໕. ປາຣາຊິກາທິອາປຕ຺ຕິ

໓໓໙. ‘ປາຣາຊິກ’ນ຺ຕິ ຍໍ ວຸຕ຺ຕໍ, ຕໍ ສຸໂຓຫິ ຍຖາຕຖໍ;

ຈຸໂຕ ປຣທ຺ໂຘ ຠຏ຺ໂຐ ຈ, ສທ຺ຘມ຺ມາ ຫິ ນິຣງ຺ກໂຕ;

ສໍວາໂສປິ ຕຫິໍ ນຕ຺ຖິ, ເຕເນຕໍ ອິຕິ ວຸຈ຺ຈຕິ.

‘ສງ຺ຆາທິເສໂສ’ຕິ ຍໍ ວຸຕ຺ຕໍ, ຕໍ ສຸໂຓຫິ ຍຖາຕຖໍ;

ສງ຺ໂຆວ ເທຕິ ປຣິວາສໍ, ມູລາຍ ປຏິກສ຺ສຕິ;

ມານຕ຺ຕໍ ເທຕິ ອພ຺ເຠຕິ, ເຕເນຕໍ ອິຕິ ວຸຈ຺ຈຕິ.

‘ອນິຍໂຕ’ຕິ ຍໍ ວຸຕ຺ຕໍ, ຕໍ ສຸໂຓຫິ ຍຖາຕຖໍ;

ອນິຍໂຕ ນ ນິຍໂຕ, ອເນກໍສິກຕໍ ປທໍ;

ຕິຓ຺ຓມຎ຺ຎຕຣໍ ຐານໍ, ‘ອນິຍໂຕ’ຕິ ປວຸຈ຺ຈຕິ.

‘ຖຸລ຺ລຈ຺ຈຍ’ນ຺ຕິ ຍໍ ວຸຕ຺ຕໍ, ຕໍ ສຸໂຓຫິ ຍຖາຕຖໍ;

ເອກສ຺ສ ມູເລ ໂຍ ເທເສຕິ, ໂຍ ຈ ຕໍ ປຏິຄຓ຺ຫຕິ;

ອຈ຺ຈໂຍ ເຕນ ສໂມ ນຕ຺ຖິ, ເຕເນຕໍ ອິຕິ ວຸຈ຺ຈຕິ.

‘ນິສ຺ສຄ຺ຄິຍ’ນ຺ຕິ ຍໍ ວຸຕ຺ຕໍ, ຕໍ ສຸໂຓຫິ ຍຖາຕຖໍ;

ສງ຺ຆມຊ຺ເຌ ຄຓມຊ຺ເຌ, ເອກສ຺ເສວ ຈ ເອກໂຕ;

ນິສ຺ສຊ຺ຊິຕ຺ວານ ເທເສຕິ, ເຕເນຕໍ ອິຕິ ວຸຈ຺ຈຕິ.

‘ປາຈິຕ຺ຕິຍ’ນ຺ຕິ ຍໍ ວຸຕ຺ຕໍ, ຕໍ ສຸໂຓຫິ ຍຖາຕຖໍ;

ປາເຕຕິ ກຸສລໍ ຘມ຺ມໍ, ອຣິຍມຄ຺ຄໍ ອປຣຊ຺ຌຕິ;

ຈິຕ຺ຕສໍໂມຫນຏ຺ຐານໍ, ເຕເນຕໍ ອິຕິ ວຸຈ຺ຈຕິ.

‘ປາຏິເທສນີຍ’ນ຺ຕິ ຍໍ ວຸຕ຺ຕໍ, ຕໍ ສຸໂຓຫິ ຍຖາຕຖໍ;

ຠິກ຺ຂຸ ອຎ຺ຎາຕໂກ ສນ຺ໂຕ, ກິຈ຺ຉາ ລທ຺ຘາຍ ໂຠຊນໍ;

ສາມໍ ຄເຫຕ຺ວາ ຠຸຎ຺ເຊຍ຺ຍ, ‘ຄາຣຍ຺ຫ’ນ຺ຕິ ປວຸຈ຺ຈຕິ.

ນິມນ຺ຕນາສຸ ຠຸຎ຺ຊນ຺ຕາ ຉນ຺ທາຍ, ໂວສາສຕິ ຕຕ຺ຖ ຠິກ຺ຂຸນິໍ;

ອນິວາເຣຕ຺ວາ ຕຫິໍ ຠຸຎ຺ເຊ, ຄາຣຍ຺ຫນ຺ຕິ ປວຸຈ຺ຈຕິ.

ສທ຺ຘາຈິຕ຺ຕໍ ກຸລໍ ຄນ຺ຕ຺ວາ, ອປ຺ປໂຠຄໍ ອນາຬິຍໍ [ອນາຬ຺ຫິຍໍ (ສີ. ສ຺ຍາ.)];

ອຄິລາໂນ ຕຫິໍ ຠຸຎ຺ເຊ, ຄາຣຍ຺ຫນ຺ຕິ ປວຸຈ຺ຈຕິ.

ໂຍ ເຈ ອຣຎ຺ເຎ ວິຫຣນ຺ໂຕ, ສາສງ຺ເກ ສຠຍານເກ;

ອວິທິຕໍ ຕຫິໍ ຠຸຎ຺ເຊ, ຄາຣຍ຺ຫນ຺ຕິ ປວຸຈ຺ຈຕິ.

ຠິກ຺ຂຸນີ ອຎ຺ຎາຕິກາ ສນ຺ຕາ, ຍໍ ປເຣສໍ ມມາຍິຕໍ;

ສປ຺ປິ ເຕລໍ ມຘຸໍ ຜາຓິຕໍ, ມຈ຺ຉມໍສໍ ອໂຖ ຂີຣໍ;

ທຘິໍ ສຍໍ ວິຎ຺ຎາເປຍ຺ຍ ຠິກ຺ຂຸນີ, ຄາຣຍ຺ຫປຕ຺ຕາ ສຸຄຕສ຺ສ ສາສເນ.

‘ທຸກ຺ກຏ’ນ຺ຕິ ຍໍ ວຸຕ຺ຕໍ, ຕໍ ສຸໂຓຫິ ຍຖາຕຖໍ;

ອປຣທ຺ຘໍ ວິຣທ຺ຘຎ຺ຈ, ຂລິຕໍ ຍຎ຺ຈ ທຸກ຺ກຏໍ.

ຍໍ ມນຸສ຺ໂສ ກເຣ ປາປໍ, ອາວິ ວາ ຍທິ ວາ ຣໂຫ;

‘ທຸກ຺ກຏ’ນ຺ຕິ ປເວເທນ຺ຕິ, ເຕເນຕໍ ອິຕິ ວຸຈ຺ຈຕິ.

‘ທຸພ຺ຠາສິຕ’ນ຺ຕິ ຍໍ ວຸຕ຺ຕໍ, ຕໍ ສຸໂຓຫິ ຍຖາຕຖໍ;

ທຸພ຺ຠາສິຕໍ ທຸຣາຠຏ຺ຐໍ, ສໍກິລິຏ຺ຐຎ຺ຈ ຍໍ ປທໍ;

ຍຎ຺ຈ ວິຎ຺ຎູ ຄຣຫນ຺ຕິ, ເຕເນຕໍ ອິຕິ ວຸຈ຺ຈຕິ.

‘ເສຂິຍ’ນ຺ຕິ ຍໍ ວຸຕ຺ຕໍ, ຕໍ ສຸໂຓຫິ ຍຖາຕຖໍ;

ເສກ຺ຂສ຺ສ ສິກ຺ຂມານສ຺ສ, ອຸຊຸມຄ຺ຄານຸສາຣິໂນ.

ອາທິ ເຈຕໍ ຈຣຓຎ຺ຈ, ມຸຂໍ ສຎ຺ຎມສໍວໂຣ;

ສິກ຺ຂາ ເອຕາທິສີ ນຕ຺ຖິ, ເຕເນຕໍ ອິຕິ ວຸຈ຺ຈຕິ.

[ອຸທາ. ໔໕ ອຸທາເນປິ] ຉນ຺ນມຕິວສ຺ສຕິ, ວິວຏໍ ນາຕິວສ຺ສຕິ;

ຕສ຺ມາ ຉນ຺ນໍ ວິວເຣຖ, ເອວໍ ຕໍ ນາຕິວສ຺ສຕິ.

ຄຕິ ມິຄານໍ ປວນໍ, ອາກາໂສ ປກ຺ຂິນໍ ຄຕິ;

ວິຠໂວ ຄຕິ ຘມ຺ມານໍ, ນິພ຺ພານໍ ອຣຫໂຕ ຄຕີຕິ.

ຄາຖາສງ຺ຄຓິກໍ.

ຕສ຺ສຸທ຺ທານໍ –

ສຕ຺ຕນຄເຣສຸ ປຎ຺ຎຕ຺ຕາ, ວິປຕ຺ຕິ ຈຕຸໂຣປິ ຈ;

ຠິກ຺ຂູນໍ ຠິກ຺ຂຸນີນຎ຺ຈ, ສາຘາຣຓາ ອສາຘາຣຓາ;

ສາສນໍ ອນຸຄ຺ຄຫາຍ, ຄາຖາສງ຺ຄຓິກໍ ອິທນ຺ຕິ.

ຄາຖາສງ຺ຄຓິກໍ ນິຏ຺ຐິຕໍ.