൧. സേഖബലവഗ്ഗോ

൧. സംഖിത്തസുത്തം

൧. ഏവം മേ സുതം – ഏകം സമയം ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തത്ര ഖോ ഭഗവാ ഭിക്ഖൂ ആമന്തേസി – ‘‘ഭിക്ഖവോ’’തി. ‘‘ഭദന്തേ’’തി തേ ഭിക്ഖൂ ഭഗവതോ പച്ചസ്സോസും. ഭഗവാ ഏതദവോച –

‘‘പഞ്ചിമാനി, ഭിക്ഖവേ, സേഖബലാനി [സേക്ഖബലാനി (ക.)]. കതമാനി പഞ്ച? സദ്ധാബലം, ഹിരീബലം [ഹിരിബലം (സീ. പീ.)], ഓത്തപ്പബലം, വീരിയബലം [വിരിയബലം (സീ. സ്യാ. കം. പീ.)], പഞ്ഞാബലം – ഇമാനി ഖോ, ഭിക്ഖവേ, പഞ്ച സേഖബലാനി.

‘‘തസ്മാതിഹ, ഭിക്ഖവേ, ഏവം സിക്ഖിതബ്ബം – ‘സദ്ധാബലേന സമന്നാഗതാ ഭവിസ്സാമ സേഖബലേന, ഹിരീബലേന സമന്നാഗതാ ഭവിസ്സാമ സേഖബലേന, ഓത്തപ്പബലേന സമന്നാഗതാ ഭവിസ്സാമ സേഖബലേന, വീരിയബലേന സമന്നാഗതാ ഭവിസ്സാമ സേഖബലേന, പഞ്ഞാബലേന സമന്നാഗതാ ഭവിസ്സാമ സേഖബലേനാ’തി. ഏവഞ്ഹി വോ, ഭിക്ഖവേ, സിക്ഖിതബ്ബ’’ന്തി. ഇദമവോച ഭഗവാ. അത്തമനാ തേ ഭിക്ഖൂ ഭഗവതോ ഭാസിതം അഭിനന്ദുന്തി. പഠമം.

൨. വിത്ഥതസുത്തം

൨. ‘‘പഞ്ചിമാനി, ഭിക്ഖവേ, സേഖബലാനി. കതമാനി പഞ്ച? സദ്ധാബലം, ഹിരീബലം, ഓത്തപ്പബലം, വീരിയബലം, പഞ്ഞാബലം. കതമഞ്ച, ഭിക്ഖവേ, സദ്ധാബലം? ഇധ, ഭിക്ഖവേ, അരിയസാവകോ സദ്ധോ ഹോതി, സദ്ദഹതി തഥാഗതസ്സ ബോധിം – ‘ഇതിപി സോ ഭഗവാ അരഹം സമ്മാസമ്ബുദ്ധോ വിജ്ജാചരണസമ്പന്നോ സുഗതോ ലോകവിദൂ അനുത്തരോ പുരിസദമ്മസാരഥി സത്ഥാ ദേവമനുസ്സാനം ബുദ്ധോ ഭഗവാ’തി. ഇദം വുച്ചതി, ഭിക്ഖവേ, സദ്ധാബലം.

‘‘കതമഞ്ച, ഭിക്ഖവേ, ഹിരീബലം? ഇധ, ഭിക്ഖവേ, അരിയസാവകോ ഹിരിമാ ഹോതി, ഹിരീയതി കായദുച്ചരിതേന വചീദുച്ചരിതേന മനോദുച്ചരിതേന, ഹിരീയതി പാപകാനം അകുസലാനം ധമ്മാനം സമാപത്തിയാ. ഇദം വുച്ചതി, ഭിക്ഖവേ, ഹിരീബലം.

‘‘കതമഞ്ച, ഭിക്ഖവേ, ഓത്തപ്പബലം? ഇധ, ഭിക്ഖവേ, അരിയസാവകോ ഓത്തപ്പീ ഹോതി, ഓത്തപ്പതി കായദുച്ചരിതേന വചീദുച്ചരിതേന മനോദുച്ചരിതേന, ഓത്തപ്പതി പാപകാനം അകുസലാനം ധമ്മാനം സമാപത്തിയാ. ഇദം വുച്ചതി, ഭിക്ഖവേ, ഓത്തപ്പബലം.

‘‘കതമഞ്ച, ഭിക്ഖവേ, വീരിയബലം? ഇധ, ഭിക്ഖവേ, അരിയസാവകോ ആരദ്ധവീരിയോ വിഹരതി അകുസലാനം ധമ്മാനം പഹാനായ, കുസലാനം ധമ്മാനം ഉപസമ്പദായ, ഥാമവാ ദള്ഹപരക്കമോ അനിക്ഖിത്തധുരോ കുസലേസു ധമ്മേസു. ഇദം വുച്ചതി, ഭിക്ഖവേ, വീരിയബലം.

‘‘കതമഞ്ച, ഭിക്ഖവേ, പഞ്ഞാബലം? ഇധ, ഭിക്ഖവേ, അരിയസാവകോ പഞ്ഞവാ ഹോതി ഉദയത്ഥഗാമിനിയാ പഞ്ഞായ സമന്നാഗതോ അരിയായ നിബ്ബേധികായ സമ്മാ ദുക്ഖക്ഖയഗാമിനിയാ. ഇദം വുച്ചതി, ഭിക്ഖവേ, പഞ്ഞാബലം. ഇമാനി ഖോ, ഭിക്ഖവേ, പഞ്ച സേഖബലാനി.

‘‘തസ്മാതിഹ, ഭിക്ഖവേ, ഏവം സിക്ഖിതബ്ബം – ‘സദ്ധാബലേന സമന്നാഗതാ ഭവിസ്സാമ സേഖബലേന, ഹിരീബലേന… ഓത്തപ്പബലേന … വീരിയബലേന… പഞ്ഞാബലേന സമന്നാഗതാ ഭവിസ്സാമ സേഖബലേനാ’തി. ഏവഞ്ഹി ഖോ, ഭിക്ഖവേ, സിക്ഖിതബ്ബ’’ന്തി. ദുതിയം.

൩. ദുക്ഖസുത്തം

൩. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു ദിട്ഠേവ ധമ്മേ ദുക്ഖം വിഹരതി സവിഘാതം സഉപായാസം സപരിളാഹം, കായസ്സ ച ഭേദാ പരം മരണാ ദുഗ്ഗതി പാടികങ്ഖാ. കതമേഹി പഞ്ചഹി? ഇധ, ഭിക്ഖവേ, ഭിക്ഖു അസ്സദ്ധോ ഹോതി, അഹിരികോ ഹോതി, അനോത്തപ്പീ ഹോതി, കുസീതോ ഹോതി, ദുപ്പഞ്ഞോ ഹോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു ദിട്ഠേവ ധമ്മേ ദുക്ഖം വിഹരതി സവിഘാതം സഉപായാസം സപരിളാഹം, കായസ്സ ച ഭേദാ പരം മരണാ ദുഗ്ഗതി പാടികങ്ഖാ.

‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു ദിട്ഠേവ ധമ്മേ സുഖം വിഹരതി അവിഘാതം അനുപായാസം അപരിളാഹം, കായസ്സ ച ഭേദാ പരം മരണാ സുഗതി പാടികങ്ഖാ. കതമേഹി പഞ്ചഹി? ഇധ, ഭിക്ഖവേ, ഭിക്ഖു സദ്ധോ ഹോതി, ഹിരീമാ ഹോതി, ഓത്തപ്പീ ഹോതി, ആരദ്ധവീരിയോ ഹോതി, പഞ്ഞവാ ഹോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു ദിട്ഠേവ ധമ്മേ സുഖം വിഹരതി അവിഘാതം അനുപായാസം അപരിളാഹം, കായസ്സ ച ഭേദാ പരം മരണാ സുഗതി പാടികങ്ഖാ’’തി. തതിയം.

൪. യഥാഭതസുത്തം

൪. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു യഥാഭതം നിക്ഖിത്തോ ഏവം നിരയേ. കതമേഹി പഞ്ചഹി? ഇധ, ഭിക്ഖവേ, ഭിക്ഖു അസ്സദ്ധോ ഹോതി, അഹിരികോ ഹോതി, അനോത്തപ്പീ ഹോതി, കുസീതോ ഹോതി, ദുപ്പഞ്ഞോ ഹോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു യഥാഭതം നിക്ഖിത്തോ ഏവം നിരയേ.

‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു യഥാഭതം നിക്ഖിത്തോ ഏവം സഗ്ഗേ. കതമേഹി പഞ്ചഹി? ഇധ, ഭിക്ഖവേ, ഭിക്ഖു സദ്ധോ ഹോതി, ഹിരീമാ ഹോതി, ഓത്തപ്പീ ഹോതി, ആരദ്ധവീരിയോ ഹോതി, പഞ്ഞവാ ഹോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു യഥാഭതം നിക്ഖിത്തോ ഏവം സഗ്ഗേ’’തി. ചതുത്ഥം.

൫. സിക്ഖാസുത്തം

൫. ‘‘യോ ഹി കോചി, ഭിക്ഖവേ, ഭിക്ഖു വാ ഭിക്ഖുനീ വാ സിക്ഖം പച്ചക്ഖായ ഹീനായാവത്തതി, തസ്സ ദിട്ഠേവ [ദിട്ഠേ ചേവ (സീ.)] ധമ്മേ പഞ്ച സഹധമ്മികാ വാദാനുപാതാ [വാദാനുവാദാ (അ. നി. ൮.൧൨; അ. നി. ൩.൫൮)] ഗാരയ്ഹാ ഠാനാ ആഗച്ഛന്തി. കതമേ പഞ്ച? സദ്ധാപി നാമ തേ നാഹോസി കുസലേസു ധമ്മേസു, ഹിരീപി നാമ തേ നാഹോസി കുസലേസു ധമ്മേസു, ഓത്തപ്പമ്പി നാമ തേ നാഹോസി കുസലേസു ധമ്മേസു, വീരിയമ്പി നാമ തേ നാഹോസി കുസലേസു ധമ്മേസു, പഞ്ഞാപി നാമ തേ നാഹോസി കുസലേസു ധമ്മേസു. യോ ഹി കോചി, ഭിക്ഖവേ, ഭിക്ഖു വാ ഭിക്ഖുനീ വാ സിക്ഖം പച്ചക്ഖായ ഹീനായാവത്തതി, തസ്സ ദിട്ഠേവ ധമ്മേ ഇമേ പഞ്ച സഹധമ്മികാ വാദാനുപാതാ ഗാരയ്ഹാ ഠാനാ ആഗച്ഛന്തി.

‘‘യോ ഹി കോചി, ഭിക്ഖവേ, ഭിക്ഖു വാ ഭിക്ഖുനീ വാ സഹാപി ദുക്ഖേന സഹാപി ദോമനസ്സേന അസ്സുമുഖോ [അസ്സുമുഖോപി (സ്യാ.)] രുദമാനോ പരിപുണ്ണം പരിസുദ്ധം ബ്രഹ്മചരിയം ചരതി, തസ്സ ദിട്ഠേവ ധമ്മേ പഞ്ച സഹധമ്മികാ പാസംസാ ഠാനാ [പാസംസം ഠാനം (സ്യാ.)] ആഗച്ഛന്തി. കതമേ പഞ്ച? സദ്ധാപി നാമ തേ അഹോസി കുസലേസു ധമ്മേസു, ഹിരീപി നാമ തേ അഹോസി കുസലേസു ധമ്മേസു, ഓത്തപ്പമ്പി നാമ തേ അഹോസി കുസലേസു ധമ്മേസു, വീരിയമ്പി നാമ തേ അഹോസി കുസലേസു ധമ്മേസു, പഞ്ഞാപി നാമ തേ അഹോസി കുസലേസു ധമ്മേസു. യോ ഹി കോചി, ഭിക്ഖവേ, ഭിക്ഖു വാ ഭിക്ഖുനീ വാ സഹാപി ദുക്ഖേന സഹാപി ദോമനസ്സേന അസ്സുമുഖോ രുദമാനോ പരിപുണ്ണം പരിസുദ്ധം ബ്രഹ്മചരിയം ചരതി, തസ്സ ദിട്ഠേവ ധമ്മേ ഇമേ പഞ്ച സഹധമ്മികാ പാസംസാ ഠാനാ ആഗച്ഛന്തീ’’തി. പഞ്ചമം.

൬. സമാപത്തിസുത്തം

൬. ‘‘ന താവ, ഭിക്ഖവേ, അകുസലസ്സ സമാപത്തി ഹോതി യാവ സദ്ധാ പച്ചുപട്ഠിതാ ഹോതി കുസലേസു ധമ്മേസു. യതോ ച ഖോ, ഭിക്ഖവേ, സദ്ധാ അന്തരഹിതാ ഹോതി, അസദ്ധിയം പരിയുട്ഠായ തിട്ഠതി; അഥ അകുസലസ്സ സമാപത്തി ഹോതി.

‘‘ന താവ, ഭിക്ഖവേ, അകുസലസ്സ സമാപത്തി ഹോതി യാവ ഹിരീ പച്ചുപട്ഠിതാ ഹോതി കുസലേസു ധമ്മേസു. യതോ ച ഖോ, ഭിക്ഖവേ, ഹിരീ അന്തരഹിതാ ഹോതി, അഹിരികം പരിയുട്ഠായ തിട്ഠതി; അഥ അകുസലസ്സ സമാപത്തി ഹോതി.

‘‘ന താവ, ഭിക്ഖവേ, അകുസലസ്സ സമാപത്തി ഹോതി യാവ ഓത്തപ്പം പച്ചുപട്ഠിതം ഹോതി കുസലേസു ധമ്മേസു. യതോ ച ഖോ, ഭിക്ഖവേ, ഓത്തപ്പം അന്തരഹിതം ഹോതി, അനോത്തപ്പം പരിയുട്ഠായ തിട്ഠതി; അഥ അകുസലസ്സ സമാപത്തി ഹോതി.

‘‘ന താവ, ഭിക്ഖവേ, അകുസലസ്സ സമാപത്തി ഹോതി യാവ വീരിയം പച്ചുപട്ഠിതം ഹോതി കുസലേസു ധമ്മേസു. യതോ ച ഖോ, ഭിക്ഖവേ, വീരിയം അന്തരഹിതം ഹോതി, കോസജ്ജം പരിയുട്ഠായ തിട്ഠതി; അഥ അകുസലസ്സ സമാപത്തി ഹോതി.

‘‘ന താവ, ഭിക്ഖവേ, അകുസലസ്സ സമാപത്തി ഹോതി യാവ പഞ്ഞാ പച്ചുപട്ഠിതാ ഹോതി കുസലേസു ധമ്മേസു. യതോ ച ഖോ, ഭിക്ഖവേ, പഞ്ഞാ അന്തരഹിതാ ഹോതി, ദുപ്പഞ്ഞാ [ദുപ്പഞ്ഞം (ക.)] പരിയുട്ഠായ തിട്ഠതി; അഥ അകുസലസ്സ സമാപത്തി ഹോതീ’’തി. ഛട്ഠം.

൭. കാമസുത്തം

൭. ‘‘യേഭുയ്യേന, ഭിക്ഖവേ, സത്താ കാമേസു ലളിതാ [പലാളിതാ (സീ.)]. അസിതബ്യാഭങ്ഗിം [അസിതബ്യാഭങ്ഗി ചേപി (?)], ഭിക്ഖവേ, കുലപുത്തോ ഓഹായ അഗാരസ്മാ അനഗാരിയം പബ്ബജിതോ ഹോതി, ‘സദ്ധാപബ്ബജിതോ കുലപുത്തോ’തി അലം വചനായ. തം കിസ്സ ഹേതു? ലബ്ഭാ [ലബ്ഭാ ഹി (സ്യാ.)], ഭിക്ഖവേ, യോബ്ബനേന കാമാ തേ ച ഖോ യാദിസാ വാ താദിസാ വാ. യേ ച, ഭിക്ഖവേ, ഹീനാ കാമാ യേ ച മജ്ഝിമാ കാമാ യേ ച പണീതാ കാമാ, സബ്ബേ കാമാ ‘കാമാ’ത്വേവ സങ്ഖം ഗച്ഛന്തി. സേയ്യഥാപി, ഭിക്ഖവേ, ദഹരോ കുമാരോ മന്ദോ ഉത്താനസേയ്യകോ ധാതിയാ പമാദമന്വായ കട്ഠം വാ കഠലം [കഥലം (ക.)] വാ മുഖേ ആഹരേയ്യ. തമേനം ധാതി സീഘം സീഘം [സീഘസീഘം (സീ.)] മനസി കരേയ്യ; സീഘം സീഘം മനസി കരിത്വാ സീഘം സീഘം ആഹരേയ്യ. നോ ചേ സക്കുണേയ്യ സീഘം സീഘം ആഹരിതും, വാമേന ഹത്ഥേന സീസം പരിഗ്ഗഹേത്വാ ദക്ഖിണേന ഹത്ഥേന വങ്കങ്ഗുലിം കരിത്വാ സലോഹിതമ്പി ആഹരേയ്യ. തം കിസ്സ ഹേതു? ‘അത്ഥേസാ, ഭിക്ഖവേ, കുമാരസ്സ വിഹേസാ; നേസാ നത്ഥീ’തി വദാമി. കരണീയഞ്ച ഖോ ഏതം [ഏവം (ക.)], ഭിക്ഖവേ, ധാതിയാ അത്ഥകാമായ ഹിതേസിനിയാ അനുകമ്പികായ, അനുകമ്പം ഉപാദായ. യതോ ച ഖോ, ഭിക്ഖവേ, സോ കുമാരോ വുദ്ധോ ഹോതി അലംപഞ്ഞോ, അനപേക്ഖാ ദാനി [അനപേക്ഖാ പന (സീ. സ്യാ. കം.)], ഭിക്ഖവേ, ധാതി തസ്മിം കുമാരേ ഹോതി – ‘അത്തഗുത്തോ ദാനി കുമാരോ നാലം പമാദായാ’തി.

‘‘ഏവമേവം ഖോ, ഭിക്ഖവേ, യാവകീവഞ്ച ഭിക്ഖുനോ സദ്ധായ അകതം ഹോതി കുസലേസു ധമ്മേസു, ഹിരിയാ അകതം ഹോതി കുസലേസു ധമ്മേസു, ഓത്തപ്പേന അകതം ഹോതി കുസലേസു ധമ്മേസു, വീരിയേന അകതം ഹോതി കുസലേസു ധമ്മേസു, പഞ്ഞായ അകതം ഹോതി കുസലേസു ധമ്മേസു, അനുരക്ഖിതബ്ബോ താവ മേ സോ, ഭിക്ഖവേ, ഭിക്ഖു ഹോതി. യതോ ച ഖോ, ഭിക്ഖവേ, ഭിക്ഖുനോ സദ്ധായ കതം ഹോതി കുസലേസു ധമ്മേസു, ഹിരിയാ കതം ഹോതി കുസലേസു ധമ്മേസു, ഓത്തപ്പേന കതം ഹോതി കുസലേസു ധമ്മേസു, വീരിയേന കതം ഹോതി കുസലേസു ധമ്മേസു, പഞ്ഞായ കതം ഹോതി കുസലേസു ധമ്മേസു, അനപേക്ഖോ ദാനാഹം, ഭിക്ഖവേ [പനാഹം (സീ. സ്യാ. കം.)], തസ്മിം ഭിക്ഖുസ്മിം ഹോമി – ‘അത്തഗുത്തോ ദാനി ഭിക്ഖു നാലം പമാദായാ’’’തി. സത്തമം.

൮. ചവനസുത്തം

൮. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു ചവതി, നപ്പതിട്ഠാതി സദ്ധമ്മേ. കതമേഹി പഞ്ചഹി? അസദ്ധോ, ഭിക്ഖവേ, ഭിക്ഖു ചവതി, നപ്പതിട്ഠാതി സദ്ധമ്മേ. അഹിരികോ, ഭിക്ഖവേ, ഭിക്ഖു ചവതി, നപ്പതിട്ഠാതി സദ്ധമ്മേ. അനോത്തപ്പീ, ഭിക്ഖവേ, ഭിക്ഖു ചവതി, നപ്പതിട്ഠാതി സദ്ധമ്മേ. കുസീതോ, ഭിക്ഖവേ, ഭിക്ഖു ചവതി, നപ്പതിട്ഠാതി സദ്ധമ്മേ. ദുപ്പഞ്ഞോ, ഭിക്ഖവേ, ഭിക്ഖു ചവതി, നപ്പതിട്ഠാതി സദ്ധമ്മേ. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു ചവതി, നപ്പതിട്ഠാതി സദ്ധമ്മേ.

‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു ന ചവതി, പതിട്ഠാതി സദ്ധമ്മേ. കതമേഹി പഞ്ചഹി? സദ്ധോ, ഭിക്ഖവേ, ഭിക്ഖു ന ചവതി, പതിട്ഠാതി സദ്ധമ്മേ. ഹിരീമാ, ഭിക്ഖവേ, ഭിക്ഖു ന ചവതി, പതിട്ഠാതി സദ്ധമ്മേ. ഓത്തപ്പീ, ഭിക്ഖവേ, ഭിക്ഖു ന ചവതി, പതിട്ഠാതി സദ്ധമ്മേ. ആരദ്ധവീരിയോ, ഭിക്ഖവേ, ഭിക്ഖു ന ചവതി, പതിട്ഠാതി സദ്ധമ്മേ. പഞ്ഞവാ, ഭിക്ഖവേ, ഭിക്ഖു ന ചവതി, പതിട്ഠാതി സദ്ധമ്മേ. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു ന ചവതി, പതിട്ഠാതി സദ്ധമ്മേ’’തി. അട്ഠമം.

൯. പഠമഅഗാരവസുത്തം

൯. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു അഗാരവോ അപ്പതിസ്സോ ചവതി, നപ്പതിട്ഠാതി സദ്ധമ്മേ. കതമേഹി പഞ്ചഹി? അസ്സദ്ധോ, ഭിക്ഖവേ, ഭിക്ഖു അഗാരവോ അപ്പതിസ്സോ ചവതി, നപ്പതിട്ഠാതി സദ്ധമ്മേ. അഹിരികോ, ഭിക്ഖവേ, ഭിക്ഖു അഗാരവോ അപ്പതിസ്സോ ചവതി, നപ്പതിട്ഠാതി സദ്ധമ്മേ. അനോത്തപ്പീ, ഭിക്ഖവേ, ഭിക്ഖു അഗാരവോ അപ്പതിസ്സോ ചവതി, നപ്പതിട്ഠാതി സദ്ധമ്മേ. കുസീതോ, ഭിക്ഖവേ, ഭിക്ഖു അഗാരവോ അപ്പതിസ്സോ ചവതി, നപ്പതിട്ഠാതി സദ്ധമ്മേ. ദുപ്പഞ്ഞോ, ഭിക്ഖവേ, ഭിക്ഖു അഗാരവോ അപ്പതിസ്സോ ചവതി, നപ്പതിട്ഠാതി സദ്ധമ്മേ. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു അഗാരവോ അപ്പതിസ്സോ ചവതി, നപ്പതിട്ഠാതി സദ്ധമ്മേ.

‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു സഗാരവോ സപ്പതിസ്സോ ന ചവതി, പതിട്ഠാതി സദ്ധമ്മേ. കതമേഹി പഞ്ചഹി? സദ്ധോ, ഭിക്ഖവേ, ഭിക്ഖു സഗാരവോ സപ്പതിസ്സോ ന ചവതി, പതിട്ഠാതി സദ്ധമ്മേ. ഹിരിമാ, ഭിക്ഖവേ, ഭിക്ഖു സഗാരവോ സപ്പതിസ്സോ ന ചവതി, പതിട്ഠാതി സദ്ധമ്മേ. ഓത്തപ്പീ, ഭിക്ഖവേ, ഭിക്ഖു സഗാരവോ സപ്പതിസ്സോ ന ചവതി, പതിട്ഠാതി സദ്ധമ്മേ. ആരദ്ധവീരിയോ, ഭിക്ഖവേ, ഭിക്ഖു സഗാരവോ സപ്പതിസ്സോ ന ചവതി, പതിട്ഠാതി സദ്ധമ്മേ. പഞ്ഞവാ, ഭിക്ഖവേ, ഭിക്ഖു സഗാരവോ സപ്പതിസ്സോ ന ചവതി, പതിട്ഠാതി സദ്ധമ്മേ. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു സഗാരവോ സപ്പതിസ്സോ ന ചവതി, പതിട്ഠാതി സദ്ധമ്മേ’’തി. നവമം.

൧൦. ദുതിയഅഗാരവസുത്തം

൧൦. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു അഗാരവോ അപ്പതിസ്സോ അഭബ്ബോ ഇമസ്മിം ധമ്മവിനയേ വുദ്ധിം വിരൂള്ഹിം വേപുല്ലം ആപജ്ജിതും. കതമേഹി പഞ്ചഹി? അസ്സദ്ധോ, ഭിക്ഖവേ, ഭിക്ഖു അഗാരവോ അപ്പതിസ്സോ അഭബ്ബോ ഇമസ്മിം ധമ്മവിനയേ വുദ്ധിം വിരൂള്ഹിം വേപുല്ലം ആപജ്ജിതും. അഹിരികോ, ഭിക്ഖവേ, ഭിക്ഖു അഗാരവോ അപ്പതിസ്സോ അഭബ്ബോ ഇമസ്മിം ധമ്മവിനയേ വുദ്ധിം വിരൂള്ഹിം വേപുല്ലം ആപജ്ജിതും. അനോത്തപ്പീ, ഭിക്ഖവേ, ഭിക്ഖു അഗാരവോ അപ്പതിസ്സോ അഭബ്ബോ ഇമസ്മിം ധമ്മവിനയേ വുദ്ധിം വിരൂള്ഹിം വേപുല്ലം ആപജ്ജിതും. കുസീതോ, ഭിക്ഖവേ, ഭിക്ഖു അഗാരവോ അപ്പതിസ്സോ അഭബ്ബോ ഇമസ്മിം ധമ്മവിനയേ വുദ്ധിം വിരൂള്ഹിം വേപുല്ലം ആപജ്ജിതും. ദുപ്പഞ്ഞോ, ഭിക്ഖവേ, ഭിക്ഖു അഗാരവോ അപ്പതിസ്സോ അഭബ്ബോ ഇമസ്മിം ധമ്മവിനയേ വുദ്ധിം വിരൂള്ഹിം വേപുല്ലം ആപജ്ജിതും. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു അഗാരവോ അപ്പതിസ്സോ അഭബ്ബോ ഇമസ്മിം ധമ്മവിനയേ വുദ്ധിം വിരൂള്ഹിം വേപുല്ലം ആപജ്ജിതും.

‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു സഗാരവോ സപ്പതിസ്സോ ഭബ്ബോ ഇമസ്മിം ധമ്മവിനയേ വുദ്ധിം വിരൂള്ഹിം വേപുല്ലം ആപജ്ജിതും. കതമേഹി പഞ്ചഹി? സദ്ധോ, ഭിക്ഖവേ, ഭിക്ഖു സഗാരവോ സപ്പതിസ്സോ ഭബ്ബോ ഇമസ്മിം ധമ്മവിനയേ വുദ്ധിം വിരൂള്ഹിം വേപുല്ലം ആപജ്ജിതും. ഹിരീമാ, ഭിക്ഖവേ, ഭിക്ഖു…പേ… ഓത്തപ്പീ, ഭിക്ഖവേ, ഭിക്ഖു…പേ… ആരദ്ധവീരിയോ, ഭിക്ഖവേ, ഭിക്ഖു…പേ… പഞ്ഞവാ, ഭിക്ഖവേ, ഭിക്ഖു സഗാരവോ സപ്പതിസ്സോ ഭബ്ബോ ഇമസ്മിം ധമ്മവിനയേ വുദ്ധിം വിരൂള്ഹിം വേപുല്ലം ആപജ്ജിതും. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു സഗാരവോ സപ്പതിസ്സോ ഭബ്ബോ ഇമസ്മിം ധമ്മവിനയേ വുദ്ധിം വിരൂള്ഹിം വേപുല്ലം ആപജ്ജിതു’’ന്തി. ദസമം.

സേഖബലവഗ്ഗോ പഠമോ.