൮. മനസികാരസുത്തം

൮. അഥ ഖോ ആയസ്മാ ആനന്ദോ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ ആയസ്മാ ആനന്ദോ ഭഗവന്തം ഏതദവോച –

‘‘സിയാ നു ഖോ, ഭന്തേ, ഭിക്ഖുനോ തഥാരൂപോ സമാധിപടിലാഭോ യഥാ ന ചക്ഖും മനസി കരേയ്യ, ന രൂപം മനസി കരേയ്യ, ന സോതം മനസി കരേയ്യ, ന സദ്ദം മനസി കരേയ്യ, ന ഘാനം മനസി കരേയ്യ, ന ഗന്ധം മനസി കരേയ്യ, ന ജിവ്ഹം മനസി കരേയ്യ, ന രസം മനസി കരേയ്യ, ന കായം മനസി കരേയ്യ, ന ഫോട്ഠബ്ബം മനസി കരേയ്യ, ന പഥവിം മനസി കരേയ്യ, ന ആപം മനസി കരേയ്യ, ന തേജം മനസി കരേയ്യ, ന വായം മനസി കരേയ്യ, ന ആകാസാനഞ്ചായതനം മനസി കരേയ്യ, ന വിഞ്ഞാണഞ്ചായതനം മനസി കരേയ്യ, ന ആകിഞ്ചഞ്ഞായതനം മനസി കരേയ്യ, ന നേവസഞ്ഞാനാസഞ്ഞായതനം മനസി കരേയ്യ, ന ഇധലോകം മനസി കരേയ്യ, ന പരലോകം മനസി കരേയ്യ, യമ്പിദം ദിട്ഠം സുതം മുതം വിഞ്ഞാതം പത്തം പരിയേസിതം അനുവിചരിതം മനസാ, തമ്പി ന മനസി കരേയ്യ; മനസി ച പന കരേയ്യാ’’തി?

‘‘സിയാ, ആനന്ദ, ഭിക്ഖുനോ തഥാരൂപോ സമാധിപടിലാഭോ യഥാ ന ചക്ഖും മനസി കരേയ്യ, ന രൂപം മനസി കരേയ്യ, ന സോതം മനസി കരേയ്യ, ന സദ്ദം മനസി കരേയ്യ, ന ഘാനം മനസി കരേയ്യ, ന ഗന്ധം മനസി കരേയ്യ, ന ജിവ്ഹം മനസി കരേയ്യ, ന രസം മനസി കരേയ്യ, ന കായം മനസി കരേയ്യ, ന ഫോട്ഠബ്ബം മനസി കരേയ്യ, ന പഥവിം മനസി കരേയ്യ, ന ആപം മനസി കരേയ്യ, ന തേജം മനസി കരേയ്യ, ന വായം മനസി കരേയ്യ, ന ആകാസാനഞ്ചായതനം മനസി കരേയ്യ, ന വിഞ്ഞാണഞ്ചായതനം മനസി കരേയ്യ, ന ആകിഞ്ചഞ്ഞായതനം മനസി കരേയ്യ, ന നേവസഞ്ഞാനാസഞ്ഞായതനം മനസി കരേയ്യ, ന ഇധലോകം മനസി കരേയ്യ, ന പരലോകം മനസി കരേയ്യ, യമ്പിദം ദിട്ഠം സുതം മുതം വിഞ്ഞാതം പത്തം പരിയേസിതം അനുവിചരിതം മനസാ, തമ്പി ന മനസി കരേയ്യ; മനസി ച പന കരേയ്യാ’’തി.

‘‘യഥാ കഥം പന, ഭന്തേ, സിയാ ഭിക്ഖുനോ തഥാരൂപോ സമാധിപടിലാഭോ യഥാ ന ചക്ഖും മനസി കരേയ്യ, ന രൂപം മനസി കരേയ്യ… യമ്പിദം ദിട്ഠം സുതം മുതം വിഞ്ഞാതം പത്തം പരിയേസിതം അനുവിചരിതം മനസാ, തമ്പി ന മനസി കരേയ്യ; മനസി ച പന കരേയ്യാ’’തി?

‘‘ഇധാനന്ദ, ഭിക്ഖു ഏവം മനസി കരോതി – ‘ഏതം സന്തം ഏതം പണീതം, യദിദം സബ്ബസങ്ഖാരസമഥോ സബ്ബൂപധിപടിനിസ്സഗ്ഗോ തണ്ഹാക്ഖയോ വിരാഗോ നിരോധോ നിബ്ബാന’ന്തി. ഏവം ഖോ, ആനന്ദ, സിയാ ഭിക്ഖുനോ തഥാരൂപോ സമാധിപടിലാഭോ യഥാ ന ചക്ഖും മനസി കരേയ്യ, ന രൂപം മനസി കരേയ്യ…പേ… യമ്പിദം ദിട്ഠം സുതം മുതം വിഞ്ഞാതം പത്തം പരിയേസിതം അനുവിചരിതം മനസാ, തമ്പി ന മനസി കരേയ്യ; മനസി ച പന കരേയ്യാ’’തി. അട്ഠമം.