໓. ອນິຍຕກຓ຺ຑໍ

໑. ປຐມອນິຍຕສິກ຺ຂາປທໍ

ອິເມ ໂຂ ປນາຍສ຺ມນ຺ໂຕ ທ຺ເວ ອນິຍຕາ ຘມ຺ມາ

ອຸທ຺ເທສໍ ອາຄຈ຺ຉນ຺ຕິ.

໔໔໓. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອາຍສ຺ມາ ອຸທາຍີ ສາວຕ຺ຖິຍໍ ກຸລູປໂກ ໂຫຕິ, ພຫຸການິ ກຸລານິ ອຸປສງ຺ກມຕິ. ເຕນ ໂຂ ປນ ສມເຍນ ອາຍສ຺ມໂຕ ອຸທາຍິສ຺ສ ອຸປຏ຺ຐາກກຸລສ຺ສ ກຸມາຣິກາ ອຎ຺ຎຕຣສ຺ສ ກຸລສ຺ສ ກຸມາຣກສ຺ສ ທິນ຺ນາ ໂຫຕິ. ອຖ ໂຂ ອາຍສ຺ມາ ອຸທາຍີ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ຕໍ ກຸລໍ ເຕນຸປສງ຺ກມິ; ອຸປສງ຺ກມິຕ຺ວາ ມນຸສ຺ເສ ປຸຈ຺ຉິ – ‘‘ກຫໍ ອິຕ຺ຖນ຺ນາມາ’’ຕິ? ເຕ ເອວມາຫໍສຸ – ‘‘ທິນ຺ນາ, ຠນ຺ເຕ, ອມຸກສ຺ສ ກຸລສ຺ສ ກຸມາຣກສ຺ສາ’’ຕິ. ຕມ຺ປິ ໂຂ ກຸລໍ ອາຍສ຺ມໂຕ ອຸທາຍິສ຺ສ ອຸປຏ຺ຐາກໍ ໂຫຕິ. ອຖ ໂຂ ອາຍສ຺ມາ ອຸທາຍີ ເຍນ ຕໍ ກຸລໍ ເຕນຸປສງ຺ກມິ; ອຸປສງ຺ກມິຕ຺ວາ ມນຸສ຺ເສ ປຸຈ຺ຉິ – ‘‘ກຫໍ ອິຕ຺ຖນ຺ນາມາ’’ຕິ? ເຕ ເອວມາຫໍສຸ – ‘‘ເອສາຍ຺ຍ, ໂອວຣເກ ນິສິນ຺ນາ’’ຕິ. ອຖ ໂຂ ອາຍສ຺ມາ ອຸທາຍີ ເຍນ ສາ ກຸມາຣິກາ ເຕນຸປສງ຺ກມິ; ອຸປສງ຺ກມິຕ຺ວາ ຕສ຺ສາ ກຸມາຣິກາຍ ສທ຺ຘິໍ ເອໂກ ເອກາຍ ຣໂຫ ປຏິຈ຺ຉນ຺ເນ ອາສເນ ອລໍກມ຺ມນິເຍ ນິສຊ຺ຊໍ ກປ຺ເປສິ ກາລຍຸຕ຺ຕໍ ສມຸລ຺ລປນ຺ໂຕ ກາລຍຸຕ຺ຕໍ ຘມ຺ມໍ ຠຓນ຺ໂຕ.

ເຕນ ໂຂ ປນ ສມເຍນ ວິສາຂາ ມິຄາຣມາຕາ ພຫຸປຸຕ຺ຕາ ໂຫຕິ ພຫຸນຕ຺ຕາ ອໂຣຄປຸຕ຺ຕາ ອໂຣຄນຕ຺ຕາ ອຠິມງ຺ຄລສມ຺ມຕາ. ມນຸສ຺ສາ ຍຎ຺ເຎສຸ ຉເຓສຸ ອຸສ຺ສເວສຸ ວິສາຂໍ ມິຄາຣມາຕຣໍ ປຐມໍ ໂຠເຊນ຺ຕິ. ອຖ ໂຂ ວິສາຂາ ມິຄາຣມາຕາ ນິມນ຺ຕິຕາ ຕໍ ກຸລໍ ອຄມາສິ. ອທ຺ທສາ ໂຂ ວິສາຂາ ມິຄາຣມາຕາ ອາຍສ຺ມນ຺ຕໍ ອຸທາຍິໍ ຕສ຺ສາ ກຸມາຣິກາຍ ສທ຺ຘິໍ ເອກໍ ເອກາຍ ຣໂຫ ປຏິຈ຺ຉນ຺ເນ ອາສເນ ອລໍກມ຺ມນິເຍ ນິສິນ຺ນໍ. ທິສ຺ວານ ອາຍສ຺ມນ຺ຕໍ ອຸທາຍິໍ ເອຕທໂວຈ – ‘‘ອິທໍ, ຠນ຺ເຕ, ນຈ຺ຉນ຺ນໍ ນປ຺ປຕິຣູປໍ ຍໍ ອຍ຺ໂຍ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ປຏິຈ຺ຉນ຺ເນ ອາສເນ ອລໍກມ຺ມນິເຍ ນິສຊ຺ຊໍ ກປ຺ເປຕິ. ກິຎ຺ຈາປິ, ຠນ຺ເຕ, ອຍ຺ໂຍ ອນຕ຺ຖິໂກ ເຕນ ຘມ຺ເມນ, ອປິຈ ທຸສ຺ສທ຺ຘາປຍາ ອປ຺ປສນ຺ນາ ມນຸສ຺ສາ’’ຕິ. ເອວມ຺ປິ ໂຂ ອາຍສ຺ມາ ອຸທາຍີ ວິສາຂາຍ ມິຄາຣມາຕຸຍາ ວຸຈ຺ຈມາໂນ ນາທິຍິ. ອຖ ໂຂ ວິສາຂາ ມິຄາຣມາຕາ ນິກ຺ຂມິຕ຺ວາ ຠິກ຺ຂູນໍ ເອຕມຕ຺ຖໍ ອາໂຣເຈສິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຍສ຺ມາ ອຸທາຍີ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ປຏິຈ຺ຉນ຺ເນ ອາສເນ ອລໍກມ຺ມນິເຍ ນິສຊ຺ຊໍ ກປ຺ເປສ຺ສຕີ’’ຕິ! ອຖ ໂຂ ເຕ ຠິກ຺ຂູ ອາຍສ຺ມນ຺ຕໍ ອຸທາຍິໍ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ‘‘ສຈ຺ຈໍ ກິຣ ຕ຺ວໍ, ອຸທາຍິ, ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ປຏິຈ຺ຉນ຺ເນ ອາສເນ ອລໍກມ຺ມນິເຍ ນິສຊ຺ຊໍ ກປ຺ເປສີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ປຏິຈ຺ຉນ຺ເນ ອາສເນ ອລໍກມ຺ມນິເຍ ນິສຊ຺ຊໍ ກປ຺ເປສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໔໔໔. ‘‘ໂຍ ປນ ຠິກ຺ຂຸ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ປຏິຈ຺ຉນ຺ເນ ອາສເນ ອລໍກມ຺ມນິເຍ ນິສຊ຺ຊໍ ກປ຺ເປຍ຺ຍ, ຕເມນໍ ສທ຺ເຘຍ຺ຍວຈສາ ອຸປາສິກາ ທິສ຺ວາ ຕິຓ຺ຓໍ ຘມ຺ມານໍ ອຎ຺ຎຕເຣນ ວເທຍ຺ຍ – ປາຣາຊິເກນ ວາ ສງ຺ຆາທິເສເສນ ວາ ປາຈິຕ຺ຕິເຍນ ວາ, ນິສຊ຺ຊໍ ຠິກ຺ຂຸ ປຏິຊານມາໂນ ຕິຓ຺ຓໍ ຘມ຺ມານໍ ອຎ຺ຎຕເຣນ ກາເຣຕພ຺ໂພ – ປາຣາຊິເກນ ວາ ສງ຺ຆາທິເສເສນ ວາ ປາຈິຕ຺ຕິເຍນ ວາ ເຍນ ວາ ສາ ສທ຺ເຘຍ຺ຍວຈສາ ອຸປາສິກາ ວເທຍ຺ຍ, ເຕນ ໂສ ຠິກ຺ຂຸ ກາເຣຕພ຺ໂພ. ອຍໍ ຘມ຺ໂມ ອນິຍໂຕ’’ຕິ.

໔໔໕. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ມາຕຸຄາໂມ ນາມ ມນຸສ຺ສິຕ຺ຖີ, ນ ຍກ຺ຂີ ນ ເປຕີ ນ ຕິຣຈ຺ຉານຄຕາ. ອນ຺ຕມໂສ ຕທຫຸຊາຕາປິ ທາຣິກາ, ປເຄວ ມຫຕ຺ຕຣີ.

ສທ຺ຘິນ຺ຕິ ເອກໂຕ.

ເອໂກ ເອກາຍາຕິ ຠິກ຺ຂຸ ເຈວ ໂຫຕິ ມາຕຸຄາໂມ ຈ.

ຣໂຫ ນາມ ຈກ຺ຂຸສ຺ສ ຣໂຫ, ໂສຕສ຺ສ ຣໂຫ. ຈກ຺ຂຸສ຺ສ ຣໂຫນາມ ນ ສກ຺ກາ ໂຫຕິ ອກ຺ຂິໍ ວາ ນິຂຓີຍມາເນ ຠມຸກໍ ວາ ອຸກ຺ຂິປີຍມາເນ ສີສໍ ວາ ອຸກ຺ຂິປີຍມາເນ ປສ຺ສິຕຸໍ. ໂສຕສ຺ສ ຣໂຫນາມ ນ ສກ຺ກາ ໂຫຕິ ປກຕິກຖາ ໂສຕຸໍ.

ປຏິຈ຺ຉນ຺ນໍ ນາມ ອາສນໍ ກຸຏ຺ເຏນ ວາ [ກຸຑ຺ເຑນ ວາ (ສີ. ສ຺ຍາ.)] ກວາເຏນ ວາ ກິລຎ຺ເຊນ ວາ ສາຓິປາກາເຣນ ວາ ຣຸກ຺ເຂນ ວາ ຖມ຺ເຠນ ວາ ໂກຕ຺ຖຬິຍາ ວາ ເຍນ ເກນຈິ ປຏິຈ຺ຉນ຺ນໍ ໂຫຕິ.

ອລໍກມ຺ມນິເຍຕິ ສກ຺ກາ ໂຫຕິ ເມຖຸນໍ ຘມ຺ມໍ ປຏິເສວິຕຸໍ.

ນິສຊ຺ຊໍ ກປ຺ເປຍ຺ຍາຕິ ມາຕຸຄາເມ ນິສິນ຺ເນ ຠິກ຺ຂຸ ອຸປນິສິນ຺ໂນ ວາ ໂຫຕິ ອຸປນິປນ຺ໂນ ວາ. ຠິກ຺ຂຸ ນິສິນ຺ເນ ມາຕຸຄາໂມ ອຸປນິສິນ຺ໂນ ວາ ໂຫຕິ ອຸປນິປນ຺ໂນ ວາ. ອຸໂຠ ວາ ນິສິນ຺ນາ ໂຫນ຺ຕິ ອຸໂຠ ວາ ນິປນ຺ນາ.

ສທ຺ເຘຍ຺ຍວຈສາ ນາມ ອາຄຕຜລາ ອຠິສເມຕາວິນີ ວິຎ຺ຎາຕສາສນາ.

ອຸປາສິກາ ນາມ ພຸທ຺ຘໍ ສຣຓໍ ຄຕາ, ຘມ຺ມໍ ສຣຓໍ ຄຕາ, ສງ຺ຆໍ ສຣຓໍ ຄຕາ.

ທິສ຺ວາຕິ ປສ຺ສິຕ຺ວາ.

ຕິຓ຺ຓໍ ຘມ຺ມານໍ ອຎ຺ຎຕເຣນ ວເທຍ຺ຍ – ປາຣາຊິເກນ ວາ ສງ຺ຆາທິເສເສນ ວາ ປາຈິຕ຺ຕິເຍນ ວາ. ນິສຊ຺ຊໍ ຠິກ຺ຂຸ ປຏິຊານມາໂນ ຕິຓ຺ຓໍ ຘມ຺ມານໍ ອຎ຺ຎຕເຣນ ກາເຣຕພ຺ໂພ – ປາຣາຊິເກນ ວາ ສງ຺ຆາທິເສເສນ ວາ ປາຈິຕ຺ຕິເຍນ ວາ. ເຍນ ວາ ສາ ສທ຺ເຘຍ຺ຍວຈສາ ອຸປາສິກາ ວເທຍ຺ຍ ເຕນ ໂສ ຠິກ຺ຂຸ ກາເຣຕພ຺ໂພ.

໔໔໖. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິສິນ຺ໂນ ມາຕຸຄາມສ຺ສ ເມຖຸນໍ ຘມ຺ມໍ ປຏິເສວນ຺ໂຕ’’ຕິ, ໂສ ຈ ຕໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິສິນ຺ໂນ ມາຕຸຄາມສ຺ສ ເມຖຸນໍ ຘມ຺ມໍ ປຏິເສວນ຺ໂຕ’’ຕິ, ໂສ ເຈ ເອວໍ ວເທຍ຺ຍ – ‘‘ສຈ຺ຈາຫໍ ນິສິນ຺ໂນ, ໂນ ຈ ໂຂ ເມຖຸນໍ ຘມ຺ມໍ ປຏິເສວິ’’ນ຺ຕິ, ນິສຊ຺ຊາຍ ກາເຣຕພ຺ໂພ. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິສິນ຺ໂນ ມາຕຸຄາມສ຺ສ ເມຖຸນໍ ຘມ຺ມໍ ປຏິເສວນ຺ໂຕ’’ຕິ, ໂສ ເຈ ເອວໍ ວເທຍ຺ຍ – ‘‘ນາຫໍ ນິສິນ຺ໂນ, ອປິຈ ໂຂ ນິປນ຺ໂນ’’ຕິ, ນິປຊ຺ຊາຍ ກາເຣຕພ຺ໂພ. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິສິນ຺ໂນ ມາຕຸຄາມສ຺ສ ເມຖຸນໍ ຘມ຺ມໍ ປຏິເສວນ຺ໂຕ’’ຕິ, ໂສ ເຈ ເອວໍ ວເທຍ຺ຍ – ‘‘ນາຫໍ ນິສິນ຺ໂນ ອປິຈ ໂຂ ຐິໂຕ’’ຕິ, ນ ກາເຣຕພ຺ໂພ.

໔໔໗. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິປນ຺ໂນ ມາຕຸຄາມສ຺ສ ເມຖຸນໍ ຘມ຺ມໍ ປຏິເສວນ຺ໂຕ’’ຕິ, ໂສ ຈ ຕໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິປນ຺ໂນ ມາຕຸຄາມສ຺ສ ເມຖຸນໍ ຘມ຺ມໍ ປຏິເສວນ຺ໂຕ’’ຕິ, ໂສ ເຈ ເອວໍ ວເທຍ຺ຍ – ‘‘ສຈ຺ຈາຫໍ ນິປນ຺ໂນ, ໂນ ຈ ໂຂ ເມຖຸນໍ ຘມ຺ມໍ ປຏິເສວິ’’ນ຺ຕິ, ນິປຊ຺ຊາຍ ກາເຣຕພ຺ໂພ. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິປນ຺ໂນ ມາຕຸຄາມສ຺ສ ເມຖຸນໍ ຘມ຺ມໍ ປຏິເສວນ຺ໂຕ’’ຕິ, ໂສ ເຈ ເອວໍ ວເທຍ຺ຍ – ‘‘ນາຫໍ ນິປນ຺ໂນ, ອປິຈ ໂຂ ນິສິນ຺ໂນ’’ຕິ, ນິສຊ຺ຊາຍ ກາເຣຕພ຺ໂພ. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິປນ຺ໂນ ມາຕຸຄາມສ຺ສ ເມຖຸນໍ ຘມ຺ມໍ ປຏິເສວນ຺ໂຕ’’ຕິ, ໂສ ເຈ ເອວໍ ວເທຍ຺ຍ – ‘‘ນາຫໍ ນິປນ຺ໂນ ອປິຈ ໂຂ ຐິໂຕ’’ຕິ, ນ ກາເຣຕພ຺ໂພ.

໔໔໘. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິສິນ຺ໂນ ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊນ຺ໂຕ’’ຕິ, ໂສ ຈ ຕໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ…ເປ… ສຈ຺ຈາຫໍ ນິສິນ຺ໂນ ໂນ ຈ ໂຂ ກາຍສໍສຄ຺ຄໍ ສມາປຊ຺ຊິນ຺ຕິ, ນິສຊ຺ຊາຍ ກາເຣຕພ຺ໂພ…ເປ… ນາຫໍ ນິສິນ຺ໂນ ອປິຈ ໂຂ ນິປນ຺ໂນຕິ, ນິປຊ຺ຊາຍ ກາເຣຕພ຺ໂພ…ເປ… ນາຫໍ ນິສິນ຺ໂນ ອປິຈ ໂຂ ຐິໂຕຕິ, ນ ກາເຣຕພ຺ໂພ.

ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິປນ຺ໂນ ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊນ຺ໂຕ’’ຕິ, ໂສ ຈ ຕໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ…ເປ… ສຈ຺ຈາຫໍ ນິປນ຺ໂນ, ໂນ ຈ ໂຂ ກາຍສໍສຄ຺ຄໍ ສມາປຊ຺ຊິນ຺ຕິ, ນິປຊ຺ຊາຍ ກາເຣຕພ຺ໂພ…ເປ… ນາຫໍ ນິປນ຺ໂນ, ອປິຈ ໂຂ ນິສິນ຺ໂນຕິ, ນິສຊ຺ຊາຍ ກາເຣຕພ຺ໂພ…ເປ… ນາຫໍ ນິປນ຺ໂນ, ອປິຈ ໂຂ ຐິໂຕຕິ, ນ ກາເຣຕພ຺ໂພ.

໔໔໙. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ປຏິຈ຺ຉນ຺ເນ ອາສເນ ອລໍກມ຺ມນິເຍ ນິສິນ຺ໂນ’’ຕິ, ໂສ ຈ ຕໍ ປຏິຊານາຕິ, ນິສຊ຺ຊາຍ ກາເຣຕພ຺ໂພ…ເປ… ນາຫໍ ນິສິນ຺ໂນ ອປິຈ ໂຂ ນິປນ຺ໂນຕິ, ນິປຊ຺ຊາຍ ກາເຣຕພ຺ໂພ…ເປ… ນາຫໍ ນິສິນ຺ໂນ, ອປິຈ ໂຂ ຐິໂຕຕິ, ນ ກາເຣຕພ຺ໂພ.

໔໕໐. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ປຏິຈ຺ຉນ຺ເນ ອາສເນ ອລໍກມ຺ມນິເຍ ນິປນ຺ໂນ’’ຕິ, ໂສ ຈ ຕໍ ປຏິຊານາຕິ, ນິປຊ຺ຊາຍ ກາເຣຕພ຺ໂພ…ເປ… ນາຫໍ ນິປນ຺ໂນ, ອປິຈ ໂຂ ນິສິນ຺ໂນຕິ, ນິສຊ຺ຊາຍ ກາເຣຕພ຺ໂພ…ເປ… ນາຫໍ ນິປນ຺ໂນ, ອປິຈ ໂຂ ຐິໂຕຕິ, ນ ກາເຣຕພ຺ໂພ.

ອນິຍໂຕຕິ ນ ນິຍໂຕ, ປາຣາຊິກໍ ວາ ສງ຺ຆາທິເສໂສ ວາ ປາຈິຕ຺ຕິຍໍ ວາ.

໔໕໑. ຄມນໍ ປຏິຊານາຕິ, ນິສຊ຺ຊໍ ປຏິຊານາຕິ, ອາປຕ຺ຕິໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ. ຄມນໍ ປຏິຊານາຕິ, ນິສຊ຺ຊໍ ນ ປຏິຊານາຕິ, ອາປຕ຺ຕິໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ. ຄມນໍ ປຏິຊານາຕິ, ນິສຊ຺ຊໍ ປຏິຊານາຕິ, ອາປຕ຺ຕິໍ ນ ປຏິຊານາຕິ, ນິສຊ຺ຊາຍ ກາເຣຕພ຺ໂພ. ຄມນໍ ປຏິຊານາຕິ, ນິສຊ຺ຊໍ ນ ປຏິຊານາຕິ, ອາປຕ຺ຕິໍ ນ ປຏິຊານາຕິ, ນ ກາເຣຕພ຺ໂພ.

ຄມນໍ ນ ປຏິຊານາຕິ, ນິສຊ຺ຊໍ ປຏິຊານາຕິ, ອາປຕ຺ຕິໍ ປຏິຊານາຕິ, ອາປຕ຺ຕິຍາ

ກາເຣຕພ຺ໂພ. ຄມນໍ ນ ປຏິຊານາຕິ, ນິສຊ຺ຊໍ ນ ປຏິຊານາຕິ, ອາປຕ຺ຕິໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ. ຄມນໍ ນ ປຏິຊານາຕິ, ນິສຊ຺ຊໍ ປຏິຊານາຕິ, ອາປຕ຺ຕິໍ ນ ປຏິຊານາຕິ, ນິສຊ຺ຊາຍ ກາເຣຕພ຺ໂພ. ຄມນໍ ນ ປຏິຊານາຕິ, ນິສຊ຺ຊໍ ນ ປຏິຊານາຕິ, ອາປຕ຺ຕິໍ ນ ປຏິຊານາຕິ, ນ ກາເຣຕພ຺ໂພຕິ.

ປຐໂມ ອນິຍໂຕ ນິຏ຺ຐິໂຕ.

໒. ທຸຕິຍອນິຍຕສິກ຺ຂາປທໍ

໔໕໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອາຍສ຺ມາ ອຸທາຍີ – ‘‘ຠຄວຕາ ປຏິກ຺ຂິຕ຺ຕໍ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ປຏິຈ຺ຉນ຺ເນ ອາສເນ ອລໍກມ຺ມນິເຍ ນິສຊ຺ຊໍ ກປ຺ເປຕຸ’’ນ຺ຕິ ຕສ຺ສາເຍວ ກຸມາຣິກາຍ ສທ຺ຘິໍ ເອໂກ ເອກາຍ ຣໂຫ ນິສຊ຺ຊໍ ກປ຺ເປສິ ກາລຍຸຕ຺ຕໍ ສມຸລ຺ລປນ຺ໂຕ ກາລຍຸຕ຺ຕໍ ຘມ຺ມໍ ຠຓນ຺ໂຕ. ທຸຕິຍມ຺ປິ ໂຂ ວິສາຂາ ມິຄາຣມາຕາ ນິມນ຺ຕິຕາ ຕໍ ກຸລໍ ອຄມາສິ. ອທ຺ທສາ ໂຂ ວິສາຂາ ມິຄາຣມາຕາ ອາຍສ຺ມນ຺ຕໍ ອຸທາຍິໍ ຕສ຺ສາເຍວ ກຸມາຣິກາຍ ສທ຺ຘິໍ ເອກໍ ເອກາຍ ຣໂຫ ນິສິນ຺ນໍ. ທິສ຺ວານ ອາຍສ຺ມນ຺ຕໍ ອຸທາຍິໍ ເອຕທໂວຈ – ‘‘ອິທໍ, ຠນ຺ເຕ, ນຈ຺ຉນ຺ນໍ ນປ຺ປຕິຣູປໍ ຍໍ ອຍ຺ໂຍ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ນິສຊ຺ຊໍ ກປ຺ເປຕິ. ກິຎ຺ຈາປິ, ຠນ຺ເຕ, ອຍ຺ໂຍ ອນຕ຺ຖິໂກ ເຕນ ຘມ຺ເມນ, ອປິຈ ທຸສ຺ສທ຺ຘາປຍາ ອປ຺ປສນ຺ນາ ມນຸສ຺ສາ’’ຕິ. ເອວມ຺ປິ ໂຂ ອາຍສ຺ມາ ອຸທາຍີ ວິສາຂາຍ ມິຄາຣມາຕຸຍາ ວຸຈ຺ຈມາໂນ ນາທິຍິ. ອຖ ໂຂ ວິສາຂາ ມິຄາຣມາຕາ ນິກ຺ຂມິຕ຺ວາ ຠິກ຺ຂູນໍ ເອຕມຕ຺ຖໍ ອາໂຣເຈສິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຍສ຺ມາ ອຸທາຍີ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ນິສຊ຺ຊໍ ກປ຺ເປສ຺ສຕີ’’ຕິ! ອຖ ໂຂ ເຕ ຠິກ຺ຂູ ອາຍສ຺ມນ຺ຕໍ ອຸທາຍິໍ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ …ເປ… ‘‘ສຈ຺ຈໍ ກິຣ ຕ຺ວໍ, ອຸທາຍິ, ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ນິສຊ຺ຊໍ ກປ຺ເປສີ’’ຕິ? ‘‘ສຈ຺ຈໍ ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ນິສຊ຺ຊໍ ກປ຺ເປສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໔໕໓. ‘‘ນ ເຫວ ໂຂ ປນ ປຏິຈ຺ຉນ຺ນໍ ອາສນໍ ໂຫຕິ ນາລໍ ກມ຺ມນິຍໍ, ອລຎ຺ຈ ໂຂ ໂຫຕິ ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາສິຕຸໍ. ໂຍ ປນ ຠິກ຺ຂຸ ຕຖາຣູເປ ອາສເນ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ນິສຊ຺ຊໍ ກປ຺ເປຍ຺ຍ, ຕເມນໍ ສທ຺ເຘຍ຺ຍວຈສາ ອຸປາສິກາ ທິສ຺ວາ ທ຺ວິນ຺ນໍ ຘມ຺ມານໍ ອຎ຺ຎຕເຣນ ວເທຍ຺ຍ – ສງ຺ຆາທິເສເສນ ວາ ປາຈິຕ຺ຕິເຍນ ວາ. ນິສຊ຺ຊໍ ຠິກ຺ຂຸ ປຏິຊານມາໂນ ທ຺ວິນ຺ນໍ ຘມ຺ມານໍ ອຎ຺ຎຕເຣນ ກາເຣຕພ຺ໂພ – ສງ຺ຆາທິເສເສນ ວາ ປາຈິຕ຺ຕິເຍນ ວາ. ເຍນ ວາ ສາ ສທ຺ເຘຍ຺ຍວຈສາ ອຸປາສິກາ ວເທຍ຺ຍ ເຕນ ໂສ ຠິກ຺ຂຸ ກາເຣຕພ຺ໂພ. ອຍມ຺ປິ ຘມ຺ໂມ ອນິຍໂຕ’’ຕິ.

໔໕໔. ນ ເຫວ ໂຂ ປນ ປຏິຈ຺ຉນ຺ນໍ ອາສນໍ ໂຫຕີຕິ ອປ຺ປຏິຈ຺ຉນ຺ນໍ ໂຫຕິ ກຸຏ຺ເຏນ ວາ ກວາເຏນ ວາ ກິລຎ຺ເຊນ ວາ ສາຓິປາກາເຣນ ວາ ຣຸກ຺ເຂນ ວາ ຖມ຺ເຠນ ວາ ໂກຕ຺ຖຬິຍາ ວາ ເຍນ ເກນຈິ ອປ຺ປຏິຈ຺ຉນ຺ນໍ ໂຫຕິ.

ນາລໍ ກມ຺ມນິຍນ຺ຕິ ນ ສກ຺ກາ ໂຫຕິ ເມຖຸນໍ ຘມ຺ມໍ ປຏິເສວິຕຸໍ.

ອລຎ຺ຈ ໂຂ ໂຫຕິ ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາສິຕຸນ຺ຕິ ສກ຺ກາ ໂຫຕິ ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາສິຕຸໍ.

ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຕຖາຣູເປ ອາສເນຕິ ເອວຣູເປ ອາສເນ.

ມາຕຸຄາໂມ ນາມ ມນຸສ຺ສິຕ຺ຖີ, ນ ຍກ຺ຂີ ນ ເປຕີ ນ ຕິຣຈ຺ຉານຄຕາ, ວິຎ຺ຎູ ປຏິພລາ ສຸຠາສິຕທຸພ຺ຠາສິຕໍ ທຸຏ຺ຐຸລ຺ລາທຸຏ຺ຐຸລ຺ລໍ ອາຊານິຕຸໍ.

ສທ຺ຘິນ຺ຕິ ເອກໂຕ.

ເອໂກ ເອກາຍາຕິ ຠິກ຺ຂຸ ເຈວ ໂຫຕິ ມາຕຸຄາໂມ ຈ.

ຣໂຫ ນາມ ຈກ຺ຂຸສ຺ສ ຣໂຫ, ໂສຕສ຺ສ ຣໂຫ. ຈກ຺ຂຸສ຺ສ ຣໂຫ ນາມ ນ ສກ຺ກາ ໂຫຕິ ອກ຺ຂິໍ ວາ ນິຂຓີຍມາເນ ຠມຸກໍ ວາ ອຸກ຺ຂິປີຍມາເນ ສີສໍ ວາ ອຸກ຺ຂິປີຍມາເນ ປສ຺ສິຕຸໍ. ໂສຕສ຺ສ ຣໂຫ ນາມ ນ ສກ຺ກາ ໂຫຕິ ປກຕິກຖາ ໂສຕຸໍ.

ນິສຊ຺ຊໍ ກປ຺ເປຍ຺ຍາຕິ ມາຕຸຄາເມ ນິສິນ຺ເນ ຠິກ຺ຂຸ ອຸປນິສິນ຺ໂນ ວາ ໂຫຕິ ອຸປນິປນ຺ໂນ ວາ. ຠິກ຺ຂຸ ນິສິນ຺ເນ ມາຕຸຄາໂມ ອຸປນິສິນ຺ໂນ ວາ ໂຫຕິ ອຸປນິປນ຺ໂນ ວາ. ອຸໂຠ ວາ ນິສິນ຺ນາ ໂຫນ຺ຕິ ອຸໂຠ ວາ ນິປນ຺ນາ.

ສທ຺ເຘຍ຺ຍວຈສາ ນາມ ອາຄຕຜລາ ອຠິສເມຕາວິນີ ວິຎ຺ຎາຕສາສນາ.

ອຸປາສິກາ ນາມ ພຸທ຺ຘໍ ສຣຓໍ ຄຕາ, ຘມ຺ມໍ ສຣຓໍ ຄຕາ, ສງ຺ຆໍ ສຣຓໍ ຄຕາ.

ທິສ຺ວາຕິ ປສ຺ສິຕ຺ວາ.

ທ຺ວິນ຺ນໍ ຘມ຺ມານໍ ອຎ຺ຎຕເຣນ ວເທຍ຺ຍ ສງ຺ຆາທິເສເສນ ວາ ປາຈິຕ຺ຕິເຍນ ວາ. ນິສຊ຺ຊໍ ຠິກ຺ຂຸ ປຏິຊານມາໂນ ທ຺ວິນ຺ນໍ ຘມ຺ມານໍ ອຎ຺ຎຕເຣນ ກາເຣຕພ຺ໂພ – ສງ຺ຆາທິເສເສນ ວາ ປາຈິຕ຺ຕິເຍນ ວາ. ເຍນ ວາ ສາ ສທ຺ເຘຍ຺ຍວຈສາ ອຸປາສິກາ ວເທຍ຺ຍ, ເຕນ ໂສ ຠິກ຺ຂຸ ກາເຣຕພ຺ໂພ.

໔໕໕. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິສິນ຺ໂນ ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊນ຺ໂຕ’’ຕິ, ໂສ ຈ ຕໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິສິນ຺ໂນ ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊນ຺ໂຕ’’ຕິ, ໂສ ເຈ ເອວໍ ວເທຍ຺ຍ – ‘‘ສຈ຺ຈາຫໍ ນິສິນ຺ໂນ, ໂນ ຈ ໂຂ ກາຍສໍສຄ຺ຄໍ ສມາປຊ຺ຊິ’’ນ຺ຕິ, ນິສຊ຺ຊາຍ ກາເຣຕພ຺ໂພ…ເປ… ນາຫໍ ນິສິນ຺ໂນ, ອປິຈ ໂຂ ນິປນ຺ໂນຕິ, ນິປຊ຺ຊາຍ ກາເຣຕພ຺ໂພ…ເປ… ນາຫໍ ນິສິນ຺ໂນ, ອປິຈ ໂຂ ຐິໂຕຕິ, ນ ກາເຣຕພ຺ໂພ.

ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ນິປນ຺ໂນ ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊນ຺ໂຕ’’ຕິ, ໂສ ຈ ຕໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ…ເປ… ສຈ຺ຈາຫໍ ນິປນ຺ໂນ, ໂນ ຈ ໂຂ ກາຍສໍສຄ຺ຄໍ ສມາປຊ຺ຊິນ຺ຕິ, ນິປຊ຺ຊາຍ ກາເຣຕພ຺ໂພ…ເປ… ນາຫໍ ນິປນ຺ໂນ, ອປິຈ ໂຂ ນິສິນ຺ໂນຕິ, ນິສຊ຺ຊາຍ ກາເຣຕພ຺ໂພ …ເປ… ນາຫໍ ນິປນ຺ໂນ, ອປິຈ ໂຂ ຐິໂຕຕິ, ນ ກາເຣຕພ຺ໂພ.

ສາ ເຈ ເອວໍ ວເທຍ຺ຍ – ‘‘ອຍ຺ຍສ຺ສ ມຍາ ສຸຕໍ ນິສິນ຺ນສ຺ສ ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາສນ຺ຕສ຺ສາ’’ຕິ, ໂສ ຈ ຕໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ. ສາ ເຈ ເອວໍ ວເທຍ຺ຍ – ‘‘ອຍ຺ຍສ຺ສ ມຍາ ສຸຕໍ ນິສິນ຺ນສ຺ສ ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາສນ຺ຕສ຺ສາ’’ຕິ, ໂສ ເຈ ເອວໍ ວເທຍ຺ຍ – ‘‘ສຈ຺ຈາຫໍ ນິສິນ຺ໂນ, ໂນ ຈ ໂຂ ທຸຏ຺ຐຸລ຺ລາຫິ ວາຈາຫິ ໂອຠາສິ’’ນ຺ຕິ, ນິສຊ຺ຊາຍ ກາເຣຕພ຺ໂພ…ເປ… ນາຫໍ ນິສິນ຺ໂນ, ອປິຈ ໂຂ ນິປນ຺ໂນຕິ, ນິປຊ຺ຊາຍ ກາເຣຕພ຺ໂພ…ເປ… ນາຫໍ ນິສິນ຺ໂນ, ອປິຈ ໂຂ ຐິໂຕຕິ, ນ ກາເຣຕພ຺ໂພ.

ສາ ເຈ ເອວໍ ວເທຍ຺ຍ – ‘‘ອຍ຺ຍສ຺ສ ມຍາ ສຸຕໍ ນິປນ຺ນສ຺ສ ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາສນ຺ຕສ຺ສາ’’ຕິ, ໂສ ຈ ຕໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ…ເປ… ສຈ຺ຈາຫໍ ນິປນ຺ໂນ ໂນ ຈ ໂຂ ທຸຏ຺ຐຸລ຺ລາຫິ ວາຈາຫິ ໂອຠາສິນ຺ຕິ, ນິປຊ຺ຊາຍ ກາເຣຕພ຺ໂພ…ເປ… ນາຫໍ ນິປນ຺ໂນ, ອປິຈ ໂຂ ນິສິນ຺ໂນຕິ, ນິສຊ຺ຊາຍ ກາເຣຕພ຺ໂພ…ເປ… ນາຫໍ ນິປນ຺ໂນ, ອປິຈ ໂຂ ຐິໂຕຕິ, ນ ກາເຣຕພ຺ໂພ.

໔໕໖. ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ນິສິນ຺ໂນ’’ຕິ, ໂສ ຈ ຕໍ ປຏິຊານາຕິ, ນິສຊ຺ຊາຍ ກາເຣຕພ຺ໂພ…ເປ… ນາຫໍ ນິສິນ຺ໂນ, ອປິຈ ໂຂ ນິປນ຺ໂນຕິ, ນິປຊ຺ຊາຍ ກາເຣຕພ຺ໂພ…ເປ… ນາຫໍ ນິສິນ຺ໂນ, ອປິຈ ໂຂ ຐິໂຕຕິ, ນ ກາເຣຕພ຺ໂພ.

ສາ ເຈ ເອວໍ ວເທຍ຺ຍ – ‘‘ອຍ຺ໂຍ ມຍາ ທິຏ຺ໂຐ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ນິປນ຺ໂນ’’ຕິ, ໂສ ຈ ຕໍ ປຏິຊານາຕິ, ນິປຊ຺ຊາຍ ກາເຣຕພ຺ໂພ…ເປ… ນາຫໍ ນິປນ຺ໂນ, ອປິຈ ໂຂ ນິສິນ຺ໂນຕິ, ນິສຊ຺ຊາຍ ກາເຣຕພ຺ໂພ…ເປ… ນາຫໍ ນິປນ຺ໂນ, ອປິຈ ໂຂ ຐິໂຕຕິ, ນ ກາເຣຕພ຺ໂພ.

ອຍມ຺ປີຕິ ປຸຣິມໍ ອຸປາທາຍ ວຸຈ຺ຈຕິ.

ອນິຍໂຕຕິ ນ ນິຍໂຕ, ສງ຺ຆາທິເສໂສ ວາ ປາຈິຕ຺ຕິຍໍ ວາ.

໔໕໗. ຄມນໍ ປຏິຊານາຕິ ນິສຊ຺ຊໍ ປຏິຊານາຕິ ອາປຕ຺ຕິໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ. ຄມນໍ ປຏິຊານາຕິ ນິສຊ຺ຊໍ ນ ປຏິຊານາຕິ ອາປຕ຺ຕິໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ. ຄມນໍ ປຏິຊານາຕິ ນິສຊ຺ຊໍ ປຏິຊານາຕິ ອາປຕ຺ຕິໍ ນ ປຏິຊານາຕິ, ນິສຊ຺ຊາຍ ກາເຣຕພ຺ໂພ. ຄມນໍ ປຏິຊານາຕິ ນິສຊ຺ຊໍ ນ ປຏິຊານາຕິ ອາປຕ຺ຕິໍ ນ ປຏິຊານາຕິ, ນ ກາເຣຕພ຺ໂພ.

ຄມນໍ ນ ປຏິຊານາຕິ ນິສຊ຺ຊໍ ປຏິຊານາຕິ ອາປຕ຺ຕິໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ. ຄມນໍ ນ ປຏິຊານາຕິ ນິສຊ຺ຊໍ ນ ປຏິຊານາຕິ ອາປຕ຺ຕິໍ ປຏິຊານາຕິ, ອາປຕ຺ຕິຍາ ກາເຣຕພ຺ໂພ. ຄມນໍ ນ ປຏິຊານາຕິ ນິສຊ຺ຊໍ ປຏິຊານາຕິ ອາປຕ຺ຕິໍ ນ ປຏິຊານາຕິ, ນິສຊ຺ຊາຍ ກາເຣຕພ຺ໂພ. ຄມນໍ ນ ປຏິຊານາຕິ ນິສຊ຺ຊໍ ນ ປຏິຊານາຕິ ອາປຕ຺ຕິໍ ນ ປຏິຊານາຕິ, ນ ກາເຣຕພ຺ໂພຕິ.

ທຸຕິໂຍ ອນິຍໂຕ ນິຏ຺ຐິໂຕ.

໔໕໘. ອຸທ຺ທິຏ຺ຐາ ໂຂ ອາຍສ຺ມນ຺ໂຕ ທ຺ເວ ອນິຍຕາ ຘມ຺ມາ. ຕຕ຺ຖາຍສ຺ມນ຺ເຕ ປຸຈ຺ຉາມິ – ‘‘ກຈ຺ຈິຕ຺ຖ ປຣິສຸທ຺ຘາ’’? ທຸຕິຍມ຺ປິ ປຸຈ຺ຉາມິ – ‘‘ກຈ຺ຈິຕ຺ຖ ປຣິສຸທ຺ຘາ’’? ຕຕິຍມ຺ປິ ປຸຈ຺ຉາມິ – ‘‘ກຈ຺ຈິຕ຺ຖ ປຣິສຸທ຺ຘາ’’? ປຣິສຸທ຺ເຘຕ຺ຖາຍສ຺ມນ຺ໂຕ; ຕສ຺ມາ ຕຸຓ຺ຫີ, ເອວເມຕໍ ຘາຣຍາມີຕິ.

ຕສ຺ສຸທ຺ທານໍ –

ອລໍ ກມ຺ມນິຍຎ຺ເຈວ, ຕເຖວ ຈ ນເຫວ ໂຂ;

ອນິຍຕາ ສຸປຎ຺ຎຕ຺ຕາ, ພຸທ຺ຘເສຏ຺ເຐນ ຕາທິນາຕິ.

ອນິຍຕກຓ຺ຑໍ ນິຏ຺ຐິຕໍ.