ອຘິກຣຓເຠໂທ

໑. ອຸກ຺ໂກຏນເຠທາທິ

໓໔໐. [ຈູຬວ. ໒໑໕; ປຣິ. ໒໗໕] ຈຕ຺ຕາຣິ ອຘິກຣຓານິ. ວິວາທາຘິກຣຓໍ, ອນຸວາທາຘິກຣຓໍ, ອາປຕ຺ຕາຘິກຣຓໍ, ກິຈ຺ຈາຘິກຣຓໍ – ອິມານິ ຈຕ຺ຕາຣິ ອຘິກຣຓານິ.

ອິເມສໍ ຈຕຸນ຺ນໍ ອຘິກຣຓານໍ ກຕິ ອຸກ຺ໂກຏາ? ອິເມສໍ ຈຕຸນ຺ນໍ ອຘິກຣຓານໍ ທສ ອຸກ຺ໂກຏາ. ວິວາທາຘິກຣຓສ຺ສ ທ຺ເວ ອຸກ຺ໂກຏາ, ອນຸວາທາຘິກຣຓສ຺ສ ຈຕ຺ຕາໂຣ ອຸກ຺ໂກຏາ, ອາປຕ຺ຕາຘິກຣຓສ຺ສ ຕໂຍ ອຸກ຺ໂກຏາ, ກິຈ຺ຈາຘິກຣຓສ຺ສ ເອໂກ ອຸກ຺ໂກໂຏ – ອິເມສໍ ຈຕຸນ຺ນໍ ອຘິກຣຓານໍ ອິເມ ທສ ອຸກ຺ໂກຏາ.

ວິວາທາຘິກຣຓໍ ອຸກ຺ໂກເຏນ຺ໂຕ ກຕິ ສມເຖ ອຸກ຺ໂກເຏຕິ? ອນຸວາທາຘິກຣຓໍ ອຸກ຺ໂກເຏນ຺ໂຕ ກຕິ ສມເຖ ອຸກ຺ໂກເຏຕິ? ອາປຕ຺ຕາຘິກຣຓໍ ອຸກ຺ໂກເຏນ຺ໂຕ ກຕິ ສມເຖ ອຸກ຺ໂກເຏຕິ? ກິຈ຺ຈາຘິກຣຓໍ ອຸກ຺ໂກເຏນ຺ໂຕ ກຕິ ສມເຖ ອຸກ຺ໂກເຏຕິ?

ວິວາທາຘິກຣຓໍ ອຸກ຺ໂກເຏນ຺ໂຕ ທ຺ເວ ສມເຖ ອຸກ຺ໂກເຏຕິ. ອນຸວາທາຘິກຣຓໍ ອຸກ຺ໂກເຏນ຺ໂຕ ຈຕ຺ຕາໂຣ ສມເຖ ອຸກ຺ໂກເຏຕິ. ອາປຕ຺ຕາຘິກຣຓໍ ອຸກ຺ໂກເຏນ຺ໂຕ ຕໂຍ ສມເຖ ອຸກ຺ໂກເຏຕິ. ກິຈ຺ຈາຘິກຣຓໍ ອຸກ຺ໂກເຏນ຺ໂຕ ເອກໍ ສມຖໍ ອຸກ຺ໂກເຏຕິ.

໓໔໑. ກຕິ ອຸກ຺ໂກຏາ? ກຕິຫາກາເຣຫິ ອຸກ຺ໂກຏນໍ ປສວຕິ? ກຕິຫງ຺ເຄຫິ ສມນ຺ນາຄໂຕ ປຸຄ຺ຄໂລ ອຘິກຣຓໍ ອຸກ຺ໂກເຏຕິ? ກຕິ ປຸຄ຺ຄລາ ອຘິກຣຓໍ ອຸກ຺ໂກເຏນ຺ຕາ ອາປຕ຺ຕິໍ ອາປຊ຺ຊນ຺ຕິ?

ທ຺ວາທສ ອຸກ຺ໂກຏາ. ທສຫາກາເຣຫິ ອຸກ຺ໂກຏນໍ ປສວຕິ. ຈຕູຫງ຺ເຄຫິ ສມນ຺ນາຄໂຕ ປຸຄ຺ຄໂລ ອຘິກຣຓໍ ອຸກ຺ໂກເຏຕິ. ຈຕ຺ຕາໂຣ ປຸຄ຺ຄລາ ອຘິກຣຓໍ ອຸກ຺ໂກເຏນ຺ຕາ ອາປຕ຺ຕິໍ ອາປຊ຺ຊນ຺ຕິ?

ກຕເມ ທ຺ວາທສ ອຸກ຺ໂກຏາ? ອກຕໍ ກມ຺ມໍ, ທຸກ຺ກຏໍ ກມ຺ມໍ, ປຸນ ກາຕພ຺ພໍ ກມ຺ມໍ, ອນິຫຕໍ, ທຸນ຺ນິຫຕໍ, ປຸນ ນິຫນິຕພ຺ພໍ, ອວິນິຈ຺ຉິຕໍ, ທຸວິນິຈ຺ຉິຕໍ, ປຸນ ວິນິຈ຺ຉິຕພ຺ພໍ, ອວູປສນ຺ຕໍ, ທຸວູປສນ຺ຕໍ, ປຸນ ວູປສເມຕພ຺ພນ຺ຕິ – ອິເມ ທ຺ວາທສ ອຸກ຺ໂກຏາ.

ກຕເມຫິ ທສຫາກາເຣຫິ ອຸກ຺ໂກຏນໍ ປສວຕິ? ຕຕ຺ຖ ຊາຕກໍ ອຘິກຣຓໍ ອຸກ຺ໂກເຏຕິ, ຕຕ຺ຖ ຊາຕກໍ ວູປສນ຺ຕໍ ອຘິກຣຓໍ ອຸກ຺ໂກເຏຕິ, ອນ຺ຕຣາມຄ຺ເຄ ອຘິກຣຓໍ ອຸກ຺ໂກເຏຕິ, ອນ຺ຕຣາມຄ຺ເຄ ວູປສນ຺ຕໍ ອຘິກຣຓໍ ອຸກ຺ໂກເຏຕິ, ຕຕ຺ຖ ຄຕໍ ອຘິກຣຓໍ ອຸກ຺ໂກເຏຕິ, ຕຕ຺ຖ ຄຕໍ ວູປສນ຺ຕໍ ອຘິກຣຓໍ ອຸກ຺ໂກເຏຕິ, ສຕິວິນຍໍ ອຸກ຺ໂກເຏຕິ, ອມູຬ຺ຫວິນຍໍ ອຸກ຺ໂກເຏຕິ, ຕສ຺ສປາປິຍສິກໍ ອຸກ຺ໂກເຏຕິ, ຕິຓວຕ຺ຖາຣກໍ ອຸກ຺ໂກເຏຕິ – ອິເມຫິ ທສຫາກາເຣຫິ ອຸກ຺ໂກຏນໍ ປສວຕິ.

ກຕເມຫິ ຈຕູຫງ຺ເຄຫິ ສມນ຺ນາຄໂຕ ປຸຄ຺ຄໂລ ອຘິກຣຓໍ ອຸກ຺ໂກເຏຕິ? ຉນ຺ທາຄຕິໍ ຄຈ຺ຉນ຺ໂຕ ອຘິກຣຓໍ ອຸກ຺ໂກເຏຕິ, ໂທສາຄຕິໍ ຄຈ຺ຉນ຺ໂຕ ອຘິກຣຓໍ ອຸກ຺ໂກເຏຕິ, ໂມຫາຄຕິໍ ຄຈ຺ຉນ຺ໂຕ ອຘິກຣຓໍ ອຸກ຺ໂກເຏຕິ, ຠຍາຄຕິໍ ຄຈ຺ຉນ຺ໂຕ ອຘິກຣຓໍ ອຸກ຺ໂກເຏຕິ – ອິເມຫິ ຈຕູຫງ຺ເຄຫິ ສມນ຺ນາຄໂຕ ປຸຄ຺ຄໂລ ອຘິກຣຓໍ ອຸກ຺ໂກເຏຕິ.

ກຕເມ ຈຕ຺ຕາໂຣ ປຸຄ຺ຄລາ ອຘິກຣຓໍ ອຸກ຺ໂກເຏນ຺ຕາ ອາປຕ຺ຕິໍ ອາປຊ຺ຊນ຺ຕິ? ຕທຫຸປສມ຺ປນ຺ໂນ ອຸກ຺ໂກເຏຕິ ອຸກ຺ໂກຏນກໍ ປາຈິຕ຺ຕິຍໍ, ອາຄນ຺ຕຸໂກ ອຸກ຺ໂກເຏຕິ ອຸກ຺ໂກຏນກໍ ປາຈິຕ຺ຕິຍໍ, ກາຣໂກ ອຸກ຺ໂກເຏຕິ ອຸກ຺ໂກຏນກໍ ປາຈິຕ຺ຕິຍໍ, ຉນ຺ທທາຍໂກ ອຸກ຺ໂກເຏຕິ ອຸກ຺ໂກຏນກໍ ປາຈິຕ຺ຕິຍໍ – ອິເມ ຈຕ຺ຕາໂຣ ປຸຄ຺ຄລາ ອຘິກຣຓໍ ອຸກ຺ໂກເຏນ຺ຕາ ອາປຕ຺ຕິໍ ອາປຊ຺ຊນ຺ຕິ.

໒. ອຘິກຣຓນິທານາທິ

໓໔໒. ວິວາທາຘິກຣຓໍ ກິໍນິທານໍ, ກິໍສມຸທຍໍ, ກິໍຊາຕິກໍ, ກິໍປຠວໍ, ກິໍສມ຺ຠາຣໍ, ກິໍສມຸຏ຺ຐານໍ? ອນຸວາທາຘິກຣຓໍ ກິໍນິທານໍ, ກິໍສມຸທຍໍ, ກິໍຊາຕິກໍ, ກິໍປຠວໍ, ກິໍສມ຺ຠາຣໍ, ກິໍສມຸຏ຺ຐານໍ? ອາປຕ຺ຕາຘິກຣຓໍ ກິໍນິທານໍ, ກິໍສມຸທຍໍ, ກິໍຊາຕິກໍ, ກິໍປຠວໍ, ກິໍສມ຺ຠາຣໍ, ກິໍສມຸຏ຺ຐານໍ? ກິຈ຺ຈາຘິກຣຓໍ ກິໍນິທານໍ, ກິໍສມຸທຍໍ, ກິໍຊາຕິກໍ, ກິໍປຠວໍ, ກິໍສມ຺ຠາຣໍ, ກິໍສມຸຏ຺ຐານໍ?

ວິວາທາຘິກຣຓໍ ວິວາທນິທານໍ ວິວາທສມຸທຍໍ ວິວາທຊາຕິກໍ ວິວາທປຠວໍ ວິວາທສມ຺ຠາຣໍ ວິວາທສມຸຏ຺ຐານໍ. ອນຸວາທາຘິກຣຓໍ ອນຸວາທນິທານໍ ອນຸວາທສມຸທຍໍ ອນຸວາທຊາຕິກໍ ອນຸວາທປຠວໍ ອນຸວາທສມ຺ຠາຣໍ ອນຸວາທສມຸຏ຺ຐານໍ. ອາປຕ຺ຕາຘິກຣຓໍ ອາປຕ຺ຕິນິທານໍ ອາປຕ຺ຕິສມຸທຍໍ ອາປຕ຺ຕິຊາຕິກໍ ອາປຕ຺ຕິປຠວໍ ອາປຕ຺ຕິສມ຺ຠາຣໍ ອາປຕ຺ຕິສມຸຏ຺ຐານໍ. ກິຈ຺ຈາຘິກຣຓໍ ກິຈ຺ຈຍນິທານໍ ກິຈ຺ຈຍສມຸທຍໍ ກິຈ຺ຈຍຊາຕິກໍ ກິຈ຺ຈຍປຠວໍ ກິຈ຺ຈຍສມ຺ຠາຣໍ ກິຈ຺ຈຍສມຸຏ຺ຐານໍ.

ວິວາທາຘິກຣຓໍ ກິໍນິທານໍ, ກິໍສມຸທຍໍ, ກິໍຊາຕິກໍ, ກິໍປຠວໍ, ກິໍສມ຺ຠາຣໍ, ກິໍສມຸຏ຺ຐານໍ? ອນຸວາທາຘິກຣຓໍ…ເປ… ອາປຕ຺ຕາຘິກຣຓໍ…ເປ… ກິຈ຺ຈາຘິກຣຓໍ ກິໍນິທານໍ, ກິໍສມຸທຍໍ, ກິໍຊາຕິກໍ, ກິໍປຠວໍ, ກິໍສມ຺ຠາຣໍ, ກິໍສມຸຏ຺ຐານໍ?

ວິວາທາຘິກຣຓໍ ເຫຕຸນິທານໍ, ເຫຕຸສມຸທຍໍ, ເຫຕຸຊາຕິກໍ, ເຫຕຸປຠວໍ, ເຫຕຸສມ຺ຠາຣໍ, ເຫຕຸສມຸຏ຺ຐານໍ. ອນຸວາທາຘິກຣຓໍ…ເປ… ອາປຕ຺ຕາຘິກຣຓໍ…ເປ… ກິຈ຺ຈາຘິກຣຓໍ ເຫຕຸນິທານໍ, ເຫຕຸສມຸທຍໍ, ເຫຕຸຊາຕິກໍ, ເຫຕຸປຠວໍ, ເຫຕຸສມ຺ຠາຣໍ, ເຫຕຸສມຸຏ຺ຐານໍ.

ວິວາທາຘິກຣຓໍ ກິໍນິທານໍ, ກິໍສມຸທຍໍ, ກິໍຊາຕິກໍ, ກິໍປຠວໍ, ກິໍສມ຺ຠາຣໍ, ກິໍສມຸຏ຺ຐານໍ? ອນຸວາທາຘິກຣຓໍ …ເປ… ອາປຕ຺ຕາຘິກຣຓໍ…ເປ… ກິຈ຺ຈາຘິກຣຓໍ ກິໍນິທານໍ, ກິໍສມຸທຍໍ, ກິໍຊາຕິກໍ, ກິໍປຠວໍ, ກິໍສມ຺ຠາຣໍ, ກິໍສມຸຏ຺ຐານໍ?

ວິວາທາຘິກຣຓໍ ປຈ຺ຈຍນິທານໍ, ປຈ຺ຈຍສມຸທຍໍ, ປຈ຺ຈຍຊາຕິກໍ, ປຈ຺ຈຍປຠວໍ, ປຈ຺ຈຍສມ຺ຠາຣໍ, ປຈ຺ຈຍສມຸຏ຺ຐານໍ. ອນຸວາທາຘິກຣຓໍ…ເປ… ອາປຕ຺ຕາຘິກຣຓໍ…ເປ… ກິຈ຺ຈາຘິກຣຓໍ ປຈ຺ຈຍນິທານໍ, ປຈ຺ຈຍສມຸທຍໍ, ປຈ຺ຈຍຊາຕິກໍ, ປຈ຺ຈຍປຠວໍ, ປຈ຺ຈຍສມ຺ຠາຣໍ, ປຈ຺ຈຍສມຸຏ຺ຐານໍ.

໓. ອຘິກຣຓມູລາທິ

໓໔໓. ຈຕຸນ຺ນໍ ອຘິກຣຓານໍ ກຕິ ມູລານິ, ກຕິ ສມຸຏ຺ຐານາ? ຈຕຸນ຺ນໍ ອຘິກຣຓານໍ ເຕຕ຺ຕິໍສ ມູລານິ, ເຕຕ຺ຕິໍສ ສມຸຏ຺ຐານາ.

ຈຕຸນ຺ນໍ ອຘິກຣຓານໍ ກຕມານິ ເຕຕ຺ຕິໍສ ມູລານິ? ວິວາທາຘິກຣຓສ຺ສ ທ຺ວາທສ ມູລານິ, ອນຸວາທາຘິກຣຓສ຺ສ ຈຸທ຺ທສ ມູລານິ, ອາປຕ຺ຕາຘິກຣຓສ຺ສ ຉ ມູລານິ, ກິຈ຺ຈາຘິກຣຓສ຺ສ ເອກໍ ມູລໍ, ສງ຺ໂຆ – ຈຕຸນ຺ນໍ ອຘິກຣຓານໍ ອິມານິ ເຕຕ຺ຕິໍສ ມູລານິ.

ຈຕຸນ຺ນໍ ອຘິກຣຓານໍ ກຕເມ ເຕຕ຺ຕິໍສ ສມຸຏ຺ຐານາ? ວິວາທາຘິກຣຓສ຺ສ ອຏ຺ຐາຣສເຠທກຣວຕ຺ຖູນິ ສມຸຏ຺ຐານາ, ອນຸວາທາຘິກຣຓສ຺ສ ຈຕສ຺ໂສ ວິປຕ຺ຕິໂຍ ສມຸຏ຺ຐານາ, ອາປຕ຺ຕາຘິກຣຓສ຺ສ ສຕ຺ຕາປຕ຺ຕິກ຺ຂນ຺ຘາ ສມຸຏ຺ຐານາ, ກິຈ຺ຈາຘິກຣຓສ຺ສ ຈຕ຺ຕາຣິ ກມ຺ມານິ ສມຸຏ຺ຐານາ – ຈຕຸນ຺ນໍ ອຘິກຣຓານໍ ອິເມ ເຕຕ຺ຕິໍສ ສມຸຏ຺ຐານາ.

໔. ອຘິກຣຓປຈ຺ຈຍາປຕ຺ຕິ

໓໔໔. ວິວາທາຘິກຣຓໍ ອາປຕ຺ຕານາປຕ຺ຕີຕິ? ວິວາທາຘິກຣຓໍ ນ ອາປຕ຺ຕິ. ກິໍ ປນ ວິວາທາຘິກຣຓປຈ຺ຈຍາ ອາປຕ຺ຕິໍ ອາປຊ຺ເຊຍ຺ຍາຕິ? ອາມ, ວິວາທາຘິກຣຓປຈ຺ຈຍາ ອາປຕ຺ຕິໍ ອາປຊ຺ເຊຍ຺ຍ. ວິວາທາຘິກຣຓປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ວິວາທາຘິກຣຓປຈ຺ຈຍາ ທ຺ເວ ອາປຕ຺ຕິໂຍ ອາປຊ຺ຊຕິ. ອຸປສມ຺ປນ຺ນໍ ໂອມສຕິ, ອາປຕ຺ຕິ ປາຈິຕ຺ຕິຍສ຺ສ; ອນຸປສມ຺ປນ຺ນໍ ໂອມສຕິ, ອາປຕ຺ຕິ ທຸກ຺ກຏສ຺ສ – ວິວາທາຘິກຣຓປຈ຺ຈຍາ ອິມາ ທ຺ເວ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ? ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ? ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕິຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ? ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐນ຺ຕິ? ກຕິຫິ ອຘິກຣເຓຫິ ກຕິສຸ ຐາເນສຸ ກຕິຫິ ສມເຖຫິ ສມ຺ມນ຺ຕິ?

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ເອກໍ ວິປຕ຺ຕິໍ ຠຊນ຺ຕິ – ອາຈາຣວິປຕ຺ຕິໍ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ທ຺ວີຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ຕີຫິ ສມຸຏ຺ຐາເນຫິ ສມຸຏ຺ຐນ຺ຕິ. ເອເກນ ອຘິກຣເຓນ – ກິຈ຺ຈາຘິກຣເຓນ; ຕີສຸ ຐາເນສຸ – ສງ຺ຆມຊ຺ເຌ, ຄຓມຊ຺ເຌ, ປຸຄ຺ຄລສ຺ສ ສນ຺ຕິເກ; ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໓໔໕. ອນຸວາທາຘິກຣຓໍ ອາປຕ຺ຕານາປຕ຺ຕີຕິ? ອນຸວາທາຘິກຣຓໍ ນ ອາປຕ຺ຕິ. ກິໍ ປນ ອນຸວາທາຘິກຣຓປຈ຺ຈຍາ ອາປຕ຺ຕິໍ ອາປຊ຺ເຊຍ຺ຍາຕິ? ອາມ, ອນຸວາທາຘິກຣຓປຈ຺ຈຍາ ອາປຕ຺ຕິໍ ອາປຊ຺ເຊຍ຺ຍ. ອນຸວາທາຘິກຣຓປຈ຺ຈຍາ, ກຕິ ອາປຕ຺ຕິໂຍ ອາປຊ຺ຊຕິ? ອນຸວາທາຘິກຣຓປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຠິກ຺ຂຸໍ ອມູລເກນ ປາຣາຊິເກນ ຘມ຺ເມນ ອນຸທ຺ຘໍເສຕິ, ອາປຕ຺ຕິ ສງ຺ຆາທິເສສສ຺ສ; ອມູລເກນ ສງ຺ຆາທິເສເສນ ອນຸທ຺ຘໍເສຕິ, ອາປຕ຺ຕິ ປາຈິຕ຺ຕິຍສ຺ສ; ອມູລິກາຍ ອາຈາຣວິປຕ຺ຕິຍາ ອນຸທ຺ຘໍເສຕິ, ອາປຕ຺ຕິ ທຸກ຺ກຏສ຺ສ – ອນຸວາທາຘິກຣຓປຈ຺ຈຍາ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ຕີຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ສງ຺ຆາທິເສສາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ຕີຫິ ສມຸຏ຺ຐາເນຫິ ສມຸຏ຺ຐນ຺ຕິ. ຍາ ຕາ ອາປຕ຺ຕິໂຍ ຄຣຸກາ ຕາ ອາປຕ຺ຕິໂຍ ເອເກນ ອຘິກຣເຓນ – ກິຈ຺ຈາຘິກຣເຓນ; ເອກມ຺ຫິ ຐາເນ – ສງ຺ຆມຊ຺ເຌ; ທ຺ວີຫິ ສມເຖຫິ ສມ຺ມນ຺ຕິ – ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ. ຍາ ຕາ ອາປຕ຺ຕິໂຍ ລຫຸກາ ຕາ ອາປຕ຺ຕິໂຍ ເອເກນ ອຘິກຣເຓນ – ກິຈ຺ຈາຘິກຣເຓນ; ຕີສຸ ຐາເນສຸ – ສງ຺ຆມຊ຺ເຌ ຄຓມຊ຺ເຌ ປຸຄ຺ຄລສ຺ສ ສນ຺ຕິເກ; ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໓໔໖. ອາປຕ຺ຕາຘິກຣຓໍ ອາປຕ຺ຕານາປຕ຺ຕີຕິ? ອາປຕ຺ຕາຘິກຣຓໍ ອາປຕ຺ຕິ. ກິໍ ປນ ອາປຕ຺ຕາຘິກຣຓປຈ຺ຈຍາ ອາປຕ຺ຕິໍ ອາປຊ຺ເຊຍ຺ຍາຕິ? ອາມ, ອາປຕ຺ຕາຘິກຣຓປຈ຺ຈຍາ ອາປຕ຺ຕິໍ ອາປຊ຺ເຊຍ຺ຍ. ອາປຕ຺ຕາຘິກຣຓປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ອາປຕ຺ຕາຘິກຣຓປຈ຺ຈຍາ ຈຕສ຺ໂສ ອາປຕ຺ຕິໂຍ ອາປຊ຺ຊຕິ. ຠິກ຺ຂຸນີ ຊານໍ ປາຣາຊິກໍ ຘມ຺ມໍ [ປາຣາຊິກໍ ຘມ຺ມໍ ອຊ຺ຌາປນ຺ນໍ (ສ຺ຍາ.)] ປຏິຈ຺ຉາເທຕິ, ອາປຕ຺ຕິ ປາຣາຊິກສ຺ສ; ເວມຕິກາ ປຏິຈ຺ຉາເທຕິ, ອາປຕ຺ຕິ ຖຸລ຺ລຈ຺ຈຍສ຺ສ; ຠິກ຺ຂຸ ສງ຺ຆາທິເສສໍ ປຏິຈ຺ຉາເທຕິ, ອາປຕ຺ຕິ ປາຈິຕ຺ຕິຍສ຺ສ; ອາຈາຣວິປຕ຺ຕິໍ ປຏິຈ຺ຉາເທຕິ, ອາປຕ຺ຕິ ທຸກ຺ກຏສ຺ສ – ອາປຕ຺ຕາຘິກຣຓປຈ຺ຈຍາ ອິມາ ຈຕສ຺ໂສ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ ສິຍາ ອາຈາຣວິປຕ຺ຕິໍ. ຈຕຸນ຺ນໍ ອຘິກຣຓານໍ – ອາປຕ຺ຕາຘິກຣຓໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ຈຕູຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຣາຊິກາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ. ຍາ ສາ ອາປຕ຺ຕິ ອນວເສສາ ສາ ອາປຕ຺ຕິ ນ ກຕເມນ ອຘິກຣເຓນ, ນ ກຕມມ຺ຫິ ຐາເນ, ນ ກຕເມນ ສມເຖນ ສມ຺ມຕິ. ຍາ ຕາ ອາປຕ຺ຕິໂຍ ລຫຸກາ ຕາ ອາປຕ຺ຕິໂຍ ເອເກນ ອຘິກຣເຓນ – ກິຈ຺ຈາຘິກຣເຓນ; ຕີສຸ ຐາເນສຸ – ສງ຺ຆມຊ຺ເຌ, ຄຓມຊ຺ເຌ, ປຸຄ຺ຄລສ຺ສ ສນ຺ຕິເກ; ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໓໔໗. ກິຈ຺ຈາຘິກຣຓໍ ອາປຕ຺ຕານາປຕ຺ຕີຕິ? ກິຈ຺ຈາຘິກຣຓໍ ນ ອາປຕ຺ຕິ. ກິໍ ປນ ກິຈ຺ຈາຘິກຣຓປຈ຺ຈຍາ ອາປຕ຺ຕິໍ ອາປຊ຺ເຊຍ຺ຍາຕິ? ອາມ, ກິຈ຺ຈາຘິກຣຓປຈ຺ຈຍາ ອາປຕ຺ຕິໍ ອາປຊ຺ເຊຍ຺ຍ. ກິຈ຺ຈາຘິກຣຓປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ກິຈ຺ຈາຘິກຣຓປຈ຺ຈຍາ ປຎ຺ຈ ອາປຕ຺ຕິໂຍ ອາປຊ຺ຊຕິ. ອຸກ຺ຂິຕ຺ຕານຸວຕ຺ຕິກາ ຠິກ຺ຂຸນີ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊຕິ, ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ປາຣາຊິກສ຺ສ; ເຠທການຸວຕ຺ຕກາ ຠິກ຺ຂູ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕິ, ອາປຕ຺ຕິ ສງ຺ຆາທິເສສສ຺ສ; ປາປິກາຍ ທິຏ຺ຐິຍາ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕິ, ອາປຕ຺ຕິ ປາຈິຕ຺ຕິຍສ຺ສ – ກິຈ຺ຈາຘິກຣຓປຈ຺ຈຍາ ອິມາ ປຎ຺ຈ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ ສິຍາ ອາຈາຣວິປຕ຺ຕິໍ. ຈຕຸນ຺ນໍ ອຘິກຣຓານໍ – ອາປຕ຺ຕາຘິກຣຓໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ປຎ຺ຈຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຣາຊິກາປຕ຺ຕິກ຺ຂນ຺ເຘນ, ສິຍາ ສງ຺ຆາທິເສສາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ. ຍາ ສາ ອາປຕ຺ຕິ ອນວເສສາ ສາ ອາປຕ຺ຕິ ນ ກຕເມນ ອຘິກຣເຓນ, ນ ກຕມມ຺ຫິ ຐາເນ, ນ ກຕເມນ ສມເຖນ ສມ຺ມຕິ. ຍາ ສາ ອາປຕ຺ຕິ ຄຣຸກາ ສາ ອາປຕ຺ຕິ ເອເກນ ອຘິກຣເຓນ – ກິຈ຺ຈາຘິກຣເຓນ; ເອກມ຺ຫິ ຐາເນ – ສງ຺ຆມຊ຺ເຌ; ທ຺ວີຫິ ສມເຖຫິ ສມ຺ມຕິ – ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ. ຍາ ຕາ ອາປຕ຺ຕິໂຍ ລຫຸກາ ຕາ ອາປຕ຺ຕິໂຍ ເອເກນ ອຘິກຣເຓນ – ກິຈ຺ຈາຘິກຣເຓນ; ຕີສຸ ຐາເນສຸ – ສງ຺ຆມຊ຺ເຌ, ຄຓມຊ຺ເຌ, ປຸຄ຺ຄລສ຺ສ ສນ຺ຕິເກ; ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໕. ອຘິກຣຓາຘິປ຺ປາໂຍ

໓໔໘. ວິວາທາຘິກຣຓໍ ໂຫຕິ ອນຸວາທາຘິກຣຓໍ, ໂຫຕິ ອາປຕ຺ຕາຘິກຣຓໍ, ໂຫຕິ ກິຈ຺ຈາຘິກຣຓໍ. ວິວາທາຘິກຣຓໍ ນ ໂຫຕິ ອນຸວາທາຘິກຣຓໍ, ນ ໂຫຕິ ອາປຕ຺ຕາຘິກຣຓໍ, ນ ໂຫຕິ ກິຈ຺ຈາຘິກຣຓໍ; ອປິ ຈ, ວິວາທາຘິກຣຓປຈ຺ຈຍາ ໂຫຕິ ອນຸວາທາຘິກຣຓໍ, ໂຫຕິ ອາປຕ຺ຕາຘິກຣຓໍ, ໂຫຕິ ກິຈ຺ຈາຘິກຣຓໍ. ຍຖາ ກຖໍ ວິຍ? [ຈູຬວ. ໒໑໕; ປຣິ. ໓໑໔] ອິຘ ຠິກ຺ຂູ ວິວທນ຺ຕິ – ຘມ຺ໂມຕິ ວາ ອຘມ຺ໂມຕິ ວາ ທຸຏ຺ຐຸລ຺ລາປຕ຺ຕີຕິ ວາ ອທຸຏ຺ຐຸລ຺ລາປຕ຺ຕີຕິ ວາ. ຍໍ ຕຕ຺ຖ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ນານາວາໂທ ອຎ຺ຎຖາວາໂທ ວິປຈ຺ຈຕາຍ ໂວຫາໂຣ ເມຘກໍ, ອິທໍ ວຸຈ຺ຈຕິ ວິວາທາຘິກຣຓໍ. ວິວາທາຘິກຣເຓ ສງ຺ໂຆ ວິວທຕິ ວິວາທາຘິກຣຓໍ. ວິວທມາໂນ ອນຸວທຕິ ອນຸວາທາຘິກຣຓໍ. ອນຸວທມາໂນ ອາປຕ຺ຕິໍ ອາປຊ຺ຊຕິ ອາປຕ຺ຕາຘິກຣຓໍ. ຕາຍ ອາປຕ຺ຕິຍາ ສງ຺ໂຆ ກມ຺ມໍ ກໂຣຕິ ກິຈ຺ຈາຘິກຣຓໍ. ເອວໍ ວິວາທາຘິກຣຓປຈ຺ຈຍາ ໂຫຕິ ອນຸວາທາຘິກຣຓໍ, ໂຫຕິ ອາປຕ຺ຕາຘິກຣຓໍ, ໂຫຕິ ກິຈ຺ຈາຘິກຣຓໍ.

ອນຸວາທາຘິກຣຓໍ ໂຫຕິ ອາປຕ຺ຕາຘິກຣຓໍ, ໂຫຕິ ກິຈ຺ຈາຘິກຣຓໍ, ໂຫຕິ ວິວາທາຘິກຣຓໍ. ອນຸວາທາຘິກຣຓໍ ນ ໂຫຕິ ອາປຕ຺ຕາຘິກຣຓໍ, ນ ໂຫຕິ ກິຈ຺ຈາຘິກຣຓໍ, ນ ໂຫຕິ ວິວາທາຘິກຣຓໍ; ອປິ ຈ, ອນຸວາທາຘິກຣຓປຈ຺ຈຍາ ໂຫຕິ ອາປຕ຺ຕາຘິກຣຓໍ, ໂຫຕິ ກິຈ຺ຈາຘິກຣຓໍ, ໂຫຕິ ວິວາທາຘິກຣຓໍ. ຍຖາ ກຖໍ ວິຍ? ອິຘ ຠິກ຺ຂູ ຠິກ຺ຂຸໍ ອນຸວທນ຺ຕິ ສີລວິປຕ຺ຕິຍາ ວາ ອາຈາຣວິປຕ຺ຕິຍາ ວາ ທິຏ຺ຐິວິປຕ຺ຕິຍາ ວາ ອາຊີວວິປຕ຺ຕິຍາ ວາ. ໂຍ ຕຕ຺ຖ ອນຸວາໂທ ອນຸວທນາ ອນຸລ຺ລປນາ ອນຸຠຓນາ ອນຸສມ຺ປວງ຺ກຕາ ອພ຺ຠຸສ຺ສຫນຕາ ອນຸພລປ຺ປທານໍ, ອິທໍ ວຸຈ຺ຈຕິ ອນຸວາທາຘິກຣຓໍ. ອນຸວາທາຘິກຣເຓ ສງ຺ໂຆ ວິວທຕິ, ວິວາທາຘິກຣຓໍ. ວິວທມາໂນ ອນຸວທຕິ, ອນຸວາທາຘິກຣຓໍ. ອນຸວທມາໂນ ອາປຕ຺ຕິໍ ອາປຊ຺ຊຕິ, ອາປຕ຺ຕາຘິກຣຓໍ. ຕາຍ ອາປຕ຺ຕິຍາ ສງ຺ໂຆ ກມ຺ມໍ ກໂຣຕິ, ກິຈ຺ຈາຘິກຣຓໍ. ເອວໍ ອນຸວາທາຘິກຣຓປຈ຺ຈຍາ ໂຫຕິ ອາປຕ຺ຕາຘິກຣຓໍ, ໂຫຕິ ກິຈ຺ຈາຘິກຣຓໍ, ໂຫຕິ ວິວາທາຘິກຣຓໍ.

ອາປຕ຺ຕາຘິກຣຓໍ ໂຫຕິ ກິຈ຺ຈາຘິກຣຓໍ, ໂຫຕິ ວິວາທາຘິກຣຓໍ, ໂຫຕິ ອນຸວາທາຘິກຣຓໍ. ອາປຕ຺ຕາຘິກຣຓໍ ນ ໂຫຕິ ກິຈ຺ຈາຘິກຣຓໍ, ນ ໂຫຕິ ວິວາທາຘິກຣຓໍ, ນ ໂຫຕິ ອນຸວາທາຘິກຣຓໍ; ອປິ ຈ, ອາປຕ຺ຕາຘິກຣຓປຈ຺ຈຍາ ໂຫຕິ ກິຈ຺ຈາຘິກຣຓໍ, ໂຫຕິ ວິວາທາຘິກຣຓໍ, ໂຫຕິ ອນຸວາທາຘິກຣຓໍ. ຍຖາ ກຖໍ ວິຍ? [ຈູຬວ. ໒໑໕; ປຣິ. ໓໔໘] ປຎ຺ຈປິ ອາປຕ຺ຕິກ຺ຂນ຺ຘາ ອາປຕ຺ຕາຘິກຣຓໍ, ສຕ຺ຕປິ ອາປຕ຺ຕິກ຺ຂນ຺ຘາ ອາປຕ຺ຕາຘິກຣຓໍ, ອິທໍ ວຸຈ຺ຈຕິ ອາປຕ຺ຕາຘິກຣຓໍ. ອາປຕ຺ຕາຘິກຣເຓ ສງ຺ໂຆ ວິວທຕິ ວິວາທາຘິກຣຓໍ. ວິວທມາໂນ ອນຸວທຕິ ອນຸວາທາຘິກຣຓໍ. ອນຸວທມາໂນ ອາປຕ຺ຕິໍ ອາປຊ຺ຊຕິ ອາປຕ຺ຕາຘິກຣຓໍ. ຕາຍ ອາປຕ຺ຕິຍາ ສງ຺ໂຆ ກມ຺ມໍ ກໂຣຕິ ກິຈ຺ຈາຘິກຣຓໍ. ເອວໍ ອາປຕ຺ຕາຘິກຣຓປຈ຺ຈຍາ ໂຫຕິ ກິຈ຺ຈາຘິກຣຓໍ, ໂຫຕິ ວິວາທາຘິກຣຓໍ, ໂຫຕິ ອນຸວາທາຘິກຣຓໍ.

ກິຈ຺ຈາຘິກຣຓໍ ໂຫຕິ ວິວາທາຘິກຣຓໍ, ໂຫຕິ ອນຸວາທາຘິກຣຓໍ, ໂຫຕິ ອາປຕ຺ຕາຘິກຣຓໍ. ກິຈ຺ຈາຘິກຣຓໍ ນ ໂຫຕິ ວິວາທາຘິກຣຓໍ, ນ ໂຫຕິ ອນຸວາທາຘິກຣຓໍ, ນ ໂຫຕິ ອາປຕ຺ຕາຘິກຣຓໍ; ອປິ ຈ, ກິຈ຺ຈາຘິກຣຓປຈ຺ຈຍາ ໂຫຕິ ວິວາທາຘິກຣຓໍ, ໂຫຕິ ອນຸວາທາຘິກຣຓໍ, ໂຫຕິ ອາປຕ຺ຕາຘິກຣຓໍ. ຍຖາ ກຖໍ ວິຍ? ຍາ ສງ຺ຆສ຺ສ ກິຈ຺ຈຍຕາ ກຣຓີຍຕາ ອປໂລກນກມ຺ມໍ ຎຕ຺ຕິກມ຺ມໍ ຎຕ຺ຕິທຸຕິຍກມ຺ມໍ ຎຕ຺ຕິຈຕຸຕ຺ຖກມ຺ມໍ, ອິທໍ ວຸຈ຺ຈຕິ ກິຈ຺ຈາຘິກຣຓໍ. ກິຈ຺ຈາຘິກຣເຓ ສງ຺ໂຆ ວິວທຕິ ວິວາທາຘິກຣຓໍ. ວິວທມາໂນ ອນຸວທຕິ ອນຸວາທາຘິກຣຓໍ. ອນຸວທມາໂນ ອາປຕ຺ຕິໍ ອາປຊ຺ຊຕິ ອາປຕ຺ຕາຘິກຣຓໍ. ຕາຍ ອາປຕ຺ຕິຍາ ສງ຺ໂຆ ກມ຺ມໍ ກໂຣຕິ ກິຈ຺ຈາຘິກຣຓໍ. ເອວໍ ກິຈ຺ຈາຘິກຣຓປຈ຺ຈຍາ ໂຫຕິ ວິວາທາຘິກຣຓໍ, ໂຫຕິ ອນຸວາທາຘິກຣຓໍ, ໂຫຕິ ອາປຕ຺ຕາຘິກຣຓໍ.

໖. ປຸຈ຺ຉາວາໂຣ

໓໔໙. ຍຕ຺ຖ ສຕິວິນໂຍ ຕຕ຺ຖ ສມ຺ມຸຂາວິນໂຍ? ຍຕ຺ຖ ສມ຺ມຸຂາວິນໂຍ ຕຕ຺ຖ ສຕິວິນໂຍ? ຍຕ຺ຖ ອມູຬ຺ຫວິນໂຍ ຕຕ຺ຖ ສມ຺ມຸຂາວິນໂຍ? ຍຕ຺ຖ ສມ຺ມຸຂາວິນໂຍ ຕຕ຺ຖ ອມູຬ຺ຫວິນໂຍ? ຍຕ຺ຖ ປຏິຎ຺ຎາຕກຣຓໍ ຕຕ຺ຖ ສມ຺ມຸຂາວິນໂຍ? ຍຕ຺ຖ ສມ຺ມຸຂາວິນໂຍ ຕຕ຺ຖ ປຏິຎ຺ຎາຕກຣຓໍ? ຍຕ຺ຖ ເຍຠຸຍ຺ຍສິກາ ຕຕ຺ຖ ສມ຺ມຸຂາວິນໂຍ? ຍຕ຺ຖ ສມ຺ມຸຂາວິນໂຍ ຕຕ຺ຖ ເຍຠຸຍ຺ຍສິກາ? ຍຕ຺ຖ ຕສ຺ສປາປິຍສິກາ ຕຕ຺ຖ ສມ຺ມຸຂາວິນໂຍ? ຍຕ຺ຖ ສມ຺ມຸຂາວິນໂຍ ຕຕ຺ຖ ຕສ຺ສປາປິຍສິກາ? ຍຕ຺ຖ ຕິຓວຕ຺ຖາຣໂກ ຕຕ຺ຖ ສມ຺ມຸຂາວິນໂຍ? ຍຕ຺ຖ ສມ຺ມຸຂາວິນໂຍ ຕຕ຺ຖ ຕິຓວຕ຺ຖາຣໂກ?

໗. ວິສ຺ສຊ຺ຊນາວາໂຣ

໓໕໐. ຍສ຺ມິໍ ສມເຍ ສມ຺ມຸຂາວິນເຍນ ຈ ສຕິວິນເຍນ ຈ ອຘິກຣຓໍ ວູປສມ຺ມຕິ – ຍຕ຺ຖ ສຕິວິນໂຍ ຕຕ຺ຖ ສມ຺ມຸຂາວິນໂຍ, ຍຕ຺ຖ ສມ຺ມຸຂາວິນໂຍ ຕຕ຺ຖ ສຕິວິນໂຍ, ນ ຕຕ຺ຖ ອມູຬ຺ຫວິນໂຍ, ນ ຕຕ຺ຖ ປຏິຎ຺ຎາຕກຣຓໍ, ນ ຕຕ຺ຖ ເຍຠຸຍ຺ຍສິກາ, ນ ຕຕ຺ຖ ຕສ຺ສປາປິຍສິກາ, ນ ຕຕ຺ຖ ຕິຓວຕ຺ຖາຣໂກ. ຍສ຺ມິໍ ສມເຍ ສມ຺ມຸຂາວິນເຍນ ຈ ອມູຬ຺ຫວິນເຍນ ຈ…ເປ… ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ…ເປ… ສມ຺ມຸຂາວິນເຍນ ຈ ເຍຠຸຍ຺ຍສິກາຍ ຈ…ເປ… ສມ຺ມຸຂາວິນເຍນ ຈ ຕສ຺ສປາປິຍສິກາຍ ຈ…ເປ… ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ ອຘິກຣຓໍ ວູປສມ຺ມຕິ – ຍຕ຺ຖ ຕິຓວຕ຺ຖາຣໂກ ຕຕ຺ຖ ສມ຺ມຸຂາວິນໂຍ, ຍຕ຺ຖ ສມ຺ມຸຂາວິນໂຍ ຕຕ຺ຖ ຕິຓວຕ຺ຖາຣໂກ, ນ ຕຕ຺ຖ ສຕິວິນໂຍ, ນ ຕຕ຺ຖ ອມູຬ຺ຫວິນໂຍ, ນ ຕຕ຺ຖ ປຏິຎ຺ຎາຕກຣຓໍ, ນ ຕຕ຺ຖ ເຍຠຸຍ຺ຍສິກາ, ນ ຕຕ຺ຖ ຕສ຺ສປາປິຍສິກາ.

໘. ສໍສຏ຺ຐວາໂຣ

໓໕໑. ສມ຺ມຸຂາວິນໂຍຕິ ວາ ສຕິວິນໂຍຕິ ວາ – ອິເມ ຘມ຺ມາ ສໍສຏ຺ຐາ ອຸທາຫຸ ວິສໍສຏ຺ຐາ? ລພ຺ຠາ ຈ ປນິເມສໍ ຘມ຺ມານໍ ວິນິພ຺ຠຸຊິຕ຺ວາ ວິນິພ຺ຠຸຊິຕ຺ວາ ນານາກຣຓໍ ປຎ຺ຎາເປຕຸໍ? ສມ຺ມຸຂາວິນໂຍຕິ ວາ ອມູຬ຺ຫວິນໂຍຕິ ວາ…ເປ… ສມ຺ມຸຂາວິນໂຍຕິ ວາ ປຏິຎ຺ຎາຕກຣຓນ຺ຕິ ວາ… ສມ຺ມຸຂາວິນໂຍຕິ ວາ ເຍຠຸຍ຺ຍສິກາຕິ ວາ… ສມ຺ມຸຂາວິນໂຍຕິ ວາ ຕສ຺ສປາປິຍສິກາຕິ ວາ… ສມ຺ມຸຂາວິນໂຍຕິ ວາ ຕິຓວຕ຺ຖາຣໂກຕິ – ອິເມ ຘມ຺ມາ ສໍສຏ຺ຐາ ອຸທາຫຸ ວິສໍສຏ຺ຐາ? ລພ຺ຠາ ຈ ປນິເມສໍ ຘມ຺ມານໍ ວິນິພ຺ຠຸຊິຕ຺ວາ ວິນິພ຺ຠຸຊິຕ຺ວາ ນານາກຣຓໍ ປຎ຺ຎາເປຕຸໍ?

ສມ຺ມຸຂາວິນໂຍຕິ ວາ ສຕິວິນໂຍຕິ ວາ – ອິເມ ຘມ຺ມາ ສໍສຏ຺ຐາ, ໂນ ວິສໍສຏ຺ຐາ; ນ ຈ ລພ຺ຠາ ອິເມສໍ ຘມ຺ມານໍ ວິນິພ຺ຠຸຊິຕ຺ວາ ວິນິພ຺ຠຸຊິຕ຺ວາ ນານາກຣຓໍ ປຎ຺ຎາເປຕຸໍ. ສມ຺ມຸຂາວິນໂຍຕິ ວາ ອມູຬ຺ຫວິນໂຍຕິ ວາ…ເປ… ສມ຺ມຸຂາວິນໂຍຕິ ວາ ປຏິຎ຺ຎາຕກຣຓນ຺ຕິ ວາ… ສມ຺ມຸຂາວິນໂຍຕິ ວາ ເຍຠຸຍ຺ຍສິກາຕິ ວາ… ສມ຺ມຸຂາວິນໂຍຕິ ວາ ຕສ຺ສປາປິຍສິກາຕິ ວາ… ສມ຺ມຸຂາວິນໂຍຕິ ວາ ຕິຓວຕ຺ຖາຣໂກຕິ ວາ – ອິເມ ຘມ຺ມາ ສໍສຏ຺ຐາ, ໂນ ວິສໍສຏ຺ຐາ; ນ ຈ ລພ຺ຠາ ອິເມສໍ ຘມ຺ມານໍ ວິນິພ຺ຠຸຊິຕ຺ວາ ວິນິພ຺ຠຸຊິຕ຺ວາ ນານາກຣຓໍ ປຎ຺ຎາເປຕຸໍ.

໙. ສຕ຺ຕສມຖນິທານໍ

໓໕໒. ສມ຺ມຸຂາວິນໂຍ ກິໍນິທາໂນ, ກິໍສມຸທໂຍ, ກິໍຊາຕິໂກ, ກິໍປຠໂວ, ກິໍສມ຺ຠາໂຣ ກິໍສມຸຏ຺ຐາໂນ? ສຕິວິນໂຍ ກິໍນິທາໂນ, ກິໍສມຸທໂຍ, ກິໍຊາຕິໂກ, ກິໍປຠໂວ, ກິໍສມ຺ຠາໂຣ, ກິໍສມຸຏ຺ຐາໂນ? ອມູຬ຺ຫວິນໂຍ ກິໍນິທາໂນ, ກິໍສມຸທໂຍ, ກິໍຊາຕິໂກ, ກິໍປຠໂວ, ກິໍສມ຺ຠາໂຣ, ກິໍສມຸຏ຺ຐາໂນ? ປຏິຎ຺ຎາຕກຣຓໍ ກິໍນິທານໍ, ກິໍສມຸທຍໍ, ກິໍຊາຕິກໍ, ກິໍປຠວໍ, ກິໍສມ຺ຠາຣໍ, ກິໍສມຸຏ຺ຐານໍ? ເຍຠຸຍ຺ຍສິກາ ກິໍນິທານາ, ກິໍສມຸທຍາ, ກິໍຊາຕິກາ, ກິໍປຠວາ, ກິໍສມ຺ຠາຣາ, ກິໍສມຸຏ຺ຐານາ? ຕສ຺ສປາປິຍສິກາ ກິໍນິທານາ, ກິໍສມຸທຍາ, ກິໍຊາຕິກາ, ກິໍປຠວາ, ກິໍສມ຺ຠາຣາ, ກິໍສມຸຏ຺ຐານາ ຕິຓວຕ຺ຖາຣໂກ ກິໍນິທາໂນ, ກິໍສມຸທໂຍ, ກິໍຊາຕິໂກ, ກິໍປຠໂວ, ກິໍສມ຺ຠາໂຣ, ກິໍສມຸຏ຺ຐາໂນ?

ສມ຺ມຸຂາວິນໂຍ ນິທານນິທາໂນ, ນິທານສມຸທໂຍ, ນິທານຊາຕິໂກ, ນິທານປຠໂວ, ນິທານສມ຺ຠາໂຣ, ນິທານສມຸຏ຺ຐາໂນ. ສຕິວິນໂຍ…ເປ… ອມູຬ຺ຫວິນໂຍ…ເປ… ປຏິຎ຺ຎາຕກຣຓໍ ນິທານນິທານໍ, ນິທານສມຸທຍໍ, ນິທານຊາຕິກໍ, ນິທານປຠວໍ, ນິທານສມ຺ຠາຣໍ, ນິທານສມຸຏ຺ຐານໍ. ເຍຠຸຍ຺ຍສິກາ…ເປ… ຕສ຺ສປາປິຍສິກາ ນິທານນິທານາ, ນິທານສມຸທຍາ, ນິທານຊາຕິກາ, ນິທານປຠວາ, ນິທານສມ຺ຠາຣາ, ນິທານສມຸຏ຺ຐານາ. ຕິຓວຕ຺ຖາຣໂກ ນິທານນິທາໂນ, ນິທານສມຸທໂຍ, ນິທານຊາຕິໂກ, ນິທານປຠໂວ, ນິທານສມ຺ຠາໂຣ, ນິທານສມຸຏ຺ຐາໂນ.

ສມ຺ມຸຂາວິນໂຍ ເຫຕຸນິທາໂນ, ເຫຕຸສມຸທໂຍ, ເຫຕຸຊາຕິໂກ, ເຫຕຸປຠໂວ, ເຫຕຸສມ຺ຠາໂຣ, ເຫຕຸສມຸຏ຺ຐາໂນ. ສຕິວິນໂຍ…ເປ… ອມູຬ຺ຫວິນໂຍ…ເປ… ປຏິຎ຺ຎາຕກຣຓໍ ເຫຕຸນິທານໍ, ເຫຕຸສມຸທຍໍ, ເຫຕຸຊາຕິກໍ, ເຫຕຸປຠວໍ, ເຫຕຸສມ຺ຠາຣໍ, ເຫຕຸສມຸຏ຺ຐານໍ. ເຍຠຸຍ຺ຍສິກາ…ເປ… ຕສ຺ສປາປິຍສິກາ ເຫຕຸນິທານາ, ເຫຕຸສມຸທຍາ, ເຫຕຸຊາຕິກາ, ເຫຕຸປຠວາ, ເຫຕຸສມ຺ຠາຣາ, ເຫຕຸສມຸຏ຺ຐານາ. ຕິຓວຕ຺ຖາຣໂກ ເຫຕຸນິທາໂນ, ເຫຕຸສມຸທໂຍ, ເຫຕຸຊາຕິໂກ, ເຫຕຸປຠໂວ, ເຫຕຸສມ຺ຠາໂຣ, ເຫຕຸສມຸຏ຺ຐາໂນ.

ສມ຺ມຸຂາວິນໂຍ ກິໍນິທາໂນ, ກິໍສມຸທໂຍ, ກິໍຊາຕິໂກ, ກິໍປຠໂວ, ກິໍສມ຺ຠາໂຣ, ກິໍສມຸຏ຺ຐາໂນ? ສຕິວິນໂຍ…ເປ… ອມູຬ຺ຫວິນໂຍ…ເປ… ປຏິຎ຺ຎາຕກຣຓໍ…ເປ… ເຍຠຸຍ຺ຍສິກາ…ເປ… ຕສ຺ສປາປິຍສິກາ…ເປ… ຕິຓວຕ຺ຖາຣໂກ ກິໍນິທາໂນ, ກິໍສມຸທໂຍ, ກິໍຊາຕິໂກ, ກິໍປຠໂວ, ກິໍສມ຺ຠາໂຣ, ກິໍສມຸຏ຺ຐາໂນ? ສມ຺ມຸຂາວິນໂຍ ປຈ຺ຈຍນິທາໂນ, ປຈ຺ຈຍສມຸທໂຍ, ປຈ຺ຈຍຊາຕິໂກ, ປຈ຺ຈຍປຠໂວ, ປຈ຺ຈຍສມ຺ຠາໂຣ, ປຈ຺ຈຍສມຸຏ຺ຐາໂນ. ສຕິວິນໂຍ…ເປ… ອມູຬ຺ຫວິນໂຍ…ເປ… ປຏິຎ຺ຎາຕກຣຓໍ ປຈ຺ຈຍນິທານໍ, ປຈ຺ຈຍສມຸທຍໍ, ປຈ຺ຈຍຊາຕິກໍ, ປຈ຺ຈຍປຠວໍ, ປຈ຺ຈຍສມ຺ຠາຣໍ, ປຈ຺ຈຍສມຸຏ຺ຐານໍ. ເຍຠຸຍ຺ຍສິກາ…ເປ… ຕສ຺ສປາປິຍສິກາ ປຈ຺ຈຍນິທານາ, ປຈ຺ຈຍສມຸທຍາ, ປຈ຺ຈຍຊາຕິກາ, ປຈ຺ຈຍປຠວາ, ປຈ຺ຈຍສມ຺ຠາຣາ, ປຈ຺ຈຍສມຸຏ຺ຐານາ. ຕິຓວຕ຺ຖາຣໂກ ປຈ຺ຈຍນິທາໂນ, ປຈ຺ຈຍສມຸທໂຍ, ປຈ຺ຈຍຊາຕິໂກ, ປຈ຺ຈຍປຠໂວ, ປຈ຺ຈຍສມ຺ຠາໂຣ, ປຈ຺ຈຍສມຸຏ຺ຐາໂນ.

໓໕໓. ສຕ຺ຕນ຺ນໍ ສມຖານໍ ກຕິ ມູລານິ, ກຕິ ສມຸຏ຺ຐານາ? ສຕ຺ຕນ຺ນໍ ສມຖານໍ ຉພ຺ພີສ ມູລານິ, ຉຕ຺ຕິໍສ ສມຸຏ຺ຐານາ. ສຕ຺ຕນ຺ນໍ ສມຖານໍ ກຕມານິ ຉພ຺ພີ ມູລານິ? ສມ຺ມຸຂາວິນຍສ຺ສ ຈຕ຺ຕາຣິ ມູລານິ. ສງ຺ຆສມ຺ມຸຂຕາ, ຘມ຺ມສມ຺ມຸຂຕາ, ວິນຍສມ຺ມຸຂຕາ, ປຸຄ຺ຄລສມ຺ມຸຂຕາ; ສຕິວິນຍສ຺ສ ຈຕ຺ຕາຣິ ມູລານິ; ອມູຬ຺ຫວິນຍສ຺ສ ຈຕ຺ຕາຣິ ມູລານິ; ປຏິຎ຺ຎາຕກຣຓສ຺ສ ທ຺ເວ ມູລານິ – ໂຍ ຈ ເທເສຕິ ຍສ຺ສ ຈ ເທເສຕິ; ເຍຠຸຍ຺ຍສິກາຍ ຈຕ຺ຕາຣິ ມູລານິ; ຕສ຺ສປາປິຍສິກາຍ ຈຕ຺ຕາຣິ ມູລານິ; ຕິຓວຕ຺ຖາຣກສ຺ສ ຈຕ຺ຕາຣິ ມູລານິ – ສງ຺ຆສມ຺ມຸຂຕາ, ຘມ຺ມສມ຺ມຸຂຕາ, ວິນຍສມ຺ມຸຂຕາ, ປຸຄ຺ຄລສມ຺ມຸຂຕາ – ສຕ຺ຕນ຺ນໍ ສມຖານໍ ອິມານິ ຉພ຺ພີສ ມູລານິ.

ສຕ຺ຕນ຺ນໍ ສມຖານໍ ກຕເມ ຉຕ຺ຕິໍສ ສມຸຏ຺ຐານາ? ສຕິວິນຍສ຺ສ ກມ຺ມສ຺ສ ກິຣິຍາ, ກຣຓໍ, ອຸປຄມນໍ, ອຊ຺ຌຸປຄມນໍ, ອຘິວາສນາ, ອປ຺ປຏິກ຺ໂກສນາ. ອມູຬ຺ຫວິນຍສ຺ສ ກມ຺ມສ຺ສ…ເປ… ປຏິຎ຺ຎາຕກຣຓສ຺ສ ກມ຺ມສ຺ສ… ເຍຠຸຍ຺ຍສິກາຍ ກມ຺ມສ຺ສ… ຕສ຺ສປາປິຍສິກາຍ ກມ຺ມສ຺ສ… ຕິຓວຕ຺ຖາຣກສ຺ສ ກມ຺ມສ຺ສ ກິຣິຍາ, ກຣຓໍ, ອຸປຄມນໍ, ອຊ຺ຌຸປຄມນໍ, ອຘິວາສນາ, ອປ຺ປຏິກ຺ໂກສນາ – ສຕ຺ຕນ຺ນໍ ສມຖານໍ ອິເມ ຉຕ຺ຕິໍສ ສມຸຏ຺ຐານາ.

໑໐. ສຕ຺ຕສມຖນານຕ຺ຖາທິ

໓໕໔. ສມ຺ມຸຂາວິນໂຍຕິ ວາ ສຕິວິນໂຍຕິ ວາ – ອິເມ ຘມ຺ມາ ນານຕ຺ຖາ ນານາພ຺ຍຎ຺ຊນາ ອຸທາຫຸ ເອກຕ຺ຖາ ພ຺ຍຎ຺ຊນເມວ ນານໍ? ສມ຺ມຸຂາວິນໂຍຕິ ວາ ອມູຬ຺ຫວິນໂຍຕິ ວາ…ເປ… ສມ຺ມຸຂາວິນໂຍຕິ ວາ ປຏິຎ຺ຎາຕກຣຓນ຺ຕິ ວາ… ສມ຺ມຸຂາວິນໂຍຕິ ວາ ເຍຠຸຍ຺ຍສິກາຕິ ວາ… ສມ຺ມຸຂາວິນໂຍຕິ ວາ ຕສ຺ສປາປິຍສິກາຕິ ວາ… ສມ຺ມຸຂາວິນໂຍຕິ ວາ ຕິຓວຕ຺ຖາຣໂກຕິ ວາ – ອິເມ ຘມ຺ມາ ນານຕ຺ຖາ ນານາພ຺ຍຎ຺ຊນາ ອຸທາຫຸ ເອກຕ຺ຖາ ພ຺ຍຎ຺ຊນເມວ ນານໍ? ສມ຺ມຸຂາວິນໂຍຕິ ວາ ສຕິວິນໂຍຕິ ວາ – ອິເມ ຘມ຺ມາ ນານຕ຺ຖາ ເຈວ ນານາພ຺ຍຎ຺ຊນາ ຈ. ສມ຺ມຸຂາວິນໂຍຕິ ວາ ອມູຬ຺ຫວິນໂຍຕິ ວາ…ເປ… ສມ຺ມຸຂາວິນໂຍຕິ ວາ ປຏິຎ຺ຎາຕກຣຓນ຺ຕິ ວາ… ສມ຺ມຸຂາວິນໂຍຕິ ວາ ເຍຠຸຍ຺ຍສິກາຕິ ວາ… ສມ຺ມຸຂາວິນໂຍຕິ ວາ ຕສ຺ສປາປິຍສິກາຕິ ວາ… ສມ຺ມຸຂາວິນໂຍຕິ ວາ ຕິຓວຕ຺ຖາຣໂກຕິ ວາ – ອິເມ ຘມ຺ມາ ນານຕ຺ຖາ ເຈວ ນານາ ພ຺ຍຎ຺ຊນາ ຈ.

໓໕໕. [ຈູຬວ. ໒໒໔] ວິວາໂທ ວິວາທາຘິກຣຓໍ, ວິວາໂທ ໂນ ອຘິກຣຓໍ, ອຘິກຣຓໍ ໂນ ວິວາໂທ, ອຘິກຣຓຎ຺ເຈວ ວິວາໂທ ຈ? ສິຍາ ວິວາໂທ ວິວາທາຘິກຣຓໍ, ສິຍາ ວິວາໂທ ໂນ ອຘິກຣຓໍ, ສິຍາ ອຘິກຣຓໍ ໂນ ວິວາໂທ, ສິຍາ ອຘິກຣຓຎ຺ເຈວ ວິວາໂທ ຈ.

ຕຕ຺ຖ ກຕໂມ ວິວາໂທ ວິວາທາຘິກຣຓໍ? ອິຘ ຠິກ຺ຂູ ວິວທນ຺ຕິ ຘມ຺ໂມຕິ ວາ ອຘມ຺ໂມຕິ ວາ…ເປ… ທຸຏ຺ຐຸລ຺ລາ ອາປຕ຺ຕີຕິ ວາ ອທຸຏ຺ຐຸລ຺ລາ ອາປຕ຺ຕີຕິ ວາ. ຍໍ ຕຕ຺ຖ ຠຓ຺ຑນໍ, ກລໂຫ, ວິຄ຺ຄໂຫ, ວິວາໂທ, ນານາວາໂທ, ອຎ຺ຎຖາວາໂທ, ວິປຈ຺ຈຕາຍ ໂວຫາໂຣ, ເມຘກໍ – ອຍໍ ວິວາໂທ ວິວາທາຘິກຣຓໍ.

ຕຕ຺ຖ ກຕໂມ ວິວາໂທ ໂນ ອຘິກຣຓໍ? ມາຕາປິ ປຸຕ຺ເຕນ ວິວທຕິ, ປຸຕ຺ໂຕປິ ມາຕຣາ ວິວທຕິ, ປິຕາປິ ປຸຕ຺ເຕນ ວິວທຕິ, ປຸຕ຺ໂຕປິ ປິຕຣາ ວິວທຕິ, ຠາຕາປິ ຠາຕຣາ ວິວທຕິ, ຠາຕາປິ ຠຄິນິຍາ ວິວທຕິ, ຠຄິນີປິ ຠາຕຣາ ວິວທຕິ, ສຫາໂຍປິ ສຫາເຍນ ວິວທຕິ – ອຍໍ ວິວາໂທ ໂນ ອຘິກຣຓໍ.

ຕຕ຺ຖ ກຕມໍ ອຘິກຣຓໍ ໂນ ວິວາໂທ? ອນຸວາທາຘິກຣຓໍ, ອາປຕ຺ຕາຘິກຣຓໍ, ກິຈ຺ຈາຘິກຣຓໍ – ອິທໍ ອຘິກຣຓໍ ໂນ ວິວາໂທ.

ຕຕ຺ຖ ກຕມໍ ອຘິກຣຓຎ຺ເຈວ ວິວາໂທ ຈ? ວິວາທາຘິກຣຓໍ ອຘິກຣຓຎ຺ເຈວ ວິວາໂທ ຈ.

໓໕໖. [ຈູຬວ. ໒໒໔ ອາທໂຍ] ອນຸວາໂທ ອນຸວາທາຘິກຣຓໍ, ອນຸວາໂທ ໂນ ອຘິກຣຓໍ, ອຘິກຣຓໍ ໂນ ອນຸວາໂທ, ອຘິກຣຓຎ຺ເຈວ ອນຸວາໂທ ຈ? ສິຍາ ອນຸວາໂທ ອນຸວາທາຘິກຣຓໍ, ສິຍາ ອນຸວາໂທ ໂນ ອຘິກຣຓໍ, ສິຍາ ອຘິກຣຓໍ ໂນ ອນຸວາໂທ, ສິຍາ ອຘິກຣຓຎ຺ເຈວ ອນຸວາໂທ ຈ.

ຕຕ຺ຖ ກຕໂມ ອນຸວາໂທ ອນຸວາທາຘິກຣຓໍ? ອິຘ ຠິກ຺ຂູ ຠິກ຺ຂຸໍ ອນຸວທນ຺ຕິ ສີລວິປຕ຺ຕິຍາ ວາ ອາຈາຣວິປຕ຺ຕິຍາ ວາ ທິຏ຺ຐິວິປຕ຺ຕິຍາ ວາ ອາຊີວວິປຕ຺ຕິຍາ ວາ. ໂຍ ຕຕ຺ຖ ອນຸວາໂທ, ອນຸວທນາ ອນຸລ຺ລປນາ ອນຸຠຓນາ ອນຸສມ຺ປວງ຺ກຕາ ອພ຺ຠຸສ຺ສຫນຕາ ອນຸພລປ຺ປທານໍ – ອຍໍ ອນຸວາໂທ ອນຸວາທາຘິກຣຓໍ.

ຕຕ຺ຖ ກຕໂມ ອນຸວາໂທ ໂນ ອຘິກຣຓໍ? ມາຕາປິ ປຸຕ຺ຕໍ ອນຸວທຕິ, ປຸຕ຺ໂຕປິ ມາຕຣໍ ອນຸວທຕິ, ປິຕາປິ ປຸຕ຺ຕໍ ອນຸວທຕິ, ປຸຕ຺ໂຕປິ ປິຕຣໍ ອນຸວທຕິ, ຠາຕາປິ ຠາຕຣໍ ອນຸວທຕິ, ຠາຕາປິ ຠຄິນິໍ ອນຸວທຕິ, ຠຄິນີປິ ຠາຕຣໍ ອນຸວທຕິ, ສຫາໂຍປິ ສຫາຍໍ ອນຸວທຕິ – ອຍໍ ອນຸວາໂທ ໂນ ອຘິກຣຓໍ.

ຕຕ຺ຖ ກຕມໍ ອຘິກຣຓໍ ໂນ ອນຸວາໂທ? ອາປຕ຺ຕາຘິກຣຓໍ ກິຈ຺ຈາຘິກຣຓໍ ວິວາທາຘິກຣຓໍ – ອິທໍ ອຘິກຣຓໍ ໂນ ອນຸວາໂທ.

ຕຕ຺ຖ ກຕມໍ ອຘິກຣຓຎ຺ເຈວ ອນຸວາໂທ ຈ? ອນຸວາທາຘິກຣຓໍ ອຘິກຣຓຎ຺ເຈວ ອນຸວາໂທ ຈ.

໓໕໗. ອາປຕ຺ຕິ ອາປຕ຺ຕາຘິກຣຓໍ, ອາປຕ຺ຕິ ໂນ ອຘິກຣຓໍ, ອຘິກຣຓໍ ໂນ ອາປຕ຺ຕິ, ອຘິກຣຓຎ຺ເຈວ ອາປຕ຺ຕິ ຈ? ສິຍາ ອາປຕ຺ຕິ ອາປຕ຺ຕາຘິກຣຓໍ, ສິຍາ ອາປຕ຺ຕິ ໂນ ອຘິກຣຓໍ, ສິຍາ ອຘິກຣຓໍ ໂນ ອາປຕ຺ຕິ, ສິຍາ ອຘິກຣຓຎ຺ເຈວ ອາປຕ຺ຕິ ຈ.

ຕຕ຺ຖ ກຕມາ ອາປຕ຺ຕິ ອາປຕ຺ຕາຘິກຣຓໍ? ປຎ຺ຈປິ ອາປຕ຺ຕິກ຺ຂນ຺ຘາ ອາປຕ຺ຕາຘິກຣຓໍ. ສຕ຺ຕປິ ອາປຕ຺ຕິກ຺ຂນ຺ຘາ ອາປຕ຺ຕາຘິກຣຓໍ. ອຍໍ ອາປຕ຺ຕິ ອາປຕ຺ຕາຘິກຣຓໍ.

ຕຕ຺ຖ ກຕມາ ອາປຕ຺ຕິ ໂນ ອຘິກຣຓໍ? ໂສຕາປຕ຺ຕິ ສມາປຕ຺ຕິ – ອຍໍ ອາປຕ຺ຕິ ໂນ ອຘິກຣຓໍ.

ຕຕ຺ຖ ກຕມໍ ອຘິກຣຓໍ ໂນ ອາປຕ຺ຕິ? ກິຈ຺ຈາຘິກຣຓໍ ວິວາທາຘິກຣຓໍ ອນຸວາທາຘິກຣຓໍ – ອິທໍ ອຘິກຣຓໍ ໂນ ອາປຕ຺ຕິ.

ຕຕ຺ຖ ກຕມໍ ອຘິກຣຓຎ຺ເຈວ ອາປຕ຺ຕິ ຈ? ອາປຕ຺ຕາຘິກຣຓໍ ອຘິກຣຓຎ຺ເຈວ ອາປຕ຺ຕິ ຈ.

໓໕໘. [ຈູຬວ. ໒໒໓] ກິຈ຺ຈໍ ກິຈ຺ຈາຘິກຣຓໍ, ກິຈ຺ຈໍ ໂນ ອຘິກຣຓໍ, ອຘິກຣຓໍ ໂນ ກິຈ຺ຈໍ, ອຘິກຣຓຎ຺ເຈວ ກິຈ຺ຈຎ຺ຈ? ສິຍາ ກິຈ຺ຈໍ ກິຈ຺ຈາຘິກຣຓໍ, ສິຍາ ກິຈ຺ຈໍ ໂນ ອຘິກຣຓໍ, ສິຍາ ອຘິກຣຓໍ ໂນ ກິຈ຺ຈໍ, ສິຍາ ອຘິກຣຓຎ຺ເຈວ ກິຈ຺ຈຎ຺ຈ.

ຕຕ຺ຖ ກຕມໍ ກິຈ຺ຈໍ ກິຈ຺ຈາຘິກຣຓໍ? ຍາ ສງ຺ຆສ຺ສ ກິຈ຺ຈຍຕາ ກຣຓີຍຕາ ອປໂລກນກມ຺ມໍ ຎຕ຺ຕິກມ຺ມໍ ຎຕ຺ຕິທຸຕິຍກມ຺ມໍ ຎຕ຺ຕິຈຕຸຕ຺ຖກມ຺ມໍ – ອິທໍ ກິຈ຺ຈໍ ກິຈ຺ຈາຘິກຣຓໍ.

ຕຕ຺ຖ ກຕມໍ ກິຈ຺ຈໍ ໂນ ອຘິກຣຓໍ? ອາຈຣິຍກິຈ຺ຈໍ ອຸປຊ຺ຌາຍກິຈ຺ຈໍ [ອຸປຊ຺ຌາຍກິຈ຺ຈໍ ສກິຈ຺ຈໍ (ກ.)] ສມານຸປຊ຺ຌາຍກິຈ຺ຈໍ ສມານາຈຣິຍກິຈ຺ຈໍ – ອິທໍ ກິຈ຺ຈໍ ໂນ ອຘິກຣຓໍ.

ຕຕ຺ຖ ກຕມໍ ອຘິກຣຓໍ ໂນ ກິຈ຺ຈໍ? ວິວາທາຘິກຣຓໍ ອນຸວາທາຘິກຣຓໍ ອາປຕ຺ຕາຘິກຣຓໍ – ອິທໍ ອຘິກຣຓໍ ໂນ ກິຈ຺ຈໍ.

ຕຕ຺ຖ ກຕມໍ ອຘິກຣຓຎ຺ເຈວ ກິຈ຺ຈຎ຺ຈ? ກິຈ຺ຈາຘິກຣຓໍ ອຘິກຣຓຎ຺ເຈວ ກິຈ຺ຈໍ ຈາຕິ.

ອຘິກຣຓເຠໂທ ນິຏ຺ຐິໂຕ.