൧൦. ആതപ്പകരണീയസുത്തം

൫൦. ‘‘തീഹി, ഭിക്ഖവേ, ഠാനേഹി ആതപ്പം കരണീയം. കതമേഹി തീഹി? അനുപ്പന്നാനം പാപകാനം അകുസലാനം ധമ്മാനം അനുപ്പാദായ ആതപ്പം കരണീയം, അനുപ്പന്നാനം കുസലാനം ധമ്മാനം ഉപ്പാദായ ആതപ്പം കരണീയം, ഉപ്പന്നാനം സാരീരികാനം വേദനാനം ദുക്ഖാനം തിബ്ബാനം ഖരാനം കടുകാനം അസാതാനം അമനാപാനം പാണഹരാനം അധിവാസനായ ആതപ്പം കരണീയം. ഇമേഹി തീഹി, ഭിക്ഖവേ, ഠാനേഹി ആതപ്പം കരണീയം.

‘‘യതോ ഖോ, ഭിക്ഖവേ, ഭിക്ഖു അനുപ്പന്നാനം പാപകാനം അകുസലാനം ധമ്മാനം അനുപ്പാദായ ആതപ്പം കരോതി, അനുപ്പന്നാനം കുസലാനം ധമ്മാനം ഉപ്പാദായ ആതപ്പം കരോതി, ഉപ്പന്നാനം സാരീരികാനം വേദനാനം ദുക്ഖാനം തിബ്ബാനം ഖരാനം കടുകാനം അസാതാനം അമനാപാനം പാണഹരാനം അധിവാസനായ ആതപ്പം കരോതി. അയം വുച്ചതി, ഭിക്ഖവേ, ഭിക്ഖു ആതാപീ നിപകോ സതോ സമ്മാ ദുക്ഖസ്സ അന്തകിരിയായാ’’തി. ദസമം.