാരീ ച, സപ്പായകാരീ ച. ഇമേഹി ഖോ, ഭിക്ഖവേ, ഛഹി ധമ്മേഹി സമന്നാഗതോ ഭിക്ഖു ഭബ്ബോ സമാധിസ്മിം ബലതം പാപുണിതു’’ന്തി. അട്ഠമം.

൯. പഠമതജ്ഝാനസുത്തം

൭൩. ‘‘ഛ, ഭിക്ഖവേ, ധമ്മേ അപ്പഹായ അഭബ്ബോ പഠമം ഝാനം ഉപസമ്പജ്ജ വിഹരിതും. കതമേ ഛ? കാമച്ഛന്ദം, ബ്യാപാദം, ഥിനമിദ്ധം, ഉദ്ധച്ചകുക്കുച്ചം, വിചികിച്ഛം. കാമേസു ഖോ പനസ്സ ആദീനവോ ന യഥാഭൂതം സമ്മപ്പഞ്ഞായ സുദിട്ഠോ ഹോതി. ഇമേ ഖോ, ഭിക്ഖവേ, ഛ ധമ്മേ അപ്പഹായ അഭബ്ബോ പഠമം ഝാനം ഉപസമ്പജ്ജ വിഹരിതും.

‘‘ഛ, ഭിക്ഖവേ, ധമ്മേ പഹായ ഭബ്ബോ പഠമം ഝാനം ഉപസമ്പജ്ജ വിഹരിതും. കതമേ ഛ? കാമച്ഛന്ദം, ബ്യാപാദം, ഥിനമിദ്ധം, ഉദ്ധച്ചകുക്കുച്ചം, വിചികിച്ഛം, കാമേസു ഖോ പനസ്സ ആദീനവോ ന യഥാഭൂതം സമ്മപ്പഞ്ഞായ സുദിട്ഠോ ഹോതി. ഇമേ ഖോ, ഭിക്ഖവേ, ഛ ധമ്മേ പഹായ ഭബ്ബോ പഠമം ഝാനം ഉപസമ്പജ്ജ വിഹരിതു’’ന്തി. നവമം.

൧൦. ദുതിയതജ്ഝാനസുത്തം

൭൪. ‘‘ഛ, ഭിക്ഖവേ, ധമ്മേ അപ്പഹായ അഭബ്ബോ പഠമം ഝാനം ഉപസമ്പജ്ജ വിഹരിതും. കതമേ ഛ? കാമവിതക്കം, ബ്യാപാദവിതക്കം, വിഹിംസാവിതക്കം, കാമസഞ്ഞം, ബ്യാപാദസഞ്ഞം, വിഹിംസാസഞ്ഞം – ഇമേ ഖോ, ഭിക്ഖവേ, ഛ ധമ്മേ അപ്പഹായ അഭബ്ബോ പഠമം ഝാനം ഉപസമ്പജ്ജ വിഹരിതും.

‘‘ഛ, ഭിക്ഖവേ, ധമ്മേ പഹായ ഭബ്ബോ പഠമം ഝാനം ഉപസമ്പജ്ജ വിഹരിതും. കതമേ ഛ? കാമവിതക്കം, ബ്യാപാദവിതക്കം, വിഹിംസാവിതക്കം, കാമസഞ്ഞം, ബ്യാപാദസഞ്ഞം, വിഹിംസാസഞ്ഞം – ഇമേ ഖോ, ഭിക്ഖവേ, ഛ ധമ്മേ പഹായ ഭബ്ബോ പഠമം ഝാനം ഉപസമ്പജ്ജ വിഹരിതു’’ന്തി. ദസമം.

ദേവതാവഗ്ഗോ സത്തമോ. [ദുതിയോ (സ്യാ. ക.)]