໒. ທຸຕິຍສິກ຺ຂາປທໍ

໑໐໒໘. ເຕນ ສມເຍນ ພຸທ຺ໂຘ ຠຄວາ ເວສາລິຍໍ ວິຫຣຕິ ມຫາວເນ ກູຏາຄາຣສາລາຍໍ. ເຕນ ໂຂ ປນ ສມເຍນ ອາຍສ຺ມໂຕ ອຸປາລິສ຺ສ ອຸປຊ຺ຌາໂຍ ອາຍສ຺ມາ ກປ຺ປິຕໂກ ສຸສາເນ ວິຫຣຕິ. ເຕນ ໂຂ ປນ ສມເຍນ ຉພ຺ພຄ຺ຄິຍານໍ ຠິກ຺ຂຸນີນໍ ມຫຕ຺ຕຣາ [ມຫນ຺ຕຕຣາ (ສີ.)] ຠິກ຺ຂຸນີ ກາລງ຺ກຕາ ໂຫຕິ. ຉພ຺ພຄ຺ຄິຍາ ຠິກ຺ຂຸນິໂຍ ຕໍ ຠິກ຺ຂຸນິໍ ນີຫຣິຕ຺ວາ ອາຍສ຺ມໂຕ ກປ຺ປິຕກສ຺ສ ວິຫາຣສ຺ສ ອວິທູເຣ ຌາເປຕ຺ວາ ຖູປໍ ກຕ຺ວາ ຄນ຺ຕ຺ວາ ຕສ຺ມິໍ ຖູເປ ໂຣທນ຺ຕິ. ອຖ ໂຂ ອາຍສ຺ມາ ກປ຺ປິຕໂກ ເຕນ ສທ຺ເທນ ອຸພ຺ພາຬ຺ໂຫ ຕໍ ຖູປໍ ຠິນ຺ທິຕ຺ວາ ປກິເຣສິ. ຉພ຺ພຄ຺ຄິຍາ ຠິກ຺ຂຸນິໂຍ – ‘‘ອິມິນາ ກປ຺ປິຕເກນ ອມ຺ຫາກໍ ອຍ຺ຍາຍ ຖູໂປ ຠິນ຺ໂນ, ຫນ຺ທ ນໍ ຆາເຕມາ’’ຕິ, ມນ຺ເຕສຸໍ. ອຎ຺ຎຕຣາ ຠິກ຺ຂຸນີ ອາຍສ຺ມໂຕ ອຸປາລິສ຺ສ ເອຕມຕ຺ຖໍ ອາໂຣເຈສິ. ອາຍສ຺ມາ ອຸປາລິ ອາຍສ຺ມໂຕ ກປ຺ປິຕກສ຺ສ ເອຕມຕ຺ຖໍ ອາໂຣເຈສິ. ອຖ ໂຂ ອາຍສ຺ມາ ກປ຺ປິຕໂກ ວິຫາຣາ ນິກ຺ຂມິຕ຺ວາ ນິລີໂນ ອຈ຺ຉິ. ອຖ ໂຂ ຉພ຺ພຄ຺ຄິຍາ ຠິກ຺ຂຸນິໂຍ ເຍນາຍສ຺ມໂຕ ກປ຺ປິຕກສ຺ສ ວິຫາໂຣ ເຕນຸປສງ຺ກມິໍສຸ; ອຸປສງ຺ກມິຕ຺ວາ ອາຍສ຺ມໂຕ ກປ຺ປິຕກສ຺ສ ວິຫາຣໍ ປາສາເຓຫິ ຈ ເລຑ຺ຑູຫິ ຈ ໂອຕ຺ຖຣາເປຕ຺ວາ, ‘‘ມໂຕ ກປ຺ປິຕໂກ’’ຕິ ປກ຺ກມິໍສຸ.

ອຖ ໂຂ ອາຍສ຺ມາ ກປ຺ປິຕໂກ ຕສ຺ສາ ຣຕ຺ຕິຍາ ອຈ຺ຈເຍນ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເວສາລິໍ ປິຓ຺ຑາຍ ປາວິສິ. ອທ຺ທສໍສຸ ໂຂ ຉພ຺ພຄ຺ຄິຍາ ຠິກ຺ຂຸນິໂຍ ອາຍສ຺ມນ຺ຕໍ ກປ຺ປິຕກໍ ປິຓ຺ຑາຍ ຈຣນ຺ຕໍ. ທິສ຺ວານ ເອວມາຫໍສຸ – ‘‘ອຍໍ ກປ຺ປິຕໂກ ຊີວຕິ, ໂກ ນຸ ໂຂ ອມ຺ຫາກໍ ມນ຺ຕໍ ສໍຫຣີ’’ຕິ? ອສ຺ໂສສຸໍ ໂຂ ຉພ຺ພຄ຺ຄິຍາ ຠິກ຺ຂຸນິໂຍ – ‘‘ອຍ຺ເຍນ ກິຣ ອຸປາລິນາ ອມ຺ຫາກໍ ມນ຺ໂຕ ສໍຫໂຏ’’ຕິ. ຕາ ອາຍສ຺ມນ຺ຕໍ ອຸປາລິໍ ອກ຺ໂກສິໍສຸ – ‘‘ກຖຎ຺ຫິ ນາມ ອຍໍ ກາສາວໂຏ ມລມຊ຺ຊໂນ ນິຫີນຊຈ຺ໂຈ ອມ຺ຫາກໍ ມນ຺ຕໍ ສໍຫຣິສ຺ສຕີ’’ຕິ! ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂຸນິໂຍ ອຍ຺ຍໍ ອຸປາລິໍ ອກ຺ໂກສິສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ອຸປາລິໍ ອກ຺ໂກສນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ອຸປາລິໍ ອກ຺ໂກສິສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໑໐໒໙. ‘‘ຍາ ປນ ຠິກ຺ຂຸນີ ຠິກ຺ຂຸໍ ອກ຺ໂກເສຍ຺ຍ ວາ ປຣິຠາເສຍ຺ຍ ວາ, ປາຈິຕ຺ຕິຍ’’ນ຺ຕິ.

໑໐໓໐. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຠິກ຺ຂຸນ຺ຕິ ອຸປສມ຺ປນ຺ນໍ. ອກ຺ໂກເສຍ຺ຍ ວາຕິ ທສຫິ ວາ ອກ຺ໂກສວຕ຺ຖູຫິ ອກ຺ໂກສຕິ ເອເຕສໍ ວາ ອຎ຺ຎຕເຣນ, ອາປຕ຺ຕິ ປາຈິຕ຺ຕິຍສ຺ສ.

ປຣິຠາເສຍ຺ຍ ວາຕິ ຠຍໍ ອຸປທໍເສຕິ, ອາປຕ຺ຕິ ປາຈິຕ຺ຕິຍສ຺ສ.

໑໐໓໑. ອຸປສມ຺ປນ຺ເນ ອຸປສມ຺ປນ຺ນສຎ຺ຎາ ອກ຺ໂກສຕິ ວາ ປຣິຠາສຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ເນ ເວມຕິກາ ອກ຺ໂກສຕິ ວາ ປຣິຠາສຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ເນ ອນຸປສມ຺ປນ຺ນສຎ຺ຎາ ອກ຺ໂກສຕິ ວາ ປຣິຠາສຕິ ວາ, ອາປຕ຺ຕິ ປາຈິຕ຺ຕິຍສ຺ສ.

ອນຸປສມ຺ປນ຺ນໍ ອກ຺ໂກສຕິ ວາ ປຣິຠາສຕິ ວາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ເວມຕິກາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອນຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ.

໑໐໓໒. ອນາປຕ຺ຕິ ອຕ຺ຖປຸເຣກ຺ຂາຣາຍ, ຘມ຺ມປຸເຣກ຺ຂາຣາຍ, ອນຸສາສນິປຸເຣກ຺ຂາຣາຍ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ທຸຕິຍສິກ຺ຂາປທໍ ນິຏ຺ຐິຕໍ.