൧൫. അട്ഠാനപാളി

൧. പഠമവഗ്ഗോ

൨൬൮. ‘‘അട്ഠാനമേതം, ഭിക്ഖവേ, അനവകാസോ യം ദിട്ഠിസമ്പന്നോ പുഗ്ഗലോ കഞ്ചി [കിഞ്ചി (ക.)] സങ്ഖാരം നിച്ചതോ ഉപഗച്ഛേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം പുഥുജ്ജനോ കഞ്ചി സങ്ഖാരം നിച്ചതോ ഉപഗച്ഛേയ്യ. ഠാനമേതം വിജ്ജതീ’’തി.

൨൬൯. ‘‘അട്ഠാനമേതം, ഭിക്ഖവേ, അനവകാസോ യം ദിട്ഠിസമ്പന്നോ പുഗ്ഗലോ കഞ്ചി സങ്ഖാരം സുഖതോ ഉപഗച്ഛേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം പുഥുജ്ജനോ കഞ്ചി സങ്ഖാരം സുഖതോ ഉപഗച്ഛേയ്യ. ഠാനമേതം വിജ്ജതീ’’തി.

൨൭൦. ‘‘അട്ഠാനമേതം, ഭിക്ഖവേ, അനവകാസോ യം ദിട്ഠിസമ്പന്നോ പുഗ്ഗലോ കഞ്ചി ധമ്മം അത്തതോ ഉപഗച്ഛേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം പുഥുജ്ജനോ കഞ്ചി ധമ്മം അത്തതോ ഉപഗച്ഛേയ്യ. ഠാനമേതം വിജ്ജതീ’’തി.

൨൭൧. ‘‘അട്ഠാനമേതം, ഭിക്ഖവേ, അനവകാസോ യം ദിട്ഠിസമ്പന്നോ പുഗ്ഗലോ മാതരം ജീവിതാ വോരോപേയ്യ. നേതം ഠാനം വിജ്ജതി. ഠാനഞ്ച ഖോ, ഭിക്ഖവേ, വിജ്ജതി യം പുഥുജ്ജനോ മാതരം ജീവിതാ വോരോപേയ്യ. ഠാനമേതം വിജ്ജതീ’’തി.

൨൭൨. ‘‘അട്ഠാനമേതം, ഭിക്ഖവേ, അനവകാസോ യം ദിട്ഠിസമ്പന്നോ പുഗ്ഗലോ പിതരം ജീവിതാ വോരോപേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം പുഥുജ്ജനോ പിതരം ജീവിതാ വോരോപേയ്യ. ഠാനമേതം വിജ്ജതീ’’തി.

൨൭൩. ‘‘അട്ഠാനമേതം, ഭിക്ഖവേ, അനവകാസോ യം ദിട്ഠിസമ്പന്നോ പുഗ്ഗലോ അരഹന്തം ജീവിതാ വോരോപേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം പുഥുജ്ജനോ അരഹന്തം ജീവിതാ വോരോപേയ്യ. ഠാനമേതം വിജ്ജതീ’’തി.

൨൭൪. ‘‘അട്ഠാനമേതം, ഭിക്ഖവേ, അനവകാസോ യം ദിട്ഠിസമ്പന്നോ പുഗ്ഗലോ തഥാഗതസ്സ പദുട്ഠചിത്തോ ലോഹിതം ഉപ്പാദേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം പുഥുജ്ജനോ തഥാഗതസ്സ പദുട്ഠചിത്തോ ലോഹിതം ഉപ്പാദേയ്യ. ഠാനമേതം വിജ്ജതീ’’തി.

൨൭൫. ‘‘അട്ഠാനമേതം, ഭിക്ഖവേ, അനവകാസോ യം ദിട്ഠിസമ്പന്നോ പുഗ്ഗലോ സങ്ഘം ഭിന്ദേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം പുഥുജ്ജനോ സങ്ഘം ഭിന്ദേയ്യ. ഠാനമേതം വിജ്ജതീ’’തി.

൨൭൬. ‘‘അട്ഠാനമേതം, ഭിക്ഖവേ, അനവകാസോ യം ദിട്ഠിസമ്പന്നോ പുഗ്ഗലോ അഞ്ഞം സത്ഥാരം ഉദ്ദിസേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം പുഥുജ്ജനോ അഞ്ഞം സത്ഥാരം ഉദ്ദിസേയ്യ. ഠാനമേതം വിജ്ജതീ’’തി.

൨൭൭. ‘‘അട്ഠാനമേതം, ഭിക്ഖവേ, അനവകാസോ യം ഏകിസ്സാ ലോകധാതുയാ ദ്വേ അരഹന്തോ സമ്മാസമ്ബുദ്ധാ അപുബ്ബം അചരിമം ഉപ്പജ്ജേയ്യും. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം ഏകിസ്സാ ലോകധാതുയാ ഏകോവ അരഹം സമ്മാസമ്ബുദ്ധോ ഉപ്പജ്ജേയ്യ. ഠാനമേതം വിജ്ജതീ’’തി.

വഗ്ഗോ പഠമോ.

൨. ദുതിയവഗ്ഗോ

൨൭൮. ‘‘അട്ഠാനമേതം, ഭിക്ഖവേ, അനവകാസോ യം ഏകിസ്സാ ലോകധാതുയാ ദ്വേ രാജാനോ ചക്കവത്തീ അപുബ്ബം അചരിമം ഉപ്പജ്ജേയ്യും. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം ഏകിസ്സാ ലോകധാതുയാ ഏകോ രാജാ ചക്കവത്തീ ഉപ്പജ്ജേയ്യ. ഠാനമേതം വിജ്ജതീ’’തി.

൨൭൯. ‘‘അട്ഠാനമേതം, ഭിക്ഖവേ, അനവകാസോ യം ഇത്ഥീ അരഹം അസ്സ സമ്മാസമ്ബുദ്ധോ. നേതം ഠാനം വിജ്ജതി. ഠാനഞ്ച ഖോ, ഏതം, ഭിക്ഖവേ, വിജ്ജതി യം പുരിസോ അരഹം അസ്സ സമ്മാസമ്ബുദ്ധോ. ഠാനമേതം വിജ്ജതീ’’തി.

൨൮൦. ‘‘അട്ഠാനമേതം, ഭിക്ഖവേ, അനവകാസോ യം ഇത്ഥീ രാജാ അസ്സ ചക്കവത്തീ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം പുരിസോ രാജാ അസ്സ ചക്കവത്തീ. ഠാനമേതം വിജ്ജതീ’’തി.

൨൮൧-൨൮൩. ‘‘അട്ഠാനമേതം, ഭിക്ഖവേ, അനവകാസോ യം ഇത്ഥീ സക്കത്തം കാരേയ്യ…പേ… മാരത്തം കാരേയ്യ…പേ… ബ്രഹ്മത്തം കാരേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം പുരിസോ സക്കത്തം കാരേയ്യ…പേ… മാരത്തം കാരേയ്യ…പേ… ബ്രഹ്മത്തം കാരേയ്യ. ഠാനമേതം വിജ്ജതീ’’തി.

൨൮൪. ‘‘അട്ഠാനമേതം, ഭിക്ഖവേ, അനവകാസോ യം കായദുച്ചരിതസ്സ ഇട്ഠോ കന്തോ മനാപോ വിപാകോ നിബ്ബത്തേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം കായദുച്ചരിതസ്സ അനിട്ഠോ അകന്തോ അമനാപോ വിപാകോ നിബ്ബത്തേയ്യ. ഠാനമേതം വിജ്ജതീ’’തി.

൨൮൫-൨൮൬. ‘‘അട്ഠാനമേതം, ഭിക്ഖവേ, അനവകാസോ യം വചീദുച്ചരിതസ്സ…പേ… യം മനോദുച്ചരിതസ്സ ഇട്ഠോ കന്തോ മനാപോ വിപാകോ നിബ്ബത്തേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം മനോദുച്ചരിതസ്സ അനിട്ഠോ അകന്തോ അമനാപോ വിപാകോ നിബ്ബത്തേയ്യ. ഠാനമേതം വിജ്ജതീ’’തി.

വഗ്ഗോ ദുതിയോ.

൩. തതിയവഗ്ഗോ

൨൮൭. ‘‘അട്ഠാനമേതം, ഭിക്ഖവേ, അനവകാസോ യം കായസുചരിതസ്സ അനിട്ഠോ അകന്തോ അമനാപോ വിപാകോ നിബ്ബത്തേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം കായസുചരിതസ്സ ഇട്ഠോ കന്തോ മനാപോ വിപാകോ നിബ്ബത്തേയ്യ. ഠാനമേതം വിജ്ജതീ’’തി.

൨൮൮-൨൮൯. ‘‘അട്ഠാനമേതം, ഭിക്ഖവേ, അനവകാസോ യം വചീസുചരിതസ്സ…പേ… മനോസുചരിതസ്സ അനിട്ഠോ അകന്തോ അമനാപോ വിപാകോ നിബ്ബത്തേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം മനോസുചരിതസ്സ ഇട്ഠോ കന്തോ മനാപോ വിപാകോ നിബ്ബത്തേയ്യ. ഠാനമേതം വിജ്ജതീ’’തി.

൨൯൦. ‘‘അട്ഠാനമേതം, ഭിക്ഖവേ, അനവകാസോ യം കായദുച്ചരിതസമങ്ഗീ തന്നിദാനാ തപ്പച്ചയാ കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം കായദുച്ചരിതസമങ്ഗീ തന്നിദാനാ തപ്പച്ചയാ കായസ്സ ഭേദാ പരം മരണാ അപായം ദുഗ്ഗതിം വിനിപാതം നിരയം ഉപപജ്ജേയ്യ. ഠാനമേതം വിജ്ജതീ’’തി.

൨൯൧-൨൯൨. ‘‘അട്ഠാനമേതം, ഭിക്ഖവേ, അനവകാസോ യം വചീദുച്ചരിതസമങ്ഗീ…പേ… യം മനോദുച്ചരിതസമങ്ഗീ തന്നിദാനാ തപ്പച്ചയാ കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം മനോദുച്ചരിതസമങ്ഗീ തന്നിദാനാ തപ്പച്ചയാ കായസ്സ ഭേദാ പരം മരണാ അപായം ദുഗ്ഗതിം വിനിപാതം നിരയം ഉപപജ്ജേയ്യ. ഠാനമേതം വിജ്ജതീ’’തി.

൨൯൩. ‘‘അട്ഠാനമേതം, ഭിക്ഖവേ, അനവകാസോ യം കായസുചരിതസമങ്ഗീ തന്നിദാനാ തപ്പച്ചയാ കായസ്സ ഭേദാ പരം മരണാ അപായം ദുഗ്ഗതിം വിനിപാതം നിരയം ഉപപജ്ജേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം കായസുചരിതസമങ്ഗീ തന്നിദാനാ തപ്പച്ചയാ കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജേയ്യ. ഠാനമേതം വിജ്ജതീ’’തി.

൨൯൪-൨൯൫. ‘‘അട്ഠാനമേതം, ഭിക്ഖവേ, അനവകാസോ യം വചീസുചരിതസമങ്ഗീ…പേ… യം മനോസുചരിതസമങ്ഗീ തന്നിദാനാ തപ്പച്ചയാ കായസ്സ ഭേദാ പരം മരണാ അപായം ദുഗ്ഗതിം വിനിപാതം നിരയം ഉപപജ്ജേയ്യ. നേതം ഠാനം വിജ്ജതി. ഠാനഞ്ച ഖോ ഏതം, ഭിക്ഖവേ, വിജ്ജതി യം മനോസുചരിതസമങ്ഗീ തന്നിദാനാ തപ്പച്ചയാ കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജേയ്യ. ഠാനമേതം വിജ്ജതീ’’തി.

വഗ്ഗോ തതിയോ.

അട്ഠാനപാളി പന്നരസമോ.