ຄາຖາສງ຺ຄຓິກໍ

໑. ສຕ຺ຕນຄເຣສຸ ປຎ຺ຎຕ຺ຕສິກ຺ຂາປທໍ

໓໓໕. ເອກໍສໍ ຈີວຣໍ ກຕ຺ວາ, ປຄ຺ຄຓ຺ຫິຕ຺ວານ ອຎ຺ຊລິໍ;

ອາສີສມານຣູໂປວ [ອາສິໍສມານຣູໂປວ (ສີ. ສ຺ຍາ.)], ກິສ຺ສ ຕ຺ວໍ ອິຘ ມາຄໂຕ.

ທ຺ວີສຸ ວິນເຍສຸ ເຍ ປຎ຺ຎຕ຺ຕາ;

ອຸທ຺ເທສໍ ອາຄຈ຺ຉນ຺ຕິ ອຸໂປສເຖສຸ;

ກຕິ ເຕ ສິກ຺ຂາປທາ ໂຫນ຺ຕິ;

ກຕິສຸ ນຄເຣສຸ ປຎ຺ຎຕ຺ຕາ.

ຠທ຺ທໂກ ເຕ ອຸມ຺ມງ຺ໂຄ, ໂຍນິໂສ ປຣິປຸຈ຺ຉສິ;

ຕຄ຺ຆ ເຕ ອຫມກ຺ຂິສ຺ສໍ, ຍຖາສິ ກຸສໂລ ຕຖາ.

ທ຺ວີສຸ ວິນເຍສຸ ເຍ ປຎ຺ຎຕ຺ຕາ;

ອຸທ຺ເທສໍ ອາຄຈ຺ຉນ຺ຕິ ອຸໂປສເຖສຸ;

ອຑ຺ຒຸຑ຺ຒສຕານິ ເຕ ໂຫນ຺ຕິ;

ສຕ຺ຕສຸ ນຄເຣສຸ ປຎ຺ຎຕ຺ຕາ.

ກຕເມສຸ ສຕ຺ຕສຸ ນຄເຣສຸ ປຎ຺ຎຕ຺ຕາ;

ອິງ຺ຆ ເມ ຕ຺ວໍ ພ຺ຍາກຣ ນໍ [ອິງ຺ຆ ເມ ຕໍ ພ຺ຍາກຣ (ກ.)];

ຕໍ ວຈນປຖໍ [ຕວ ວຈນປຖໍ (ສ຺ຍາ.)] ນິສາມຍິຕ຺ວາ;

ປຏິປຊ຺ເຊມ ຫິຕາຍ ໂນ ສິຍາ.

ເວສາລິຍໍ ຣາຊຄເຫ, ສາວຕ຺ຖິຍຎ຺ຈ ອາຬວິຍໍ;

ໂກສມ຺ພິຍຎ຺ຈ ສກ຺ເກສຸ, ຠຄ຺ເຄສຸ ເຈວ ປຎ຺ຎຕ຺ຕາ.

ກຕິ ເວສາລິຍໍ ປຎ຺ຎຕ຺ຕາ, ກຕິ ຣາຊຄເຫ ກຕາ;

ສາວຕ຺ຖິຍໍ ກຕິ ໂຫນ຺ຕິ, ກຕິ ອາຬວິຍໍ ກຕາ.

ກຕິ ໂກສມ຺ພິຍໍ ປຎ຺ຎຕ຺ຕາ, ກຕິ ສກ຺ເກສຸ ວຸຈ຺ຈນ຺ຕິ;

ກຕິ ຠຄ຺ເຄສຸ ປຎ຺ຎຕ຺ຕາ, ຕໍ ເມ ອກ຺ຂາຫິ ປຸຈ຺ຉິໂຕ.

ທສ ເວສາລິຍໍ ປຎ຺ຎຕ຺ຕາ, ເອກວີສ ຣາຊຄເຫ ກຕາ;

ຉອູນ ຕີຓິສຕານິ, ສພ຺ເພ ສາວຕ຺ຖິຍໍ ກຕາ.

ຉ ອາຬວິຍໍ ປຎ຺ຎຕ຺ຕາ, ອຏ຺ຐ ໂກສມ຺ພິຍໍ ກຕາ;

ອຏ຺ຐ ສກ຺ເກສຸ ວຸຈ຺ຈນ຺ຕິ, ຕໂຍ ຠຄ຺ເຄສຸ ປຎ຺ຎຕ຺ຕາ.

ເຍ ເວສາລິຍໍ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ [ຍຖາກຖໍ (ສີ. ສ຺ຍາ. ເອວມຸປຣິປິ)];

ເມຖຸນວິຄ຺ຄຫຸຕ຺ຕຣິ, ອຕິເຣກຎ຺ຈ ກາຬກໍ.

ຠູຕໍ ປຣມ຺ປຣຠຕ຺ຕໍ, ທນ຺ຕໂປເນນ [ທນ຺ຕໂປເຓນ (ກ.)] ອເຈລໂກ;

ຠິກ຺ຂຸນີສຸ ຈ ອກ຺ໂກໂສ, ທເສເຕ ເວສາລິຍໍ ກຕາ.

ເຍ ຣາຊຄເຫ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ອທິນ຺ນາທານໍ ຣາຊຄເຫ, ທ຺ເວ ອນຸທ຺ຘໍສນາ ທ຺ເວປິ ຈ ເຠທາ.

ອນ຺ຕຣວາສກໍ ຣູປິຍໍ ສຸຕ຺ຕໍ, ອຸຊ຺ຌາປເນນ ຈ ປາຈິຕປິຓ຺ຑໍ;

ຄຓໂຠຊນໍ ວິກາເລ ຈ, ຈາຣິຕ຺ຕໍ ນຫານໍ ອູນວີສຕິ.

ຈີວຣໍ ທຕ຺ວາ ໂວສາສນ຺ຕິ, ເອເຕ ຣາຊຄເຫ ກຕາ;

ຄິຣຄ຺ຄຈຣິຍາ ຕຕ຺ເຖວ, ຉນ຺ທທາເນນ ເອກວີສຕິ.

ເຍ ສາວຕ຺ຖິຍໍ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ປາຣາຊິການິ ຈຕ຺ຕາຣິ, ສງ຺ຆາທິເສສາ ຠວນ຺ຕິ ໂສຬສ.

ອນິຍຕາ ຈ ທ຺ເວ ໂຫນ຺ຕິ, ນິສ຺ສຄ຺ຄິຍາ ຈຕຸວີສຕິ;

ຉປຎ຺ຎາສສຕຎ຺ເຈວ, ຂຸທ຺ທການິ ປວຸຈ຺ຈນ຺ຕິ.

ທສເຍວ ຈ ຄາຣຍ຺ຫາ, ທ຺ເວສຕ຺ຕຕິ ຈ ເສຂິຍາ;

ຉອູນ ຕີຓິສຕານິ, ສພ຺ເພ ສາວຕ຺ຖິຍໍ ກຕາ.

ເຍ ອາຬວິຍໍ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ກຸຏິໂກສິຍເສຍ຺ຍາ ຈ, ຂຓເນ ຄຈ຺ຉ ເທວເຕ;

ສປ຺ປາຓກຎ຺ຈ ສິຎ຺ຈນ຺ຕິ, ຉ ເອເຕ ອາຬວິຍໍ ກຕາ.

ເຍ ໂກສມ຺ພິຍໍ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ມຫາວິຫາໂຣ ໂທວຈສ຺ສໍ, ອຎ຺ຎໍ ທ຺ວາຣໍ ສຸຣາຍ ຈ;

ອນາທຣິຍໍ ສຫຘມ຺ໂມ, ປໂຍປາເນນ ອຏ຺ຐມໍ.

ເຍ ສກ຺ເກສຸ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ເອຬກໂລມານິ ປຕ຺ໂຕ ຈ, ໂອວາໂທ ເຈວ ເຠສຊ຺ຊໍ.

ສູຈິ ອາຣຎ຺ຎິໂກ ເຈວ, ອຏ຺ເຐເຕ [ຉ ເອເຕ (ສພ຺ພຕ຺ຖ)] ກາປິລວຕ຺ຖເວ;

ອຸທກສຸທ຺ຘິຍາ ໂອວາໂທ, ຠິກ຺ຂຸນີສຸ ປວຸຈ຺ຈນ຺ຕິ.

ເຍ ຠຄ຺ເຄສຸ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ສມາທຫິຕ຺ວາ ວິສິພ຺ເພນ຺ຕິ, ສາມິເສນ ສສິຕ຺ຖກໍ.

ປາຣາຊິການິ ຈຕ຺ຕາຣິ, ສງ຺ຆາທິເສສານິ ຠວນ຺ຕິ;

ສຕ຺ຕ ຈ ນິສ຺ສຄ຺ຄິຍານິ, ອຏ຺ຐ ທ຺ວຕ຺ຕິໍສ ຂຸທ຺ທກາ.

ທ຺ເວ ຄາຣຍ຺ຫາ ຕໂຍ ເສກ຺ຂາ, ຉປ຺ປຎ຺ຎາສ ສິກ຺ຂາປທາ;

ຉສຸ ນຄເຣສຸ ປຎ຺ຎຕ຺ຕາ, ພຸທ຺ເຘນາທິຈ຺ຈພນ຺ຘຸນາ.

ຉອູນ ຕີຓິສຕານິ, ສພ຺ເພ ສາວຕ຺ຖິຍໍ ກຕາ;

ກາຣຸຓິເກນ ພຸທ຺ເຘນ, ໂຄຕເມນ ຍສສ຺ສິນາ.

໒. ຈຕຸວິປຕ຺ຕິໍ

໓໓໖. ຍໍ ຕໍ [ຍໍ ຍໍ (ກ.)] ປຸຈ຺ຉິມ຺ຫ ອກິຕ຺ຕຍິ ໂນ;

ຕໍ ຕໍ ພ຺ຍາກຕໍ ອນຎ຺ຎຖາ;

ອຎ຺ຎໍ ຕໍ ປຸຈ຺ຉາມິ ຕທິງ຺ຆ ພ຺ຣູຫິ;

ຄຣຸກ ລຫຸກຎ຺ຈາປິ ສາວເສສໍ;

ອນວເສສໍ ທຸຏ຺ຐຸລ຺ລຎ຺ຈ ອທຸຏ຺ຐຸລ຺ລໍ;

ເຍ ຈ ຍາວຕຕິຍກາ.

ສາຘາຣຓໍ ອສາຘາຣຓໍ;

ວິຠຕ຺ຕິໂຍ ຈ [ວິປຕ຺ຕິໂຍ ຈ (ສີ. ສ຺ຍາ.)] ເຍຫິ ສມເຖຫິ ສມ຺ມນ຺ຕິ;

ສພ຺ພານິເປຕານິ ວິຍາກໂຣຫິ;

ຫນ຺ທ ວາກ຺ຍໍ ສຸໂຓມ ເຕ.

ເອກຕິໍສາ ເຍ ຄຣຸກາ, ອຏ຺ເຐຕ຺ຖ ອນວເສສາ;

ເຍ ຄຣຸກາ ເຕ ທຸຏ຺ຐຸລ຺ລາ, ເຍ ທຸຏ຺ຐຸລ຺ລາ ສາ ສີລວິປຕ຺ຕິ;

ປາຣາຊິກໍ ສງ຺ຆາທິເສໂສ, ‘‘ສີລວິປຕ຺ຕີ’’ຕິ ວຸຈ຺ຈຕິ.

ຖຸລ຺ລຈ຺ຈຍໍ ປາຈິຕ຺ຕິຍາ, ປາຏິເທສນີຍໍ ທຸກ຺ກຏໍ;

ທຸພ຺ຠາສິຕໍ ໂຍ ຈາຍໍ, ອກ຺ໂກສຕິ ຫສາຘິປ຺ປາໂຍ;

ອຍໍ ສາ ອາຈາຣວິປຕ຺ຕິສມ຺ມຕາ.

ວິປຣີຕທິຏ຺ຐິໍ ຄຓ຺ຫນ຺ຕິ, ອສທ຺ຘມ຺ເມຫິ ປຸຣກ຺ຂຕາ;

ອພ຺ຠາຈິກ຺ຂນ຺ຕິ ສມ຺ພຸທ຺ຘໍ, ທຸປ຺ປຎ຺ຎາ ໂມຫປາຣຸຕາ;

ອຍໍ ສາ ທິຏ຺ຐິວິປຕ຺ຕິສມ຺ມຕາ.

ອາຊີວເຫຕຸ ອາຊີວກາຣຓາ ປາປິຈ຺ໂຉ ອິຈ຺ຉາປກໂຕ ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປຕິ, ອາຊີວເຫຕຸ ອາຊີວກາຣຓາ ສຎ຺ຈຣິຕ຺ຕໍ ສມາປຊ຺ຊຕິ, ອາຊີວເຫຕຸ ອາຊີວກາຣຓາ – ‘‘ໂຍ ເຕ ວິຫາເຣ ວສຕິ, ໂສ ຠິກ຺ຂຸ ອຣຫາ’’ຕິ ຠຓຕິ, ອາຊີວເຫຕຸ ອາຊີວກາຣຓາ ຠິກ຺ຂຸ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ, ອາຊີວເຫຕຸ ອາຊີວກາຣຓາ ຠິກ຺ຂຸນີ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ, ອາຊີວເຫຕຸ ອາຊີວກາຣຓາ ສູປໍ ວາ ໂອທນໍ ວາ ອຄິລາໂນ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ. ອຍໍ ສາ ອາຊີວວິປຕ຺ຕິ ສມ຺ມຕາ.

ເອກາທສ ຍາວຕຕິຍກາ, ເຕ ສຸໂຓຫິ ຍຖາຕຖໍ;

ອຸກ຺ຂິຕ຺ຕານຸວຕ຺ຕິກາ, ອຏ຺ຐ ຍາວຕຕິຍກາ;

ອຣິຏ຺ໂຐ ຈຓ຺ຑກາຬີ ຈ, ອິເມ ເຕ ຍາວຕຕິຍກາ.

໓. ເຉທນກາທິ

໓໓໗. ກຕິ ເຉທນການິ? ກຕິ ເຠທນການິ? ກຕິ ອຸທ຺ທາລນການິ? ກຕິ ອນຎ຺ຎປາຈິຕ຺ຕິຍານິ? ກຕິ ຠິກ຺ຂຸສມ຺ມຸຕິໂຍ? ກຕິ ສາມີຈິໂຍ? ກຕິ ປຣມານິ?

ກຕິ ຊານນ຺ຕິ ປຎ຺ຎຕ຺ຕາ, ພຸທ຺ເຘນາທິຈ຺ຈພນ຺ຘຸນາ.

ຉ ເຉທນການິ. ເອກໍ ເຠທນກໍ. ເອກໍ ອຸທ຺ທາລນກໍ. ຈຕ຺ຕາຣິ ອນຎ຺ຎປາຈິຕ຺ຕິຍານິ. ຈຕສ຺ໂສ ຠິກ຺ຂຸສມ຺ມຸຕິໂຍ. ສຕ຺ຕ ສາມີຈິໂຍ. ຈຸທ຺ທສ ປຣມານິ.

ໂສທສ [ໂສຬສ (ສີ. ສ຺ຍາ.) ອຏ຺ຐກຖາ ໂອໂລເກຕພ຺ພາ] ຊານນ຺ຕິ ປຎ຺ຎຕ຺ຕາ, ພຸທ຺ເຘນາທິຈ຺ຈພນ຺ຘຸນາ.

໔. ອສາຘາຣຓາທິ

໓໓໘. ວີສໍ ທ຺ເວ ສຕານິ ຠິກ຺ຂູນໍ ສິກ຺ຂາປທານິ;

ອຸທ຺ເທສໍ ອາຄຈ຺ຉນ຺ຕິ ອຸໂປສເຖສຸ;

ຕີຓິ ສຕານິ ຈຕ຺ຕາຣິ ຠິກ຺ຂຸນີນໍ ສິກ຺ຂາປທານິ;

ອຸທ຺ເທສໍ ອາຄຈ຺ຉນ຺ຕິ ອຸໂປສເຖສຸ.

ຉຈຕ຺ຕາຣີສາ ຠິກ຺ຂູນໍ, ຠິກ຺ຂຸນີຫິ ອສາຘາຣຓາ;

ສຕໍ ຕິໍສາ ຈ ຠິກ຺ຂຸນີນໍ, ຠິກ຺ຂູຫິ ອສາຘາຣຓາ.

ສຕໍ ສຕ຺ຕຕິ ຉຈ຺ເຈວ, ອຸຠິນ຺ນໍ ອສາຘາຣຓາ;

ສຕໍ ສຕ຺ຕຕິ ຈຕ຺ຕາຣິ, ອຸຠິນ຺ນໍ ສມສິກ຺ຂຕາ.

ວີສໍ ທ຺ເວ ສຕານິ ຠິກ຺ຂູນໍ ສິກ຺ຂາປທານິ;

ອຸທ຺ເທສໍ ອາຄຈ຺ຉນ຺ຕິ ອຸໂປສເຖສຸ;

ເຕ ສຸໂຓຫິ ຍຖາຕຖໍ.

ປາຣາຊິການິ ຈຕ຺ຕາຣິ, ສງ຺ຆາທິເສສານິ ຠວນ຺ຕິ ເຕຣສ;

ອນິຍຕາ ທ຺ເວ ໂຫນ຺ຕິ.

ນິສ຺ສຄ຺ຄິຍານິ ຕິໍເສວ, ທ຺ເວນວຸຕິ ຈ ຂຸທ຺ທກາ;

ຈຕ຺ຕາໂຣ ປາຏິເທສນີຍາ, ປຎ຺ຈສຕ຺ຕຕິ ເສຂິຍາ.

ວີສໍ ທ຺ເວ ສຕານິ ຈິເມ ໂຫນ຺ຕິ ຠິກ຺ຂູນໍ ສິກ຺ຂາປທານິ;

ອຸທ຺ເທສໍ ອາຄຈ຺ຉນ຺ຕິ ອຸໂປສເຖສຸ.

ຕີຓິ ສຕານິ ຈຕ຺ຕາຣິ, ຠິກ຺ຂຸນີນໍ ສິກ຺ຂາປທານິ;

ອຸທ຺ເທສໍ ອາຄຈ຺ຉນ຺ຕິ ອຸໂປສເຖສຸ, ເຕ ສຸໂຓຫິ ຍຖາຕຖໍ.

ປາຣາຊິການິ ອຏ຺ຐ, ສງ຺ຆາທິເສສານິ ຠວນ຺ຕິ ສຕ຺ຕຣສ;

ນິສ຺ສຄ຺ຄິຍານິ ຕິໍເສວ, ສຕໍ ສຏ຺ຐິ ຉ ເຈວ ຂຸທ຺ທການິ ປວຸຈ຺ຈນ຺ຕິ.

ອຏ຺ຐ ປາຏິເທສນີຍາ, ປຎ຺ຈສຕ຺ຕຕິ ເສຂິຍາ;

ຕີຓິ ສຕານິ ຈຕ຺ຕາຣິ ຈິເມ ໂຫນ຺ຕິ ຠິກ຺ຂຸນີນໍ ສິກ຺ຂາປທານິ;

ອຸທ຺ເທສໍ ອາຄຈ຺ຉນ຺ຕິ ອຸໂປສເຖສຸ.

ຉຈຕ຺ຕາຣີສາ ຠິກ຺ຂູນໍ, ຠິກ຺ຂຸນີຫິ ອສາຘາຣຓາ;

ເຕ ສຸໂຓຫິ ຍຖາຕຖໍ.

ສງ຺ຆາທິເສສາ, ທ຺ເວ ອນິຍເຕຫິ ອຏ຺ຐ;

ນິສ຺ສຄ຺ຄິຍານິ ທ຺ວາທສ, ເຕຫິ ເຕ ໂຫນ຺ຕິ ວີສຕິ.

ທ຺ເວວີສຕິ ຂຸທ຺ທກາ, ຈຕຸໂຣ ປາຏິເທສນີຍາ;

ຉຈຕ຺ຕາຣີສາ ຈິເມ ໂຫນ຺ຕິ, ຠິກ຺ຂູນໍ ຠິກ຺ຂຸນີຫິ ອສາຘາຣຓາ.

ສຕໍ ຕິໍສາ ຈ ຠິກ຺ຂຸນີນໍ, ຠິກ຺ຂູຫິ ອສາຘາຣຓາ;

ເຕ ສຸໂຓຫິ ຍຖາຕຖໍ.

ປາຣາຊິການິ ຈຕ຺ຕາຣິ, ສງ຺ຆມ຺ຫາ ທສ ນິສ຺ສເຣ;

ນິສ຺ສຄ຺ຄິຍານິ ທ຺ວາທສ, ຉນ຺ນວຸຕິ ຈ ຂຸທ຺ທກາ;

ອຏ຺ຐ ປາຏິເທສນີຍາ.

ສຕໍ ຕິໍສາ ຈິເມ ໂຫນ຺ຕິ ຠິກ຺ຂຸນີນໍ, ຠິກ຺ຂູຫິ ອສາຘາຣຓາ;

ສຕໍ ສຕ຺ຕຕິ ຉຈ຺ເຈວ, ອຸຠິນ຺ນໍ ອສາຘາຣຓາ;

ເຕ ສຸໂຓຫິ ຍຖາຕຖໍ.

ປາຣາຊິການິ ຈຕ຺ຕາຣິ, ສງ຺ຆາທິເສສານິ ຠວນ຺ຕິ ໂສຬສ;

ອນິຍຕາ ທ຺ເວ ໂຫນ຺ຕິ, ນິສ຺ສຄ຺ຄິຍານິ ຈຕຸວີສຕິ;

ສຕໍ ອຏ຺ຐາຣສາ ເຈວ, ຂຸທ຺ທການິ ປວຸຈ຺ຈນ຺ຕິ;

ທ຺ວາທສ ປາຏິເທສນີຍາ.

ສຕໍ ສຕ຺ຕຕິ ຉຈ຺ເຈວິເມ ໂຫນ຺ຕິ, ອຸຠິນ຺ນໍ ອສາຘາຣຓາ;

ສຕໍ ສຕ຺ຕຕິ ຈຕ຺ຕາຣິ, ອຸຠິນ຺ນໍ ສມສິກ຺ຂຕາ;

ເຕ ສຸໂຓຫິ ຍຖາຕຖໍ.

ປາຣາຊິການິ ຈຕ຺ຕາຣິ, ສງ຺ຆາທິເສສານິ ຠວນ຺ຕິ ສຕ຺ຕ;

ນິສ຺ສຄ຺ຄິຍານິ ອຏ຺ຐາຣສ, ສມສຕ຺ຕຕິ ຂຸທ຺ທກາ;

ປຎ຺ຈສຕ຺ຕຕິ ເສຂິຍານິ.

ສຕໍ ສຕ຺ຕຕິ ຈຕ຺ຕາຣິ ຈິເມ ໂຫນ຺ຕິ, ອຸຠິນ຺ນໍ ສມສິກ຺ຂຕາ;

ອຏ຺ເຐ ປາຣາຊິກາ ເຍ ທຸຣາສທາ, ຕາລວຕ຺ຖຸສມູປມາ.

ປຓ຺ຑຸປລາໂສ ປຸຖຸສິລາ, ສີສຈ຺ຉິນ຺ໂນວ ໂສ ນໂຣ;

ຕາໂລວ ມຕ຺ຖກຈ຺ຉິນ຺ໂນ, ອວິຣຸຬ຺ຫີ ຠວນ຺ຕິ ເຕ.

ເຕວີສຕິ ສງ຺ຆາທິເສສາ, ທ຺ເວ ອນິຍຕາ;

ທ຺ເວ ຈຕ຺ຕາຣີສ ນິສ຺ສຄ຺ຄິຍາ;

ອຏ຺ຐາສີຕິສຕໍ ປາຈິຕ຺ຕິຍາ, ທ຺ວາທສ ປາຏິເທສນີຍາ.

ປຎ຺ຈສຕ຺ຕຕິ ເສຂິຍາ, ຕີຫິ ສມເຖຫິ ສມ຺ມນ຺ຕິ;

ສມ຺ມຸຂາ ຈ ປຏິຎ຺ຎາຍ, ຕິຓວຕ຺ຖາຣເກນ ຈ.

ທ຺ເວ ອຸໂປສຖາ ທ຺ເວ ປວາຣຓາ;