൧൦. ദുതിയകഥാവത്ഥുസുത്തം

൭൦. ഏകം സമയം ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന സമ്ബഹുലാ ഭിക്ഖൂ പച്ഛാഭത്തം പിണ്ഡപാതപടിക്കന്താ ഉപട്ഠാനസാലായം സന്നിസിന്നാ സന്നിപതിതാ അനേകവിഹിതം തിരച്ഛാനകഥം അനുയുത്താ വിഹരന്തി, സേയ്യഥിദം – രാജകഥം ചോരകഥം മഹാമത്തകഥം…പേ… ഇതിഭവാഭവകഥം ഇതി വാതി.

‘‘ദസയിമാനി, ഭിക്ഖവേ, പാസംസാനി ഠാനാനി. കതമാനി ദസ? ഇധ, ഭിക്ഖവേ, ഭിക്ഖു അത്തനാ ച അപ്പിച്ഛോ ഹോതി, അപ്പിച്ഛകഥഞ്ച ഭിക്ഖൂനം കത്താ ഹോതി. ‘അപ്പിച്ഛോ ഭിക്ഖു അപ്പിച്ഛകഥഞ്ച ഭിക്ഖൂനം കത്താ’തി പാസംസമേതം ഠാനം.

‘‘അത്തനാ ച സന്തുട്ഠോ ഹോതി, സന്തുട്ഠികഥഞ്ച ഭിക്ഖൂനം കത്താ ഹോതി. ‘സന്തുട്ഠോ ഭിക്ഖു സന്തുട്ഠികഥഞ്ച ഭിക്ഖൂനം കത്താ’തി പാസംസമേതം ഠാനം.

‘‘അത്തനാ ച പവിവിത്തോ ഹോതി, പവിവേകകഥഞ്ച ഭിക്ഖൂനം കത്താ ഹോതി. ‘പവിവിത്തോ ഭിക്ഖു പവിവേകകഥഞ്ച ഭിക്ഖൂനം കത്താ’തി പാസംസമേതം ഠാനം.

‘‘അത്തനാ ച അസംസട്ഠോ ഹോതി, അസംസട്ഠകഥഞ്ച ഭിക്ഖൂനം കത്താ ഹോതി. ‘അസംസട്ഠോ ഭിക്ഖു അസംസട്ഠകഥഞ്ച ഭിക്ഖൂനം കത്താ’തി പാസംസമേതം ഠാനം.

‘‘അത്തനാ ച ആരദ്ധവീരിയോ ഹോതി, വീരിയാരമ്ഭകഥഞ്ച ഭിക്ഖൂനം കത്താ ഹോതി. ‘ആരദ്ധവീരിയോ ഭിക്ഖു വീരിയാരമ്ഭകഥഞ്ച ഭിക്ഖൂനം കത്താ’തി പാസംസമേതം ഠാനം.

‘‘അത്തനാ ച സീലസമ്പന്നോ ഹോതി, സീലസമ്പദാകഥഞ്ച ഭിക്ഖൂനം കത്താ ഹോതി. ‘സീലസമ്പന്നോ ഭിക്ഖു സീലസമ്പദാകഥഞ്ച ഭിക്ഖൂനം കത്താ’തി പാസംസമേതം ഠാനം.

‘‘അത്തനാ ച സമാധിസമ്പന്നോ ഹോതി, സമാധിസമ്പദാകഥഞ്ച ഭിക്ഖൂനം കത്താ ഹോതി. ‘സമാധിസമ്പന്നോ ഭിക്ഖു സമാധിസമ്പദാകഥഞ്ച ഭിക്ഖൂനം കത്താ’തി പാസംസമേതം ഠാനം.

‘‘അത്തനാ ച പഞ്ഞാസമ്പന്നോ ഹോതി, പഞ്ഞാസമ്പദാകഥഞ്ച ഭിക്ഖൂനം കത്താ ഹോതി. ‘പഞ്ഞാസമ്പന്നോ ഭിക്ഖു പഞ്ഞാസമ്പദാകഥഞ്ച ഭിക്ഖൂനം കത്താ’തി പാസംസമേതം ഠാനം.

‘‘അത്തനാ ച വിമുത്തിസമ്പന്നോ ഹോതി, വിമുത്തിസമ്പദാകഥഞ്ച ഭിക്ഖൂനം കത്താ ഹോതി. ‘വിമുത്തിസമ്പന്നോ ഭിക്ഖു വിമുത്തിസമ്പദാകഥഞ്ച ഭിക്ഖൂനം കത്താ’തി പാസംസമേതം ഠാനം.

‘‘അത്തനാ ച വിമുത്തിഞാണദസ്സനസമ്പന്നോ ഹോതി, വിമുത്തിഞാണദസ്സനസമ്പദാകഥഞ്ച ഭിക്ഖൂനം കത്താ ഹോതി. ‘വിമുത്തിഞാണദസ്സനസമ്പന്നോ ഭിക്ഖു വിമുത്തിഞാണദസ്സനസമ്പദാകഥഞ്ച ഭിക്ഖൂനം കത്താ’തി പാസംസമേതം ഠാനം. ഇമാനി ഖോ, ഭിക്ഖവേ, ദസ പാസംസാനി ഠാനാനീ’’തി. ദസമം.

യമകവഗ്ഗോ ദുതിയോ.