൧. ആവാസികസുത്തം

൨൩൧. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ആവാസികോ ഭിക്ഖു അഭാവനീയോ ഹോതി. കതമേഹി പഞ്ചഹി? ന ആകപ്പസമ്പന്നോ ഹോതി ന വത്തസമ്പന്നോ; ന ബഹുസ്സുതോ ഹോതി ന സുതധരോ; ന പടിസല്ലേഖിതാ [സല്ലേഖിതാ (ക. സീ.)] ഹോതി ന പടിസല്ലാനാരാമോ; ന കല്യാണവാചോ ഹോതി ന കല്യാണവാക്കരണോ; ദുപ്പഞ്ഞോ ഹോതി ജളോ ഏളമൂഗോ. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ആവാസികോ ഭിക്ഖു അഭാവനീയോ ഹോതി.

‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ആവാസികോ ഭിക്ഖു ഭാവനീയോ ഹോതി. കതമേഹി പഞ്ചഹി? ആകപ്പസമ്പന്നോ ഹോതി വത്തസമ്പന്നോ; ബഹുസ്സുതോ ഹോതി സുതധരോ; പടിസല്ലേഖിതാ ഹോതി പടിസല്ലാനാരാമോ; കല്യാണവാചോ ഹോതി കല്യാണവാക്കരണോ; പഞ്ഞവാ ഹോതി അജളോ അനേളമൂഗോ. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ആവാസികോ ഭിക്ഖു ഭാവനീയോ ഹോതീ’’തി. പഠമം.