(൧൯) ൪. അരഞ്ഞവഗ്ഗോ

൧. ആരഞ്ഞികസുത്തം

൧൮൧. ‘‘പഞ്ചിമേ, ഭിക്ഖവേ, ആരഞ്ഞികാ [ആരഞ്ഞതാ (സബ്ബത്ഥ) പരി. ൪൪൩ പസ്സിതബ്ബം]. കതമേ പഞ്ച? മന്ദത്താ മോമൂഹത്താ ആരഞ്ഞികോ ഹോതി, പാപിച്ഛോ ഇച്ഛാപകതോ ആരഞ്ഞികോ ഹോതി, ഉമ്മാദാ ചിത്തക്ഖേപാ ആരഞ്ഞികോ ഹോതി, വണ്ണിതം ബുദ്ധേഹി ബുദ്ധസാവകേഹീതി ആരഞ്ഞികോ ഹോതി, അപ്പിച്ഛതംയേവ നിസ്സായ സന്തുട്ഠിംയേവ നിസ്സായ സല്ലേഖംയേവ നിസ്സായ പവിവേകംയേവ നിസ്സായ ഇദമത്ഥിതംയേവ [ഇദമട്ഠിതംയേവ (സീ. പീ.)] നിസ്സായ ആരഞ്ഞികോ ഹോതി. ഇമേ ഖോ, ഭിക്ഖവേ, പഞ്ച ആരഞ്ഞികാ. ഇമേസം ഖോ, ഭിക്ഖവേ, പഞ്ചന്നം ആരഞ്ഞികാനം യ്വായം ആരഞ്ഞികോ അപ്പിച്ഛതംയേവ നിസ്സായ സന്തുട്ഠിംയേവ നിസ്സായ സല്ലേഖംയേവ നിസ്സായ പവിവേകംയേവ നിസ്സായ ഇദമത്ഥിതംയേവ നിസ്സായ ആരഞ്ഞികോ ഹോതി, അയം ഇമേസം പഞ്ചന്നം ആരഞ്ഞികാനം അഗ്ഗോ ച സേട്ഠോ ച മോക്ഖോ [പാമോക്ഖോ (അ. നി. ൪.൯൫; ൧൦.൯൧)] ച ഉത്തമോ ച പവരോ ച.

‘‘സേയ്യഥാപി, ഭിക്ഖവേ, ഗവാ ഖീരം, ഖീരമ്ഹാ ദധി, ദധിമ്ഹാ നവനീതം, നവനീതമ്ഹാ സപ്പി, സപ്പിമ്ഹാ സപ്പിമണ്ഡോ, സപ്പിമണ്ഡോ [സപ്പിമ്ഹാ സപ്പിമണ്ഡോ (ക.) സം. നി. ൩.൬൬൨] തത്ഥ അഗ്ഗമക്ഖായതി; ഏവമേവം ഖോ, ഭിക്ഖവേ, ഇമേസം പഞ്ചന്നം ആരഞ്ഞികാനം യ്വായം ആരഞ്ഞികോ അപ്പിച്ഛതംയേവ നിസ്സായ സന്തുട്ഠിംയേവ നിസ്സായ സല്ലേഖംയേവ നിസ്സായ പവിവേകംയേവ നിസ്സായ ഇദമത്ഥിതംയേവ നിസ്സായ ആരഞ്ഞികോ ഹോതി, അയം ഇമേസം പഞ്ചന്നം ആരഞ്ഞികാനം അഗ്ഗോ ച സേട്ഠോ ച മോക്ഖോ ച ഉത്തമോ ച പവരോ ചാ’’തി. പഠമം.

൨. ചീവരസുത്തം

൧൮൨. ‘‘പഞ്ചിമേ, ഭിക്ഖവേ, പംസുകൂലികാ. കതമേ പഞ്ച? മന്ദത്താ മോമൂഹത്താ പംസുകൂലികോ ഹോതി…പേ… ഇദമത്ഥിതംയേവ നിസ്സായ പംസുകൂലികോ ഹോതി. ഇമേ ഖോ, ഭിക്ഖവേ, പഞ്ച പംസുകൂലികാ’’തി. ദുതിയം.

൩. രുക്ഖമൂലികസുത്തം

൧൮൩. ‘‘പഞ്ചിമേ, ഭിക്ഖവേ, രുക്ഖമൂലികാ. കതമേ പഞ്ച? മന്ദത്താ മോമൂഹത്താ രുക്ഖമൂലികോ ഹോതി…പേ… ഇദമത്ഥിതംയേവ നിസ്സായ രുക്ഖമൂലികോ ഹോതി. ഇമേ ഖോ, ഭിക്ഖവേ, പഞ്ച രുക്ഖമൂലികാ’’തി. തതിയം.

൪. സോസാനികസുത്തം

൧൮൪. ‘‘പഞ്ചിമേ, ഭിക്ഖവേ, സോസാനികാ. കതമേ പഞ്ച? മന്ദത്താ മോമൂഹത്താ സോസാനികോ ഹോതി…പേ… ഇദമത്ഥിതംയേവ നിസ്സായ സോസാനികോ ഹോതി. ഇമേ ഖോ, ഭിക്ഖവേ, പഞ്ച സോസാനികാ’’തി. ചതുത്ഥം.

൫. അബ്ഭോകാസികസുത്തം

൧൮൫. ‘‘പഞ്ചിമേ, ഭിക്ഖവേ, അബ്ഭോകാസികാ…പേ…. പഞ്ചമം.

൬. നേസജ്ജികസുത്തം

൧൮൬. ‘‘പഞ്ചിമേ, ഭിക്ഖവേ, നേസജ്ജികാ…പേ…. ഛട്ഠം.

൭. യഥാസന്ഥതികസുത്തം

൧൮൭. ‘‘പഞ്ചിമേ, ഭിക്ഖവേ, യഥാസന്ഥതികാ…പേ…. സത്തമം.

൮. ഏകാസനികസുത്തം

൧൮൮. ‘‘പഞ്ചിമേ, ഭിക്ഖവേ, ഏകാസനികാ…പേ…. അട്ഠമം.

൯. ഖലുപച്ഛാഭത്തികസുത്തം

൧൮൯. ‘‘പഞ്ചിമേ, ഭിക്ഖവേ, ഖലുപച്ഛാഭത്തികാ…പേ…. നവമം.

൧൦. പത്തപിണ്ഡികസുത്തം

൧൯൦. ‘‘പഞ്ചിമേ, ഭിക്ഖവേ, പത്തപിണ്ഡികാ. കതമേ പഞ്ച? മന്ദത്താ മോമൂഹത്താ പത്തപിണ്ഡികോ ഹോതി, പാപിച്ഛോ ഇച്ഛാപകതോ പത്തപിണ്ഡികോ ഹോതി, ഉമ്മാദാ ചിത്തക്ഖേപാ പത്തപിണ്ഡികോ ഹോതി, ‘വണ്ണിതം ബുദ്ധേഹി ബുദ്ധസാവകേഹീ’തി പത്തപിണ്ഡികോ ഹോതി, അപ്പിച്ഛതംയേവ നിസ്സായ സന്തുട്ഠിംയേവ നിസ്സായ സല്ലേഖംയേവ നിസ്സായ പവിവേകംയേവ നിസ്സായ ഇദമത്ഥിതംയേവ നിസ്സായ പത്തപിണ്ഡികോ ഹോതി. ഇമേ ഖോ, ഭിക്ഖവേ, പഞ്ച പത്തപിണ്ഡികാ. ഇമേസം ഖോ, ഭിക്ഖവേ, പഞ്ചന്നം പത്തപിണ്ഡികാനം യ്വായം പത്തപിണ്ഡികോ അപ്പിച്ഛതംയേവ നിസ്സായ സന്തുട്ഠിംയേവ നിസ്സായ സല്ലേഖംയേവ നിസ്സായ പവിവേകംയേവ നിസ്സായ ഇദമത്ഥിതംയേവ നിസ്സായ പത്തപിണ്ഡികോ ഹോതി, അയം ഇമേസം പഞ്ചന്നം പത്തപിണ്ഡികാനം അഗ്ഗോ ച സേട്ഠോ ച മോക്ഖോ ച ഉത്തമോ ച പവരോ ച.

‘‘സേയ്യഥാപി, ഭിക്ഖവേ, ഗവാ ഖീരം, ഖീരമ്ഹാ ദധി, ദധിമ്ഹാ നവനീതം, നവനീതമ്ഹാ സപ്പി, സപ്പിമ്ഹാ സപ്പിമണ്ഡോ, സപ്പിമണ്ഡോ തത്ഥ അഗ്ഗമക്ഖായതി; ഏവമേവം ഖോ, ഭിക്ഖവേ, ഇമേസം പഞ്ചന്നം പത്തപിണ്ഡികാനം യ്വായം പത്തപിണ്ഡികോ അപ്പിച്ഛതംയേവ നിസ്സായ സന്തുട്ഠിംയേവ നിസ്സായ സല്ലേഖംയേവ നിസ്സായ പവിവേകംയേവ നിസ്സായ ഇദമത്ഥിതംയേവ നിസ്സായ പത്തപിണ്ഡികോ ഹോതി, അയം ഇമേസം പഞ്ചന്നം പത്തപിണ്ഡികാനം അഗ്ഗോ ച സേട്ഠോ ച മോക്ഖോ ച ഉത്തമോ ച പവരോ ചാ’’തി. ദസമം.

അരഞ്ഞവഗ്ഗോ ചതുത്ഥോ.