໗. ມຫາເປສກາຣສິກ຺ຂາປທໍ

໖໔໑. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕໂຣ ປຸຣິໂສ ປວາສໍ ຄຈ຺ຉນ຺ໂຕ ປຊາປຕິໍ ເອຕທໂວຈ – ‘‘ສຸຕ຺ຕໍ ຘາຣຍິຕ຺ວາ ອມຸກສ຺ສ ຕນ຺ຕວາຍສ຺ສ ເທຫິ, ຈີວຣໍ ວາຍາເປຕ຺ວາ ນິກ຺ຂິປ, ອາຄໂຕ ອຍ຺ຍໍ ອຸປນນ຺ທໍ ຈີວເຣນ ອຈ຺ຉາເທສ຺ສາມີ’’ຕິ. ອສ຺ໂສສິ ໂຂ ອຎ຺ຎຕໂຣ ປິຓ຺ຑຈາຣິໂກ ຠິກ຺ຂຸ ຕສ຺ສ ປຸຣິສສ຺ສ ອິມໍ ວາຈໍ ຠາສມານສ຺ສ. ອຖ ໂຂ ໂສ ຠິກ຺ຂຸ ເຍນາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ເອຕທໂວຈ – ‘‘ມຫາປຸຎ຺ໂຎສິ ຕ຺ວໍ, ອາວຸໂສ ອຸປນນ຺ທ, ອມຸກສ຺ມິໍ ໂອກາເສ ອຎ຺ຎຕໂຣ ປຸຣິໂສ ປວາສໍ ຄຈ຺ຉນ຺ໂຕ ປຊາປຕິໍ ເອຕທໂວຈ – ‘‘ສຸຕ຺ຕໍ ຘາຣຍິຕ຺ວາ ອມຸກສ຺ສ ຕນ຺ຕວາຍສ຺ສ ເທຫິ, ຈີວຣໍ ວາຍາເປຕ຺ວາ ນິກ຺ຂິປ, ອາຄໂຕ ອຍ຺ຍໍ ອຸປນນ຺ທໍ ຈີວເຣນ ອຈ຺ຉາເທສ຺ສາມີ’’ຕິ. ‘‘ອຕ຺ຖາວຸໂສ, ມໍ ໂສ ອຸປຏ຺ຐາໂກ’’ຕິ. ໂສປິ ໂຂ ຕນ຺ຕວາໂຍ ອາຍສ຺ມໂຕ ອຸປນນ຺ທສ຺ສ ສກ຺ຍປຸຕ຺ຕສ຺ສ ອຸປຏ຺ຐາໂກ ໂຫຕິ. ອຖ ໂຂ ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ເຍນ ໂສ ຕນ຺ຕວາໂຍ ເຕນຸປສງ຺ກມິ; ອຸປສງ຺ກມິຕ຺ວາ ຕໍ ຕນ຺ຕວາຍໍ ເອຕທໂວຈ – ‘‘ອິທໍ ໂຂ, ອາວຸໂສ, ຈີວຣໍ ມໍ ອຸທ຺ທິສ຺ສ ວິຍ຺ຍຕິ; ອາຍຕຎ຺ຈ ກໂຣຫິ ວິຕ຺ຖຕຎ຺ຈ. ອປ຺ປິຕຎ຺ຈ ສຸວີຕຎ຺ຈ ສຸປ຺ປວາຍິຕຎ຺ຈ ສຸວິເລຂິຕຎ຺ຈ ສຸວິຕຈ຺ຉິຕຎ຺ຈ ກໂຣຫີ’’ຕິ. ‘‘ເອເຕ ໂຂ ເມ, ຠນ຺ເຕ, ສຸຕ຺ຕໍ ຘາຣຍິຕ຺ວາ ອທໍສຸ; ອິມິນາ ສຸຕ຺ເຕນ ຈີວຣໍ ວິນາຫີ’’ຕິ. ‘‘ນ, ຠນ຺ເຕ, ສກ຺ກາ ອາຍຕໍ ວາ ວິຕ຺ຖຕໍ ວາ ອປ຺ປິຕໍ ວາ ກາຕຸໍ. ສກ຺ກາ ຈ ໂຂ, ຠນ຺ເຕ, ສຸວີຕຎ຺ຈ ສຸປ຺ປວາຍິຕຎ຺ຈ ສຸວິເລຂິຕຎ຺ຈ ສຸວິຕຈ຺ຉິຕຎ຺ຈ ກາຕຸ’’ນ຺ຕິ. ‘‘ອິງ຺ຆ ຕ຺ວໍ, ອາວຸໂສ, ອາຍຕຎ຺ຈ ກໂຣຫິ ວິຕ຺ຖຕຎ຺ຈ ອປ຺ປິຕຎ຺ຈ. ນ ເຕນ ສຸຕ຺ເຕນ ປຏິພທ຺ຘໍ ຠວິສ຺ສຕີ’’ຕິ.

ອຖ ໂຂ ໂສ ຕນ຺ຕວາໂຍ ຍຖາຠຕໍ ສຸຕ຺ຕໍ ຕນ຺ເຕ ອຸປເນຕ຺ວາ ເຍນ ສາ ອິຕ຺ຖີ ເຕນຸປສງ຺ກມິ; ອຸປສງ຺ກມິຕ຺ວາ ຕໍ ອິຕ຺ຖິໍ ເອຕທໂວຈ – ‘‘ສຸຕ຺ເຕນ, ອຍ຺ເຍ, ອຕ຺ໂຖ’’ຕິ. ‘‘ນນຸ ຕ຺ວໍ ອຍ຺ໂຍ [ອຍ຺ຍ (ສ຺ຍາ.)] ມຍາ ວຸຕ຺ໂຕ – ‘ອິມິນາ ສຸຕ຺ເຕນ ຈີວຣໍ ວິນາຫີ’’’ຕິ. ‘‘ສຈ຺ຈາຫໍ, ອຍ຺ເຍ, ຕຍາ ວຸຕ຺ໂຕ – ‘ອິມິນາ ສຸຕ຺ເຕນ ຈີວຣໍ ວິນາຫີ’ຕິ. ອປິຈ, ມໍ ອຍ຺ໂຍ ອຸປນນ຺ໂທ ເອວມາຫ – ‘ອິງ຺ຆ ຕ຺ວໍ, ອາວຸໂສ, ອາຍຕຎ຺ຈ ກໂຣຫິ ວິຕ຺ຖຕຎ຺ຈ ອປ຺ປິຕຎ຺ຈ, ນ ເຕນ ສຸຕ຺ເຕນ ປຏິພທ຺ຘໍ ຠວິສ຺ສຕີ’’’ຕິ. ອຖ ໂຂ ສາ ອິຕ຺ຖີ ຍຕ຺ຕກໍເຍວ ສຸຕ຺ຕໍ ປຐມໍ ອທາສິ ຕຕ຺ຕກໍ ປຈ຺ຉາ ອທາສິ. ອສ຺ໂສສິ ໂຂ ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ – ‘‘ໂສ ກິຣ ປຸຣິໂສ ປວາສໂຕ ອາຄໂຕ’’ຕິ. ອຖ ໂຂ ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ເຍນ ຕສ຺ສ ປຸຣິສສ຺ສ ນິເວສນໍ ເຕນຸປສງ຺ກມິ; ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ອຖ ໂຂ ໂສ ປຸຣິໂສ ເຍນາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ໂສ ປຸຣິໂສ ປຊາປຕິໍ ເອຕທໂວຈ – ‘‘ວີຕໍ ຕໍ ຈີວຣ’’ນ຺ຕິ? ‘‘ອາມາຍ຺ຍ, ວີຕໍ ຕໍ ຈີວຣ’’ນ຺ຕິ. ‘‘ອາຫຣ, ອຍ຺ຍໍ ອຸປນນ຺ທໍ ຈີວເຣນ ອຈ຺ຉາເທສ຺ສາມີ’’ຕິ. ອຖ ໂຂ ສາ ອິຕ຺ຖີ ຕໍ ຈີວຣໍ ນີຫຣິຕ຺ວາ ສາມິກສ຺ສ ທຕ຺ວາ ເອຕມຕ຺ຖໍ ອາໂຣເຈສິ. ອຖ ໂຂ ໂສ ປຸຣິໂສ ອາຍສ຺ມໂຕ ອຸປນນ຺ທສ຺ສ ສກ຺ຍປຸຕ຺ຕສ຺ສ ຈີວຣໍ ທຕ຺ວາ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ມຫິຈ຺ຉາ ອິເມ ສມຓາ ສກ຺ຍປຸຕ຺ຕິຍາ ອສນ຺ຕຸຏ຺ຐາ. ນຍິເມ ສຸກຣາ ຈີວເຣນ ອຈ຺ຉາເທຕຸໍ. ກຖຎ຺ຫິ ນາມ ອຍ຺ໂຍ ອຸປນນ຺ໂທ ມຍາ ປຸພ຺ເພ ອປ຺ປວາຣິໂຕ ຕນ຺ຕວາເຍ [ຄຫປຕິກສ຺ສ ຕນ຺ຕວາເຍ (ກ.)] ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊິສ຺ສຕີ’’ຕິ.

ອສ຺ໂສສຸໍ ໂຂ ຠິກ຺ຂູ ຕສ຺ສ ປຸຣິສສ຺ສ ອຸຊ຺ຌາຍນ຺ຕສ຺ສ ຂິຍ຺ຍນ຺ຕສ຺ສ ວິປາເຈນ຺ຕສ຺ສ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ປຸພ຺ເພ ອປ຺ປວາຣິໂຕ ຄຫປຕິກສ຺ສ ຕນ຺ຕວາເຍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊິສ຺ສຕີ’’ຕິ! ອຖ ໂຂ ເຕ ຠິກ຺ຂູ ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ‘‘ສຈ຺ຈໍ ກິຣ ຕ຺ວໍ, ອຸປນນ຺ທ, ປຸພ຺ເພ ອປ຺ປວາຣິໂຕ ຄຫປຕິກສ຺ສ ຕນ຺ຕວາເຍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊີ’’ຕິ? ‘‘ສຈ຺ຈໍ, ຠຄວາ’’ຕິ. ‘‘ຎາຕໂກ ເຕ, ອຸປນນ຺ທ, ອຎ຺ຎາຕໂກ’’ຕິ? ‘‘ອຎ຺ຎາຕໂກ, ຠຄວາ’’ຕິ. ‘‘ອຎ຺ຎາຕໂກ, ໂມຆປຸຣິສ, ອຎ຺ຎາຕກສ຺ສ ນ ຊານາຕິ ປຕິຣູປໍ ວາ ອປ຺ປຕິຣູປໍ ວາ ສນ຺ຕໍ ວາ ອສນ຺ຕໍ ວາ. ຕຕ຺ຖ ນາມ ຕ຺ວໍ, ໂມຆປຸຣິສ, ປຸພ຺ເພ ອປ຺ປວາຣິໂຕ ອຎ຺ຎາຕກສ຺ສ ຄຫປຕິກສ຺ສ ຕນ຺ຕວາເຍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊິສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໖໔໒. ‘‘ຠິກ຺ຂຸໍ ປເນວ ອຸທ຺ທິສ຺ສ ອຎ຺ຎາຕໂກ ຄຫປຕິ ວາ ຄຫປຕານີ ວາ ຕນ຺ຕວາເຍຫິ ຈີວຣໍ ວາຍາເປຍ຺ຍ, ຕຕ຺ຣ ເຈ ໂສ ຠິກ຺ຂຸ ປຸພ຺ເພ ອປ຺ປວາຣິໂຕ ຕນ຺ຕວາເຍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ເຊຍ຺ຍ – ‘ອິທໍ ໂຂ, ອາວຸໂສ, ຈີວຣໍ ມໍ ອຸທ຺ທິສ຺ສ ວິຍ຺ຍຕິ. ອາຍຕຎ຺ຈ ກໂຣຖ ວິຕ຺ຖຕຎ຺ຈ. ອປ຺ປິຕຎ຺ຈ ສຸວີຕຎ຺ຈ ສຸປ຺ປວາຍິຕຎ຺ຈ ສຸວິເລຂິຕຎ຺ຈ ສຸວິຕຈ຺ຉິຕຎ຺ຈ ກໂຣຖ. ອປ຺ເປວ ນາມ ມຍມ຺ປິ ອາຍສ຺ມນ຺ຕານໍ ກິຎ຺ຈິມຕ຺ຕໍ ອນຸປທຊ຺ເຊຍ຺ຍາມາ’ຕິ. ເອວຎ຺ຈ ໂສ ຠິກ຺ຂຸ ວຕ຺ວາ ກິຎ຺ຈິມຕ຺ຕໍ ອນຸປທຊ຺ເຊຍ຺ຍ ອນ຺ຕມໂສ ປິຓ຺ຑປາຕມຕ຺ຕມ຺ປິ, ນິສ຺ສຄ຺ຄິຍໍ ປາຈິຕ຺ຕິຍ’’ນ຺ຕິ.

໖໔໓. ຠິກ຺ຂຸໍ ປເນວ ອຸທ຺ທິສ຺ສາຕິ ຠິກ຺ຂຸສ຺ສຕ຺ຖາຍ ຠິກ຺ຂຸໍ ອາຣມ຺ມຓໍ ກຣິຕ຺ວາ ຠິກ຺ຂຸໍ ອຈ຺ຉາເທຕຸກາໂມ.

ອຎ຺ຎາຕໂກ ນາມ ມາຕິໂຕ ວາ ປິຕິໂຕ ວາ ຍາວ ສຕ຺ຕມາ ປິຕາມຫຍຸຄາ ອສມ຺ພທ຺ໂຘ.

ຄຫປຕິ ນາມ ໂຍ ໂກຈິ ອຄາຣໍ ອຊ຺ຌາວສຕິ.

ຄຫປຕານີ ນາມ ຍາ ກາຈິ ອຄາຣໍ ອຊ຺ຌາວສຕິ.

ຕນ຺ຕວາເຍຫີຕິ ເປສກາເຣຫິ.

ຈີວຣໍ ນາມ ຉນ຺ນໍ ຈີວຣານໍ ອຎ຺ຎຕຣໍ ຈີວຣໍ ວິກປ຺ປນຸປຄໍ ປຈ຺ຉິມໍ.

ວາຍາເປຍ຺ຍາຕິ ວິນາເປຕິ.

ຕຕ຺ຣ ເຈ ໂສ ຠິກ຺ຂູຕິ ຍໍ ຠິກ຺ຂຸໍ ອຸທ຺ທິສ຺ສ ຈີວຣໍ ວິຍ຺ຍຕິ ໂສ ຠິກ຺ຂຸ.

ປຸພ຺ເພ ອປ຺ປວາຣິໂຕຕິ ປຸພ຺ເພ ອວຸຕ຺ໂຕ ໂຫຕິ – ‘‘ກີທິເສນ ເຕ, ຠນ຺ເຕ, ຈີວເຣນ ອຕ຺ໂຖ, ກີທິສໍ ເຕ ຈີວຣໍ ວາຍາເປມີ’’ຕິ?

ຕນ຺ຕວາເຍ ອຸປສງ຺ກມິຕ຺ວາຕິ ຆຣໍ ຄນ຺ຕ຺ວາ ຍຕ຺ຖ ກຕ຺ຖຈິ ອຸປສງ຺ກມິຕ຺ວາ.

ຈີວເຣ ວິກປ຺ປໍ ອາປຊ຺ເຊຍ຺ຍາຕິ – ‘‘ອິທໍ ໂຂ, ອາວຸໂສ, ຈີວຣໍ ມໍ ອຸທ຺ທິສ຺ສ ວິຍ຺ຍຕິ, ອາຍຕຎ຺ຈ ກໂຣຖ ວິຕ຺ຖຕຎ຺ຈ. ອປ຺ປິຕຎ຺ຈ ສຸວີຕຎ຺ຈ ສຸປ຺ປວາຍິຕຎ຺ຈ ສຸວິເລຂິຕຎ຺ຈ ສຸວິຕຈ຺ຉິຕຎ຺ຈ ກໂຣຖ. ອປ຺ເປວ ນາມ ມຍມ຺ປິ ອາຍສ຺ມນ຺ຕານໍ ກິຎ຺ຈິມຕ຺ຕໍ ອນຸປທຊ຺ເຊຍ຺ຍາມາ’’ຕິ.

ເອວຎ຺ຈ ໂສ ຠິກ຺ຂຸ ວຕ຺ວາ ກິຎ຺ຈິມຕ຺ຕໍ ອນຸປທຊ຺ເຊຍ຺ຍ ອນ຺ຕມໂສ ປິຓ຺ຑປາຕມຕ຺ຕມ຺ປີຕິ. ປິຓ຺ຑປາໂຕ ນາມ ຍາຄຸປິ ຠຕ຺ຕມ຺ປິ ຂາທນີຍມ຺ປິ ຈຸຓ຺ຓປິຓ຺ໂຑປິ ທນ຺ຕກຏ຺ຐມ຺ປິ ທສິກສຸຕ຺ຕມ຺ປິ, ອນ຺ຕມໂສ ຘມ຺ມມ຺ປິ ຠຓຕິ.

ຕສ຺ສ ວຈເນນ ອາຍຕໍ ວາ ວິຕ຺ຖຕໍ ວາ ອປ຺ປິຕໍ ວາ ກໂຣຕິ, ປໂຍເຄ ທຸກ຺ກຏໍ. ປຏິລາເຠນ ນິສ຺ສຄ຺ຄິຍໍ ໂຫຕິ. ນິສ຺ສຊ຺ຊິຕພ຺ພໍ ສງ຺ຆສ຺ສ ວາ ຄຓສ຺ສ ວາ ປຸຄ຺ຄລສ຺ສ ວາ. ເອວຎ຺ຈ ປນ, ຠິກ຺ຂເວ, ນິສ຺ສຊ຺ຊິຕພ຺ພໍ…ເປ… ອິທໍ ເມ, ຠນ຺ເຕ, ຈີວຣໍ ປຸພ຺ເພ ອປ຺ປວາຣິໂຕ ອຎ຺ຎາຕກສ຺ສ ຄຫປຕິກສ຺ສ ຕນ຺ຕວາເຍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປນ຺ນໍ ນິສ຺ສຄ຺ຄິຍໍ. ອິມາຫໍ ສງ຺ຆສ຺ສ ນິສ຺ສຊ຺ຊາມີຕິ…ເປ… ທເທຍ຺ຍາຕິ…ເປ… ທເທຍ຺ຍຸນ຺ຕິ…ເປ… ອາຍສ຺ມໂຕ ທມ຺ມີຕິ.

໖໔໔. ອຎ຺ຎາຕເກ ອຎ຺ຎາຕກສຎ຺ຎີ ປຸພ຺ເພ ອປ຺ປວາຣິໂຕ ຄຫປຕິກສ຺ສ ຕນ຺ຕວາເຍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອຎ຺ຎາຕເກ ເວມຕິໂກ ປຸພ຺ເພ ອປ຺ປວາຣິໂຕ ຄຫປຕິກສ຺ສ ຕນ຺ຕວາເຍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອຎ຺ຎາຕເກ ຎາຕກສຎ຺ຎີ ປຸພ຺ເພ ອປ຺ປວາຣິໂຕ ຄຫປຕິກສ຺ສ ຕນ຺ຕວາເຍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ຎາຕເກ ອຎາຕກສຎ຺ຎີ, ອາປຕ຺ຕິ ທຸກ຺ກຏສ຺ສ. ຎາຕເກ ເວມຕິໂກ, ອາປຕ຺ຕິ ທຸກ຺ກຏສ຺ສ. ຎາຕເກ ຎາຕກສຎ຺ຎີ, ອນາປຕ຺ຕິ.

໖໔໕. ອນາປຕ຺ຕິ – ຎາຕການໍ, ປວາຣິຕານໍ, ອຎ຺ຎສ຺ສຕ຺ຖາຍ, ອຕ຺ຕໂນ ຘເນນ, ມຫຄ຺ຆໍ ວາຍາເປຕຸກາມສ຺ສ ອປ຺ປຄ຺ຆໍ ວາຍາເປຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ມຫາເປສກາຣສິກ຺ຂາປທໍ ນິຏ຺ຐິຕໍ ສຕ຺ຕມໍ.