(൨൮) ൮. രാഗപേയ്യാലം

൧. സതിപട്ഠാനസുത്തം

൨൭൪. ‘‘രാഗസ്സ, ഭിക്ഖവേ, അഭിഞ്ഞായ ചത്താരോ ധമ്മാ ഭാവേതബ്ബാ. കതമേ ചത്താരോ? ഇധ, ഭിക്ഖവേ, ഭിക്ഖു കായേ കായാനുപസ്സീ വിഹരതി ആതാപീ സമ്പജാനോ സതിമാ വിനേയ്യ ലോകേ അഭിജ്ഝാദോമനസ്സം; വേദനാസു…പേ… ചിത്തേ…പേ… ധമ്മേസു ധമ്മാനുപസ്സീ വിഹരതി ആതാപീ സമ്പജാനോ സതിമാ വിനേയ്യ ലോകേ അഭിജ്ഝാദോമനസ്സം. രാഗസ്സ, ഭിക്ഖവേ, അഭിഞ്ഞായ ഇമേ ചത്താരോ ധമ്മാ ഭാവേതബ്ബാ’’തി. പഠമം.

൨. സമ്മപ്പധാനസുത്തം

൨൭൫. ‘‘രാഗസ്സ, ഭിക്ഖവേ, അഭിഞ്ഞായ ചത്താരോ ധമ്മാ ഭാവേതബ്ബാ. കതമേ ചത്താരോ? ഇധ, ഭിക്ഖവേ, ഭിക്ഖു അനുപ്പന്നാനം പാപകാനം അകുസലാനം ധമ്മാനം അനുപ്പാദായ ഛന്ദം ജനേതി വായമതി വീരിയം ആരഭതി ചിത്തം പഗ്ഗണ്ഹാതി പദഹതി; ഉപ്പന്നാനം പാപകാനം അകുസലാനം ധമ്മാനം പഹാനായ…പേ… അനുപ്പന്നാനം കുസലാനം ധമ്മാനം ഉപ്പാദായ…പേ… ഉപ്പന്നാനം കുസലാനം ധമ്മാനം ഠിതിയാ അസമ്മോസായ ഭിയ്യോഭാവായ വേപുല്ലായ ഭാവനായ പാരിപൂരിയാ ഛന്ദം ജനേതി വായമതി വീരിയം ആരഭതി ചിത്തം പഗ്ഗണ്ഹാതി പദഹതി. രാഗസ്സ, ഭിക്ഖവേ, അഭിഞ്ഞായ ഇമേ ചത്താരോ ധമ്മാ ഭാവേതബ്ബാ’’തി. ദുതിയം.

൩. ഇദ്ധിപാദസുത്തം

൨൭൬. ‘‘രാഗസ്സ, ഭിക്ഖവേ, അഭിഞ്ഞായ ചത്താരോ ധമ്മാ ഭാവേതബ്ബാ. കതമേ ചത്താരോ? ഇധ, ഭിക്ഖവേ, ഭിക്ഖു ഛന്ദസമാധിപധാനസങ്ഖാരസമന്നാഗതം ഇദ്ധിപാദം ഭാവേതി; വീരിയസമാധി…പേ… ചിത്തസമാധി…പേ… വീമംസാസമാധിപധാനസങ്ഖാരസമന്നാഗതം ഇദ്ധിപാദം ഭാവേതി. രാഗസ്സ, ഭിക്ഖവേ, അഭിഞ്ഞായ ഇമേ ചത്താരോ ധമ്മാ ഭാവേതബ്ബാ’’തി. തതിയം.

൪-൩൦. പരിഞ്ഞാദിസുത്താനി

൨൭൭-൩൦൩. ‘‘രാഗസ്സ, ഭിക്ഖവേ, പരിഞ്ഞായ…പേ… പരിക്ഖയായ… പഹാനായ… ഖയായ … വയായ… വിരാഗായ… നിരോധായ… ചാഗായ… പടിനിസ്സഗ്ഗായ ചത്താരോ ധമ്മാ ഭാവേതബ്ബാ…പേ…. തിംസതിമം.

൩൧-൫൧൦. ദോസഅഭിഞ്ഞാദിസുത്താനി

൩൦൪-൭൮൩. ‘‘ദോസസ്സ…പേ… മോഹസ്സ… കോധസ്സ… ഉപനാഹസ്സ… മക്ഖസ്സ… പളാസസ്സ… ഇസ്സായ… മച്ഛരിയസ്സ… മായായ… സാഠേയ്യസ്സ… ഥമ്ഭസ്സ… സാരമ്ഭസ്സ… മാനസ്സ… അതിമാനസ്സ… മദസ്സ… പമാദസ്സ അഭിഞ്ഞായ… പരിഞ്ഞായ… പരിക്ഖയായ… പഹാനായ… ഖയായ… വയായ… വിരാഗായ… നിരോധായ… ചാഗായ… പടിനിസ്സഗ്ഗായ ഇമേ ചത്താരോ ധമ്മാ ഭാവേതബ്ബാ’’തി. ദസുത്തരപഞ്ചസതിമം.

രാഗപേയ്യാലം നിട്ഠിതം.