൫. ദാരുകമ്മികസുത്തം

൫൯. ഏവം മേ സുതം – ഏകം സമയം ഭഗവാ നാതികേ വിഹരതി ഗിഞ്ജകാവസഥേ. അഥ ഖോ ദാരുകമ്മികോ ഗഹപതി യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നം ഖോ ദാരുകമ്മികം ഗഹപതിം ഭഗവാ ഏതദവോച – ‘‘അപി നു തേ, ഗഹപതി, കുലേ ദാനം ദീയതീ’’തി? ‘‘ദീയതി മേ, ഭന്തേ, കുലേ ദാനം. തഞ്ച ഖോ യേ തേ ഭിക്ഖൂ ആരഞ്ഞികാ പിണ്ഡപാതികാ പംസുകൂലികാ അരഹന്തോ വാ അരഹത്തമഗ്ഗം വാ സമാപന്നാ, തഥാരൂപേസു മേ, ഭന്തേ, ഭിക്ഖൂസു ദാനം ദീയതീ’’തി.

‘‘ദുജ്ജാനം ഖോ ഏതം, ഗഹപതി, തയാ ഗിഹിനാ കാമഭോഗിനാ പുത്തസമ്ബാധസയനം അജ്ഝാവസന്തേന, കാസികചന്ദനം പച്ചനുഭോന്തേന, മാലാഗന്ധവിലേപനം ധാരയന്തേന, ജാതരൂപരജതം സാദിയന്തേന ഇമേ വാ അരഹന്തോ ഇമേ വാ അരഹത്തമഗ്ഗം സമാപന്നാതി.

‘‘ആരഞ്ഞികോ ചേപി, ഗഹപതി, ഭിക്ഖു ഹോതി ഉദ്ധതോ ഉന്നളോ ചപലോ മുഖരോ വികിണ്ണവാചോ മുട്ഠസ്സതി അസമ്പജാനോ അസമാഹിതോ വിബ്ഭന്തചിത്തോ പാകതിന്ദ്രിയോ. ഏവം സോ തേനങ്ഗേന ഗാരയ്ഹോ. ആരഞ്ഞികോ ചേപി, ഗഹപതി, ഭിക്ഖു ഹോതി അനുദ്ധതോ അനുന്നളോ അചപലോ അമുഖരോ അവികിണ്ണവാചോ ഉപട്ഠിതസ്സതി സമ്പജാനോ സമാഹിതോ ഏകഗ്ഗചിത്തോ സംവുതിന്ദ്രിയോ. ഏവം സോ തേനങ്ഗേന പാസംസോ.

‘‘ഗാമന്തവിഹാരീ ചേപി, ഗഹപതി, ഭിക്ഖു ഹോതി ഉദ്ധതോ…പേ… ഏവം സോ തേനങ്ഗേന ഗാരയ്ഹോ. ഗാമന്തവിഹാരീ ചേപി, ഗഹപതി, ഭിക്ഖു ഹോതി അനുദ്ധതോ…പേ… ഏവം സോ തേനങ്ഗേന പാസംസോ.

‘‘പിണ്ഡപാതികോ ചേപി, ഗഹപതി, ഭിക്ഖു ഹോതി ഉദ്ധതോ…പേ… ഏവം സോ തേനങ്ഗേന ഗാരയ്ഹോ. പിണ്ഡപാതികോ ചേപി, ഗഹപതി, ഭിക്ഖു ഹോതി അനുദ്ധതോ…പേ… ഏവം സോ തേനങ്ഗേന പാസംസോ.

‘‘നേമന്തനികോ ചേപി, ഗഹപതി, ഭിക്ഖു ഹോതി ഉദ്ധതോ…പേ… ഏവം സോ തേനങ്ഗേന ഗാരയ്ഹോ. നേമന്തനികോ ചേപി, ഗഹപതി, ഭിക്ഖു ഹോതി അനുദ്ധതോ…പേ… ഏവം സോ തേനങ്ഗേന പാസംസോ.

‘‘പംസുകൂലികോ ചേപി, ഗഹപതി, ഭിക്ഖു ഹോതി ഉദ്ധതോ…പേ… ഏവം സോ തേനങ്ഗേന ഗാരയ്ഹോ. പംസുകൂലികോ ചേപി, ഗഹപതി, ഭിക്ഖു ഹോതി അനുദ്ധതോ…പേ… ഏവം സോ തേനങ്ഗേന പാസംസോ.

‘‘ഗഹപതിചീവരധരോ ചേപി, ഗഹപതി, ഭിക്ഖു ഹോതി ഉദ്ധതോ ഉന്നളോ ചപലോ മുഖരോ വികിണ്ണവാചോ മുട്ഠസ്സതി അസമ്പജാനോ അസമാഹിതോ വിബ്ഭന്തചിത്തോ പാകതിന്ദ്രിയോ. ഏവം സോ തേനങ്ഗേന ഗാരയ്ഹോ. ഗഹപതിചീവരധരോ ചേപി, ഗഹപതി, ഭിക്ഖു ഹോതി അനുദ്ധതോ അനുന്നളോ അചപലോ അമുഖരോ അവികിണ്ണവാചോ ഉപട്ഠിതസ്സതി സമ്പജാനോ സമാഹിതോ ഏകഗ്ഗചിത്തോ സംവുതിന്ദ്രിയോ. ഏവം സോ തേനങ്ഗേന പാസംസോ.

‘‘ഇങ്ഘ ത്വം, ഗഹപതി, സങ്ഘേ ദാനം [ദാനാനി (ക.)] ദേഹി. സങ്ഘേ തേ ദാനം ദദതോ ചിത്തം പസീദിസ്സതി. സോ ത്വം പസന്നചിത്തോ കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജിസ്സസീ’’തി. ‘‘ഏസാഹം, ഭന്തേ, അജ്ജതഗ്ഗേ സങ്ഘേ ദാനം ദസ്സാമീ’’തി. പഞ്ചമം.