໓. ຕຕິຍສິກ຺ຂາປທໍ

໑໐໓໓. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຈຓ຺ຑກາຬີ ຠິກ຺ຂຸນີ ຠຓ຺ຑນກາຣິກາ ໂຫຕິ ກລຫກາຣິກາ ວິວາທກາຣິກາ ຠສ຺ສກາຣິກາ ສງ຺ເຆ ອຘິກຣຓກາຣິກາ. ຖຸລ຺ລນນ຺ທາ ຠິກ຺ຂຸນີ ຕສ຺ສາ ກມ຺ເມ ກຣີຍມາເນ ປຏິກ຺ໂກສຕິ. ເຕນ ໂຂ ປນ ສມເຍນ ຖຸລ຺ລນນ຺ທາ ຠິກ຺ຂຸນີ ຄາມກໍ ອຄມາສິ ເກນຈິເທວ ກຣຓີເຍນ. ອຖ ໂຂ ຠິກ຺ຂຸນິສງ຺ໂຆ – ‘‘ຖຸລ຺ລນນ຺ທາ ຠິກ຺ຂຸນີ ປກ຺ກນ຺ຕາ’’ຕິ ຈຓ຺ຑກາຬິໍ ຠິກ຺ຂຸນິໍ ອາປຕ຺ຕິຍາ ອທສ຺ສເນ ອຸກ຺ຂິປິ. ຖຸລ຺ລນນ຺ທາ ຠິກ຺ຂຸນີ ຄາມເກ ຕໍ ກຣຓີຍໍ ຕີເຣຕ຺ວາ ປຸນເທວ ສາວຕ຺ຖິໍ ປຈ຺ຈາຄຈ຺ຉິ. ຈຓ຺ຑກາຬີ ຠິກ຺ຂຸນີ ຖຸລ຺ລນນ຺ທາຍ ຠິກ຺ຂຸນິຍາ ອາຄຈ຺ຉນ຺ຕິຍາ ເນວ ອາສນໍ ປຎ຺ຎເປສິ ນ ປາໂທທກໍ ປາທປີຐໍ ປາທກຐລິກໍ ອຸປນິກ຺ຂິປິ; ນ ປຈ຺ຈຸຄ຺ຄນ຺ຕ຺ວາ ປຕ຺ຕຈີວຣໍ ປຏິຄ຺ຄເຫສິ ນ ປານີເຍນ ອາປຸຈ຺ຉິ. ຖຸລ຺ລນນ຺ທາ ຠິກ຺ຂຸນີ ຈຓ຺ຑກາຬິໍ ຠິກ຺ຂຸນິໍ ເອຕທໂວຈ – ‘‘ກິສ຺ສ ຕ຺ວໍ, ອຍ຺ເຍ, ມຍິ ອາຄຈ຺ຉນ຺ຕິຍາ ເນວ ອາສນໍ ປຎ຺ຎເປສິ ນ ປາໂທທກໍ ປາທປີຐໍ ປາທກຐລິກໍ ອຸປນິກ຺ຂິປິ; ນ ປຈ຺ຈຸຄ຺ຄນ຺ຕ຺ວາ ປຕ຺ຕຈີວຣໍ ປຏິຄ຺ຄເຫສິ ນ ປານີເຍນ ອາປຸຈ຺ຉີ’’ຕິ? ‘‘ເອວຎ຺ເຫຕໍ, ອຍ຺ເຍ, ໂຫຕິ ຍຖາ ຕໍ ອນາຖາຍາ’’ຕິ. ‘‘ກິສ຺ສ ປນ ຕ຺ວໍ, ອຍ຺ເຍ, ອນາຖາ’’ຕິ? ‘‘ອິມາ ມໍ, ອຍ຺ເຍ, ຠິກ຺ຂຸນິໂຍ – ‘‘ອຍໍ ອນາຖາ ອປ຺ປຎ຺ຎາຕາ, ນຕ຺ຖິ ອິມິສ຺ສາ ກາຈິ ປຕິວຕ຺ຕາ’’ຕິ, ອາປຕ຺ຕິຍາ ອທສ຺ສເນ ອຸກ຺ຂິປິໍສູ’’ຕິ. ຖຸລ຺ລນນ຺ທາ ຠິກ຺ຂຸນີ – ‘‘ພາລາ ເອຕາ ອພ຺ຍຕ຺ຕາ ເອຕາ ເນຕາ ຊານນ຺ຕິ ກມ຺ມໍ ວາ ກມ຺ມໂທສໍ ວາ ກມ຺ມວິປຕ຺ຕິໍ ວາ ກມ຺ມສມ຺ປຕ຺ຕິໍ ວາ’’ຕິ, ຈຓ຺ຑີກຕາ ຄຓໍ ປຣິຠາສິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ຈຓ຺ຑີກຕາ ຄຓໍ ປຣິຠາສິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຈຓ຺ຑີກຕາ ຄຓໍ ປຣິຠາສຕີຕິ [ປຣິຠາສີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ …ເປ…ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຈຓ຺ຑີກຕາ ຄຓໍ ປຣິຠາສິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໑໐໓໔. ‘‘ຍາ ປນ ຠິກ຺ຂຸນີ ຈຓ຺ຑີກຕາ ຄຓໍ ປຣິຠາເສຍ຺ຍ, ປາຈິຕ຺ຕິຍ’’ນ຺ຕິ.

໑໐໓໕. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຈຓ຺ຑີກຕາ ນາມ ໂກຘນາ ວຸຈ຺ຈຕິ.

ຄໂຓ ນາມ ຠິກ຺ຂຸນິສງ຺ໂຆ ວຸຈ຺ຈຕິ.

ປຣິຠາເສຍ຺ຍາຕິ ‘‘ພາລາ ເອຕາ ອພ຺ຍຕ຺ຕາ ເອຕາ ເນຕາ ຊານນ຺ຕິ ກມ຺ມໍ ວາ ກມ຺ມໂທສໍ ວາ ກມ຺ມວິປຕ຺ຕິໍ ວາ ກມ຺ມສມ຺ປຕ຺ຕິໍ ວາ’’ຕິ ປຣິຠາສຕິ, ອາປຕ຺ຕິ ປາຈິຕ຺ຕິຍສ຺ສ. ສມ຺ພຫຸລາ ຠິກ຺ຂຸນິໂຍ ວາ ເອກໍ ຠິກ຺ຂຸນິໍ ວາ ອນຸປສມ຺ປນ຺ນໍ ວາ ປຣິຠາສຕິ, ອາປຕ຺ຕິ ທຸກ຺ກຏສ຺ສ.

໑໐໓໖. ອນາປຕ຺ຕິ ອຕ຺ຖປຸເຣກ຺ຂາຣາຍ, ຘມ຺ມປຸເຣກ຺ຂາຣາຍ, ອນຸສາສນິປຸເຣກ຺ຂາຣາຍ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ຕຕິຍສິກ຺ຂາປທໍ ນິຏ຺ຐິຕໍ.