(൨൭) ൭. കമ്മപഥവഗ്ഗോ

൧. പാണാതിപാതീസുത്തം

൨൬൪. ‘‘ചതൂഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ. കതമേഹി ചതൂഹി? അത്തനാ ച പാണാതിപാതീ ഹോതി, പരഞ്ച പാണാതിപാതേ സമാദപേതി, പാണാതിപാതേ ച സമനുഞ്ഞോ ഹോതി, പാണാതിപാതസ്സ ച വണ്ണം ഭാസതി – ഇമേഹി ഖോ, ഭിക്ഖവേ, ചതൂഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ.

‘‘ചതൂഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ. കതമേഹി ചതൂഹി? അത്തനാ ച പാണാതിപാതാ പടിവിരതോ ഹോതി, പരഞ്ച പാണാതിപാതാ വേരമണിയാ സമാദപേതി, പാണാതിപാതാ വേരമണിയാ ച സമനുഞ്ഞോ ഹോതി, പാണാതിപാതാ വേരമണിയാ ച വണ്ണം ഭാസതി – ഇമേഹി ഖോ, ഭിക്ഖവേ, ചതൂഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ’’തി. പഠമം.

൨. അദിന്നാദായീസുത്തം

൨൬൫. ‘‘ചതൂഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ. കതമേഹി ചതൂഹി? അത്തനാ ച അദിന്നാദായീ ഹോതി, പരഞ്ച അദിന്നാദാനേ സമാദപേതി, അദിന്നാദാനേ ച സമനുഞ്ഞോ ഹോതി, അദിന്നാദാനസ്സ ച വണ്ണം ഭാസതി – ഇമേഹി ഖോ…പേ….

‘‘അത്തനാ ച അദിന്നാദാനാ പടിവിരതോ ഹോതി, പരഞ്ച അദിന്നാദാനാ വേരമണിയാ സമാദപേതി, അദിന്നാദാനാ വേരമണിയാ ച സമനുഞ്ഞോ ഹോതി, അദിന്നാദാനാ വേരമണിയാ ച വണ്ണം ഭാസതി – ഇമേഹി ഖോ, ഭിക്ഖവേ…പേ…. ദുതിയം.

൩. മിച്ഛാചാരീസുത്തം

൨൬൬. … അത്തനാ ച കാമേസുമിച്ഛാചാരീ ഹോതി, പരഞ്ച കാമേസുമിച്ഛാചാരേ സമാദപേതി, കാമേസുമിച്ഛാചാരേ ച സമനുഞ്ഞോ ഹോതി, കാമേസുമിച്ഛാചാരസ്സ ച വണ്ണം ഭാസതി – ഇമേഹി ഖോ…പേ….

അത്തനാ ച കാമേസുമിച്ഛാചാരാ പടിവിരതോ ഹോതി, പരഞ്ച കാമേസുമിച്ഛാചാരാ വേരമണിയാ സമാദപേതി, കാമേസുമിച്ഛാചാരാ വേരമണിയാ ച സമനുഞ്ഞോ ഹോതി, കാമേസുമിച്ഛാചാരാ വേരമണിയാ ച വണ്ണം ഭാസതി – ഇമേഹി ഖോ…പേ…. തതിയം.

൪. മുസാവാദീസുത്തം

൨൬൭. … അത്തനാ ച മുസാവാദീ ഹോതി, പരഞ്ച മുസാവാദേ സമാദപേതി, മുസാവാദേ ച സമനുഞ്ഞോ ഹോതി, മുസാവാദസ്സ ച വണ്ണം ഭാസതി – ഇമേഹി ഖോ…പേ….

അത്തനാ ച മുസാവാദാ പടിവിരതോ ഹോതി, പരഞ്ച മുസാവാദാ വേരമണിയാ സമാദപേതി, മുസാവാദാ വേരമണിയാ ച സമനുഞ്ഞോ ഹോതി, മുസാവാദാ വേരമണിയാ ച വണ്ണം ഭാസതി – ഇമേഹി…പേ…. ചതുത്ഥം.

൫. പിസുണവാചാസുത്തം

൨൬൮. … അത്തനാ ച പിസുണവാചോ ഹോതി, പരഞ്ച പിസുണായ വാചായ സമാദപേതി, പിസുണായ വാചായ ച സമനുഞ്ഞോ ഹോതി, പിസുണായ വാചായ ച വണ്ണം ഭാസതി – ഇമേഹി…പേ….

അത്തനാ ച പിസുണായ വാചായ പടിവിരതോ ഹോതി, പരഞ്ച പിസുണായ വാചായ വേരമണിയാ സമാദപേതി, പിസുണായ വാചായ വേരമണിയാ ച സമനുഞ്ഞോ ഹോതി, പിസുണായ വാചായ വേരമണിയാ ച വണ്ണം ഭാസതി – ഇമേഹി…പേ…. പഞ്ചമം.

൬. ഫരുസവാചാസുത്തം

൨൬൯. … അത്തനാ ച ഫരുസവാചോ ഹോതി, പരഞ്ച ഫരുസായ വാചായ സമാദപേതി, ഫരുസായ വാചായ ച സമനുഞ്ഞോ ഹോതി, ഫരുസായ വാചായ ച വണ്ണം ഭാസതി…പേ….

അത്തനാ ച ഫരുസായ വാചായ പടിവിരതോ ഹോതി, പരഞ്ച ഫരുസായ വാചായ വേരമണിയാ സമാദപേതി, ഫരുസായ വാചായ വേരമണിയാ ച സമനുഞ്ഞോ ഹോതി, ഫരുസായ വാചായ വേരമണിയാ ച വണ്ണം ഭാസതി – ഇമേഹി ഖോ…പേ…. ഛട്ഠം.

൭. സമ്ഫപ്പലാപസുത്തം

൨൭൦. … അത്തനാ ച സമ്ഫപ്പലാപീ ഹോതി, പരഞ്ച സമ്ഫപ്പലാപേ സമാദപേതി, സമ്ഫപ്പലാപേ ച സമനുഞ്ഞോ ഹോതി, സമ്ഫപ്പലാപസ്സ ച വണ്ണം ഭാസതി – ഇമേഹി…പേ….

അത്തനാ ച സമ്ഫപ്പലാപാ പടിവിരതോ ഹോതി, പരഞ്ച സമ്ഫപ്പലാപാ വേരമണിയാ സമാദപേതി, സമ്ഫപ്പലാപാ വേരമണിയാ ച സമനുഞ്ഞോ ഹോതി, സമ്ഫപ്പലാപാ വേരമണിയാ ച വണ്ണം ഭാസതി – ഇമേഹി ഖോ, ഭിക്ഖവേ…പേ…. സത്തമം.

൮. അഭിജ്ഝാലുസുത്തം

൨൭൧. … അത്തനാ ച അഭിജ്ഝാലു ഹോതി, പരഞ്ച അഭിജ്ഝായ സമാദപേതി, അഭിജ്ഝായ ച സമനുഞ്ഞോ ഹോതി, അഭിജ്ഝായ ച വണ്ണം ഭാസതി…പേ….

‘‘അത്തനാ ച അനഭിജ്ഝാലു ഹോതി, പരഞ്ച അനഭിജ്ഝായ സമാദപേതി, അനഭിജ്ഝായ ച സമനുഞ്ഞോ ഹോതി, അനഭിജ്ഝായ ച വണ്ണം ഭാസതി – ഇമേഹി ഖോ…പേ…. അട്ഠമം.

൯. ബ്യാപന്നചിത്തസുത്തം

൨൭൨. … അത്തനാ ച ബ്യാപന്നചിത്തോ ഹോതി, പരഞ്ച ബ്യാപാദേ സമാദപേതി, ബ്യാപാദേ ച സമനുഞ്ഞോ ഹോതി, ബ്യാപാദസ്സ ച വണ്ണം ഭാസതി – ഇമേഹി…പേ….

അത്തനാ ച അബ്യാപന്നചിത്തോ ഹോതി, പരഞ്ച അബ്യാപാദേ സമാദപേതി, അബ്യാപാദേ ച സമനുഞ്ഞോ ഹോതി, അബ്യാപാദസ്സ ച വണ്ണം ഭാസതി – ഇമേഹി ഖോ…പേ…. നവമം.

൧൦. മിച്ഛാദിട്ഠിസുത്തം

൨൭൩. … അത്തനാ ച മിച്ഛാദിട്ഠികോ ഹോതി, പരഞ്ച മിച്ഛാദിട്ഠിയാ സമാദപേതി, മിച്ഛാദിട്ഠിയാ ച സമനുഞ്ഞോ ഹോതി, മിച്ഛാദിട്ഠിയാ ച വണ്ണം ഭാസതി – ഇമേഹി…പേ….

അത്തനാ ച സമ്മാദിട്ഠികോ ഹോതി, പരഞ്ച സമ്മാദിട്ഠിയാ സമാദപേതി, സമ്മാദിട്ഠിയാ ച സമനുഞ്ഞോ ഹോതി, സമ്മാദിട്ഠിയാ ച വണ്ണം ഭാസതി – ഇമേഹി ഖോ, ഭിക്ഖവേ, ചതൂഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേതി. ദസമം.

കമ്മപഥവഗ്ഗോ സത്തമോ.