൨. സിക്ഖാപദപേയ്യാലം

൧. ഭിക്ഖുസുത്തം

൨൮൬. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു യഥാഭതം നിക്ഖിത്തോ ഏവം നിരയേ. കതമേഹി പഞ്ചഹി? പാണാതിപാതീ ഹോതി, അദിന്നാദായീ ഹോതി, അബ്രഹ്മചാരീ ഹോതി, മുസാവാദീ ഹോതി, സുരാമേരയമജ്ജപമാദട്ഠായീ ഹോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു യഥാഭതം നിക്ഖിത്തോ ഏവം നിരയേ.

‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു യഥാഭതം നിക്ഖിത്തോ ഏവം സഗ്ഗേ. കതമേഹി പഞ്ചഹി? പാണാതിപാതാ പടിവിരതോ ഹോതി, അദിന്നാദാനാ പടിവിരതോ ഹോതി, അബ്രഹ്മചരിയാ പടിവിരതോ ഹോതി, മുസാവാദാ പടിവിരതോ ഹോതി, സുരാമേരയമജ്ജപമാദട്ഠാനാ പടിവിരതോ ഹോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു യഥാഭതം നിക്ഖിത്തോ ഏവം സഗ്ഗേ’’തി. പഠമം.

൨-൭. ഭിക്ഖുനീസുത്താദിഛക്കം

൨൮൭-൨൯൨. ‘‘പഞ്ചഹി, ഭിക്ഖവേ, ധമ്മേഹി സമന്നാഗതാ ഭിക്ഖുനീ…പേ… സിക്ഖമാനാ… സാമണേരോ… സാമണേരീ… ഉപാസകോ… ഉപാസികാ യഥാഭതം നിക്ഖിത്താ ഏവം നിരയേ. കതമേഹി പഞ്ചഹി? പാണാതിപാതിനീ ഹോതി, അദിന്നാദായിനീ ഹോതി, കാമേസുമിച്ഛാചാരിനീ ഹോതി, മുസാവാദിനീ ഹോതി, സുരാമേരയമജ്ജപമാദട്ഠായിനീ ഹോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതാ ഉപാസികാ യഥാഭതം നിക്ഖിത്താ ഏവം നിരയേ.

‘‘പഞ്ചഹി, ഭിക്ഖവേ, ധമ്മേഹി സമന്നാഗതാ ഉപാസികാ യഥാഭതം നിക്ഖിത്താ ഏവം സഗ്ഗേ. കതമേഹി പഞ്ചഹി? പാണാതിപാതാ പടിവിരതാ ഹോതി, അദിന്നാദാനാ പടിവിരതാ ഹോതി, കാമേസുമിച്ഛാചാരാ പടിവിരതാ ഹോതി, മുസാവാദാ പടിവിരതാ ഹോതി, സുരാമേരയമജ്ജപമാദട്ഠാനാ പടിവിരതാ ഹോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതാ ഉപാസികാ യഥാഭതം നിക്ഖിത്താ ഏവം സഗ്ഗേ’’തി. സത്തമം.

൮. ആജീവകസുത്തം

൨൯൩. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ആജീവകോ യഥാഭതം നിക്ഖിത്തോ ഏവം നിരയേ. കതമേഹി പഞ്ചഹി? പാണാതിപാതീ ഹോതി, അദിന്നാദായീ ഹോതി, അബ്രഹ്മചാരീ ഹോതി, മുസാവാദീ ഹോതി, സുരാമേരയമജ്ജപമാദട്ഠായീ ഹോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ആജീവകോ യഥാഭതം നിക്ഖിത്തോ ഏവം നിരയേ’’തി. അട്ഠമം.

൯-൧൭. നിഗണ്ഠസുത്താദിനവകം

൨൯൪-൩൦൨. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ നിഗണ്ഠോ…പേ… മുണ്ഡസാവകോ… ജടിലകോ… പരിബ്ബാജകോ… മാഗണ്ഡികോ… തേദണ്ഡികോ… ആരുദ്ധകോ… ഗോതമകോ… ദേവധമ്മികോ യഥാഭതം നിക്ഖിത്തോ ഏവം നിരയേ. കതമേഹി പഞ്ചഹി? പാണാതിപാതീ ഹോതി, അദിന്നാദായീ ഹോതി…പേ… സുരാമേരയമജ്ജപമാദട്ഠായീ ഹോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ദേവധമ്മികോ യഥാഭതം നിക്ഖിത്തോ ഏവം നിരയേ’’തി. സത്തരസമം.

സിക്ഖാപദപേയ്യാലം നിട്ഠിതം.