൧൦. ദുതിയസേഖസുത്തം

൯൦. ‘‘പഞ്ചിമേ, ഭിക്ഖവേ, ധമ്മാ സേഖസ്സ ഭിക്ഖുനോ പരിഹാനായ സംവത്തന്തി. കതമേ പഞ്ച? ഇധ, ഭിക്ഖവേ, സേഖോ ഭിക്ഖു ബഹുകിച്ചോ ഹോതി ബഹുകരണീയോ വിയത്തോ കിംകരണീയേസു; രിഞ്ചതി പടിസല്ലാനം, നാനുയുഞ്ജതി അജ്ഝത്തം ചേതോസമഥം. അയം, ഭിക്ഖവേ, പഠമോ ധമ്മോ സേഖസ്സ ഭിക്ഖുനോ പരിഹാനായ സംവത്തതി.

‘‘പുന ചപരം, ഭിക്ഖവേ, സേഖോ ഭിക്ഖു അപ്പമത്തകേന കമ്മേന ദിവസം അതിനാമേതി; രിഞ്ചതി പടിസല്ലാനം, നാനുയുഞ്ജതി അജ്ഝത്തം ചേതോസമഥം. അയം, ഭിക്ഖവേ, ദുതിയോ ധമ്മോ സേഖസ്സ ഭിക്ഖുനോ പരിഹാനായ സംവത്തതി.

‘‘പുന ചപരം, ഭിക്ഖവേ, സേഖോ ഭിക്ഖു സംസട്ഠോ വിഹരതി ഗഹട്ഠപബ്ബജിതേഹി അനനുലോമികേന ഗിഹിസംസഗ്ഗേന; രിഞ്ചതി പടിസല്ലാനം, നാനുയുഞ്ജതി അജ്ഝത്തം ചേതോസമഥം. അയം, ഭിക്ഖവേ, തതിയോ ധമ്മോ സേഖസ്സ ഭിക്ഖുനോ പരിഹാനായ സംവത്തതി.

‘‘പുന ചപരം, ഭിക്ഖവേ, സേഖോ ഭിക്ഖു അകാലേന ഗാമം പവിസതി, അതിദിവാ പടിക്കമതി; രിഞ്ചതി പടിസല്ലാനം, നാനുയുഞ്ജതി അജ്ഝത്തം ചേതോസമഥം. അയം, ഭിക്ഖവേ, ചതുത്ഥോ ധമ്മോ സേഖസ്സ ഭിക്ഖുനോ പരിഹാനായ സംവത്തതി.

‘‘പുന ചപരം, ഭിക്ഖവേ, സേഖോ ഭിക്ഖു യായം കഥാ ആഭിസല്ലേഖികാ ചേതോവിവരണസപ്പായാ, സേയ്യഥിദം – അപ്പിച്ഛകഥാ സന്തുട്ഠികഥാ പവിവേകകഥാ അസംസഗ്ഗകഥാ വീരിയാരമ്ഭകഥാ സീലകഥാ സമാധികഥാ പഞ്ഞാകഥാ വിമുത്തികഥാ വിമുത്തിഞാണദസ്സനകഥാ, ഏവരൂപിയാ കഥായ ന നികാമലാഭീ ഹോതി ന അകിച്ഛലാഭീ ന അകസിരലാഭീ [കിച്ഛലാഭീ കസിരലാഭീ (സീ. സ്യാ. കം. പീ)]; രിഞ്ചതി പടിസല്ലാനം, നാനുയുഞ്ജതി അജ്ഝത്തം ചേതോസമഥം. അയം, ഭിക്ഖവേ, പഞ്ചമോ ധമ്മോ സേഖസ്സ ഭിക്ഖുനോ പരിഹാനായ സംവത്തതി. ഇമേ ഖോ, ഭിക്ഖവേ, പഞ്ച ധമ്മാ സേഖസ്സ ഭിക്ഖുനോ പരിഹാനായ സംവത്തന്തി.

‘‘പഞ്ചിമേ, ഭിക്ഖവേ, ധമ്മാ സേഖസ്സ ഭിക്ഖുനോ അപരിഹാനായ സംവത്തന്തി. കതമേ പഞ്ച? ഇധ, ഭിക്ഖവേ, സേഖോ ഭിക്ഖു ന ബഹുകിച്ചോ ഹോതി ന ബഹുകരണീയോ വിയത്തോ കിംകരണീയേസു; ന രിഞ്ചതി പടിസല്ലാനം, അനുയുഞ്ജതി അജ്ഝത്തം ചേതോസമഥം. അയം, ഭിക്ഖവേ, പഠമോ ധമ്മോ സേഖസ്സ ഭിക്ഖുനോ അപരിഹാനായ സംവത്തതി.

‘‘പുന ചപരം, ഭിക്ഖവേ, സേഖോ ഭിക്ഖു ന അപ്പമത്തകേന കമ്മേന ദിവസം അതിനാമേതി; ന രിഞ്ചതി പടിസല്ലാനം, അനുയുഞ്ജതി അജ്ഝത്തം ചേതോസമഥം. അയം, ഭിക്ഖവേ, ദുതിയോ ധമ്മോ സേഖസ്സ ഭിക്ഖുനോ അപരിഹാനായ സംവത്തതി.

‘‘പുന ചപരം, ഭിക്ഖവേ, സേഖോ ഭിക്ഖു അസംസട്ഠോ വിഹരതി ഗഹട്ഠപബ്ബജിതേഹി അനനുലോമികേന ഗിഹിസംസഗ്ഗേന; ന രിഞ്ചതി പടിസല്ലാനം, അനുയുഞ്ജതി അജ്ഝത്തം ചേതോസമഥം. അയം, ഭിക്ഖവേ, തതിയോ ധമ്മോ സേഖസ്സ ഭിക്ഖുനോ അപരിഹാനായ സംവത്തതി.

‘‘പുന ചപരം, ഭിക്ഖവേ, സേഖോ ഭിക്ഖു ന അതികാലേന ഗാമം പവിസതി, നാതിദിവാ പടിക്കമതി; ന രിഞ്ചതി പടിസല്ലാനം, അനുയുഞ്ജതി അജ്ഝത്തം ചേതോസമഥം. അയം, ഭിക്ഖവേ, ചതുത്ഥോ ധമ്മോ സേഖസ്സ ഭിക്ഖുനോ അപരിഹാനായ സംവത്തതി.

‘‘പുന ചപരം, ഭിക്ഖവേ, സേഖോ ഭിക്ഖു യായം കഥാ ആഭിസല്ലേഖികാ ചേതോവിവരണസപ്പായാ, സേയ്യഥിദം – അപ്പിച്ഛകഥാ സന്തുട്ഠികഥാ പവിവേകകഥാ അസംസഗ്ഗകഥാ വീരിയാരമ്ഭകഥാ സീലകഥാ സമാധികഥാ പഞ്ഞാകഥാ വിമുത്തികഥാ വിമുത്തിഞാണദസ്സനകഥാ, ഏവരൂപിയാ കഥായ നികാമലാഭീ ഹോതി അകിച്ഛലാഭീ അകസിരലാഭീ; ന രിഞ്ചതി പടിസല്ലാനം, അനുയുഞ്ജതി അജ്ഝത്തം ചേതോസമഥം. അയം, ഭിക്ഖവേ, പഞ്ചമോ ധമ്മോ സേഖസ്സ ഭിക്ഖുനോ അപരിഹാനായ സംവത്തതി. ഇമേ ഖോ, ഭിക്ഖവേ, പഞ്ച ധമ്മാ സേഖസ്സ ഭിക്ഖുനോ അപരിഹാനായ സംവത്തന്തീ’’തി. ദസമം.

ഥേരവഗ്ഗോ ചതുത്ഥോ.