໒. ອູນປຎ຺ຈພນ຺ຘນສິກ຺ຂາປທໍ

໖໐໙. ເຕນ ສມເຍນ ພຸທ຺ໂຘ ຠຄວາ ສກ຺ເກສຸ ວິຫຣຕິ ກປິລວຕ຺ຖຸສ຺ມິໍ ນິຄ຺ໂຣຘາຣາເມ. ເຕນ ໂຂ ປນ ສມເຍນ ອຎ຺ຎຕເຣນ ກຸມ຺ຠກາເຣນ ຠິກ຺ຂູ ປວາຣິຕາ ໂຫນ຺ຕິ – ‘‘ເຍສໍ ອຍ຺ຍານໍ ປຕ຺ເຕນ ອຕ຺ໂຖ ອຫໍ ປຕ຺ເຕນາ’’ຕິ. ເຕນ ໂຂ ປນ ສມເຍນ ຠິກ຺ຂູ ນ ມຕ຺ຕໍ ຊານິຕ຺ວາ ພຫູ ປຕ຺ເຕ ວິຎ຺ຎາເປນ຺ຕິ. ເຍສໍ ຂຸທ຺ທກາ ປຕ຺ຕາ ເຕ ມຫນ຺ເຕ ປຕ຺ເຕ ວິຎ຺ຎາເປນ຺ຕິ. ເຍສໍ ມຫນ຺ຕາ ປຕ຺ຕາ ເຕ ຂຸທ຺ທເກ ປຕ຺ເຕ ວິຎ຺ຎາເປນ຺ຕິ. ອຖ ໂຂ ໂສ ກຸມ຺ຠກາໂຣ ຠິກ຺ຂູນໍ ພຫູ ປຕ຺ເຕ ກໂຣນ຺ໂຕ ນ ສກ຺ໂກຕິ ອຎ຺ຎໍ ວິກ຺ກາຍິກໍ ຠຓ຺ຑໍ ກາຕຸໍ, ອຕ຺ຕນາປິ ນ ຍາເປຕິ, ປຸຕ຺ຕທາຣາປິສ຺ສ ກິລມນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ນ ມຕ຺ຕໍ ຊານິຕ຺ວາ ພຫູ ປຕ຺ເຕ ວິຎ຺ຎາເປສ຺ສນ຺ຕິ! ອຍໍ ອິເມສໍ ພຫູ ປຕ຺ເຕ ກໂຣນ຺ໂຕ ນ ສກ຺ໂກຕິ ອຎ຺ຎໍ ວິກ຺ກາຍິກໍ ຠຓ຺ຑໍ ກາຕຸໍ, ອຕ຺ຕນາປິ ນ ຍາເປຕິ, ປຸຕ຺ຕທາຣາປິສ຺ສ ກິລມນ຺ຕີ’’ຕິ.

ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂູ ນ ມຕ຺ຕໍ ຊານິຕ຺ວາ ພຫູ ປຕ຺ເຕ ວິຎ຺ຎາເປສ຺ສນ຺ຕີ’’ຕິ! ອຖ ໂຂ ເຕ ຠິກ຺ຂູ ເຕ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂູ ນ ມຕ຺ຕໍ ຊານິຕ຺ວາ ພຫູ ປຕ຺ເຕ ວິຎ຺ຎາເປນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ເຕ, ຠິກ຺ຂເວ, ໂມຆປຸຣິສາ ນ ມຕ຺ຕໍ ຊານິຕ຺ວາ ພຫູ ປຕ຺ເຕ ວິຎ຺ຎາເປສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ວິຄຣຫິຕ຺ວາ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ນ, ຠິກ຺ຂເວ, ປຕ຺ໂຕ ວິຎ຺ຎາເປຕພ຺ໂພ. ໂຍ ວິຎ຺ຎາເປຍ຺ຍ, ອາປຕ຺ຕິ ທຸກ຺ກຏສ຺ສາ’’ຕິ.

໖໑໐. ເຕນ ໂຂ ປນ ສມເຍນ ອຎ຺ຎຕຣສ຺ສ ຠິກ຺ຂຸໂນ ປຕ຺ໂຕ ຠິນ຺ໂນ ໂຫຕິ. ອຖ ໂຂ ໂສ ຠິກ຺ຂຸ – ‘‘ຠຄວຕາ ປຏິກ຺ຂິຕ຺ຕໍ ປຕ຺ຕໍ ວິຎ຺ຎາເປຕຸ’’ນ຺ຕິ ກຸກ຺ກຸຈ຺ຈາຍນ຺ໂຕ ນ ວິຎ຺ຎາເປຕິ. ຫຕ຺ເຖສຸ ປິຓ຺ຑາຍ ຈຣຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ຫຕ຺ເຖສຸ ປິຓ຺ຑາຍ ຈຣິສ຺ສນ຺ຕິ, ເສຍ຺ຍຖາປິ ຕິຕ຺ຖິຍາ’’ຕິ! ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ນຏ຺ຐປຕ຺ຕສ຺ສ ວາ ຠິນ຺ນປຕ຺ຕສ຺ສ ວາ ປຕ຺ຕໍ ວິຎ຺ຎາເປຕຸ’’ນ຺ຕິ.

໖໑໑. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ – ‘‘ຠຄວຕາ ອນຸຎ຺ຎາຕໍ ນຏ຺ຐປຕ຺ຕສ຺ສ ວາ ຠິນ຺ນປຕ຺ຕສ຺ສ ວາ ປຕ຺ຕໍ ວິຎ຺ຎາເປຕຸ’’ນ຺ຕິ ອປ຺ປມຕ຺ຕເກນປິ ຠິນ຺ເນນ ອປ຺ປມຕ຺ຕເກນປິ ຂຓ຺ເຑນ ວິລິຂິຕມຕ຺ເຕນປິ ພຫູ ປຕ຺ເຕ ວິຎ຺ຎາເປນ຺ຕິ. ອຖ ໂຂ ໂສ ກຸມ຺ຠກາໂຣ ຠິກ຺ຂູນໍ ຕເຖວ ພຫູ ປຕ຺ເຕ ກໂຣນ຺ໂຕ ນ ສກ຺ໂກຕິ ອຎ຺ຎໍ ວິກ຺ກາຍິກໍ ຠຓ຺ຑໍ ກາຕຸໍ, ອຕ຺ຕນາປິ ນ ຍາເປຕິ, ປຸຕ຺ຕທາຣາປິສ຺ສ ກິລມນ຺ຕິ. ມນຸສ຺ສາ ຕເຖວ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ນ ມຕ຺ຕໍ ຊານິຕ຺ວາ ພຫູ ປຕ຺ເຕ ວິຎ຺ຎາເປສ຺ສນ຺ຕິ! ອຍໍ ອິເມສໍ ພຫູ ປຕ຺ເຕ ກໂຣນ຺ໂຕ ນ ສກ຺ໂກຕິ ອຎ຺ຎໍ ວິກ຺ກາຍິກໍ ຠຓ຺ຑໍ ກາຕຸໍ, ອຕ຺ຕນາປິ ນ ຍາເປຕິ, ປຸຕ຺ຕທາຣາປິສ຺ສ ກິລມນ຺ຕີ’’ຕິ.

ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ອປ຺ປມຕ຺ຕເກນປິ ຠິນ຺ເນນ ອປ຺ປມຕ຺ຕເກນປິ ຂຓ຺ເຑນ ວິລິຂິຕມຕ຺ເຕນປິ ພຫູ ປຕ຺ເຕ ວິຎ຺ຎາເປສ຺ສນ຺ຕີ’’ຕິ! ອຖ ໂຂ ເຕ ຠິກ຺ຂູ ຉພ຺ພຄ຺ຄິເຍ ຠິກ຺ຂູ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ‘‘ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ອປ຺ປມຕ຺ຕເກນປິ ຠິນ຺ເນນ ອປ຺ປມຕ຺ຕເກນປິ ຂຓ຺ເຑນ ວິລິຂິຕມຕ຺ເຕນປິ ພຫູ ປຕ຺ເຕ ວິຎ຺ຎາເປຖາ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ອປ຺ປມຕ຺ຕເກນປິ ຠິນ຺ເນນ ອປ຺ປມຕ຺ຕເກນປິ ຂຓ຺ເຑນ ວິລິຂິຕມຕ຺ເຕນປິ ພຫູ ປຕ຺ເຕ ວິຎ຺ຎາເປສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໖໑໒. ‘‘ໂຍ ປນ ຠິກ຺ຂຸ ອູນປຎ຺ຈພນ຺ຘເນນ ປຕ຺ເຕນ ອຎ຺ຎໍ ນວໍ ປຕ຺ຕໍ ເຈຕາເປຍ຺ຍ, ນິສ຺ສຄ຺ຄິຍໍ ປາຈິຕ຺ຕິຍໍ. ເຕນ ຠິກ຺ຂຸນາ ໂສ ປຕ຺ໂຕ ຠິກ຺ຂຸປຣິສາຍ ນິສ຺ສຊ຺ຊິຕພ຺ໂພ. ໂຍ ຈ ຕສ຺ສາ ຠິກ຺ຂຸປຣິສາຍ ປຕ຺ຕປຣິຍນ຺ໂຕ ໂສ ຕສ຺ສ ຠິກ຺ຂຸໂນ ປທາຕພ຺ໂພ – ‘ອຍໍ ເຕ, ຠິກ຺ຂຸ, ປຕ຺ໂຕ ຍາວ ເຠທນາຍ ຘາເຣຕພ຺ໂພ’ຕິ. ອຍໍ ຕຕ຺ຖ ສາມີຈີ’’ຕິ.

໖໑໓. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ອູນປຎ຺ຈພນ຺ຘໂນ ນາມ ປຕ຺ໂຕ ອພນ຺ຘໂນ ວາ ເອກພນ຺ຘໂນ ວາ ທ຺ວິພນ຺ຘໂນ ວາ ຕິພນ຺ຘໂນ ວາ ຈຕຸພນ຺ຘໂນ ວາ. ອພນ຺ຘໂນກາໂສ ນາມ ປຕ຺ໂຕ ຍສ຺ສ ທ຺ວງ຺ຄຸລາ ຣາຊິ ນ ໂຫຕິ. ພນ຺ຘໂນກາໂສ ນາມ ປຕ຺ໂຕ ຍສ຺ສ ທ຺ວງ຺ຄຸລາ ຣາຊິ ໂຫຕິ. ນໂວ ນາມ ປຕ຺ໂຕ ວິຎ຺ຎຕ຺ຕິໍ ອຸປາທາຍ ວຸຈ຺ຈຕິ.

ເຈຕາເປຍ຺ຍາຕິ ວິຎ຺ຎາເປຕິ, ປໂຍເຄ ທຸກ຺ກຏໍ. ປຏິລາເຠນ ນິສ຺ສຄ຺ຄິໂຍ ໂຫຕິ. ສງ຺ຆມຊ຺ເຌ ນິສ຺ສຊ຺ຊິຕພ຺ໂພ. ສພ຺ເພເຫວ ອຘິຏ຺ຐິຕປຕ຺ຕໍ ຄເຫຕ຺ວາ ສນ຺ນິປຕິຕພ຺ພໍ. ນ ລາມໂກ ປຕ຺ໂຕ ອຘິຏ຺ຐາຕພ຺ໂພ – ‘‘ມຫຄ຺ຆໍ ປຕ຺ຕໍ ຄເຫສ຺ສາມີ’’ຕິ. ສເຈ ລາມກໍ ປຕ຺ຕໍ ອຘິຏ຺ເຐຕິ – ‘‘ມຫຄ຺ຆໍ ປຕ຺ຕໍ ຄເຫສ຺ສາມີ’’ຕິ, ອາປຕ຺ຕິ ທຸກ຺ກຏສ຺ສ. ເອວຎ຺ຈ ປນ, ຠິກ຺ຂເວ, ນິສ຺ສຊ຺ຊິຕພ຺ໂພ. ເຕນ ຠິກ຺ຂຸນາ ສງ຺ຆໍ ອຸປສງ຺ກມິຕ຺ວາ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ວຸຑ຺ຒານໍ ຠິກ຺ຂູນໍ ປາເທ ວນ຺ທິຕ຺ວາ ອຸກ຺ກຸຏິກໍ ນິສີທິຕ຺ວາ ອຎ຺ຊລິໍ ປຄ຺ຄເຫຕ຺ວາ ເອວມສ຺ສ ວຈນີໂຍ – ‘‘ອຍໍ ເມ, ຠນ຺ເຕ, ປຕ຺ໂຕ ອູນປຎ຺ຈພນ຺ຘເນນ ປຕ຺ເຕນ ເຈຕາປິໂຕ ນິສ຺ສຄ຺ຄິໂຍ. ອິມາຫໍ ສງ຺ຆສ຺ສ ນິສ຺ສຊ຺ຊາມີ’’ຕິ. ນິສ຺ສຊ຺ຊິຕ຺ວາ ອາປຕ຺ຕິ ເທເສຕພ຺ພາ. ພ຺ຍຕ຺ເຕນ ຠິກ຺ຂຸນາ ປຏິພເລນ ອາປຕ຺ຕິ ປຏິຄ຺ຄເຫຕພ຺ພາ. ປຎ຺ຈຫງ຺ເຄຫິ ສມນ຺ນາຄໂຕ ຠິກ຺ຂຸ ປຕ຺ຕຄ຺ຄາຫາປໂກ ສມ຺ມນ຺ນິຕພ຺ໂພ – ໂຍ ນ ຉນ຺ທາຄຕິໍ ຄຈ຺ເຉຍ຺ຍ, ນ ໂທສາຄຕິໍ ຄຈ຺ເຉຍ຺ຍ, ນ ໂມຫາຄຕິໍ ຄຈ຺ເຉຍ຺ຍ, ນ ຠຍາຄຕິໍ ຄຈ຺ເຉຍ຺ຍ, ຄາຫິຕາຄາຫິຕຎ຺ຈ ຊາເນຍ຺ຍ. ເອວຎ຺ຈ ປນ, ຠິກ຺ຂເວ, ສມ຺ມນ຺ນິຕພ຺ໂພ. ປຐມໍ ຠິກ຺ຂຸ ຍາຈິຕພ຺ໂພ. ຍາຈິຕ຺ວາ ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

໖໑໔. ‘‘ສຸຓາຕຸ ເມ, ຠນ຺ເຕ, ສງ຺ໂຆ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ອິຕ຺ຖນ຺ນາມໍ ຠິກ຺ຂຸໍ ປຕ຺ຕຄ຺ຄາຫາປກໍ ສມ຺ມນ຺ເນຍ຺ຍ. ເອສາ ຎຕ຺ຕິ.

‘‘ສຸຓາຕຸ ເມ, ຠນ຺ເຕ, ສງ຺ໂຆ. ສງ຺ໂຆ ອິຕ຺ຖນ຺ນາມໍ ຠິກ຺ຂຸໍ ປຕ຺ຕຄ຺ຄາຫາປກໍ ສມ຺ມນ຺ນຕິ. ຍສ຺ສາຍສ຺ມໂຕ ຂມຕິ ອິຕ຺ຖນ຺ນາມສ຺ສ ຠິກ຺ຂຸໂນ ປຕ຺ຕຄ຺ຄາຫາປກສ຺ສ ສມ຺ມຸຕິ, ໂສ ຕຸຓ຺ຫສ຺ສ; ຍສ຺ສ ນກ຺ຂມຕິ, ໂສ ຠາເສຍ຺ຍ.

‘‘ສມ຺ມໂຕ ສງ຺ເຆນ ອິຕ຺ຖນ຺ນາໂມ ຠິກ຺ຂຸ ປຕ຺ຕຄ຺ຄາຫາປໂກ. ຂມຕິ ສງ຺ຆສ຺ສ, ຕສ຺ມາ ຕຸຓ຺ຫີ, ເອວເມຕໍ ຘາຣຍາມີ’’ຕິ.

໖໑໕. ເຕນ ສມ຺ມເຕນ ຠິກ຺ຂຸນາ ປຕ຺ໂຕ ຄາເຫຕພ຺ໂພ. ເຖໂຣ ວຕ຺ຕພ຺ໂພ – ‘‘ຄຓ຺ຫາຕຸ, ຠນ຺ເຕ, ເຖໂຣ ປຕ຺ຕ’’ນ຺ຕິ. ສເຈ ເຖໂຣ ຄຓ຺ຫາຕິ, ເຖຣສ຺ສ ປຕ຺ໂຕ ທຸຕິຍສ຺ສ ຄາເຫຕພ຺ໂພ. ນ ຈ ຕສ຺ສ ອນຸທ຺ທຍຕາຍ ນ ຄເຫຕພ຺ໂພ. ໂຍ ນ ຄຓ຺ເຫຍ຺ຍ, ອາປຕ຺ຕິ ທຸກ຺ກຏສ຺ສ. ອປຕ຺ຕກສ຺ສ ນ ຄາເຫຕພ຺ໂພ. ເອເຕເນວ ອຸປາເຍນ ຍາວ ສງ຺ຆນວກາ ຄາເຫຕພ຺ພາ. ໂຍ ຈ ຕສ຺ສາ ຠິກ຺ຂຸປຣິສາຍ ປຕ຺ຕປຣິຍນ຺ໂຕ, ໂສ ຕສ຺ສ ຠິກ຺ຂຸໂນ ປທາຕພ຺ໂພ – ‘‘ອຍໍ ເຕ, ຠິກ຺ຂຸ, ປຕ຺ໂຕ ຍາວ ເຠທນາຍ ຘາເຣຕພ຺ໂພ’’ຕິ.

ເຕນ ຠິກ຺ຂຸນາ ໂສ ປຕ຺ໂຕ ນ ອເທເສ ນິກ຺ຂິປິຕພ຺ໂພ, ນ ອໂຠເຄນ ຠຸຎ຺ຊິຕພ຺ໂພ, ນ ວິສ຺ສຊ຺ເຊຕພ຺ໂພ – ‘‘ກຖາຍໍ ປຕ຺ໂຕ ນສ຺ເສຍ຺ຍ ວາ ວິນສ຺ເສຍ຺ຍ ວາ ຠິຊ຺ເຊຍ຺ຍ ວາ’’ຕິ? ສເຈ ອເທເສ ວາ ນິກ຺ຂິປຕິ ອໂຠເຄນ ວາ ຠຸຎ຺ຊຕິ ວິສ຺ສຊ຺ເຊຕິ ວາ, ອາປຕ຺ຕິ ທຸກ຺ກຏສ຺ສ.

ອຍໍ ຕຕ຺ຖ ສາມີຈີຕິ ອຍໍ ຕຕ຺ຖ ອນຸຘມ຺ມຕາ.

໖໑໖. ອພນ຺ຘເນນ ປຕ຺ເຕນ ອພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອພນ຺ຘເນນ ປຕ຺ເຕນ ເອກພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອພນ຺ຘເນນ ປຕ຺ເຕນ ທ຺ວິພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອພນ຺ຘເນນ ປຕ຺ເຕນ ຕິພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອພນ຺ຘເນນ ປຕ຺ເຕນ ຈຕຸພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ເອກພນ຺ຘເນນ ປຕ຺ເຕນ ອພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ເອກພນ຺ຘເນນ ປຕ຺ເຕນ ເອກພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ເອກພນ຺ຘເນນ ປຕ຺ເຕນ ທ຺ວິພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ເອກພນ຺ຘເນນ ປຕ຺ເຕນ ຕິພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ເອກພນ຺ຘເນນ ປຕ຺ເຕນ ຈຕຸພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ທ຺ວິພນ຺ຘເນນ ປຕ຺ເຕນ ອພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ທ຺ວິພນ຺ຘເນນ ປຕ຺ເຕນ ເອກພນ຺ຘນໍ ປຕ຺ຕໍ…ເປ… ທ຺ວິພນ຺ຘນໍ ປຕ຺ຕໍ… ຕິພນ຺ຘນໍ ປຕ຺ຕໍ… ຈຕຸພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ຕິພນ຺ຘເນນ ປຕ຺ເຕນ ອພນ຺ຘນໍ ປຕ຺ຕໍ…ເປ… ເອກພນ຺ຘນໍ ປຕ຺ຕໍ…ເປ… ທ຺ວິພນ຺ຘນໍ ປຕ຺ຕໍ… ຕິພນ຺ຘນໍ ປຕ຺ຕໍ… ຈຕຸພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ຈຕຸພນ຺ຘເນນ ປຕ຺ເຕນ ອພນ຺ຘນໍ ປຕ຺ຕໍ…ເປ… ເອກພນ຺ຘນໍ ປຕ຺ຕໍ… ທ຺ວິພນ຺ຘນໍ ປຕ຺ຕໍ… ຕິພນ຺ຘນໍ ປຕ຺ຕໍ… ຈຕຸພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ອພນ຺ຘເນນ ປຕ຺ເຕນ ອພນ຺ຘໂນກາສໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອພນ຺ຘເນນ ປຕ຺ເຕນ ເອກພນ຺ຘໂນກາສໍ ປຕ຺ຕໍ…ເປ… ທ຺ວິພນ຺ຘໂນກາສໍ ປຕ຺ຕໍ … ຕິພນ຺ຘໂນກາສໍ ປຕ຺ຕໍ… ຈຕຸພນ຺ຘໂນກາສໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ເອກພນ຺ຘເນນ ປຕ຺ເຕນ ອພນ຺ຘໂນກາສໍ ປຕ຺ຕໍ…ເປ… ເອກພນ຺ຘໂນກາສໍ ປຕ຺ຕໍ… ທ຺ວິພນ຺ຘໂນກາສໍ ປຕ຺ຕໍ… ຕິພນ຺ຘໂນກາສໍ ປຕ຺ຕໍ… ຈຕຸພນ຺ຘໂນກາສໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ທ຺ວິພນ຺ຘເນນ ປຕ຺ເຕນ ອພນ຺ຘໂນກາສໍ ປຕ຺ຕໍ…ເປ… ຈຕຸພນ຺ຘໂນກາສໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ຕິພນ຺ຘເນນ ປຕ຺ເຕນ ອພນ຺ຘໂນກາສໍ ປຕ຺ຕໍ…ເປ… ຈຕຸພນ຺ຘໂນກາສໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ຈຕຸພນ຺ຘເນນ ປຕ຺ເຕນ ອພນ຺ຘໂນກາສໍ ປຕ຺ຕໍ…ເປ… ເອກພນ຺ຘໂນກາສໍ ປຕ຺ຕໍ… ທ຺ວິພນ຺ຘໂນກາສໍ ປຕ຺ຕໍ… ຕິພນ຺ຘໂນກາສໍ ປຕ຺ຕໍ… ຈຕຸພນ຺ຘໂນກາສໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ອພນ຺ຘໂນກາເສນ ປຕ຺ເຕນ ອພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອພນ຺ຘໂນກາເສນ ປຕ຺ເຕນ ເອກພນ຺ຘນໍ ປຕ຺ຕໍ…ເປ… ທ຺ວິພນ຺ຘນໍ ປຕ຺ຕໍ… ຕິພນ຺ຘນໍ ປຕ຺ຕໍ… ຈຕຸພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ຈຕຸພນ຺ຘໂນກາເສນ ປຕ຺ເຕນ ອພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ຈຕຸພນ຺ຘໂນກາເສນ ປຕ຺ເຕນ ເອກພນ຺ຘນໍ ປຕ຺ຕໍ…ເປ… ທ຺ວິພນ຺ຘນໍ ປຕ຺ຕໍ… ຕິພນ຺ຘນໍ ປຕ຺ຕໍ… ຈຕຸພນ຺ຘນໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ອພນ຺ຘໂນກາເສນ ປຕ຺ເຕນ ອພນ຺ຘໂນກາສໍ ປຕ຺ຕໍ…ເປ… ເອກພນ຺ຘໂນກາສໍ ປຕ຺ຕໍ… ທ຺ວິພນ຺ຘໂນກາສໍ ປຕ຺ຕໍ… ຕິພນ຺ຘໂນກາສໍ ປຕ຺ຕໍ… ຈຕຸພນ຺ຘໂນກາສໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ຈຕຸພນ຺ຘໂນກາເສນ ປຕ຺ເຕນ ອພນ຺ຘໂນກາສໍ ປຕ຺ຕໍ…ເປ… ເອກພນ຺ຘໂນກາສໍ ປຕ຺ຕໍ… ທ຺ວິພນ຺ຘໂນກາສໍ ປຕ຺ຕໍ… ຕິພນ຺ຘໂນກາສໍ ປຕ຺ຕໍ… ຈຕຸພນ຺ຘໂນກາສໍ ປຕ຺ຕໍ ເຈຕາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

໖໑໗. ອນາປຕ຺ຕິ ນຏ຺ຐປຕ຺ຕສ຺ສ, ຠິນ຺ນປຕ຺ຕສ຺ສ, ຎາຕການໍ ປວາຣິຕານໍ, ອຎ຺ຎສ຺ສຕ຺ຖາຍ, ອຕ຺ຕໂນ ຘເນນ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ອູນປຎ຺ຈພນ຺ຘນສິກ຺ຂາປທໍ ນິຏ຺ຐິຕໍ ທຸຕິຍໍ.