໑໐. ປຣິຓຕສິກ຺ຂາປທໍ

໖໕໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສາວຕ຺ຖິຍໍ ອຎ຺ຎຕຣສ຺ສ ປູຄສ຺ສ ສງ຺ຆສ຺ສ ສຈີວຣຠຕ຺ຕໍ ປຏິຍຕ຺ຕໍ ໂຫຕິ – ‘‘ໂຠເຊຕ຺ວາ ຈີວເຣນ ອຈ຺ຉາເທສ຺ສາມາ’’ຕິ. ອຖ ໂຂ ຉພ຺ພຄ຺ຄິຍາ ຠິກ຺ຂູ ເຍນ ໂສ ປູໂຄ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຕໍ ປູຄໍ ເອຕທໂວຈຸໍ – ‘‘ເທຖາວຸໂສ, ອມ຺ຫາກໍ ອິມານິ ຈີວຣານີ’’ຕິ. ‘‘ນ ມຍໍ, ຠນ຺ເຕ, ທສ຺ສາມ. ອມ຺ຫາກໍ ສງ຺ຆສ຺ສ ອນຸວສ຺ສໍ ສຈີວຣຠິກ຺ຂາ ປຎ຺ຎຕ຺ຕາ’’ຕິ. ‘‘ພຫູ, ອາວຸໂສ, ສງ຺ຆສ຺ສ ທາຍກາ, ພຫູ ສງ຺ຆສ຺ສ ຠຕ຺ຕາ [ຠທ຺ທາ (ກ.)]. ມຍໍ ຕຸມ຺ເຫ ນິສ຺ສາຍ ຕຸມ຺ເຫ ສມ຺ປສ຺ສນ຺ຕາ ອິຘ ວິຫຣາມ. ຕຸມ຺ເຫ ເຈ ອມ຺ຫາກໍ ນ ທສ຺ສຖ, ອຖ ໂກ ຈຣຫິ ອມ຺ຫາກໍ ທສ຺ສຕິ? ເທຖາວຸໂສ, ອມ຺ຫາກໍ ອິມານິ ຈີວຣານີ’’ຕິ. ອຖ ໂຂ ໂສ ປູໂຄ ຉພ຺ພຄ຺ຄິເຍຫິ ຠິກ຺ຂູຫິ ນິປ຺ປີຬິຍມາໂນ ຍຖາປຏິຍຕ຺ຕໍ ຈີວຣໍ ຉພ຺ພຄ຺ຄິຍານໍ ຠິກ຺ຂູນໍ ທຕ຺ວາ ສງ຺ຆໍ ຠຕ຺ເຕນ ປຣິວິສິ. ເຍ ເຕ ຠິກ຺ຂູ ຊານນ຺ຕິ ສງ຺ຆສ຺ສ ສຈີວຣຠຕ຺ຕໍ ປຏິຍຕ຺ຕໍ, ນ ຈ ຊານນ຺ຕິ ຉພ຺ພຄ຺ຄິຍານໍ ຠິກ຺ຂູນໍ ທິນ຺ນນ຺ຕິ, ເຕ ເອວມາຫໍສຸ – ‘‘ໂອໂຓເຊຖາວຸໂສ, ສງ຺ຆສ຺ສ ຈີວຣ’’ນ຺ຕິ. ‘‘ນຕ຺ຖິ, ຠນ຺ເຕ. ຍຖາປຏິຍຕ຺ຕໍ ຈີວຣໍ ອຍ຺ຍາ ຉພ຺ພຄ຺ຄິຍາ ອຕ຺ຕໂນ ປຣິຓາເມສຸ’’ນ຺ຕິ. ເຍ ເຕ ຠິກ຺ຂູ ອປ຺ປິຈ຺ຉາ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ຊານໍ ສງ຺ຆິກໍ ລາຠໍ ປຣິຓຕໍ ອຕ຺ຕໂນ ປຣິຓາເມສ຺ສນ຺ຕີ’’ຕິ! ອຖ ໂຂ ເຕ ຠິກ຺ຂູ ຉພ຺ພຄ຺ຄິເຍ ຠິກ຺ຂູ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ‘‘ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ຊານໍ ສງ຺ຆິກໍ ລາຠໍ ປຣິຓຕໍ ອຕ຺ຕໂນ ປຣິຓາເມຖາ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ຊານໍ ສງ຺ຆິກໍ ລາຠໍ ປຣິຓຕໍ ອຕ຺ຕໂນ ປຣິຓາເມສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໖໕໘. ‘‘ໂຍ ປນ ຠິກ຺ຂຸ ຊານໍ ສງ຺ຆິກໍ ລາຠໍ ປຣິຓຕໍ ອຕ຺ຕໂນ ປຣິຓາເມຍ຺ຍ, ນິສ຺ສຄ຺ຄິຍໍ ປາຈິຕ຺ຕິຍ’’ນ຺ຕິ.

໖໕໙. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

[ປາຈິ. ໔໙໑] ຊານາຕິ ນາມ ສາມໍ ວາ ຊານາຕິ ອຎ຺ເຎ ວາ ຕສ຺ສ ອາໂຣເຈນ຺ຕິ ໂສ ວາ ອາໂຣເຈຕິ.

[ປາຈິ. ໔໙໑] ສງ຺ຆິກໍ ນາມ ສງ຺ຆສ຺ສ ທິນ຺ນໍ ໂຫຕິ ປຣິຈ຺ຈຕ຺ຕໍ.

[ປາຈິ. ໔໙໑] ລາໂຠ ນາມ ຈີວຣປິຓ຺ຑປາຕເສນາສນຄິລານປ຺ປຈ຺ຈຍເຠສຊ຺ຊປຣິກ຺ຂາຣາ. ອນ຺ຕມໂສ ຈຸຓ຺ຓປິຓ຺ໂຑປິ, ທນ຺ຕກຏ຺ຐມ຺ປິ, ທສິກສຸຕ຺ຕມ຺ປິ.

[ປາຈິ. ໔໙໑] ປຣິຓຕໍ ນາມ ທສ຺ສາມ ກຣິສ຺ສາມາຕິ ວາຈາ ຠິນ຺ນາ ໂຫຕິ.

ອຕ຺ຕໂນ ປຣິຓາເມຕິ, ປໂຍເຄ ທຸກ຺ກຏໍ. ປຏິລາເຠນ ນິສ຺ສຄ຺ຄິຍໍ ໂຫຕິ. ນິສ຺ສຊ຺ຊິຕພ຺ພໍ ສງ຺ຆສ຺ສ ວາ ຄຓສ຺ສ ວາ ປຸຄ຺ຄລສ຺ສ ວາ. ເອວຎ຺ຈ ປນ, ຠິກ຺ຂເວ, ນິສ຺ສຊ຺ຊິຕພ຺ພໍ…ເປ… ອິທໍ ເມ, ຠນ຺ເຕ, ຊານໍ ສງ຺ຆິກໍ ລາຠໍ ປຣິຓຕໍ ອຕ຺ຕໂນ ປຣິຓາມິຕໍ ນິສ຺ສຄ຺ຄິຍໍ. ອິມາຫໍ ສງ຺ຆສ຺ສ ນິສ຺ສຊ຺ຊາມີຕິ…ເປ… ທເທຍ຺ຍາຕິ…ເປ… ທເທຍ຺ຍຸນ຺ຕິ…ເປ… ອາຍສ຺ມໂຕ ທມ຺ມີຕິ.

໖໖໐. ປຣິຓເຕ ປຣິຓຕສຎ຺ຎີ ອຕ຺ຕໂນ ປຣິຓາເມຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ປຣິຓເຕ ເວມຕິໂກ ອຕ຺ຕໂນ ປຣິຓາເມຕິ, ອາປຕ຺ຕິ ທຸກ຺ກຏສ຺ສ. ປຣິຓເຕ ອປຣິຓຕສຎ຺ຎີ ອຕ຺ຕໂນ ປຣິຓາເມຕິ, ອນາປຕ຺ຕິ. ສງ຺ຆສ຺ສ ປຣິຓຕໍ ອຎ຺ຎສງ຺ຆສ຺ສ ວາ ເຈຕິຍສ຺ສ ວາ ປຣິຓາເມຕິ, ອາປຕ຺ຕິ ທຸກ຺ກຏສ຺ສ. ເຈຕິຍສ຺ສ ປຣິຓຕໍ ອຎ຺ຎເຈຕິຍສ຺ສ ວາ ສງ຺ຆສ຺ສ ວາ ປຸຄ຺ຄລສ຺ສ ວາ ປຣິຓາເມຕິ, ອາປຕ຺ຕິ ທຸກ຺ກຏສ຺ສ. ປຸຄ຺ຄລສ຺ສ ປຣິຓຕໍ ອຎ຺ຎປຸຄ຺ຄລສ຺ສ ວາ ສງ຺ຆສ຺ສ ວາ ເຈຕິຍສ຺ສ ວາ ປຣິຓາເມຕິ, ອາປຕ຺ຕິ ທຸກ຺ກຏສ຺ສ. ອປຣິຓເຕ ປຣິຓຕສຎ຺ຎີ, ອາປຕ຺ຕິ ທຸກ຺ກຏສ຺ສ. ອປຣິຓເຕ ເວມຕິໂກ, ອາປຕ຺ຕິ ທຸກ຺ກຏສ຺ສ. ອປຣິຓເຕ ອປຣິຓຕສຎ຺ຎີ, ອນາປຕ຺ຕິ.

໖໖໑. ອນາປຕ຺ຕິ ກຕ຺ຖ ເທມາຕິ ປຸຈ຺ຉິຍມາໂນ ຍຕ຺ຖ ຕຸມ຺ຫາກໍ ເທຍ຺ຍຘມ຺ໂມ ປຣິໂຠຄໍ ວາ ລເຠຍ຺ຍ ປຏິສງ຺ຂາຣໍ ວາ ລເຠຍ຺ຍ ຈິຣຏ຺ຐິຕິໂກ ວາ ອສ຺ສ ຍຕ຺ຖ ວາ ປນ ຕຸມ຺ຫາກໍ ຈິຕ຺ຕໍ ປສີທຕິ ຕຕ຺ຖ ເທຖາຕິ ຠຓຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ປຣິຓຕສິກ຺ຂາປທໍ ນິຏ຺ຐິຕໍ ທສມໍ.

ປຕ຺ຕວຄ຺ໂຄ ຕຕິໂຍ.

ຕສ຺ສຸທ຺ທານໍ –

ທ຺ເວ ຈ ປຕ຺ຕານິ ເຠສຊ຺ຊໍ, ວສ຺ສິກາ ທານປຎ຺ຈມໍ;

ສາມໍ ວາຍາປນຈ຺ເຈໂກ, ສາສງ຺ກໍ ສງ຺ຆິເກນ ຈາຕິ.

໖໖໒. ອຸທ຺ທິຏ຺ຐາ ໂຂ, ອາຍສ຺ມນ຺ໂຕ, ຕິໍສ ນິສ຺ສຄ຺ຄິຍາ ປາຈິຕ຺ຕິຍາ ຘມ຺ມາ. ຕຕ຺ຖາຍສ຺ມນ຺ເຕ ປຸຈ຺ຉາມິ – ‘ກຈ຺ຈິຕ຺ຖ ປຣິສຸທ຺ຘາ’? ທຸຕິຍມ຺ປິ ປຸຈ຺ຉາມິ – ‘ກຈ຺ຈິຕ຺ຖ ປຣິສຸທ຺ຘາ’? ຕຕິຍມ຺ປິ ປຸຈ຺ຉາມິ – ‘ກຈ຺ຈິຕ຺ຖ ປຣິສຸທ຺ຘາ’? ປຣິສຸທ຺ເຘຕ຺ຖາຍສ຺ມນ຺ໂຕ, ຕສ຺ມາ ຕຸຓ຺ຫີ, ເອວເມຕໍ ຘາຣຍາມີຕິ.

ນິສ຺ສຄ຺ຄິຍກຓ຺ຑໍ ນິຏ຺ຐິຕໍ.